!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Поради Супер купот на УЕФА од денеска ќе има изменет сообраќаен режим


Скопје, 7 август, 2017 - 10:03 (META) 

Поради Супер купот на УЕФА од денеска ќе биде воведен посебен сообраќаен и пешачки режим за сообраќајниците во непосредна близина на стадионот.

Министерството за внатрешни работи соопшти дека од осум часот денеска до завршување на натпреварот, односно до 9 август, на потегот од крстосниците на улиците Аминта Трети (поранешна Ленинова) и Јордан Хаџи Константинов-Џинот ќе се пропуштаат исклучиво лица и возила кои имаат соодветна акредитација од организаторот на мечот, УЕФА.

На денот на натпреварот, зависно од интензитетот на сообраќајот, не е исклучена можноста од затворање за сообраќај и на булеварот Илинден на потегот од објектот на Владата до крстосницата со улицата Рузвелтова.

Градоначалникот на Град Скопје, Коце Трајановски, информираше дека Град Скопје е подготвен да ги пречека илјадниците навивачи од сите страни на светот за претстојниот натпревар меѓу двата најтрофејни клубови во Европа, „Реал Мадрид“ и „Манчестер јунајтед“.

За навивчите е подготвена т.н неутрална зона во согласност со стандардите на УЕФА, која ќе биде отворена во 11 часот.

– Во неутралната зона за обожаватели, сите ќе можат да играат фудбал, фудбалски тенис, да шутираат пенали, а и да си ги испробаат своите способности. Во оваа зона е предвидена богата музичка програма на познати македонски диџеи и музичари, кои ќе ги забавуваат посетителите на 7 и 8 август од 11 до 19 часот – рече Трајановски.

Тој додаде дека заедно со УЕФА и со ФФМ, на оваа локација ќе се постават и трите трофеи на УЕФА, трофејот на Лигата на шампионите, трофејот на Лига Европа и Супер купот.

Навивачите на „Реал Мадрид“ и на „Манчестер јунајтед“, пред самиот натпревар ќе се соберат на плоштадот „Филип Втори“ и пред платото на спомен-куќата на „Мајка Тереза“, од каде ќе тргнат кон националната арена „Филип Втори“.


„Карпош соколи“ ќе играат во квалификациите за Лигата на шампионите


Скопје, 30 јуни, 2017 - 19:09 (META) 

Кошаркарскиот клуб „Карпош соколи“ ќе биде единствениот македонски претставник во квалификациите за Лигата на шампионите на ФИБА. Кошаркарите од Карпош ќе одиграат три квалификациски натпревари за пласман во Лигата на шампионите. „Соколите“ ќе стартуваат од првото квалификациско коло и ќе треба да минат голем филтер, за да изборат пласман меѓу осумте клуба (од вкупно 32) кои ќе се пласираат во групната фаза од натпреварувањето.

Според ФИБА, во првото квалификациско коло ќе се натпреваруваат вкупно 16 тимови, меѓу кои и македонскиот претставник „Карпош соколи“. Само најдобрите ќе се пласираат во групната фаза, каде ги чекаат тимовите кои веќе се одредени како учесници во регуларниот дел од сезоната.


Вардар е новиот европски ракометен шампион


Келн, 4 јуни, 2017 - 20:27 (META) 

Екипата на Вардар е новиот европски ракомет шампион, откако со резултат 24:23 го совлада тимот на Пари Сен Жермен во финалето од Лигата на шампионите, што се одржа во Келн, Германија.

Во драматична завршница, победничкиот погодок во последната секунда од мечот го постигна Иван Чупиќ и на Вардар му ја донесе првата титула европски шампион.

Најефикасен во тимот на Вардар беше Тимур Дибиров, кој постигна седум голови, Лука Циндриќ и Вуко Борозан постигнаа по три, колку што имаше и Чупиќ, меѓу кои и победничкиот гол со звукот на сирената.

Во мечот за третото место, ракометарите на унгарски Веспрем беа подобри од Барселона, со резултат 34:30.

Во моментов граѓаните на Скопје се на улиците и ја слават шампионската титула на Вардар.


Ракометарите на Вардар ја победија Барселона и ќе играат финале во Лигата на шампиони


Келн, 3 јуни, 2017 - 20:51 (META) 

Ракометарите на Вардар вечерва го совладаа тимот на Барселона со резултат 26:25 (полувреме 13:12) и ќе играат за шампионската титула на завршниот финален турнир од Лигата на шампионите, што се одржува во Келн.

Победата на Вардар му ја донесе Лука Циндриќ со гол во последните секунди во драматичната завршница од натпреварот.

Најефикасни во победничкиот тим беа Алекс Душебаев и Иван Чупиќ со 7 гола, Вуко Борозан постигна пет, Циндриќ – четири, додека голманот Арпад Штербик беше одличен на голот со 15 одбрани.

За Барселона настапија македонските репрезентативци Кире Лазаров, кој беше најефикасен со шест гола, и голманот Борко Ристевски, кој доби шанса да брани само удари од седум метри.

Вардар за шампионискиот трофеј ќе се бори со тимот на Пари Сен Жермен, кој во првото полуфинале го совлада унгарски Веспрем со 27 – 26.

Финалето е закажано за утре од 18 часот, а дуелот за третото место е во 15.15 часот.