Касами: Не постојат две движења Беса, на Конгресот секој може да се кандидира за лидер


Скопје, 9 јануари, 2018 - 15:53 (META) 

Не постојат две движења Беса, има само едно кое работи согласно одлуките донесени на состанокот на Централниот совет во Тетово на 6 јануари годинава, изјави Билал Касами на прес-конференција.

– Апелирам до сите, ако навистина се дел од движењето Беса, да дојдат и да ги претстават кандидатурите за лидер на партијата согласно определените рокови, да направиме една здрава и демократска трка. Секој што мисли дека има мнозинство во партиските структури може слободно да се кандидира на Конгресот за да стане претседател на Беса – рече Касами.

Тој соопшти дека на Конгресот ќе се кандидира за претседател на партијата и потенцираше дека нема скопски и тетовски огранок.

– Беса има 30 ограноци низ целата држава и сите се во линија на Движењето согласно статусот. Нема раскол, има луѓе кои не се задоволни. Затоа ги охрабрувам во процесот да се придржат до статутарните норми. Вчера влегов во седиштето, но тоа не го направив насилно. Како можам насилно да влегувам во своја куќа? – праша Касами.

Тој информираше дека денеска во 18 часот во Владата ќе има средба со премиерот Зоран Заев, но дека средбата нема врска со последните случувања затоа што таа била договорена претходната недела. Тема на средбата ќе биде поддршката на реформскиот тек на Владата во Собранието каде што Беса има пет пратеници.

Прашан дали е можна коалиција со Владата, рече дека тоа е динамички процес и дека секогаш има можност за влез и излез, но во моментот тоа не е тема.

Во однос на наводите на пратеникот Каремани за закани по живот, Касами рече дека не одобрува никакво насилство и дека Каремани ја има неговата поддршка дека таквите наводи треба да ги решат органите на правдата.


Љубчо Георгиевски смета дека на Мицкоски треба да му се даде шанса


Скопје, 24 декември, 2017 - 12:04 (META) 

Поранешниот претседател на ВМРО-ДПМНЕ, Љубчо Георгиевски на својот „Фејсбук“ профил го поддржа изборот на Христијан Мицкоски за нов лидер на партијата.

Георгиевски кој е првиот претседател на партијата смета дека на Мицкоски треба да му се даде шанса.

„Христијан Мицкоски од сите имиња што беа кандидати за претседател на ВМРО-ДПМНЕ сепак е најнекомпромитиран, неизвалкан со афери, најенергичен и конечно најхаризматичен. Христијан има шанса да остави свој печат во ВМРО. Треба да му се даде шанса…“, напиша Георгиевски на својот ФБ профил.

Мицкоски вчера на партискиот конгрес во Валандово беше избран за нов лидер на најголемата опозициска партија ВМРО-ДПМНЕ и доаѓа на местото на Никола Груевски кој беше на чело на партијата од 2003 година. Од 438 пријавени делегати на конгресот, 376 гласаа за изборот на Мицкоски, додека 52 ливчиња беа неважечки.


Мицкоски: Мојот политички противник е СДСМ, а не поединци и помали групи во ВМРО-ДПМНЕ


Скопје, 23 декември, 2017 - 18:18 (META) 

Македонија мора да оди напред, kорупцијата, политичките притисоци, политичката одмазда мора да стане минато, изјави Христијан Мицкоски откако делегатите го избраа за нов претседател на ВМРО-ДПМНЕ.

-Сега е време да станеме заедно, ВМРО го очекува тоа од нас, а државата го бара тоа од нас. Потребен е нов елан и нова енергија. Ова што сега го гледаме не е ниту светлина, ни надеж, туку темнина и разочарување. Мојата визија за Македонија е земја на среќни граѓани. Силна економија со домашно стопанство и крупни инвестиции. Земја со стабилен бруто домашен производ. Граѓаните заслужуваат подобро здравство. Корупцијата, политичките притисоци и одмазда мора да станат минато. Правичноста е најважна – рече Мицкоски.

Тој истакна дека е свесен за сите сомнежи во него кои се оправдани затоа што до сега немал можност да носи крупни одлуки.

– Јас немам намера да штитам непринципиелни работи, и нешто во што не верувам и е спротивно на нашите вредности. Мојот политички противник е СДСМ, а не поединци и помали групи во ВМРО-ДПМНЕ, и ќе работам на надминување на отворените прашања кои ќе се наметнуваат низ дијалог и дебата во рамки на партијата, но никогаш нема да се доведам во ситуација јавно да прозивам или внатрешната дебата да се претвори во театар кој ќе оди во прилог на политичкиот противник – рече Мицкоски.


Христијан Мицкоски е новиот лидер на ВМРО-ДПМНЕ


Валандово, 23 декември, 2017 - 17:49 (META) 

Со 376 гласа „за“ Христијан Мицкоски е избран за нов лидер на ВМРО-ДПМНЕ. Тој беше единствениот кандидат кој делегатите може да го заокружат на гласачкото ливче.

На вонредниот 16 конгрес на партијата кој се одржуваше во Валандово, од пријавените 438 делегати, за Мицкоски гласале 376, неважечки биле 52 ливчиња, а девет делегати воопшто не гласале. ВМРО-ДПМНЕ има вкупно 544 делегати.

Мицкоски доаѓа на чело на партијата откако до сега ја извршуваше функцијата генерален секретар.

Тој доаѓа на местото на Никола Груевски кој беше лидер на ВМРО-ДПМНЕ од 2003 година, а својата оставка ја најави на почетокот на месецот откако партијата ги загуби локалните избори одржани во октомври годинава.

Мицкоски е доктор по технички науки – машинство, вонреден професор на Машинскиот факултет во Скопје. Беше претседател на управниот одбор и генерален директор на АД ЕЛЕМ. Магистрирал и докторирал на универзитети во Германија и Италија.


Груевски: Мандатот го завршувам со нож во грб, на новиот лидер му порачувам да остане човек


Вландово, 23 декември, 2017 - 13:50 (META) 

ВМРО-ДПМНЕ подготви закон за амнестија за настаните од 27 април и се надевам дека тој ќе биде изгласан во Собранието, затоа што е потребно национално помирување и простување, рече лидерот на ВМРО-ДПМНЕ, Никола Груевски на вонредниот Конгрес на партијата во Валандово каде што се бира нов партиски лидер.

– Само така земјата може да оди напред, и да стави крај на политичките освети и реваншизмите. Големите политичари така се однесуваат во вакви моменти. Треба и Заев и СДСМ да го научи ова, со целосно сочуство кон неговата болка и стрес од немилиот настан на 27 април. Тепањето во Собрание беше голема грешка. Тие луѓе беа поведени од емоции. Сега сме сведоци на политичка осветољубивост од невидени размери – рече тој.

Груевски им се заблагодари на најблиските соработници и на народот за кој рече дека секогаш ќе го почитува. Тој им се извини на сите во партијата и на сите граѓани за сите ненамерни грешки кои ги направил но рече дека енормно многу работел и затоа се случувале грешки.

Тој изрази жалење што Конгресот се случува кога партијата е нападната од надвор, но и од внатре од нејзините членови и додаде дека тешко му било кога го гледал однесувањето на неговите блиски соработници кое се сменило преку ноќ.

Тој раскажа дека странски експерти кои работеле на кампањата на локалните избори му соопштиле дека дел од неговите најблиски соработници биле среќни за изборниот пораз.

– Еден дел од моите соработници, и тоа луѓе кои добија многу, пред се доверба и шанси, функции и големи привилегии и почести, во последните месеци не можам да ги препознаам. Но, успеав тоа да го задржам длабоко во мене, да ја задржам присебноста и смиреноста, длабоко да се кршам во себе и да оставам сами да се заплеткаат и пропаднат во гробот кој го копаат за друг или во сплетките, дворските игри, лицемерието, дволичноста, неискреноста, алчноста, интригите и предавствата кои ги прават за друг. И така и ќе биде. Исто како низ историјата на ВМРО и Македонија – рече Груевски.

Toj во долгиот говор од час и 30 минути, се навраќаше на минатото, на како што рече, неговите тешки почетоци како лидер на ВМРО-ДПМНЕ и нагласи што се постигнала партијата додека била на власт.

– Го прифатив предизвикот да ги ставам моите најубави години од младоста во служба на партијата, народот и државата, да бидам новиот водач на ВМРО, предложен токму од мојот претходник на оваа позиција, Љубчо Георгиевски, на кого и покрај подоцнежните несогласувања, му се заблагодарувам за укажаната доверба и поддршка, и со кого успеав по еден неколку годишен прекин да ги обновам и до ден денес да ги задржам пријателските релации и повремени средби. Всушност, тие први три години како водач на ВМРО, и последните три беа најтешките во 14 и пол годишното водење на партијата. Не по број на работни саати и решавање на проблеми, туку по т.н. византиски игри, подли, валкани и нечесни игри со кои бев принуден да се справувам, поле на кое не се чувствувам на свој терен – додаде лидерот на ВМРО-ДПМНЕ.

Груевски раскажа како Мартин Протуѓер му рекол дека мандатот го започнал и завршил со нож во грб.

-Го коригирав, и му реков, дека не е во право, и дека, го завршувам не со еден, туку со повеќе, и не ножеви, туку ножиња во грб. Но, за среќа, во ВМРО-ДПМНЕ има многу силни личности, честити луѓе, луѓе со висок морал и капацитет, луѓе кои искрено ја сакаат оваа земја и нејзиниот напредок, и луѓе кои имаат чиста совест, јасна мисла, многу енергија и силни морални вредности – додаде тој.

На новиот претседател му порача да остане човек затоа што моќта и власта го прави човекот да стане полош, понервозен и помалку толерантен и додаде дека тој во следниот период ќе работи да стане подобар човек, татко, сопруг, пријател и соработник.


Мицкоски ќе биде единствен кандидат за лидер на ВМРО-ДПМНЕ на конгресот


Скопје, 21 декември, 2017 - 20:12 (META) 

Генералниот секретар на ВМРО-ДПМНЕ, Христијан Мицкоски, ќе биде единствениот кандидат за лидер на ВМРО-ДПМНЕ на вонредниот конгрес на партијата што ќе се одржи утре и задутре во Валандово.

Денеска пред истекот на рокот во 15 часот во ВМРО-ДПМНЕ пристигнале две кандидатури за лидер на партијата, но била прифатена само кандидатурата Мицкоски, бидејќи другата не била валидна, потврдуваат од ВМРО-ДПМНЕ.

– Пристигнаа две кандидатури, едниот кандидат сам објави дека ќе се кандидира. Предмалку заврши и состанокот на правната комисија и беше утврдено дека само едната кандидатура е валидна – изјавил директорот на Центарот за комуникации на ВМРО-ДПМНЕ, Иво Котевски за „Фокус“.

Тој не сакал да го открие името на кандидатот чија кандидатура не била прифатена.

Генералниот секретар на ВМРО-ДПМНЕ, Христијан Мицкоски, попладнево на „Фејсбук“ ја објави својата кандидатура за претседател на партијата во пресрет на вонредниот конгрес што ќе се одржи утре и задутре во Валандово.

Мицкоски вели дека ова за него лично е „една од најсериозните одлуки во животот“ и дека кандидатурата ја поднесува со „чиста мисла, со голема верба, и со отворено срце“.


Милошоски: Да не дозволиме новиот партиски лидер да биде марионета


Скопје, 20 декември, 2017 - 19:37 (META) 

Да не дозволиме новиот лидер на ВМРО-ДПМНЕ да биде марионета, изјави пратеникот и член на извршниот комитет на ВМРО-ДПМНЕ, Антонио Милошоски пред почетокот на седницата на Извршниот комитет, вечерва во штабот на партијата.

Тој додаде дека, барањата на членовите на партијата се добронамерни, со цел, како што рече, да не се дозволи, „новиот партиски лидер однапред да биде познат и избран во една недемократска и нефер трка за претседател на партијата“.

Коментирајќи ја изјавата на лидерот на ВМРО-ДПМНЕ, во оставка, Никола Груевски дека одлуката за одржување на вонреден конгрес била донесена едногласно, Милошоски рече дека, многупати досега разговарале со Груевски во четири очи, а било разговарано и на состаноци со поширокото партиско раководство, но нивните сугестии биле прифатени само декларативно.

Пратеникот Илија Димовски, рече дека очекува рационална одлука на вечерашната седница на Извршниот комитет, каде најави дека, официјално ќе ги презентира барањата за транспарентен избор на нов претседател и одложување на Конгресот.

– Многупати досега дававме сугестии и забелешки, но во изминативе две недели нашите барања не беа соодветно третирани – рече Димовски.

Прашан дали ќе се кандидира за претседател, тој рече дека нема таква намера, па дури и Конгресот да биде одложен за во февруари.

– Мислам дека не е време за персонални решенија – рече Димовски.

Извршниот комитет на ВМРО-ДПМНЕ вечерва на седница треба да го разгледа писмото потпишано од 30-на членови од партијата, со кое се бара,Kонгресот што треба да се одржи викендов, да се одложи за во февруари.


Победете ги емоциите, им порача Груевски на кандидатите за нов лидер на ВМРО-ДПМНЕ


Скопје, 18 декември, 2017 - 13:18 (META) 

По обвинувањата од Филип Петровски, дека во ВМРО-ДПМНЕ се води валкана кампања пред конгресот за избор на нов партиски претседател, Никола Груевски денеска на излегување од судот рече дека токму затоа го имал последното обраќање преку неговата официјална „Фејсбук“ страница.

– Во овој момент има внатрепартиска кампања и има се и сешто, јас слушнав за дел од тие наводи во јавноста и тоа беше повод за моето обраќање преку „Фејсбук“, по кое, се надевам, дека работите се колку – толку доведени во ред. Знаете, штом има повеќе заинтересирани, секогаш има некој незадоволен, но како што истакнав, треба да ги победат емоциите, оти по 23 декември ќе бидат на иста страна, за да може партијата потоа да се врати на власт – рече Груевски.


Филип Петровски ќе се кандидира за претседател на ВМРО-ДПМНЕ


Скопје, 8 декември, 2017 - 22:36 (META) 

Филип Петровски ќе се кандидира за претседател на ВМРО-ДПМНЕ, а својата одлука ја соопшти во вечерашната емисија „Само вистина“ на телевизија „Канал 5“.

– Ова е една од најсериозните одлуки во мојот живот. Долго време размислував, имав разговори со многу значајни луѓе во мојот живот, почнувајќи од семејството, угледни интелектуалци и членови на партијата, луѓе со корени во историјата на ВМРО-ДПМНЕ и на Македонија и донесов одлука да се кандидирам за претседател на ВМРО-ДПМНЕ – изјави Петровски.

По најавата за оставка на лидерот Никола Груевски, вонредниот конгрес на ВМРО-ДПМНЕ за избор на нов лидер ќе се одржи на 23 декември. Петровски порача да се биде внимателен при организацијата на конгресот и побара тој да биде демократски.

– Никој да не се обраќа на делегатите со притисок, како да гласаат. Барам конгресот да биде демократски, ние сме демократска партија. Сите делегати треба да имаат свое лично право да се произнесат за кандидатите, во спротивно, ќе имаме црна дамка, а ВМРО-ДПМНЕ нема да може да се извлече од длабоката политичка и идеолошка криза, во која е западната – додаде Петровски.


Пучдемон и министрите се предале на белгиската полиција


Брисел, 5 ноември, 2017 - 14:29 (META) 

Според медиумите во Белгија, сменетиот претседател на каталонската влада, Карлес Пучдемон, ѝ се предал на полицијата. Освен Пучдемон, уапсени се и четворицата министри со кои тој пребега во Белгија, откако шпанските власти наредија апсење на неговиот кабинет.

Обвинителството во Брисел за денеска најави дополнителни информации за ектрадицијата на Пучдемон и на министрите во Шпанија.

По поранешниот каталонски лидер, властите во Мадрид распишаа европска потерница. Десет од поранешните министри во кабинетот на каталонската влада се во затвор, а еден е пуштен со кауција да се брани од слобода.