!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Договорот со Бугарија нуди перспектива за евроинтеграција, велат од ЛП


Скопје, 2 август, 2017 - 11:35 (META) 

Договорот за пријателство, добрососедство и за соработка помеѓу Македонија и Бугарија, не само што ѝ нуди ЕУ-перспектива на Македонија, туку ја потврдува и перспективата на практикувањето европска политика во регионот, велат од Либералната партија (ЛП).

„Либералната партија оценува дека со потпишувањето на овој договор два месеца од формирањето на новата влада, по децениска стагнација, Македонија се враќа на патот кон ЕУ и го реплицира француско-германскиот модел на политичка соработка, економски развој и на мирно решавање на разликите помеѓу соседите на Балканот “, велат од ЛП.


ЛП: Дивите продавачи ја загрозуваат безбедноста во сообраќајот


Скопје, 28 јули, 2017 - 12:05 (META) 

Либералната партија го поздрави барањето на Групацијата на пазари при Стопанската комора на Македонија за решавање на проблемот со дивите пазарџии, кои на улица, од камиони, продаваат сезонско овошје и зеленчук.

„Овие диви продавачи не само што нелегално тргуваат и создаваат нелојална конкуренција, туку и ја загрозуваат безбедноста во сообраќајот и дополнително ја загадуваат околината, создавајќи отпад од кој се шират разни болести. Финансиската загуба поради нивното неконтролирано и неконкурентно дејствување изнесува 20 отсто од вкупниот приход на организаторите на пазарите“, велат од Либералната партија.

Оттаму додаваат дека за да се стави крај на овој 25-годишен проблем со нелојалната конкуренција, потребна е континуирана акција на Министерството за внатрешни работи, пазарната и на комуналната инспекција, преку конфискација на стока, заплена на моторни возила и парични казни на дивите продавачи во скопските општини и во градот Скопје, како и во другите градови.


Либерална партија бара одговорност за грешките во изградбата на автопатиштата


Скопје, 22 јуни, 2017 - 13:07 (META) 

Либералната партија ја осудува непрофесионалноста во изведбата на автопатиштата Миладиновци – Штип и Кичево – Охрид, односно несовпаѓањето на проектираната и на изведената траса.

„ЛП бара надлежните органи да направат темелна истрага врз геодетските и геолошки компании поради нестручноста и катастрофалните грешки во проектната документација, надзорниот орган кој ја дозволил изградбата врз погрешена проектна документација, градежната компанија и нејзините македонски подизведувачи поради употребата на лошите градежни материјали“, се вели во соопштението на ЛП.

ЛП бара да се санкционираат одговорните поединци, органи и фирми за грешките во овој проект, кој државата ја чини 579 милиони евра, а поради неприфатливите грешки – уште дополнителни 100 милиони евра.

Од ЛДП бараат затворски казни, казна со имот и средства во висина на штетата која е направена, како и трајно одземање на лиценците за работа во ваков тип дејност.


ЛП бара техничко продолжување на мандатот на локалните власти


Скопје, 15 мај, 2017 - 13:07 (META) 

Либералната партија (ЛП) повика на расправа за законски измени за техничко продолжување на мандатот на градоначалниците и на советите на општините, т.е за продолжување на правото на извршување само на техничките обврски на општините (плати на вработените во администрацијата, исплата на режиски трошоци, исплата на тековните привремени ситуации на фирмите што одржуваат и вршат градежни работи за локалната самоуправа, издавање градежни дозволи врз основа на постоечки урбанистички планови и слично).

Либералната партија посочува дека продолжувањето на мандатот на локалната самоуправа не смее да им даде можност на општините да вработуваат нови лица во администрациите, да усвојуваат нови генерални или детални урбанистички планови, да распишуваат нови тендери и воопшто да создаваат нови обврски за идните легални и легитимни локални органи. Според Либералната партија, искуството со т.н. „техничка влада“ на овој начин може да биде применето и во овој случај, и тоа ќе овозможи доволен временски период за утврдување датум за локални избори без временски притисок, со добра верба и со промислен политички дијалог.


ЛП: Иванов да не се поставува како диктатор, туку неодложно да го даде мандатот на Заев


Скопје, 12 мај, 2017 - 12:33 (META) 

Либералната партија денеска го повика претседателот на државата, Ѓорге Иванов, неодложно да го даде мандатот на Зоран Заев, како утврден претставник на дефинирано парламентарно мнозинство.

Од партијата велат дека политичкиот процес мора да продолжи дури и ако Иванов и понатаму не го дава мандатот.

„Не давајќи го мандатот за формирање влада, Иванов овозможува владеење на влада која ниту има мандат ниту има парламентарно мнозинство. Не давајќи мандат на дефинираното парламентарно мнозинство, тој се поставува како диктатор кој лично владее наспроти Уставот и ја оневозможува парламентарната демократија. Токму затоа, ако во рокот од предвидените десет дена Иванов не го даде мандатот, парламентарното мнозинство треба да избере влада без понатамошна соработка со Иванов“, стои во соопштението на Либералната партија.


ЛП: Џафери да сфати дека еден од врвните државни раководители, а не само Албанец


Скопје, 5 мај, 2017 - 12:12 (META) 

Либералната партија (ЛП) денеска му честиташе на новиот претседател на Собранието, Талат Џафери, истовремено порачувајќи му оти треба да сфати дека е еден од највисоките државни раководители, а не само Албанец, и соодветно на тоа, во неговиот кабинет треба да стои само знамето на Република Македонија.

„Го поздравуваме почетокот на претседавање со Собранието на Талат Џафери и му обрнуваме внимание дека тој е еден од врвните државни раководители, а не претставник на етничка заедница и затоа во неговиот кабинет треба да биде државното знаме, но не и знаме на која било етничка заедница. Ако тоа побргу го сфати, ќе придонесе за стабилизација во државата“, велат од ЛП.


ЛП: Парламентарното мнозинство да не чека и да прејде на избор на спикер и на нова влада


Скопје, 21 април, 2017 - 12:13 (META) 

Извршниот комитет на Либералната партија на синоќешната седница, на која била разгледувана актуелната политичка остојба во државата, констатирал дека „настојувања на парламентарното мнозинство што побргу да се конституираат државните органи, односно да се избере претседател на Собранието и влада на Република Македонија, се во опасен застој“.

„Се наоѓаме во ситуација кога секој изгубен ден во стапувањето во функција на институциите ја зголемува опасноста во државата. Затоа апелираме партиите од парламентарното мнозинство добро да ја согледаат ситуацијата и со поддршка од нашите пријатели од меѓународната заедница и од домашната јавност да прејдат на избор на претседател на Собранието и на избор на влада“, стои во соопштението на ЛП.

Оттаму нагласуваат дека одолжувањето на овие потези ги охрабрува сите што се противат на конститурирањето на државната власт во Македонија и затоа не треба да се чека. ЛП, се додава во соопштението, ги поздравува „сè поотворените обиди од страна на меѓународните фактори да помогнат што побргу да се конституира држваната власт“.

„Ја повикуваме домашната јавност да не остане само на загриженост за состојбите, туку активно да го манифестира своето незадоволство од состојбите и јасно да му даде поддршка на формираното парламентарно мнозинство“, нагласуваат од ЛП.


ЛП: Иванов со скандалот со Хан се покажа како крајно неспособен за функцијата што ја врши


Скопје, 22 март, 2017 - 13:27 (META) 

Либералната партија го осудува скандалот што го направи Ѓорге Иванов, поврзан со посетата на еврокомесарот Јоханес Хан и на тројцата европратенции, со што, како што велат од партијата, се покажал како крајно неспособен за функцијата што ја врши и за тоа треба да поднесе одговорност.

Претседателот Иванов вчера ја откажа средбата со еврокомесарот за проширување и за добрососедска политика, Хан, и со европратениците Едвард Кукан, Иво Вајгл и Кнут Флекенштајн, поради работната посета на Унгарија и својот термин им го препушти на членовите на иницијативата „За заедничка Македонија“, кои бараа средба со Хан.

„Либералната партија смета дека најдобар резултат од посетата на функционерите од Брисел е утврдената можност во решавањето на кризата голема улога да има одлуката на Европската Унија за почеток на преговорите за полноправно членство на Македонија во ЕУ и отворањето на поглавјата 23 и 24, во првите сто дена од формирањето на владата на парламентарното мнозинство на чело со СДСМ за која се собрани 67 потписи“, стои во соопштението на Либералната партија.


ЛП: Повикот на Груевски за „народот“ да ја брани државата е опасна манипулација


Скопје, 20 март, 2017 - 13:40 (META) 

Повикот на Груевски за „народот“ да ја брани државата со излегување на улиците е неодговорна и опасна манипулација токму со народот, оценува Либералната партија, а во врска со синоќешното интервју на лидерот на ВМРО-ДПМНЕ, Никола Груевски, за „Канал 5“.

„Народот може да биде сигурен дека државата ќе опстане и ќе се развива само ако институциите добро и одговорно работат. Затоа сметаме дека повикот до народот е контрапродуктивен, против вистинските интереси на тој народ, а е одраз на фактот што ВМРО-ДПМНЕ како политичка партија нема вистинска концепција како да се води и да се развива државата и што да му се понуди на народот“, стои во соопштението.

Од Либералната партија сметаат дека посетата на еврокомесарот за проширување и за добрососедска политика, Јохане Хан, „овојпат треба да се искористи со конкретни оценки и предлози од страна на партиите што ќе се среќаваат со него“.

„Тие предлози треба да содржат конкретни решенија, на пример, како да се спроведе Извештајот на Прибе и како институциите да се вратат и да дејствуват во рамките на Уставот и законите, а во интерес на сите граѓани на земјата“, велат од ЛП.

Оттаму порачуваат дека на еврокомесарот треба да му биде кажано дека и покрај неспорната заинтересираност на Европската Унија да помогне, без забрзување на процесот на вклучување на Македонија во Унијата, тоа нема да успее.

„Во користењето „стап и морков“, ЕУ користи само „стап“, но нема „морков“. Затоа, Либералната партија бара од партиите што ќе се сретнат со Хан да инсистираат надлежните институции во ЕУ што побргу да донесат одлука за почеток на преговори за полноправно членство на Македонија во ЕУ“, нагласуваат од ЛП и додаваат дека „брзото решавање на политичката криза во Македонија, ќе го ослободи целиот регион од сегашниот опасен тек на настаните и од реалните грижи и стравувања“.


Величковски – Тимоние: Стабилноста на Македонија зависи од демократијата во земјата


Скопје, 28 февруари, 2017 - 14:44 (META) 

Претседателот на Либералната партија, Ивон Величковски, денеска имал средба со амбасадорот на Франција во земјава, Кристијан Тимоние, на која Величковски го реафирмирал ставот на партијата дека „евро-атланскиот и европскиот пат на Македонија оди заедно со владеењето на правото, остварувањето на правата на човекот и на граѓанинот и со борбата со криминалот и со корупцијата“.

– Денес не е доволно да избираме меѓу стабилност и демократија, туку стабилноста на Македонија зависи од демократијата во земјата. Само формирање влада, без вистинско оспособување на институциите, без транспарентност и без што поширок општествен и политички консензус за клучните прашања, ризикува да не биде решение на кризата, туку вовед во нејзината следна етапа – оценил Величковски на средбата со Тимоние.