СЈО и понатаму ќе отвора истраги, рече обвинителката Ристоска


Скопје, 5 јуни, 2018 - 13:25 (META) 

Се надеваме дека надлежноста на СЈО ќе биде проширена на случаите од висока корупција. СЈО и понатаму ќе отвора истраги. Потребно е законско решение за измена на законодавството за да се осигури дека СЈО ќе има трајна основа за продолжување за својата работа, порача обвинителката од СЈО, Ленче Ристоска, на конференцијата организирана од Институтот за европска политика -ЕПИ, за поглавјето 23.

Таа рече дека имале голем број предистражни постапки со меѓународен елемент и сето тоа го одолговлекувало моментот за одлуки.

– Најзначајната карактеристика на СЈО е токму автономијата. СЈО ги поседува потребните капацитети за борба против криминалот и реформите нема да бидат целосни ако не се опфати и СЈО – рече Ристоска.

Ристоска изјави дека се задоволни што биле одобрени 15 обвинителни акти и што има пресуди за 14 обвинети лица.

– Имаме започнато судења за најголем дел од обвиненијата. Имаме пресуди за 14 обвинети лица. Потребно е законско решение за измена на законодавството за да се осигури дека СЈО ќе има трајна основа за продолжување за својата работа – додаде обвинителката.


Груевски до Ристоска: Кадија те тужи, кадија те суди


Скопје, 16 февруари, 2018 - 16:05 (META) 

„Кадија те тужи, кадија те суди“ и реплицираше поранешниот премиер и лидер на ВМРО-ДПМНЕ, Никола Груевски на обвинителката на СЈО, Ленче Ристоска, во продолжението на денешното рочиште за случајот „Тенк“, откако обвинителката претходно му се обрати на Груевски со народната поговорка „На човек на сила можеш да му земеш, но не и да му дадеш“.

– Не бараме ништо со сила од Судот, бараме само тоа што ни следува со закон. Досегашното судење го сметам за нефер. Јас немав можност да ги видам аудио снимките како единствен доказ за обвинението против мене и затоа јас не можам да дадам воведен говор – рече Груевски.

Денешното рочиште, по паузата од половина час продолжи со воведни зборови и со изјаснување на обвинетите дали се чувствуваат виновни или не по обвинението.

Груевски рече дека го прочитал обвинението и дека од него не може да разбере зошто е обвинет. Тој рече дека не признава вина во случајот, бидејќи „работел според закон“.

Поранешната министерката за внатрешни работи, Гордана Јанулоска рече дека делумно го разбира обвинението и оти не е виновна, а дека не е виновен се изјасни и поранешниот помошник-министер во МВР, Ѓоко Поповски, исто така обвинет за набавката на блиндираниот „мерцедес“ од 600 илјади евра.

Инаку, на рочиштето судијката Добрила Кацарска го опомена Груевски дека ќе го казни, ако уште еднаш го навреди судот.

Реакцијата на Кацарска следуваше откако обивнителот на СЈО, Стевчо Донев, го даде воведниот говор за случајот, а Груевски ѝ дофрли на адвоката Сања Алексиќ – „ова е партиски суд“.

Според обвинението, во периодот од февруари до крајот на октомври 2012 година Никола Груевски како службено лице ги искористил влијанието и службената положба и побарал од министерката за внатрешни работи Гордана Јанкулоска, да спроведе јавна набавка во која Министерството ќе купи ново блиндирано патничко моторно возило „мерцедес“, модел „С-600 гард“, а во постапката бил фаворизиран економскиот оператор „Мак Аутостар ДООЕЛ“, генерален застапник и дистрибутер на возилата од брендот мерцедес. Јанкулоска за да го исполни барањето, пак, го поттикнала обвинетиот помошник-министер Ѓоко Поповски да стори кривично дело злоупотреба на службената положба и овластувањето. Возилото од Министерството требало да се даде на користење и на Груевски кој сакал да користи такво ново блиндирано патничко моторно возило, но за тоа не сакал јавноста да дознае.

Следното рочиште судијката Кацарска го закажа за 12 март, кога треба да бидат сослушани пет сведоци.


Ристоска до Груевски: На човек на сила можеш да му земеш, не и да му дадеш


Скопје, 16 февруари, 2018 - 13:40 (META) 

Обвинителката на СЈО, Ленче Ристоска му се обрати на поранешниот премиер, Никола Груевски со народната поговорка „На човек на сила можеше да му земеш, но не и да му дадеш“, на денешното рочиште за случајот „Тенк“, откако адвокатите на одбраната се обидоа да ја прекинат и одложат расправата, бидејќи немале време да го разгледаат цд-то со записникот од претходното рочиште.

Во „Тенк“ покрај Груевски, за набавката на блиндираниот „мерцедес“ од 600 илјади евра обвинети се и поранешната министерката за внатрешни работи Гордана Јанкулоска и поранешниот помошник-министер во МВР, Ѓоко Поповски.

По приговорите на адвокатите дека немале време да го разгледаат записникот, судијката Добрила Кацарска рече оти може да им понуди половина час пауза, како добра волја, а потоа да продолжи рочиштето со воведните говори.

Кацарска посочи дека записниците биле изготвени на 13 февруари, во законски рок, но никој од адвокатите не дошол да ги земе.

– Одбраната беше должна да ги земе записниците. Тие не дојдоа да ги подигнат во рок, па судот вчера телефонски ги извести, а дури денеска пред судење адвокатот Димитар Дангов ги подигна. Затоа нема причина за пауза, но во интерес на одбраната ќе се видиме по пауза од половина час – рече Кацарска.

На ова приговараше Груевски, кој рече дека записници од 17 страни за половина час не може да се прочитаат, на што судијката рече дека била јасна, а Груевски и возврати „не, не бевте“.

Обвинителката од СЈО, Ленче Ристоска кажа оти одбраната знаела дека записниците се изготвени и требало да ги земат.

– Се противам на барањето за пауза и сметам дека тоа го прават се со цел да се одложи главната расправа. Со сила на човек можеш само да му земеш, а не можеш ништо да дадеш – рече Ристовска.

Судењето продолжува по паузата од половина час.


Шврговски најави жалба на пресудата за Грујовски за „Тврдина 2“


Скопје, 8 ноември, 2017 - 15:50 (META) 

Адвокатите на поранешниот началник на петтата управа, Горан Грујовски, најавија жалба на пресудата за една и пол година затворска казна, по завршувањето на денешното рочиште на кое судијката Лидија Петровска ги соопшти пресудите и казните за обвинетите во случајот „Тврдина 2“ на Специјалното јавно обвинителство.

– Ние очекувавме ослободителна пресуда бидејќи сме на став дека не постои како објект на заштита службена исправа која може да биде предмет на ова кривично дело. Очигледно, со судот имаме различна диоптрија на гледање на работите и од тие причини ние ќе поднесеме жалба на овие околности и на околностите околу надлежноста што ја оспоривме во текот на завршните зборови – изјави адвокатот Љупчо Шврговски.

Претходно, обвинителката на СЈО, Ленче Ристоска, во изјава за медиумите рече оти се задоволни од пресудата за Грујoвски и за шесте службенички во УБК, осудени за уништување илјадници списи во случајот „Тврдина 2“.

– Ваквата пресуда беше според нашите очекувања. Ние сме задоволни, но ќе ја почекаме пресудата и ќе ги разгледаме аргументите на судот, па ќе одлучиме дали ќе се жалиме – рече Ристоска.


Ристоска задоволна од пресудата за Грујовски – прва во корист на СЈО


Скопје, 8 ноември, 2017 - 13:19 (META) 

Специјалната јавна обвинителка Ленче Ристоска изрази задоволство од пресудата за поранешниот началник на Управата за безбедност и контраразузнавање, Горан Грујoвски, и за шесте службенички во УБК, осудени за уништување и за незаконското палење на илјадници списи во случајот „Тврдина 2“, како и за фалсификување службена исправа.

– Денеска СЈО ја доби првата пресуда. Обвинетите се осудени, а ваквата пресуда беше според нашите очекувања. Ние сме задоволни, но ќе ја почекаме пресудата и ќе ги разгледаме аргументите на судот, па ќе одлучиме дали ќе се жалиме – рече Ристоска.

Според неа, ваквата пресуда претставува порака за службениците што извршуваат наредби дека не смеат да бидат амнестирани.

Грујовски, кој се наоѓа во екстрадициски притвор во Грција, доби една и пол година затворска казна за незаконското палење на илјадници списи во случајот „Тврдина 2“ на СЈО. Другите шест обвинети, вработени во УБК, добија условни казни за фалсификување службена исправа. Пет од нив се осудени на условна казна од девет месеци, а една од нив на две години.


Ристоска: Државата треба да заземе посериозен пристап во борбата против перењето пари


Скопје, 7 ноември, 2017 - 13:48 (META) 

Македонија треба конечно да заземе посерозен пристап во борбата против перењето пари, кој треба да биде инклузивен и интердисциплинарен, изјави обвинителката на Специјалното јавно обвинителство, Ленче Ристоска, по отворањето на денешната меѓународна конференција за спречување на перење пари и финансирање тероризам, што се одржа во Скопје, во организација на Академијата за банкарство и информатичка технологија (АБИТ).

На конференцијата, покрај Ристоска, учествуваа и министерот за внатрешни работи, Оливер Спасовски, и директорот на Управата за финансиска полиција, Арафат Муареми.

– Пристапот треба да биде интердисциплинарен и треба сите активни чинители во општеството, како банкарскиот сектор, финасиските институции, така и обвинителствата, поддржани од полицијата, сите заедно да застанеме напред во борбата против перењето пари и финансискиот криминал – рече Ристоска.

Министерот за внатрешни работи, Оливер Спасовски, во своето обраќање на конференцијата, истакна дека институциите задолжени за спроведување на законот треба и мора, со соодветен интензитет, да ја унапредуваат и да ја прилагодуваат својата подготвеност во борбата против перењето пари. Ова, рече Спасовски, особено се однесува на квалитетно кадровско екипирање, а логистиката во тие задачи, како што додаде, мора да дојде од експертската бранша.

Директорот на Управата за финансиска полиција, Арафат Муареми, рече дека во минатото имало многу случаи на перење пари и оти верува дека Управата, како инситуција, е подготвена да ги расчисти сите случаи.

Одговарајќи на новинарско прашање, Муареми рече дека финансиската полиција работи интензивно и активно на неколку случаи за кои јавноста наскоро ќе биде информрана. Тој не сакаше да коментира повеќе за случаите бидејќи, како што рече, тие се сè уште во фаза на предистражна постапка, додавајќи дека меѓу засегнатите има и политичари и бизнисмени.


Ристоска побара од судот максимална казна за Грујовски за „Тврдина 2“


Скопје, 6 ноември, 2017 - 11:55 (META) 

Обвинителката на Специјалното јавно обвинителство, Ленче Ристоска, денеска побара од судот максимална казна за поранешниот началник на петтата управа, Горан Грујовски, за случајот „Тврдина 2“, додека за другите шест службенички од УБК, обвинети во случајот, таа му предложи на судот да им одреди алтернативни, односно условни казни.

Инаку, Грујовски и службеничките во УБК беа обвинети за уништување на документацијата од незаконското прислушување. СЈО ги гонеше за фалсификување службена исправа, според членот 361, став 2, за што е предвидена затворска казна од три месеци до пет години.

По денешните завршни зборови, судот в среда ќе ја изрече пресудата.

Ристоска, во завршните зборови пред Кривичниот суд во Скопје за случајот „Тврдина 2“, истакна дека мотивот на Грујовски, како наредбодавец за уништувањето на докуемнтацијата од УБК, бил да се сокријат трагите за тоа кој и како прислушувал стотици граѓани во Македонија и да се отежни истрагата за масовното кршење на човековоте слободи и права од страна на Управата за безбедност и контраразузнавање. Таа рече дека уништувањето на документите во Петровец, во близина на Скопје, се случувало истовремно со уништувањето на системите од незаконското следење на комуникациите во МВР, за што Грујовски исто така е обвинет во случајот „Тврдина“.

Обвинителката на СЈО, побара од судот при определувањето на казната да не го зема како олеснителна околност тоа што Грујовски е татко на две деца, туку фактот дека е во бегство, со што децата и семејството ги оставил на цедило, без извор на егзистенција.

За шесте службенички од УБК, кои наместо да ја одбијат наредбата на Грујовски, учествувале во постапката за уништување на документите, Ристоска побара условни казни. Како отежнителна околности таа побара од судот да го оцени тоа што ниту една не се покајала за стореното, но нагласи дека секоја од нив, наведувајќи ги по име, имала беспрекорно однесување во УБК и дека немале дамка во работењето и оти дел од нив се самохрани мајки.

Адвокатот на Грујовски, Љупчо Шврговски, пред судот рече дека во случајот нема основи за кривично, туку за евентуално прекршочно дело. Одбраната наведе дека СЈО нема мандат да гони дела сторени во 2015 години и дека ова проширување на надлежноста на СЈО ќе доведе до правна конфузија.

Инаку, на Грујовски му се судеше во отсуство, бидејќи тој заедно со својот колега од УБК, Никола Бошковски, се наоѓаат во екстрадициски притвор во Солун, откако беа уапсени на солунскиот аеродром, во обид со лажни бугарски пасоши да заминат за Будимпешта.


Рочиштето за „Тврдина 2“ одложено, се чека известување од МВР за Грујовски


Скопје, 26 септември, 2017 - 10:59 (META) 

Денешното рочиште за случајот „Тврдина 2“ се одложи бидејќи судот и СЈО го чекаат известувањето од Eдиницата за потраги на МВР во врска со достапноста на обвинетиот во случајот, Горан Грујовски, кој е во бегство и по кого е распишана потерница.

Известувањето е неопходно за да може СЈО да побара на Грујовски да му биде судено во отсуство.
Обвинителката на СЈО, Ленче Ристовска, потврди дека ќе бараат да му се суди во отсуство, а неговиот адвокатот Љупчо Шврговски во изјава за медиумите рече дека и во таков случај ќе продолжат да го застапуваат поранешниот началник на петтата управа зашто тоа од нив било побарано и од синот на Грујовски.

Следното рочиште е закажано за 2 октомври, до кога судот и СЈО очекуваат да го добијат известувањето од МВР и да продолжат со постапката.


ВМРО-ДПМНЕ: Дејствувањето на СЈО е израз на стравот на СДС дека губи на изборите


Скопје, 18 септември, 2017 - 19:09 (META) 

Секогаш кога на СДС му е потребно дефокусирање од реалните теми и скандали, се активира алатката СЈО, се вели во реакцијата на ВМРО-ДПМНЕ на изјавата дадена на обвинителка од СЈО, Ленче Ристовска, во врска со случајот „Талир“.

„СЈО покажа дека е продолжена рака на СДС, чија единствена цел е политичка борба со ВМРО-ДПМНЕ. Дејствувањето на СЈО е израз на стравот на СДС дека губи на изборите и ова е начинот на кој сакаат да го одвлечат вниманието. Нема да успеат затоа што се провидни и затоа што граѓаните ќе го казнат ваквото самоволие“, стои во партиското соопштение.

Ристовска денеска по седницата во Врховниот суд изјави дека со замрзнувањето на имотот на ВМРО-ДПМНЕ (седиштето на партијата) би се ставило забрана за раководните лица во партијата да не можат тој имот да го продадат и со тоа да нанесат дополнителна штета на политичката партија.

Седницата беше по повод барањето на СЈО, Врховниот суд да ја прогласи за незаконита одлуката на Кривичниот суд со која беше одбиен нивниот предлог за замрзнување на имотот на ВМРО-ДПМНЕ во случајот „Талир“.


Ристоска: Замрзнувањето на имотот ќе го заштити ВМРО-ДПМНЕ од раководството


Скопје, 18 септември, 2017 - 16:17 (META) 

Со замрзнувањето на имотот на ВМРО-ДПМНЕ (седиштето на партијата) би се ставило забрана за раководните лица во партијата да не можат тој имот да го продадат и со тоа да нанесат дополнителна штета на политичката партија, изјави обвинителката на СЈО, Ленче Ристоска, по седницата во Врховниот суд.

Седницата беше по повод барањето на СЈО, Врховениот суд да ја прогласи незаконита одлуката на Кривичниот суд со која беше одбиен нивниот предлог за замрзнување на имотот на ВМРО-ДПМНЕ во случајот „Талир“.

– Замрзнувањето на имотот е само привремено и со тоа би се ставило забрана за раководните лица да не можат тој имот понатаму да го отуѓуваат и со тоа да нанесат дополнителна штета на политичката партија. Така што, би рекла дека ако ја земеме политичката партија како посебен правен субјект, оние активности што ги преземаме се за заштита на политичката партија – изјави Ристоска.

Таа додаде дека имотот досега не е отуѓуван, но кон крајот на декември минатата година е ставен под хипотека во една од комерицијалните банки, што како аргумент од СЈО го истакнале пред Врховниот суд.

Кривичниот суд досега двапати ги одбиваше барањата на СЈО за замрзнување на имотот на ВМРО-ДПМНЕ, а како што образложи Ристоска, за Специјалното обвинителство е спорна втората одлука која сметаат дека е незаконита, бидејќи со неа биле прекршени повеќе закони, меѓу кои и законот за финансирање на политички партии.

– Сметаме дека таквките судски одлуки не треба да бидат дел од нашето позитивно право и затоа побаравме од Врховниот суд да ја прогласи ваквата одлука на судот за незаконита – рече Ристоска.

Истрагата за случајот „Талир“ СЈО ја отвори кон средината на мај оваа година. Во него првоосомничен лидерот на ВМРО-ДПМНЕ, Никола Груевски, а осомничени се и пратениците Илија Димовски и Даниела Рангелова и поранешниот технички премиер и поранешен генерален секретар на ВМРО-ДПМНЕ, Емил Димитриев, поранешните генерални секретари Мартин Протуѓер и Кирил Божиновски, како и актуелниот и поранешен член на Центарот за комуникации на партијата, Александар Бичиклиски и Иво Котевски.