!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: Дејствувањето на СЈО е израз на стравот на СДС дека губи на изборите


Скопје, 18 септември, 2017 - 19:09 (META) 

Секогаш кога на СДС му е потребно дефокусирање од реалните теми и скандали, се активира алатката СЈО, се вели во реакцијата на ВМРО-ДПМНЕ на изјавата дадена на обвинителка од СЈО, Ленче Ристовска, во врска со случајот „Талир“.

„СЈО покажа дека е продолжена рака на СДС, чија единствена цел е политичка борба со ВМРО-ДПМНЕ. Дејствувањето на СЈО е израз на стравот на СДС дека губи на изборите и ова е начинот на кој сакаат да го одвлечат вниманието. Нема да успеат затоа што се провидни и затоа што граѓаните ќе го казнат ваквото самоволие“, стои во партиското соопштение.

Ристовска денеска по седницата во Врховниот суд изјави дека со замрзнувањето на имотот на ВМРО-ДПМНЕ (седиштето на партијата) би се ставило забрана за раководните лица во партијата да не можат тој имот да го продадат и со тоа да нанесат дополнителна штета на политичката партија.

Седницата беше по повод барањето на СЈО, Врховниот суд да ја прогласи за незаконита одлуката на Кривичниот суд со која беше одбиен нивниот предлог за замрзнување на имотот на ВМРО-ДПМНЕ во случајот „Талир“.


Ристоска: Замрзнувањето на имотот ќе го заштити ВМРО-ДПМНЕ од раководството


Скопје, 18 септември, 2017 - 16:17 (META) 

Со замрзнувањето на имотот на ВМРО-ДПМНЕ (седиштето на партијата) би се ставило забрана за раководните лица во партијата да не можат тој имот да го продадат и со тоа да нанесат дополнителна штета на политичката партија, изјави обвинителката на СЈО, Ленче Ристоска, по седницата во Врховниот суд.

Седницата беше по повод барањето на СЈО, Врховениот суд да ја прогласи незаконита одлуката на Кривичниот суд со која беше одбиен нивниот предлог за замрзнување на имотот на ВМРО-ДПМНЕ во случајот „Талир“.

– Замрзнувањето на имотот е само привремено и со тоа би се ставило забрана за раководните лица да не можат тој имот понатаму да го отуѓуваат и со тоа да нанесат дополнителна штета на политичката партија. Така што, би рекла дека ако ја земеме политичката партија како посебен правен субјект, оние активности што ги преземаме се за заштита на политичката партија – изјави Ристоска.

Таа додаде дека имотот досега не е отуѓуван, но кон крајот на декември минатата година е ставен под хипотека во една од комерицијалните банки, што како аргумент од СЈО го истакнале пред Врховниот суд.

Кривичниот суд досега двапати ги одбиваше барањата на СЈО за замрзнување на имотот на ВМРО-ДПМНЕ, а како што образложи Ристоска, за Специјалното обвинителство е спорна втората одлука која сметаат дека е незаконита, бидејќи со неа биле прекршени повеќе закони, меѓу кои и законот за финансирање на политички партии.

– Сметаме дека таквките судски одлуки не треба да бидат дел од нашето позитивно право и затоа побаравме од Врховниот суд да ја прогласи ваквата одлука на судот за незаконита – рече Ристоска.

Истрагата за случајот „Талир“ СЈО ја отвори кон средината на мај оваа година. Во него првоосомничен лидерот на ВМРО-ДПМНЕ, Никола Груевски, а осомничени се и пратениците Илија Димовски и Даниела Рангелова и поранешниот технички премиер и поранешен генерален секретар на ВМРО-ДПМНЕ, Емил Димитриев, поранешните генерални секретари Мартин Протуѓер и Кирил Божиновски, како и актуелниот и поранешен член на Центарот за комуникации на партијата, Александар Бичиклиски и Иво Котевски.


Мијалков даде збор дека редовно ќе се јавува во суд


Скопје, 17 јули, 2017 - 15:50 (META) 

Поранешниот директор на Управата за безбедност и контраразузнавање (УБК), Сашо Мијалков, денеска пред тричлениот совет на Апелацискиот суд Скопје изјави дека нема зошто да бега од државата, бидејќи е убеден во својата невиност и оти верува дека во понатамошната постапка и судот ќе го увиди тоа, пренесува „Нова ТВ“.

Апелацискиот суд денеска ги разгледува жалбите на Специјалното јавно обвинителство и на обвинетите во случаите „Таргет“ и „Тврдина“. Првообвинет во случаите, кои се споени во едно обвинение, е Мијалков, за кого СЈО бара да му биде одреден притвор. Ваквото барање претходно беше одбиено од Кривичниот совет на Основниот суд Скопј 1, поради што СЈО поднесе жалба до второстепениот суд.

– Досега само двапати не сум се јавил на покана и тоа затоа што бев во странство и немаше билети за да се вратам порано. Одговорно се јавувам на секој нивни повик. Така било досега, а од денеска можам да кажам дека мој збор е дека секогаш и на секој повик од судот ќе се јавувам уредно и ќе бидам присутен – рекол Мијалков.

Обвинителката на СЈО, Ленче Ростовска, образложила дека како основа на барањето за притвор против Мијалков се зема само опасност од бегство бидејќи против него се води скратена постапка. Таа во прилог ги доставила анкетните листови на Мијалков од Дражвната комисија за спречување на корупција и документи од Трговскиот регистар во Чешка, во кои стои дека тој е сопственик на имот и на фирми во Чешка, алудирајќи на можноста за бегство.

Љупчо Шврговски, кој му е адвокат на Мијалков, побарал да не се земе предвид жалбата на СЈО за определување мерка притвор затоа што Мијалков, ако сакал, досега можел да избега и да не се врати во државата. Тој додал дека Мијалков уредно се јавувал на поканите на СЈО.

Мијалков, пред завшувањето на седницата, изјавил оти верува во „објективноста и професоналноста на судот и дека ќе донесе вистинска одлука“.

Денеска тричлениот совет на Апелацискиот суд ги разгледуваше жалбите на СЈО и на одбраната на другите обвинети во „Таргет“ и во „Тврдина“, меѓу кои е и поранешниот директор на петтата управа Горан Грујовски, кој денеска не се појави во судот.


Расправата за „Тврдина 2“ се одложи, Шврговски не стасал да го види предметот


Скопје, 3 јули, 2017 - 11:59 (META) 

Денешното рочиште од судскиот процес за случајот „Тврдина 2“, на кое требаше да почне главната расправа, се одложи за 26 септември, на барање на Љупчо Шврговски и на Миле Петровски, застапници на обвинетите.

Шврговски од судијката Лидија Петровска побара да го одложи рочиштето бидејќи, како што рече, непосредно пред неговото одржување бил ангажиран за бранител на првообвинетиот Горан Грујовски и на Александра Велиновска и немал можност да го види и да го проучи обвинението во „Тврдина 2“. Од истите причини, одложување на рочиштето побара и адвокатот Миле Петровски.

Претходно адвокат на Грујовски му беше Никола Додевски, кој од причини непознати за јавноста, се повлече од одбраната на повеќето осомничени, а сега и обвинети во случаите на СЈО.

Одговарајќи на новинарско прашање, Шврговски рече дека ќе го застапува поранешниот директор на управата за безбедност и контраразување, Сашо Мијалков, во сите предмети во кои тој е обвинет.

Обвинителката на СЈО, Ленче Ристоска, немаше забелешки на одложувањето на рочиштето и рече дека обвинетите имаат право на одбрана. Таа додаде дека очекува во септември, по толку многу одложувања, конечно да почне судењето за овој случај.

Во врска со одбиените притвори по поднесените обвиненија од страна на СЈО, таа потврди дека СЈО ќе ги искористи правните лекови и ќе поднесе жалби на одлуките на кривичните совети на Основен суд Скопје 1.


Ристоска: Ако не ни го продолжат рокот, имаме резервен план


Скопје, 3 април, 2017 - 21:17 (META) 

Јавната обвинителка од Специјалното јавно обвинителство, Ленче Ристоска вечерва во гостувањето на „Топ тема“ ги повтори апелите за продолжување на рокот за поднесување обвиненија кое го има СЈО, но истакна дека доколку тоа не се случи тие имаат план „б“.

– Апелираме да се продолжи рокот за покренување на обвиненија кој исткува на 30 јуни. Доколку тоа не се случи, имаме неколку варијанти кои ги разгледуваме и затоа се воздржуваме од коментирање на план „б“. Постојат повеќе опции. Со сигурност тие материјали нема да останат во некој сеф, граѓаните заслужуваат да знаат што се случило – рече Ристоска.

Ристоска рече дека не може да каже уште колку обвиненија СЈО ќе поднесе до истекот на рокот, односно до 30 јуни, но се надева ќе бидат во голем број.

На прашањето каде е бизнисменот Сеад Кочан за кого е издадено барање за притвор, Ристоска рече дека официјалната информација која на СЈО му е достапна е дека тој е во бегство.

Обвинителката Ристоска рече дека не се плашат дека Уставен суд ќе го прогласи СЈО за неуставна институција и одговарајќи на новинарско прашање рече дека очекува СЈО во иднина да биде интегрирано во редовното јавно обвинителство.

Ристоска потенцираше дека СЈО се уште се соочува со несоработка од страна на други институции и како последен пример го наведе проблемот со соработката што СЈО го има со Управата за финансиско разузнавање.

-Имаме поднесено барања за казнување на одговорни лица и тоа некако чудно се одолговлекува. Како пример ќе го посочам барањето за казнување кое го поднесовме против директорот на Управата за безбедност и контраразузнавање затоа што таа институција не одговара на нашите барања – додаде Ристоска.


Одложено рочиштето за „Тврдина 2“, судијката Петровска на боледување


Скопје, 13 март, 2017 - 14:02 (META) 

Поради боледување на судијката Лидија Петровска се одложи денешното рочиште за случајот „Тврдина 2“, што го отвори Специјалното јавно обвинителство, а во кој првообвинет е поранешниот началник на петтата управа, Горан Грујовски.

Тој и уште шестмина вработени во Управата за безбедост и контраразузнавање (УБК) се товарат дека ја уништиле документацијата поврзана со двата состеми од незаконското следење на комуникациите.

На денешното рочиште не беа присутни ниту еден од обвинетите.

Обвинителката на СЈО, Ленче Ристоска, која го застапува обвинението, по завршувањето на рочиштето изјави дека успеале да добијат решение за „декласификација на голем дел од доказите“.

– Денешното рочиште се одложи така што останува да видиме наредниот пат. Ние успеавме да добиеме решение за декласификација на голем дел од доказите, така што на наредното рочите ќе видиме што ќе се случува. Наредното рочиште е закажано на 5 мај – изјави Ристоска.

На прашање каква е соработката со УБК, таа одговори дека соработката и понатаму оди отежнато.

На претходните две подготвителни рочишта, судијката Петровска му наложи на СЈО да ги декласифицира доказите, за да може да бидат користитени во судската постапка.


Судењето за „Тврдина 2“ не почна, судијката побара од СЈО декласификација на доказите


Скопје, 28 ноември, 2016 - 14:28 (META) 

Наместо почеток на судскиот процес против ексначалникот на петтата управа, Горан Грујовски, и шестмина негови колеги обвинети во случајот „Тврдина 2“, денешното рочиште беше процедурална расправа меѓу обвинителите од СЈО, судот и одбраната за тоа дали класифицираните докази смеат да бидат употребени во постапката, односно дали треба да бидат деклсифицирани или не.

На денешното рочиште, покрај првообвинетиот во случајот, Горан Грујовски, беа присутни и другите обвинети, освен една од нив. Следното рочиште е закажано за 17 јануари следната година.

По речиси тричасовна дебата, расправа и изложување аргументи, судијката Лидија Петровска го задолжи СЈО да обезбеди дозвола од органот што ги создал класифицираните информации предложени како докази, односно УБК, и тие да бидат декласифицирани.

На ова реагираа обвинителите на СЈО, Трајче Пеливанов и Ленче Ристоска, кои се повикаа на одредбите од Законот за класифицирани информации и на Законот за кривична постапка.

Тие го бранеа ставот дека нема никакви законски пречки, а и досегашната судска практика дозволува овие класифицирани информации да бидат употребени за време на судскиот процес како докази.

– Наместо главна расправа, денеска се дебатираше за тоа дали постојат пречки судот да постапува по доказите кои се класифицирани, а беа предложени од наша страна. Ние се обидовме да го појасниме нашиот став дека не постојат пречки таквите докази да бидат изнесени во понатамошна постапка, а се раководевме, меѓу другото, и од досегашната практика на судот и посочивме дека на судот не му е непознато да постапува по класифицирани информации, а и дека законот такво нешто не забранува. Сепак, од судот бевме задолжени да побараме дозвола од органот што ги создал тие податоци да бидат користени во судска постапка, односно да бидат декласифицирани со степен за употреба во судска постапка – рече обвинителката Ристоска по завршувањето на денешното рочиште.

Прашана како оваа ситуација ќе влијае на судскиот процес, Ристоска рече дека тоа ќе значи кратко одложување на постапката и изрази надеж дека сепак ќе успеат да го надминат ова недоразбирање со судот.

Таа додаде дека со ваквата одлука на судот се доведуваат во прашање сите предмети во кои како докази биле користени класифицирани информации.

Никола Додевски, адвокатот на обвинетиот Грујоски, во текот на денешната расправа побара од судот да ги одбие класифицираните докази предложени од СЈО, односно тие да не може да се користат во судската постапка бидејќи СЈО ги предложило без да добие дозвола од УБК за нивна употреба.

– Бараме судот овие докази, кои се прибавени без претходна согласнот на создавачот на класифицираните информации, да ги одбие бидејќи не можат да останат докази затоа што се прибавени на незаконит начин – рече Додевски, кој во текот на рочиштето неколкупати му сугерираше на судот да ги казни обвинителите на СЈО поради непочитување на судот, но судијката Петровска го одби.

По завршувањето на рочиштето, Додевски изјави дека со денешната одлука судот му дал шанса на СЈО да ја исправи процедуралната грешка околу предложените класифицирани докази.


Со „Таргет“ обвинетите во „Пуч“ ќе станат сведоци, а сведоците обвинети


Скопје, 19 ноември, 2016 - 14:18 (META) 

Што ќе се случи со обвинението за случајот „Пуч“ по отворањето на новата истрага на Специјалното јавно обвинителство? Дали ќе биде повлечено, проширено со нови обвинети или, пак, на обвинителната клупа на местото на сегашните ќе се седнат сега осомничените во случајот „Таргет“? Тоа ќе се знае откако судскиот процес и официјално ќе почне. Засега единствено што е сигурно е дека истрагата за „Таргет“ ќе има импликации во постапката за „Пуч“.

Ова го посочи и обвинителката Фатиме Фетаи, која го презентираше случајот „Таргет“, а го повтори и нејзината колешка Ленче Ристоска, одговарајќи на новинарските прашања. Ни Фетаи ни Ристоска не сакаа да кажат во која насока ќе одат тие импликации.

– Како ќе тече постапката, за тоа ќе треба да се произнесеме пред судот и ќе чекаме судот формално да закажа главна расправа. Она што во моментов можам да го кажам и она што е утврдено како неминовно, а како што кажа и колешката Фетаи, овој предмет ќе има импликации на тој предмет, меѓутоа во која насока ќе одат тие имликации не би зборувале предвремено туку ќе чекаме во иднина формално да го изнесеме нашиот став – изјави Ристоска.

Во случајот „Пуч“ обвинети во моментов се поранешниот директор на Управата за безбедност и контраразузнавање (УБК) Зоран Верушевски, неговата сопруга Соња Верушевска, лидерот на СДСМ Зоран Заев, Ѓорѓи Лазаревски, функционер во МВР и Бранко Палифров, вработен во Општина Струмица. Тие се товарат за кривичните дела шпионажа, неовластено прислушување и за насилство врз претставници на највисоките државни органи. За случајот веќе е осуден поранешниот инженер во УБК, Звонко Костовски, кој го призна делото и се спогоди со обвинителството. Сепак за неговата пресуда СЈО до Врховниот суд поднесе Барање за заштита на законитоста (БЗЗ), заради неколку спорни моменти.

Единствен сведок во случајот е актулениот лидер на ВМРО-ДПМНЕ и поранешен премиер Никола Груевски.

Токму Груевски, во своето обраќање на 31 јануари 2015 година, истиот ден кога МВР го објави во јавноста случајот „Пуч“ и поднесе кривична пријава против Зоран Заев, истакна дека зад прислушувањето стои странска разузнавачка служба чиј главен соработник во земјава е Зоран Верушевски кој развил своја агентурна мрежа во Македонија.

Денеска во рамките на случајот „Таргет“ СЈО соопшти дека прислушувањето било вршено од Управата за безбедност и контраразузнавање преку нејзините системи за следење на комуникација, во период од 2008 година до 2015 година.

Осомничени се 10 поранешни и сегашни вработени во УБК кои се наоѓале на раководни позиции или биле дел од пониски ешалони, постои основно сомневање дека ја искористувале службената положба и незаконски прислушувале.

Овие лица, чиј идентитет СЈО не го откри, најверојанто се Костовски, Лазаревски и Верушевски, кои според наводите во „Таргет“ се тие кои што го откриле прислушувањето, за разлика од „Пуч“ каде се обвинети дека тие незаконски прислушувале.

Во врска со тврдењето за вмешаност на странски служби, обвинителката Ристоска денеска изјави дека СЈО не поседува докази дека странски разузнавачки служби  вршеле следење на комуникациите.

– Од она што ние го поседуваме како доказен материјал а е и предмет на испитувањето беше дали,во рамките на УБК била вршена злоупотреба на системите и сите докази кои што ги обезбедивме одеа во таа насока. Досега ние не поседуваме докази за тоа дека од страна на странски служби или жолти комбиња било вршено следење на комуникациите – рече Ристоска посочувајќи дека во испитувањето како појдовна основа ја зеле пресудата против Костовски.


СЈО не потврдува, но не исклучува дека и Иванов и амбасадорите биле прислушувани


Скопје, 18 ноември, 2016 - 13:46 (META) 

Специјалното јавно обвинителство (СЈО), иако тоа прашање беше поставено, денеска не кажа дали во изминатите седум години (од 2008 до крајот на 2015 година), освен политичари, новинари и бизнисмени биле прислушувани и амбасадори и дипломати во земјава, како и шефот на државата, Ѓорге Иванов.

Обвинителката Ленче Ристоска, иако не ја потврди, не ја ни исклучи можноста дека и Иванов и странски дипломати биле „таргет“ на осомничените, за кои денеска беше отворена истражна постапка која СЈО ја презентираше на прес-конференција.

Ристоска рече дека „во моментот не поседува податоци за тоа кој сè бил прислушуван“, но оти верува дека истрагата ќе даде одговор и на овие прашања. Таа елегантно го избегна директен одговор и се извлече со формулацијата: „Овие податоци сега не ги поседувам пред мене за да ви соопштам точно кој сè бил предмет на следење“.

– За лицата што биле таргет поседуваме определни податоци, меѓутоа овие податоци сега не ги поседувам пред мене за да ви соопштам точно кој сè бил предмет на следење. Се разбира, се работи за поголем број телефонски броеви, чии сопственици треба и дополнително да ги утврдуваме. Како што ќе напредува истрагата, верувам дека ќе добиете одговори и на тоа прашање – рече Ристоска, одговарајќи на прашањето дали биле прислушувани и странски амбасадори.

За тоа дали и претседателот Иванов бил прислушуван, таа изјави дека „во овој момент не може да обезбеди таков податок“.

– Се разбира, ако има, дополнително ќе ве известиме, во моментов немам таков податок дали претседателот на државата бил таргет – рече Ристоска.


СЈО денеска на прес-конференција ќе презентира нова истрага наречена „Таргет“


Скопје, 18 ноември, 2016 - 8:58 (META) 

Специјалното јавно обвинителство на денешната прес-конференција, закажана за 11 часот, ќе ја презентира новата истрага наречена „Таргет“.

– Денеска со почеток во 11 часот, прес-конференција за новата истрага со назив „Таргет” – пишува на профилот на „Фејсбук“ на Специјалното јавно обвинителство.

Последен пат Специјалното јавно обвинителство излезе во јавноста на 20 октомври, кога обвинителките Фатиме Фетаи и Ленче Ристоска ги презентираа истражните постапки за случаите „Топлик“ и „Тендери“.