!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заниер ќе ги поддржи напорите на Македонија за зацврстување на демократските вредности


Скопје, 3 октомври, 2017 - 16:31 (META) 

Mинистерот за надворешни работи, Никола Димитров, денеска имаше средба со високиот комесар за национални малцинства на ОБСЕ, Ламберто Заниер, кој присуствуваше на Годишниот состанок на шефовите на теренски оперативни мисии на ОБСЕ во Југоисточна Европа, што годинава се организира во Скопје, соопшти македонското МНР.

Димитров на средбата изразил задоволство од долгогодишната соработка со Македонија и подготвеност таа да продолжи во иднина, со фокус на интеграцијата и на кохезивноста во македонското општество.

Како што соопштуваат од МНР, Димитров го информирал Заниер за активностите на Владата, како и за цврстата решеност да ја искористи шансата за влез и за етаблирање на Македонија во семејството на развиените демократии. Во тој контекст, Димитров ги пренел и видувањата во поглед на изградба на поголема кохезија на етничките заедници, како и актуелниот момент на поврзување преку етничките линии произлезен по политичката криза во Македонија.

На средбата, Заниер изразил задоволство од изложената визија од македонска страна за понатамошниот развој на државата и ја нагласил личната и подготвеноста на неговиот тим да дадат поддршка на напорите на Македонија на патот кон зацврстување и развој на демократските вредности и стандарди.


Заев го уверил Заниер дека Владата ќе работи за целосна интеграција на сите граѓани


Скопје, 3 октомври, 2017 - 15:34 (META) 

„Се определивме за концептот „едно општество за сите“, кој се покажа успешен затоа што сите граѓани сакаат да живеат квалитетно во родната земја. Ние се грижиме за практичните потреби на сите граѓани, во согласност со Уставот и така ќе продолжиме да работиме“, рекол премиерот Зоран Заев на денешната средба со високиот комесар за национални малцинства на ОБСЕ, Ламберто Заниер, соопшти Владата.

На состанокот, во кој учествувала и министерката за образование и наука, Рената Дескоска, како што стои во владиното соопштение, Заниер изразил поддршка за Владата.

– Забележлива е порелаксирана атмосфера меѓу граѓаните во Македонија. Продолжете со политиките што обезбедуваат перспективи – рекол Заниер, нагласувајќи дека земјава се движи во добра насока.

Премиерот Заев рекол дека Република Македонија е определена и кон продлабочување на пријателствата и на соработката и во регионални рамки, оценувајќи дека во регионот постои позитивна клима што може да обезбеди чекор напред кон развој на сите држави и нивните граѓани.

– Да се посветиме конечно на економијата, затоа што граѓаните тоа го очекуваат од нас – рекол премиерот.


Курц и Заниер најостро ги осудија упадот во Собранието и нападот на пратениците


Виена, 28 април, 2017 - 10:09 (META) 

Претседавачот на ОБСЕ и австриски министер за надворешни работи, Себастијан Курц, и генералниот секретар на ОБСЕ, Лaмберто Заниер, најостро го осудуваат вчерашниот упад во Собранието на Македонија во Скопје.

Тие сметаат дека насилството не може да биде замена за политичките решенија и дека таквите решенија треба да се бараат во рамките на демократските процеси на одговорен начин.

„Нападите на неколку членови на Собранието, упадот во зградата на парламентот – срцето на демократијата на земјата, се шокантни. Ова е акт на заплашување, напад на претставниците на народот, кој јас категорично го осудувам. Смиреноста и редот мора веднаш повторно да се воспостават. Ги повикувам сите страни да се воздржат од понатамошна ескалација на тензии или насилство“, рече Курц.

Генералниот секретар Заниер рече дека за насилството нема место во политичкиот процес.

„Насилството мора веднаш да престане. Органите за спроведување на законот мора да обезбедат безбедност на пратениците и да ги изведат сторителите пред лицето на правдата“, изјави Заниер.

Претседавачот на ОБСЕ и генералниот секретар ги повикуваат политичките чинители повторно да го воспостават дијалогот во Собранието и да ги почитуваат демократските принципи, како и резултатите од декемвриските избори.


Заниер бара продолжување на дијалогот меѓу Косово и Србија


Приштина, 11 март, 2017 - 11:40 (META) 

Генералниот секретар на ОБСЕ, Ламберто Заниер, синоќа во Приштина се заложи за продолжување на дијалогот меѓу Косово и Србија, како и за спроведување на досега постигнатите договори.

Тој по средбата со претставници на Српската листа, соопшти дека главна тема на разговорите била „општата политичка и безбедносна состојба на малцинските заедници и функционирањето на институциите во заштита на немнозинските заедници“ во Косово.

Заниер се заложил и за продолжување на досегашната добра соработка на претставниците на малцинските заедници во Косово и на ОБСЕ, се наведува во соопштението на Српската листа.


Враќањето на политичката стабилност мора да биде највисок приоритет, порача Заниер


Скопје, 9 март, 2017 - 18:52 (META) 

Надминување на политичката пат-позиција и враќањето на политичката стабилност мора да бидат највисок приоритет, се наведува во соопштението на Мисијата на ОБСЕ во Скопје по завршувањето на посетата на генералниот секретар на организацијата, Ламберто Заниер, и на средбите со државниот и со политичкиот врв на земјава.

Заниер, стои во соопштението, изразил загриженост за последните случувања во земјава и ги повикал политичките лидери да ѝ стават крај на продолжената политичка криза во интерес на сите граѓани.

– Надминувањето на политичката пат-позиција и враќањето на политичката стабилност мора да бидат највисок приоритет. Клучот за решението лежи во рацете на политичките актери, кои треба да се справат со предизвикот и да ја решат кризата за доброто на сите граѓани – вели Заниер, забележувајќи дека резултатите од декемвриските избори во 2016 година „овозможија солидна основа за формирање влада и го повика Собранието да почне со работа, согласно демократските принципи и владеењето на правото“.

Заниер ги осудил неодамнешните провокативни пораки и инциденти кои би можеле да доведат до влошување на меѓуетничките односи и нагласил дека Охридскиот рамковен договор е од клучна важност за заштитата и за унапредувањето на правата на заедниците.

– Ги охрабрувам сите релевантни страни од Охридскиот рамковен договор да останат посветени на неговата имплементација. ОБСЕ, нејзините институции и Мисијата во Скопје ќе продолжат да се залагаат за мултиетничко и за демократско општество и да обезбедуваат помош во областите како што се владеење на правото, избори, демократско владеење и реформа на полицијата. Ги охрабруваме сите актери целосно да ја искористат оваа експертиза – вели генералниот секретар на ОБСЕ.

Заниер истакнал дека враќањето на довербата во институциите е од особена важност.

На средбата со претставниците на граѓанските организации, тој ја нагласил нивната важна улога „во промовирањето на демократското општество“ и изразил загриженост поради извештаите за притисоци“.

Во текот на посетата на Македонија, Заниер имаше средби со претседателот Ѓорге Иванов, министерот за надворешни работи во заминување, Никола Попоски, лидерите на политичките партии ВМРO-ДПМНЕ, СДСМ, ДУИ, Движење Беса, Алијансата за Албанците и ДПА, како и со претставниците на невладиниот сектор.


Заниер твитна: Политичката криза не смее да се прелее во меѓуетнички тензии


Скопје, 9 март, 2017 - 18:05 (META) 

Политичките лидери мора да ги надминат партиските интереси и да ја решат политичката криза и не смее да се дозволи ова да се прелее во меѓуетнички тензии. Ова е главната порака што генералниот секретар на ОБСЕ, Ламберто Заниер, им ја пренел на претседателот на државата, Ѓорге Иванов, и на министерот за надворешни работи, Никола Попоски.

„Утрово се сретнав со претседателот и со министерот за надворешни работи. Мојата главна порака беше дека лидерите мора да се исправат пред предизвикот, да ги надминат партиските интереси и да ја решат политичката криза за доброто на сите граѓани. Не смее да се дозволи ова да се прелее во меѓуетнички тензии!“, стои во твитот на Заниер објавен на твитер-профилот на Делегацијата на ОБСЕ во Скопје.

Заниер на својот твитер-профил напиша дека на претседателот Иванов му ја нагласил својата „загриженост за политичкиот ќор-сокак“ и дека „вперувањето прст во меѓуетничките прашања е опасно и контрапродуктивно“.

Генералниот секретар на ОБСЕ, кој е во дводневна посета на земјава, напиша и дека е „многу загрижен од притисокот врз граѓанскиот сектор“, чија улога, како што напиша, е „клучна во демократските процеси“.

Генералиот секретар на ОБСЕ денеска во Скопје имаше средби со претседателот Иванов, шефот на македонската дипломатија во заминување, Никола Попоски, лидерите на парламентарните политички партии, ВМРО-ДПМНЕ, СДСМ, ДУИ, Беса, Алијанса на Албанците и ДПА, како и со претставници на граѓанските организации.


Попоски и Заниер разговараа за случувањата во постизборниот период


Скопје, 9 март, 2017 - 17:00 (META) 

Шефот на македонската дипломатија во заминување, Никола Попоски, денеска со генералниот секретар на ОБСЕ, Ламберто Заниер, разговараше актуелната политичка ситуација во Република Македонија, како и за севкупната соработка на Македонија со ОБСЕ.

На средбата, како што стои во соопштението од МНР, Попоски ја нагласил корисноста од поддршката на Организацијата, која е посветена на изборни реформи, интеграција преку образованието и на процесот за интегрирање на Македонија во ЕУ.

„Воедно, соговорниците разменија и мислења за најактуелните прашања на политички план, во постизборниот период. Министерот Попоски јa истакна и важноста на регионалната соработка меѓу државите од Балканот, во согласност со најдобрите практики и стандарди прифатени во ОБСЕ. Во тој контекст, го посочи неодамнешниот министерски состанок на земјите од Балканот што цели кон заеднички пристап за побрз влез во ЕУ, како и договорениот неформален систем за координирање на активностите на групата држави во регионот, што се стремат кон членство во ЕУ“, стои во соопштението од МНР.


Иванов – Заниер: Кризата е правна и политичка – од правната лесно ќе излеземе


Скопје, 9 март, 2017 - 13:52 (META) 

Претседателот Ѓорге Иванов денеска се сретна со генералниот секретар на ОБСЕ, Ламберто Заниер, кому му соопштил дека кризата има правен и политички аспект, кои се проблем, но и услов за излез од неа.

„Во однос на правниот аспект поврзан со роковите за доделување на мандатот, Иванов истакна дека е лесно надминлив. Во однос на политичкиот аспект, претседателот Иванов истакна дека останува на ставот дека платформата од Тирана треба да биде осудена и отфрлена, исто како и мешањето во внатрешните работи на Република Македонија, кои не помагаат во напорите за добрососедски односи и за стабилноста и безбедноста во регионот“, се вели во соопштението од претседателскиот кабинет.

Од кабинетот на Иванов соопштуваат дека генералниот секретар на ОБСЕ изразил загриженост за меѓуетничките тензии и апелирал сите да направат конструктивни чекори за надминување на кризата. Тој се согласил со Иванов дека лидерите од регионот треба да се воздржат од штетна реторика.

Иванов и Заниер размениле и мислења во врска со безбедносната состојба во земјава и во регионот, како и за мигрантската и бегалската криза.

Претседателот Иванов изразил очекување за продолжување на соработката со ОБСЕ и на нивната поддршка во области како што се владеење на правото, полицијата, судството, и унапредувањето на меѓуетничките односи и соживот.


Заниер: Политичката криза се заканува да добие меѓуетничка и регионална димензија


Скопје, 9 март, 2017 - 11:21 (META) 

Напредокот постигнат во 2016 година ќе биде загрозен без политичка стабилност, а продолжената политичка криза е штетна за земјата и му штети на народот, оцени генералниот секретар на ОБСЕ, Ламберто Заниер, во колумна објавена во „Утрински весник“.

„Двегодишна политичка криза не само што ги забавува реформите, туку и се заканува да добие меѓуетничка и регионална димензија, нешто што земјата не смее да си го дозволи, а ниту, пак, регионот“, вели Заниер.

Тој истакнува дека иако предвремените избори во декември 2016 година генерално се сметаа за можност да се сврти страницата и да се продолжи понатаму, тоа сè уште не се случило и оти земјата, и покрај тоа што изборите беа генерално добро спроведени, влегла во нов проблематичен период.

Заниер наведува дека неодамнешните провокативни пораки на некои политички субјекти, тврдењата дека унитарноста и суверенитетот на државата се загрозени и етничките инциденти и слогани се загрижувачки. Тој, исто така, ги повикува лидерите од регионот да се однесуваат одговорно и да се воздржуваат од изјави или други иницијативи што би можеле да доведат до влошување на ситуацијата.

„Сега е време целиот фокус да се стави на владеењето на правото, независноста на судството, слободата на изразување и слобода на медиумите, демократското владеење, слободни и правични изборни процеси, меѓуетничките односи, образованието и градењето на капацитетите на државните институции. ОБСЕ може да ви помогне. Тоа е нашата улога и ве охрабрувам да ја искористите“, заклучува Заниер.


Шефот на ОБСЕ ќе се сретне со државниот и со политичкиот врв


Скопје, 9 март, 2017 - 9:41 (META) 

Генералниот секретар на ОБСЕ, Ламберто Заниер, синоќа допатува во Скопје поради новонастаната криза со недоделувањето на мандатот за формирање нова влада.

Заниер во текот на денот ќе се сретне со шефот на македонската дипломатија, Никола Попоски, претседателот Ѓорге Иванов, лидерите на парламентарните политички партии, како и со претставниците на граѓанските организации.

Минатата недела, откако Иванов одлучи да не го додели мандатот, Заниер преку социјалната мрежа „Твитер“ изрази загриженост и ја најави својата посета на Македонија.

„Загрижен сум поради развојот на настаните во Скопје. Владеењето на правото мора да надвладее. Следната недела ќе го посетам Скопје и ќе имам средби со претставници на власта, лидери на политичките партии и со претставници на граѓанското општество. Резултатите од декемвриските избори се цврста основа за формирање влада што ќе ги застапува интересите на сите граѓани“, напиша Заниер на „Твитер“.