Повлечени споровите против државата, по донесувањето на законот за енергетика


Скопје, 28 мај, 2018 - 15:06 (META) 

Секретаријатот на Енергетската заедница денеска ги повлече поднесените барања за спорови против Македонија, соопштија од кабинетот на вицепремиерот за економски прашања Кочо Анѓушев.

„По серија на јавни расправи во кои беа вклучени сите засегнати страни, во транспарентна постапка, Собранието на 21 мај 2018 година го донесе новиот Закон за енергетика, во кој се транспонирани ЕУ директивите и регулативите на Третиот енергетски пакет. Со новиот закон се враќа основното човеково право на избор на потрошувачот од кого ќе се снабдува со енергија, а воедно и се исполнуваат условите за отворање на пазарот на електрична енергија, што ќе донесе поголема конкуренција и подобар квалитет на услугите на граѓаните“, се вели во соопштението.

Од таму потсетуваат дека законот требаше да биде донесен најдоцна до 1 јануари 2015 година, а поради ненавременото исполнување на превземените обврски од Европската унија и не транспонирање на Третиот енергетски пакет, Секретаријатот на Енергетската заедница имаше покренато постапки за спорови кон Македонија.


Анѓушев: Новиот закон за енергетика ќе штити од неконтролиран раст на цените на струјата


Скопје, 4 мај, 2018 - 13:56 (META) 

На денешната јавна расправа за предлог- законот за енергетика во Собранието, вицепремиерот за економски прашања Кочо Анѓушев порача дека овој закон се носи за доброто на граѓаните и дека обезбедува конкурентност во енергетскиот сектор.

„Овој Закон обезбедува конкурентност, а кога постои конкурентност има и бенефит за крајните корисници, бидејќи со зголемена конкуренција се подобрува квалитетот на услугите и се намалуваат цените“, рече Анѓушев.

Механизмот на изборот на универзален снабдувач, кој ќе биде избран во јавна постапка, обезбедува заштита на граѓаните, како крајни потрошувачи на енергенсите.

„Мораме да се заштитиме од можноста цените неконтролирано да растат. Тоа во овој закон е направено квалитетно, во делот на електричната енергија, каде што е воведен универзалниот снабдувач кој ќе биде избран на јавен повик, со дефинирани критериуми “, дополни Анѓушев.

Преку спроведување на законот се овозможува поддршка за обновливите извори на енергија. Со овој Закон, преку воведување на премиум тарифите се дава можност за отворање нови локации за изградба на фотоволтаични централи, при што државата ќе објави тендери за премиуми, а инвеститорите ќе имаат можност произведената струја да ја продаваат на слободен пазар.

Тој додаде дека Владата ќе го реализира проектот за изградба на нови ветерните електрани, додека се постигне моќност од 150 мегавати, што е во согласност со студијата за одржливост во рамките на енергетскиот систем на Македонија.


Брисел ќе забрани продажба на второкласни производи во Источна Европа


Брисел, 11 април, 2018 - 16:23 (META) 

Европската комисија подготвува предлог-закон со кој ќе се регулира различниот квалитет на навидум исти производи на пазарот во Европска Унија. На овој начин, потрошувачите ќе се заштитат од продажба на производи кои се рекламираат како исти, а имаат значајни разлики во составот и карактеристиките.

– На почетокот на мандатот, од Европска комисија ми рекоа дека се додека производот е сигурен за здравјето, проблем за нив нема. Како да ние треба да бидеме благодарни што нe нè трујат. За неколку години стигнавме до предлог-закон со кој треба да се регулира целиот пазар на Европска Унија – изјави хрватската европратеничка Билјана Борзан.

Овој законски предлог е дел од големиот пакет кој Европската комисија го подготвила за потрошувачите, а тој вклучува и закон кој го регулира правото на колективна тужба.

– Скандалот со „Фолксваген“ покажа дека европските купувачи останаа незаштитени, за разлика од американските. Во случај на двоен квалитет треба да се има можност за колективна тужба. Ако законот стапи на сила, тоа ќе значи дека еднаквоста на сите граѓани ќе се почитува – додаде Борзан.

Европска комисија предвдува 800.000 евра за истражување на квалитетот на производите кои се навидум исти.


Засилени контроли на квалитетот и безбедноста на јајцата пред Велигден


Скопје, 20 март, 2018 - 11:03 (META) 

Агенцијата за храна и ветеринарство (АХВ) ги зајакна инспекциските контроли на квалитетот и безбедноста на јајцата, во пресрет на Велигден кога и потрошувачката е најголема.

– Покрај контролите на магацините, зајакнати контроли се спроведуваат и на граничните премини, при увоз, со цел на граѓаните да им се понуди безбеден и квалитетен производ. Секоја недоследност во поглед на овој прехранбен производ граѓаните и компаниите можат да го пријават на Агенцијата за храна и ветеринарство, врз основа на што ќе биде спроведена и инспекциска контрола – вели директорот на АХВ, Зоран Атанасов.

Претседателот на Групацијата за живинарство при Стопанска комората, Абдулезел Догани од „Везе Шари“, компанија која произведува јајца, побара при инспекциските контроли при увоз да се обрне внимание и да тоа дали јајцата кои се увезуваат во земјава го имаат кодот на државата од каде потекнуваат, за да се спречи можноста од манипулации на домашниот пазар како македонски да се пласираат јајца од увоз.


Почнува подготовката на измените на законот за квалитетот на воздухот


Скопје, 27 февруари, 2018 - 16:37 (META) 

Министерството за животна средина и просторно планирање од денеска почнува со подготовка на измени на Законот за квалитетот на амбиенталниот воздух.

Целта на Законот, кој како што е наведено на Единствениот национален електронски регистар на прописи (ЕНЕР), треба да биде готов до крајот на април оваа година, е да се воспостави едноставна процедура на подготовка на плановите за квалитет на воздухот и на краткорочните акциски планови, како и ефикасно спроведување на мерките за подобрување на квалитетот на воздухот.

„При анализа на состојбата со управување со квалитетот на воздухот во Република Македонија се увиде дека постоечкиот начин на подготовка на плановите за квалитет на воздух на ниво на зона/агломерација создава тешкотии, бидејќи на ниво на зона се вклучени поголем број на општини со различни проблеми и извори на загадување на воздухот. Начинот на усвојување на планските документи на ниво на Единиците на локалната самоуправа (ЕЛС) и проверка и одобрување на истите од страна на централната власт не се јасно прецизирани“, стои во информацијата за подготовка на предлог на измените.

Во информацијата се наведува и дека пропишаните краткорочни мерки на локално ниво, како и оние предложени од интерсекторската работна група и усвоени од Владата се спроведуваат со потешкотии.

Анализата утврдила дека контролата на имлементацијата на краткорочните мерки од инспекциските служби се спроведува делумно, а констатиран е и недоволен број на државни инспектори и овластени инспектори за животна средина кои вршат контрола на спроведувањето на мерките.

Инаку, состојбата со квалитетот на воздухот во Скопје и уште во неколку други градови во земјава е алармантна, поради енормното загадување, што беше причина за протести организирани од повеќе граѓански здруженија за изнаоѓање на решенија за овој проблем.


Тевдовски: Со новиот закон за јавни набавки, освен цената ќе биде важен и квалитетот


Скопје, 14 февруари, 2018 - 13:53 (META) 

Со новиот Закон за јавни набавки, освен цената како најважен услов во распишувањето на тендер за јавна набавка од страна на државните органи, ќе биде важен и квалетитетот рече денеска министерот за финансии, Драган Тевдовски кој измените на законот ги презентираше пред бизнис-заедницата во Стопанска комора.

– Во согласност со европските правила и практика, новиот Закон дава можност покрај цената, да се вреднува и квалитетот. Притоа, договорниот орган зависно од предметот на набавка, самиот ќе може да утврди дали како критериум ќе ја користи најниската цена, исплатливоста врз основа на животниот век на производот или најдобриот однос помеѓу цената и квалитетот – образложи Тевдовски.

Со законот, исто така, се воведува задолжителна обврска за објавување на договорите и останатата документација од секоја поединечна јавна набавка на Електронскиот систем за јавни набавки. Намерата е, како што објасни Тевдовски, јавноста да има целосен увид во документацијата од јавните набавки.

Со новиот закон се вградуваат и забелешките на Европската комисија и домашната стручна јавност во поглед на електронските аукции.

Во минатото, како што објасни Тевдовски, задолжителните електронски аукции дале добри резултати во некои случаи, но во одредени постапки довеле до незаконско договарање на понудувачите и пораст на цените во отсуство на вистинска конкуренција.

– Со новиот закон, електронските аукции остануваат, но како опција. Се стеснува употребата на негативните референци согласно укажувањата на деловната заедница и увидените слабости од досегашната пракса. Се разјаснува начинот на вршење на малите набавки и се воведува и обврска за известување за малите набавки  – изјави Тевдовски.

Тој додаде дека ќе се воведе електронски пазар на мали јавни набавки, кој ќе биде во вид на електронски каталог, што ќе овозможи брзо и ефикасно решавање на набавките од мала вредност кои се едноставни по својата природа.

Согласно програмата за реформа на управување со јавни финансии 2018 – 2021, новиот закон за јавни набавки треба да биде усвоен од страна на Собранието до октомври годинава, а да започне да се применува од јануари следната година.


Владата ќе го укине Советот за јавни набавки за да ги поедностави процедурите


Скопје, 3 ноември, 2017 - 15:54 (META) 

Владата ќе го укине Советот за јавни набавки, бидејќи со неговото воспоставување, јавните набавки станале покомплицирани и се одвивале во подолг рок од предвидениот, рече денеска министерот за финансии, Драган Тевдовски, на дебатата „Реформа во системот за јавни набавки“.

– Со Советот за јавни набавки, јавните набавки тешко се спроведуваат, имаат бројни неоправдани бирократски бариери, кои не само што не придонесуваат да се спречат можните злоупотреби, туку доведуваат до блокирање на институциите и ги спречуваат во нивното функционирање – рече Тевдовски.

Сабина Факиќ од Центарот за граѓански комуникации смета дека треба да се води грижа за квалитетот на бараните производи или услуги, да се напуштат принципот на најниска цена и електронските аукции.

Според неа, реформите во овој дел се многу важни бидејќи една третина од буџетот се јавните набавки.


Ќе се испитува водата во Гостивар, резултатите од анализата – следната недела


Скопје, 27 октомври, 2017 - 16:21 (META) 

Министерството за здравство информира дека денеска екипа од Институтот за јавно здравје зела дополнителни мостри за испитување на квалитетот на водата во Гостивар, во однос на бактериолошка исправност, периодично физичко-хемиска, како и анализа на остатоци од пестициди, информираат од таму.

Резултатите од анализите се очекуваат на почеток на следната недела.

Bо текот на ноќта, во гостиварската болница лекарска помош побарале уште 60 нови лица со симптоми на дијареа и на изнемоштеност и со ова, вкупната бројка на заболени се зголеми на 360 лица.


СДСМ: За сто дена, Владата донесе мерки со кои го подобри квалитетот на живот на граѓаните


Скопје, 6 септември, 2017 - 10:30 (META) 

Парламентарното мнозинство и Владата предводена од СДСМ за само сто дена обезбедија повисока минимална плата во висина од 12.000 денари за околу 70.000 граѓани, ја враќаат евтината дневна тарифа на струјата, трајно го решаваат проблемот на 3.000 стечајни работници, обезбедуваат поголема помош за домашните компании и почнаа процедура за укинување на радиодифузна такса, се вели во соопштението на СДСМ.

Во него се додава дека институциите „се отвораат и работат во служба на граѓаните.“

„Од први септември почна двосменското работење на клучните институции, како што се Управата за јавни приходи, Царинската управа, градинките, Управата за водење матични книги и службите за издавање лични карти и пасоши во МВР, кои сега работат до 21.30 часот“, се додава во соопштението.


Царовска: Во Фондот на ПИОМ недостасувале 21,2 милијарди денари во 2016 година


Скопје, 22 август, 2017 - 16:29 (META) 

Во Фондот за пензиско и инвалидско осигурување на Македонија (ПИОМ), лани недостасувале 21,2 милијарди денари што е трипати повеќе од 2005 година, кога трансферот од буџетот во овој Фонд изнесувал 7,7 милијарди денари, информираше денеска министерката за труд и социјална политика, Мила Царовска.

– Недостатокот на финансиски средства во Фондот на ПИОМ е огромен и ние ќе се трудиме да најдеме начин како да го надоместиме. Затоа ни е важно да имаме повисоки плати, а со тоа ќе добиеме и повисоки пензии. Колку ја зголемувате дупката во ПИОМ толку помалку внимавате за квалитетот на живот на пензионерите – рече Царовска.