Турската централна банка презема мерки да го запре падот на лирата


Истанбул, 13 август, 2018 - 12:31 (META) 

Централната банка на Турција денеска порача дека е подготвена „да ги преземе сите неопходни мерки“ за да ја зачува финансиската стабилност по големиот пад на лирата во последните неколку дена. Таа вети дека на банките ќе им ја обезбеди „сета ликвидност што им е потребна“.

Ефектот од оваа најава среде растечкиот дипломатски спор со САД, кој предизвика силен удар на турскиот финансиски пазар беше слаб. Пред најавата од Централната банка лирата беше падната за 9%, а потоа дојде на пад од 6%.

Падот на лирата почна уште на почетокот на годината, од кога загуби речиси 34 отсто од својата вредност во однос на доларот. Најновата криза почна во четвртокот вечерта, кога се менуваше по курс 6,3 лири за еден американски долар,  додека на крајот на јануари еден долар вредеше четири лири.

Работите се влошија во петокот, кога претседателот на САД, Доналд Трамп, го одобри удвојувањето на царините за челикот и алуминиумот увезен од Турција. На тоа претходеше одбивањето на Турција да се пушти на слобода американски пастор кој е во притвор во Турција речиси две години.

Експертите падот на лирата го толкуваат и со стравови дека и турската економија е во пад.

Сепак, тоа позитивно влијае на туристичката индустрија на Турција, која поради ниската вредност на лирата, станува многу конкурентна со пониските цени за странските гости.


Народна банка донесе стратегиски план за ниска инфлација и стабилен курс на денарот


Скопје, 31 мај, 2018 - 12:25 (META) 

Советот на Народната банка денеска одржа редовна седница на која ги донесе Стратегискиот план и Програмата за истражувачка активност за периодот од 2019 до 2021 година.

„Стратегискиот план за следниот тригодишен период содржи единаесет стратегиски цели кои јасно ја изразуваат определбата за одржување ниска и стабилна инфлација преку стратегијата на одржување стабилен курс на денарот во однос на еврото, одржување финансиската стабилност како составен елемент на макроекономската стабилност и предуслов за остварување економски раст и просперитет. Имајќи го предвид динамичното и променливо окружување, во рамките на Стратегискиот план се разработени основните предизвици во работењето, како и најважните, критични точки на делување во наредниот тригодишен период“, се вели во соопштението на Народна банка.


Горивата од ноќеска на полноќ поскапуваат до два денари


Скопје, 14 мај, 2018 - 13:34 (META) 

Цената на горивата од ноќеска на полноќ се зголемува од еден до два денари, одлучи денеска Регулаторна комисија на енергетика.

Цената на „еуросупер БС – 98“ се зголемува за два денара за литар, на „еуросупер БС-95“ за еден ипол денар, а на „еуродизелот“ се зголемува за еден денар.

Просечната цена на суровата нафта во изминатите 14 дена изнесуваше 75,134 долари за барел, а курсот на денарот во однос на доларот 51,30 денари.


Цената на горивата се намалува за половина денар


Скопје, 16 октомври, 2017 - 15:27 (META) 

Малопродажните цени на бензинот „еуросупер БС-95“, на дизелот и на екстралесното масло за домаќинство, од вечер на полноќ се намалуваат за половина денар по литар, одлучи денеска Регулатрната комисија за енергетика.

Новата цена на „еуросупер БС-95“ изнесува 63 денари за еден литар, на „еуродизел“ – 51 денар, а „еуросупер БС-98“ останува со цена од 65 денари за еден литар.

Намалувањето се должи на пониската просечната цена на суровата нафта на светскиот пазар, како и на намалувањето на курсот на денарот во однос на доларот.


Хрватска се подготвува за воведување на еврото


Загреб, 9 октомври, 2017 - 10:31 (META) 

Народна банка на Хрватска подготви стратегија за воведување на еврото, која содржи анализа во корист на можните ризици од влегување во еврозоната, а ќе се објави на крајот на овој месец, пишуваат хрватските медиуми.

Евростратегијата ќе послужи како темелен документ за јавна расправа за воведување на еврото, која ќе ја отвори премиерот Андреј Пленковиќ.

Пленковиќ изјави дека се залага за воведување на еврото, по што би следувало официјално барање за влегување на Хрватска во Европскиот механизам на девизен курс (ЕРМ2).

Последен пат одлука за влегување на некоја земја во ЕРМ2 беше донесена во 2005 година и тоа за Словачка.


Горивата поскапуваат од вечерва на полноќ


Скопје, 18 септември, 2017 - 16:26 (META) 

Бензинот од ноќеска на полноќ поскапува за половина денар по литар, а цената на дизел-горивата се зголемува за еден и пол денар, одлучи денеска Регулаторната комисија за енергетика (РКЕ).

Новата малопродажна цена на „еуросупер БС-95“ ќе изнесува 63,5 денари за еден литар, а литар „еуросупер БС-98“ќе се продава за 65 денари. Малопродажната цена на „еуродизел“ ќе биде 49,5 денари за еден литар.

Како причина за зголемувањето на малопродажните цени на нафтените деривати од РКЕ ги посочуваат за 5,14 отсто повисоката просечна цена на суровата нафта на светскиот пазар во изминатите 14 дена и за 0,759 отсто понискиот курс на доларот во однос на денарот.


Дизел-горивата поевтинуваат за 1,5 денар, а цената на бензинот останува иста


Скопје, 3 април, 2017 - 13:18 (META) 

Дизел-горивата од ноќеска на полноќ поевтинуваат за еден и пол денар за литар, а цената на бензинот останува иста, одлучи денеска Регулаторната комисија за енергетика (РКЕ).

Малопродажната цена на „еуросупер БС-95“ останува 65 денари за еден литар, а на „еуросупер БС- 98“ е 67 денари за литар. Новата цена на „еуродизел“ ќе изнесува 50,5 денари.

Како причина за намалувањето на цените на нафтените деривати од РКЕ ги посочуваат за 1,71 отсто пониската просечна цена на суровата нафта на светскиот пазар во изминатите 14 дена и за 2,27 отсто понискиот курс на доларот во однос на денарот.


По победата на Трамп, вредноста на доларот почна да се зголемува


Вашингтон, 16 ноември, 2016 - 14:55 (META) 

Трговците со валути сметаат дека постојат 45 проценти шанси за вредноста на доларот спрема еврото да се зголеми на еден долар до крајот на идната година, пишува „Блумберг“.

Пазарот денеска се потпира на ветувањето на новиот американски претседател Доналд Трамп дека ќе ги намали даноците и дека ќе ја зајакне потрошувачката. Тоа би требало да го зголеми економскиот пораст, а тоа на крајот би довело до побрзо зголемување на каматните стапки на централната банка.

Аналитичар во „Дојче банка“, која е четврти најголем трговец со валути во светот, предвидува дека курсот ќе се зголеми на 1,05 долари за едно евро, а до крајот на следната година едно евро би можело да чини 95 центи.

На тој начин еврото во однос на доларот би било најслабо од 2002 година.


Народна банка откупила 91,3 милиони евра во првите девет месеци


Скопје, 12 октомври, 2016 - 15:37 (META) 

Најновите податоци за девизните резерви во септември покажуваат висок квартален пораст, што произлегува од задолжувањето на државата на меѓународниот финансиски пазар во јули, интервенциите на Народна банка со откуп на девизниот пазар и порастот на девизните депозити на банките кај Народна банка.

Народната банка и во септември интервенирала со откуп на девизи од банките (вкупно 18 милиони евра), а овој тренд продолжува и на почетокот на октомври.

– Со тоа, вкупниот износ на интервенциите за откуп на девизи на Народната банка во текот на летниот период, заклучно со почетокот на октомври, изнесува 91,3 милиони евра, со што се надоместија повеќе од 70 проценти од продажбите во периодот на шпекулативниот напад на девизниот курс оваа година. Со високата девизна ликвидност во септември, се овозможи банките и понатаму активно да пласираат девизни депозити на подолг рок (6 и 12 месеци), по позитивни стапки, кај Народната банка – се вели во најновиот извештај на Народна банка.

Податоците за септември покажуваат понатамошен пораст на депозитите на населението и намалување кај корпоративниот сектор.


Бензинот поевтинува за половина денар по литар


Скопје, 3 октомври, 2016 - 12:41 (META) 

Бензинот од ноќеска на полноќ поевтинува за половина денар по литар, а цената на дизел-горивата останува иста, одлучи денеска Регулаторната комсија за енергетика (РКЕ).

Новата малопродажна цена на еден литар „еуросупер БС-95“ изнесува 61,5 денари, а на „еуросупер БС-98“ – 63 денари. Цените на „еуродизел“ и на екстралесното масло за домаќинство не се менуваат, односно остануваат 48 и 36,5 денари за еден литар.

Како причина за намалување на цените на нафтените деривати од РКЕ ги посочуваат за 0,832 отсто пониската просечна цена на сурова нафта на светскиот пазар во изминатите две недели и за 0,148 отсто понискиот курс на доларот во однос на денарот.