Во турските воздушни напади уништен древниот храм Аин Дара во Сирија


Дамаск, 28 јануари, 2018 - 19:36 (META) 

Во воздушните напади на Турција на регионот Африн на северот на Сирија оштетени се 60 отсто од древниот храм Аин Дара кој датира од арамејската ера (1300 – 700 година пред новата ера), соопшти сириската опсерваторија за човекови права, пренесува „ХРТ“.

Храмот е откриен во 1982 година, а се простира на површина од околу 50 хектари и е познат по остатоците од големи резбани блокови базалт и по ѕидните релјефи.

Сириската управа за антиквитети и музеи ги осуди турските напади на археолошките наоѓалишта, потврдувајќи ја информацијата за „уништувањето на храмот Аин Дара, една од археолошки највредните градби на Арамејците во Сирија“.

– Три илјади години цивилизација е уништено во само еден воздушен напад – изјавил директорот на управата Мамун Абделкарим.

Од управата ја повикуваат меѓународната заедница да изврши притисок на Турција за да се спречи гранатирањето и бомбардирањето на археолошките и културните локации.

Операцијата на турската војска против единиците на сириските Курди во Африн почна пред една недела со силно гранатирање и бомбардирање на курдската милиција во регионот.

Сириската влада на претседателот Башар ал-Асад го осуди нападот на Турција, но се противи и на курдските аспирации за автономија во северните делови на Сирија.

Сириската граѓанска војна, која почна во 2011 година, досега резултираше со огромни штети на многу историски градби, меѓу кои се древната Палмира и стариот дел на Алепо, кои се на списокот на УНЕСКО на светско културно наследство.


Турција бара од САД веднаш да се повлечат од Манбиџ во Сирија


Анкара, 27 јануари, 2018 - 17:19 (META) 

Министерот за надворешни работи на Турција, Мавлут Чавушоглу денеска побара од Соединетите Американски Држави „веднаш“ да се повлечат од градот Манбиџ на северот на Сирија, кој е под контрола на курдските борци, против кои Анкара поведе воена офанзива, јавуваат светските агенции.

Манбиџ се наоѓа на околу 100 километри од енклавата Африн, каде турската војска веќе една недела води офанзива против Курдите.

Турскиот претседател Реџеп Таип Ердоган вчера изјави дека турската војска ќе ја продолжи и ќе ја прошири офанзивата на северот на Сирија, чија цел е да се елиминира курдската милиција, која Анкара ја смета за терористичка организација.

Во говорот кој го пренесуваше турската државна телевизија, Ердоган вети дека „ќе го исчисти Манбиџ од терористите“.

Турската војска почна со офанзивата откако меѓународната коалиција предводена од САД најави формирање на погранични сили во Сирија, во кои би биле вклучени и курдските борци.


Ердоган: Нема прекин на акцијата против Курдите во Сирија


Анкара, 22 јануари, 2018 - 18:20 (META) 

Турскиот претседател, Реџеп Таип Ердоган изјави дека нема да ја прекине операцијата против Курдите во Африн на северот на Сирија, што предизвика загриженост помеѓу сојузниците на Анкара. Toj рече дека, операцијата позната како „маслиново гранче“ ќе биде завршена кога ќе биде постигната посакуваната цел.

Турција ја обвинува курдската полиција за поврзаност со Курдистанската работничка партија која се смета за терористичка група, како во Турција така и во ЕУ и САД.

Претходно и трускиот премиер, Бинали Јилдрим изјави дека во операцијата се вклучени копнени и воздушни сили и дека целта е формирање на сигурносна зона од 30 километри длабоко во сириската територија.

При посетата на Лондон, американскиот државен секретар, Рекс Тилерсон изјави дека, САД се загрижени поради акцијата на Турција и ги повика двете страни на воздржаност.

НАТО соопшти дека Анкара има право на самоодбрана, но дека тоа мора да го прави на „соодветен начин“.

И Советот за безбедност на ОН денеска ќе расправа за ситуацијата во Сирија.


Турски авиони денеска нападнаа 45 цели во Африн


Дамаск, 21 јануари, 2018 - 17:33 (META) 

Турски воени авиони денеска нападнале 45 цели во северниот сириски реон Африн, соопшти армијата и додаде дека копнените сили навлегуваат во зоната која е под контрола на курдската милиција поддржана од САД.

Во соопштението се информира дека 32 авиони нанеле удари против засолништа, скривници, магацини за оружје и борбени позиции на курдските Сили за заштита на народот, во вториот ден од операцијата „Маслиново гранче“. Сите авиони по нападите се вратиле во базата, истакна генералштабот на турската армија.

Во исто време, турските медиуми јавија дека турската армија и Слободната сириска армија навлегле пет километри внатре на територијата на сириската област Африн.

Почетокот на копнената операција „Маслиново гранче“ за чистење на Африн од борците на сириските Сили за заштита на народот и ПКК, кои се сметаат за терористички групи кои и се закануваат на територијалната целост на Турција, беше означен денеска во 11 часот по локално време, еден ден по воздушните напади на турски воени авиони врз позиции на противникот.

Турската армија заедно со силите на опозициската Слободна сириска армија извршија масовен напад врз Африн, навлегувајќи од точката Ѓулбаба, во граничната област Килис.

Според турски известувачи од областа, каде што е формиран прес центар за новинари, во операцијата учествуваат тенкови, оклопни возила, пешадија и командоси од специјални сили. Во операцијата учествувале и 72 турски воени авиони Ф-16, а поразени биле 153 цели на противникот.


САД демантираат дека им испратилe тенкови и оружје на Курдите


Анкара, 3 август, 2017 - 18:24 (META) 

Амбасадата на САД во Турција ги демантираше наводите на турските медиуми дека американската армија испратила тенкови и стотина камиони со оружје во Сирија за да ја поддржи курдската милиција ИПГ.

Амбасадата во соопштението наведува дека САД немаат испорачано тенкови на ниту една група која се бори против исламистите во Сирија и оти бројните камиони кои ја минуваат ирачко-сириската граница не пренесуваат воена опрема или муниција.

Турските власти сметаат дека курдската милиција претставува опасност по безбедноста на Турција и се обидуваат да го намалат нејзиното влијание во пограничниот појас.

Вашингтон им дава поддршка на курдските паравоени Единици за заштита на народот, кои меѓу првите ѝ се спротивставија на Исламска држава.

Турција ги смета курдските единици за дел од забранетата Работничка партија на Курдистан, која Анкара и Западот ја означија како терористичка.


Седумнаесет повредени во Турција при напад на курдските бунтовници


Анкара, 17 јули, 2017 - 13:26 (META) 

Курдските бунтовници активирале импровизирана експлозивна направа во покраината Хакари, додека минувало воено возило, јави турската војска.

Нападот се случил во близина на градот Јусеков и повредени се 17 војници.

Војниците бргу се евакуирани и хоспитализирани. Четворица се наоѓаат во тешка состојба, стои во соопштението.

Курдската работничка партија води борба против турските власти веќе 30 години, а во судирите досега загинаа неколку илјади лица. Немирите ескалираа по 2015 година, откако пропаднаа двегодишните мировни преговори.

Турските власти, ЕУ и САД ја третираат партијата како терористичка организација.


ОН нема да го набљудуваат курдскиот референдум во Ирак


Њујорк, 15 јуни, 2017 - 12:11 (META) 

Обединетите нации нема да се мешаат во референдумот за независност на автономниот курдски регион на северот на Ирак, планиран за 25 септември, соопшти денеска светската организација.

Соопштението на специјалната мисија на ОН во Ирак може да отвори сомнежи за веродостојноста на гласањето, што веќе предизвика критики од централната влада во Багдад и од неколку западни земји.

Претседателот на курдскиот регион, Масуд Барзани, минатата недела изјави дека гласањето треба да одлучи дали регионот ќе се отцепи од Ирак.

Гласањето ќе се одржи во три области кои го сочинуваат курдскиот регион и во областите околу кои се спорат Курдите и централната влада.


Русија демантира дека ќе има нова воена база во Сирија


Москва, 20 март, 2017 - 20:24 (META) 

Русија не планира да отвори нова воена база во Сирија, соопшти руското министерство за одбрана.

Изјавата доаѓа откако портпаролот на курдската единица за заштита на народот во Сирија, Редур Шелил, изјави дека на северозападот на земјата, Русија воспоставува нова воена база во договор со Курдите, кои ја контролираат таа област.

„Нема никакви планови за воспоставување нови руски воени бази на територијата на Сирија“, се наведува во соопштението на министерството.

Портпаролот на Курдите претходно наведе дека во таа база ќе бидат обучувани борците на единица за заштита на народот за борба против тероризмот.

Шелил тврдеше дека договорот со Русија е постигнат вчера и дека руските трупи со транспортери и со оклопни возила веќе пристигнуваат на позицијата во северозападната покраина Африн.


Околу 15.000 Курди во Стразбур побараа ослободување на Абдула Очалан


Стразбур, 11 февруари, 2017 - 17:04 (META) 

Околу 15.000 луѓе денеска се собраа во Стразбур на годишниот собир на Курдите во Европа, на кој демонстрантите побараа автономен статус за Курдистан и ослободување на нивниот лидер Абдула Очалан, јавуваат агенциите.

Полицијата во Стразбур навела дека на собирот имало меѓу 12 и 15 илјади луѓе. Демонстрантите во Стразбур пристигнале од Германија, како и од делови на Франција, Белгија и Луксембург.

Курдите што живеат во Европа веќе 18 години се собираат во Стразбур каде бараат ослободување на нивниот историски водач Абдула Очалан, кој се наоѓа во затвор во турција, како и решавање на статусот на Курдистан.

Генералниот конзулат на Турција во Стразбур побарал собирот да биде забранет со оценка дека тој претставува поддршка за терористите, бидејќи Анкара Работничката партија на Курдистан (ПКК) ја смета за терористичка организација.

По двегодишен прекин на огнот, судирите меѓу Кудрите и Турција продолжија во 2015 година, по прекинот на мировните преговори меѓу двете страни.


Курдска милитантна група ја презедe одговорноста за нападите во Истанбул


Истанбул, 11 декември, 2016 - 17:12 (META) 

Kурдската милитантна организација „Јастреби за слободата на Курдистан“ денеска на својата интернет-страница ја презеде одговорноста за синоќешните напади во Истанбул, во кои загинаа 38, а повредени се 155 лица.

„Јастреби за слободата на Кудистан“, која е одметнато крило на Курдската работничка партија, стои зад повеќе напади што годинава беа извршени во Турција.

Официјална Анкара денеска прогласи еднодневна жалост и нареди знамињата да се спуштат на половина копје по двојниот бомбашки напад во близина на стадионот во Истанбул.