!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Грчкото електростопанство ја купува ЕДС на вицепремиерот Анѓушев


Скопје, 11 јануари, 2018 - 15:48 (META) 

Грчката национална компанија за производство на струја, „Паблик пауер корпорејшн“ ППЦ (Public Power Corporation) ја почнала постапката за купување на компанијата „Енерџи деливери солушнс“ (ЕДС) на вицепремиерот Кочо Анѓушев, информираат од компанијата.

Од таму се додава дека, постапката за целосно купување на групацијата ЕДС со сите нејзини подружници на Балканот, ќе се реализира откако одобрение за тоа ќе издаде македонската Комисија за заштита на конкуренција.

ЕДС преку своите подружници работи во Словачка, Унгарија, Романија, Хрватска, Србија, Црна Гора, Косово, Македонија, Грција и Бугарија.

Со купувањето на еден од најголемите балкански трговци со струја, ППЦ ќе влезе и во бизнисот со трговија со струја и ќе го прошири своето портфолио.

„ППЦ е една од најголемите компании во Југоисточна Европа од областа на енергетиката, со вкупна актива од повеќе од 15 милијарди евра и годишни приходи од над 5 милијарди евра. Основната дејност на ППЦ е производство, дистрибуција и снабдување со електрична енергија во Грција за 7,3 милиони потрошувачи и има пазарен удел од околу 85 проценти. ППЦ е сопственик и на „Хедно“, која ја врши дистрибуцијата на струјата до потрошувачите во Грција, како и на ППЦ Обновливи извори  – една од компаниите пионери во Европа за производство на електрична енергија од обновливи извори“, се вели во соопштението.

 

 


Фабриката „Санос“ произведе автобуси за извоз во Казахстан


Скопје, 19 јули, 2017 - 17:47 (META) 

Фабриката за автобуси „Санос“ произведе пет автобуси за извоз во Казахстан, а вредноста на зделката изнесува 800.000 евра, информираа денеска од компанијата.

Автобусите се целосно произведени во фабриката во Скопје, со вградени агрегати на германската компанија „Ман“. Од „Санос“ исто така информираа дека планирано е во Казахстан да бидат испорачани 70 автобуси.

Фабриката „Санос“, поранешен ФАС „11 Октомври“, ја купи бизнисменот Славе Распашковски во 2004 година и оттогаш до денес, успеа да ја рестартира.

Денеска фабриката ја посети и премиерот Зоран Заев, кој уште еднаш ја нагласи поддршката на Владата за македонските компании, за да можат да произведуваат и да извезуваат.


Хот: Градежништвото ќе оствари 5,2 проценти пораст, се чувствува притисокот од кризата


Скопје, 24 февруари, 2017 - 14:25 (META) 

Градежништвото годинава се очекува да оствари пораст од 5,2 проценти, како резултат на планираните инфраструктурни проекти, информираше претседателот на Градежната комора на Македонија при Сојузот на стопански комори, Роберт Хот.

Тој истакна дека се очекуваат нови бизнис-контакти и соработка помеѓу претставниците на градежниот сектор, банкарите, градоначалниците на општините и граѓаните.

– Капиталните проекти се повеќегодишни и за нив е обезбедена финансиска конструкција, што влева сигурност. Дополнителен придонес на зголемување на капацитетите на градежниот сектор, имаат и проектите „Купи куќа, купи стан“ и „Купи куќа за млади“. Сепак, градежниците, како и другите стопанственици, го чувствуваат притисокот од политичката криза. За нив е важно да има стабилност, континуитет и предвидливост, да се реализираат капиталните вложувања, граѓаните да се сигурни при правењето долгорочни инвестиции, како што е купувањето стан или куќа – изјави Хот.


Почна сезоната на наддавање: За колку може да се купи еден пратеник?


Скопје, 28 декември, 2016 - 13:33 (META) 

Постизборните математики од гласачките места и од седиштето на Државната изборна комисија се префрлуваат во Собранието, па во јавноста почна да се поставува прашањето дали новите пратеници ќе им останат верни на матичните партии, дали ќе преминат во друга, ќе станат ли одеднаш „независни“ и колку сето тоа чини? Има ли цена пратеникот во македонското собрание?

Рокот за приговори на политичките партии за прегласувањето во Теарце истече, па извесно е дека ВМРО-ДПМНЕ освои 51 мандат, а СДСМ – 49.

По социјалните мрежи веќе активно се зборува за преминување на пратеници на СДСМ во ВМРО-ДПМНЕ, од ДУИ во Беса или обратно за одредена сума пари.

„Дојче веле“ минатата година објави дека ВМРО-ДПМНЕ ја условувала лојалноста на своите пратеници терајќи ги да потпишат меници на одредени суми. Освен тоа, требало да имаат и потпис од гарант на меницата, како и бланко оставка од пратеничката функција. Доколку пратеникот ѝ откаже послушност на партијата, со меницата е обврзан веднаш да ги врати парите, во спротивно ќе се соочи со тужба.

„Јас потпишав меница на 300.000 евра во денарска противвредност. Таа сума ја одреди партијата. Според образложението, толку ќе чинеле трошоците на ВМРО-ДПМНЕ вложени во мојата изборна кампања“, објасни тогаш еден пратеник за „Дојче веле“, додавајќи дека сите тие документи се чуваат во штабот на партијата.

Во последниот собраниски состав, трите пратенички Љубица Буралиева, Роза Топузовска-Каревска и Солза Грчева од опозициските СДСМ и ЛДП, станаа независни пратенички откако ги повлекоа своите оставки од Собранието по изборите во април 2014 година, кои СДСМ и коалицијата не ги признаа со образложение дека биле фалсификувани.

Практика за купување пратеници има и во соседните земји.

Во Грција во 1990 година, десничарската партија Нова демократија освои 150 гласови во парламентот кој има 300 пратеници. За формирање влада ѝ беше потребен уште еден пратеник. Низ грчката јавност тогаш се зборуваше дека пратеникот Теодорос Кацикис од Демократска обнова, за одредена сума пари преминал во Нова демократија, при што таа го доби потребното мнозинство од 151 пратеник.

Слични ситуации имало и во Србија, иако досега таквите шпекулации не биле докажани.

Дописничка на „Мета“ од Србија, Сања Ивачиќ, вели дека за време на конституирање на општинските совети имало секакви комбинации на поминување од една партија во друга, но дека тоа се случувало и во националното собрание.

– За време на формирањето на власт во една од централните градски општини во Белград – Врачар, која е позната по тоа дека од почетокот на 1990-тите години во неа победуваше опозицијата, по последните избори имаше многу натегања и обвинувања за купување гласови, за, на крај, мнозинство да добие партијата на Александар Вучиќ, Српска напредна странка. Во 2005 година се зборуваше дека Богољуб Кариќ во парламентот купил неколку пратеници и го намали мнозинстовото во Собранието на тогашната влада на Воислав Коштуница и практично предизвика нови избори. Никој ова не успеал да го докаже, за тоа само се зборува, а и политичките противници се обвинуваат меѓусебно – вели Ивачиќ.

Начинот на кој сегашните политички партии дејствуваат е авторитативен, а не идеолошки. Тоа придонесува за нетранспарентни кандидати, за купување гласови, но исто така и за преминување на пратеници од една партија во друга или за постизборни коалиции кои поттикнуваат недоверба кај граѓаните, вели Алида Каракуши, дописничка за „Мета“ од Албанија.

Косара Беликнова, дописничката за „Мета“ од Бугарија, вели дека таму нема експлицитни примери за купување пратеници, но дека се случува по изборите некои пратеници да ги напуштат матичните партии и да станат „независни“.


„Црн петок“: Повеќе метеж отколку купување


Скопје, 25 ноември, 2016 - 14:50 (META) 

Продавници полни со претежно млади луѓе забележавме во „Сити мол“ по повод т.н. црн петок,  првиот ден по американскиот празник Ден на благодарноста.

Но, впечатокот е дека не владееше некоја голема купувачка треска и не забележавме дека граѓаните купуваат повеќе од вообичаено.

Ретки беа продавниците во кои се создаваше ред за наплата, а малкумина од тие што ги сретнавме носеа по неколку кеси купени производи. Метежот во продавниците и во ходниците беше малку поголем отколку што е вообичаено за викенд.

Граѓаните се жалат дека попустите не се големи и дека 20 проценти попуст на висока сума не е ништо.

– За разлика од кај нас, во трговските центри во соседството попустите се навистина големи, и до 80 проценти – вели еден граѓанин.

Попустот во продавниците се движи од 10 до 50 проценти, а намалувањето на цените на новите колекции е многу мало.

Продавачите не сакаа да откријат дали овој „црн петок“ имаат повеќе или помалку промет од истиот ден лани, а не сакаа да откријат ни дали метежот е поголем од тој за време на викенди.


Телекомуникацискиот гигант „Еј-ти енд ти“ го купува „Тајм Ворнер“ за 86 милијарди долари


Далас, 23 октомври, 2016 - 12:24 (META) 

Американскиот телекомуникациски гигант „Еј-ти енд ти“ (AT&T) објави дека ќе ја купи медиумската групација „Тајм Ворнер“ за сума од речиси 86 милијарди долари, јавуваат светските медиуми.

Зделката, која е една од најголемите оваа година, сè уште чека одобрување од регулаторите, пренесува „Би-би-си“.

Доколку преземењато помине, тоа ќе значи ставање под една капа на дистрибуциската мрежа на „Еј-ти енд ти“ со содржините од филмските студија на „Ворнер бродерс“ и кабелските телевизии „Ејџ-би-о“ и „Си-ен-ен“, поради што договорот најверојатно ќе биде многу внимателно анализиран од антимонополиските регулатори во САД.

„Еј-ти енд ти“ во моментов е трет најголем кабелски оператор во САД.

Рендал Стивенсон, кој истовремено е претседател на управниот одбор и извршен директор на „Еј-ти енд ти“, изјавил дека според него нема никакви регулаторни пречки и дека сите прашања, за кои постои загриженост, можат да се надминат.

„Ова е совршено совпаѓање на две компании со комплементарни предности кои можат да донесат свеж пристап во начинот на работа на медиумите и комуникациската индустрија за своите клиенти, дистрибутери и огласувачи“, изјавил Стивенсон.

Во изјавата од „Еј-ти енд ти“ било наведено дека целта на договорот е да им се даде на клиентите „неспоредлив избор, квалитет, вредност и искуство, кои ќе ја дефинираат иднината на медиумите и комуникациите“ и дека новата компанија „ќе го води новиот бран на иновации во медиумската и во комуникациската индустрија“.

Републиканскиот кандидат за претседател на САД, милијардерот Доналд Трамп, вчера, пред самото објавување на договорот, изјавил дека доколку стане претседател, ќе ја блокира зделката меѓу „Еј-ти енд ти“ и „Тајм Ворнер“.

„Тоа е концентрација на премногу моќ во рацете на малкумина“, рекол Трамп.


Сугарески: Буџетот е проектиран за да ги корумпира гласачите и нема да го гласаме


Скопје, 17 октомври, 2016 - 14:13 (META) 

Предлог-буџетот за 2017 година е една голема лага и на владејачката партија ѝ служи за да ги купи изборите.

Ова денеска го истакна пратеникот на СДСМ, Горан Сугарески, на расправата за предлог-буџетот за 2017 година.

– По образложението на предлог-буџетот од страна на министерот за финансии, може да се заклучи дека тој е една голема лага за да ги купите изборите, односно ќе послужи за корупција на гласачкото тело. Пред граѓаните требаше да ги спомнете проектите како панорамско тркало за кое се планирани 20 милиони евра и рајската градина – рече Сугарески.

Тој го праша Миноски да каже што во оваа држава не е на кредит, бидејќи патиштата, водоводите, инфраструктурните проекти се покривале од кредити, а парите од буџетот се трошеле непродуктивно.

Сугарески додаде дека опозицијата нема намера да гласа буџет за кој сметаат дека е фабричка грешка.


Данска ќе купи дел од панамските документи во борба против затајувањето данок


Копенхаген, 7 септември, 2016 - 12:40 (META) 

Данскиот министер за даноци, Карстен Лаурицен, изјави дека данските власти ќе ги купат податоците од панамската правна фирма „Мосак Фонсека“, која им помагала на своите клиенти да отворат офшор-компaнии за да избегнат плаќање даноци во своите држави.

Лаурицен изјави дека данската даночна и царинска управа добила анонимна понуда доколку сака да ги купи податоците од панамските документи кои би можеле да се однесуваат на околу 600 државјани на Данска.

Тој истакна дека се работи за корисни информации што би можеле да помогнат во борбата против затајувањето даноци, бидејќи државата тоа им го должи на даночните обврзници кои редовно ги плаќаат даноците.

Според Лаурицен, документите кои протекоа од панамската компанија „Мосак Фонсека“ се релевантни и содржат валидни информации за неколку стотини даночни обврзници и истакна дека тоа државата ќе ја чини 1,4 милиони долари.

 


ВМРО-ДПМНЕ: Преку законски постапки ги купивме седиштата на општинските комитети


Скопје, 24 октомври, 2015 - 17:35 (META) 

Седиштата за општинските комитети низ земјава, во кои нашите членови би имале елементарни услови за работа, ВМРО-ДПМНЕ ги купи преку транспарентна и законска постапка, реагираат од ВМРО-ДПМНЕ по прес-конференцијата на СДСМ, на која ги обвинија дека за неполни две години купиле 63 објекта.

– СДСМ е партија која наследи огромен имот од поранешниот Сојуз на комунисти на Македонија. До денес, тие користат имот кој е граден со пари од сите граѓаните и за тоа не дале никаква сметка и не понеле никаква одговорност – изјави пратеникот од ВМРО-ДПМНЕ, Андон Чибишев.

 


Турција ѝ се заканува на Русија дека ќе престане да го купува нејзиниот гас


Анкара, 8 октомври, 2015 - 19:00 (META) 

Турскиот претседател, Реџеп Таип Ердоган, ја предупреди Русија дека ќе го раскине договорот за купување гас ако руските воздушни сили продолжат да го нарушуваат нејзиниот воздушен простор при бомбардирање на Сирија.

Ердоган наведува дека Турција е купувач број еден на рускиот природен гас.

– За Русија, губењето на Турција може да биде голема загуба. Ние можеме да купуваме гас од најразлични места – вели турскиот претседател.

Портпаролот на Кремљ, Дмитриј Песков, изјави дека претседателот Владимир Путин е запознаен со предупредувањето од Ердоган.

Турција ја обвини Русија дека го нарушила нејзиниот воздушен простор на 3 и на 4 октомври.