Шверцери фатени на „Табановце“ со големо количество антички монети и други артефакти


Куманово, 8 мај, 2018 - 14:00 (META) 

Македонски државјанин што живее во Виена и српски државјанин што живее во валандовско Марвинци добија кривични пријави поради шверцување антиквитети.

Случајот бил откриен во петокот рано наутро на граничниот премин „Табановце“ на излез од Македонија. Во облеката на С.Г. (47) од Србија со живеалиште во Марвинци се пронајдени 20 антички монети, едно античко копче, а во автомобилот „волво с80“ сопственост на М.Ј. (51), гастарбајтер во Австрија, биле пронајдени 68 антички пари, како и девет други антиквитети.

Потоа бил претресен домот на Србинот во Марвинци, при што биле пронајдени околу два килограми непозната растителна материја и неколку стари монети и други предмети.

Запленетите антиквитети СВР Куманово наскоро ќе ги достави до Археолошки музеј на Македонија, кој ќе врши процена на оригиналноста на уметничките предмети.


Состанок на фокус-групата за Дримскиот проект ќе се одржи во Охрид


Охрид, 25 октомври, 2016 - 13:34 (META) 

Првиот состанок на фокус-групата на македонска страна во рамките на Глобалниот еколошки фонд (ГЕФ) за Дримскиот проект ќе се одржи на 27 октомври во хотелот „Аквалина“ во Охрид.

Целта на состанокот е истражување на проблематичните точки во управувањето со Дримскиот Басен, приоретет на истите и дискусија за моменталните состојби и влијанија. Исто така, ќе бидат идентификувани заинтересираните страни што влијаат или трпат влијанија од прекуграничното управување со Дримскиот Басен.

– Дримскиот проект досега е најсложениот процес за управување на водените ресурси во кој се балансираат интересите на многу сектори и воедно е еден силен политички процес во кој учествуваат пет држави од тој регион. Главните цели се подготвување на прекугранична дијагностичка анализа на басенот, подготвување на стратешки акционен план и развивање на заедничка платформа за соработка, заеднички надзорен систем, систем за управување со поплави и пилот-проекти, меѓу кои и изработката на план за управување со сливот на Охридско Езеро – вели националниот координатор на ГЕФ Дримски проект, Дејан Пановски.

Пановски учествуваше и на 40. сесија на Комисијата за светско културно и природно наследство на УНЕСКО, која се одржа во Париз. На средбата беше разговарано за компонентите на интегриран менаџмент, како начин кој ги поврзува природните и културните богатства во Охрид.

ГЕФ Дримскиот проект почна со активна имплементација во мај годинава.