Роберт Алаѓозовски ќе биде национален координатор за култура во кабинетот на Заев


Скопје, 4 јуни, 2018 - 12:27 (META) 

Доскорешниот министер за култура Роберт Алаѓозовски се сели во кабинетот на премиерот Зоран Заев. Тој е назначен на висока државна функција односно национален координатор за развој на културата и меѓуресорска соработка.

Портпаролот на Владата, Миле Бошњаковски, вели дека се работи за функција предвидена со закон и кусо одговори дека за секој национален координатор потребно е именување од Влада.

Алаѓозовски, кој беше опфатен со реконструкцијата на Владата, денеска му ја предаде функцијата на Асаф Адеми од Беса.


Алaѓозовски: Трошоците се од бифето на Министерството за вода и кафе за сите гости


Скопје, 26 март, 2018 - 14:08 (META) 

Министерот за култура, Роберт Алаѓозовски, вели дека неговите лични трошоци за шестте месеци додека е министер, не надминуваат 6.000 денари месечно. Како што изјави тој денеска, дезинформација е веста дека потрошил речиси 9.000 евра за угостителски услуги. Тој посочи дека во наведениот износ не се издвоени неговите лични трошоци.

– Расчленетите ставки од алатката за транспарентност беа прикажани како групен трошок и сите беа поднесени под графата: трошења во кафеани. Во алатката за транспарентност има три типа на трошоци – угостителски услуги во странство, угостителски услуги надвор од Министерството за култура и беа прикажани трошоците направени во бифето на Министерството за култура. Во бифето не постои исхрана, туку само пијалаци. Во таа смисла, постои спецификација и административните службеници имаат направено превид што ги немаат издвоено личните трошоци на министерот од кумулираните трошоци во рамки на Министерството за култура – рече Алаѓозовски.

Тој појасни дека трошоците биле направени генерално за кафиња и вода а не, како што рече, „за тајни сметки во ексклузивни ресторани и во хотели во странство“.

Поради ова недоразбирање во јавноста, рече Алаѓозовски, во Министерството за култура ќе воведат построг правилник за користење на безалкохолните пијалаци со цел и износот на таа фактура да биде понизок.


Синдикатот на културата и Алаѓозовски се жалат на лошите закони на претходната власт


Скопје, 7 март, 2018 - 15:10 (META) 

На две прес-конференции денеска, Синдикатот на културата и министерот за култура Роберт Алаѓозовски, се пожалија на „лошите закони од претходната власт“. Синдикатот на културата се пожали и дека новата власт во изминативе месеци се уште не променила ништо во однос на тие закони, а нејзината намера да спроведува некои законски одредби само ќе ги продлабочи проблемите на вработените во културата.

Претставниците на синдикатот побараа Министерството за култура посилно да се ангажира во подготвување нов закон за култура, а во неговото пишување да бидат вклучени и и претставници на синдикати и носителите на дејност. Сегашниот, велат тие, уметниците и културни работници ги става во ригидна административна рамка, кој ја ограничила слободата на творење и претставува пример за легална закана од страна на работодавецот и отвора простор за партиски притисок и манипулација.

Беше побарано и Министерство за информатичко општество и администрација да го пролонгира рокот, кој сега е крајот на март, за изготвување на систематизации и за доделувања решенија за распределување на вработените, а Министерството за финансии да одобри средства за порамнување на платите во различните дејности на културата.

Министерот Алаѓозовски изјавувајќи дека е свесен оти формулацијата „даватели на услуги“ е понижувачка, рече дека законот мора да се почитува, но Министерството за култура е подготвено да изнајде решение.

– Предложивме да се употребува терминот „носител на дејност“ наместо „давател на услуги“,  како времено, техничко решение за издавање на решенијата и нивно евидентирање во електронскиот систем на МИОА – рече Алаѓозовски.


Министерство за култура повика да се пријавуваат неправилностите, „доколку ги има“


Скопје, 15 февруари, 2018 - 17:16 (META) 

Министерството за култура, по бројните реакции од опозицијата и од јавноста за наводни злоупотреби и непотизам во Годишната програма, упати јавен повик да му се достават таквите информации.

„Наша недвосмислена определба е процесите на одлучување да бидат целосно транспарентни, да бидат фер и објективни, согласно начелата, критериумите и пропозициите на конкурсните апликации. Цврсто стоиме на ставот, дека доколку има индиции за неправилности во процесот на аплицирање и одлучување, или доколку одредени личности или субјекти учествувале во непотизам, корупција, клиентелизам или други незаконски практики, Министерството е подготвено веднаш да ги преиспита тие случаи, а доколку се утврди одговорност, да спроведе дисциплински и други постапки во согласност со закон“, се вели во соопштението.


Шилегов: Градот Скопје ќе развива стратегија, како да се зголеми бројот на велосипедисти


Скопје, 12 декември, 2017 - 12:31 (META) 

Градот Скопје е домаќин на Регионалната конференција во рамки на меѓународниот проект „Одржлива урбана мобилност кај градовите од Југоисточна Европа“, на тема „Зголемување на бројот на велосипедисти во Скопје”.

Градоначалникот на Град Скопје, Петре Шилегов рече дека на оваа конференција ќе се дискутира за продолжување и унапредување на проектот „Скопје велосипедски град“.

– Во наредните три дена, во оваа конференција ќе бидат вклучени стручни сектори, министерства, невладини организации, јавни претпријатија и факултети, кои заедно ќе реализираат стратегија за развој на велосипедската култура и зголемувањето на бројот на велосипедисти во градот. Проектот „Скопје вело-град“, повторно го ставаме на врвот на приоритети на градот. Преку ново системско, еколошко и модерно решение на градот, имаме за цел растоварување на градскиот метеж и намалување на емисиите на издувни гасови. Со секоја реконструкција на улица ќе изградиме нова велосипедска патека и ќе ја продолжиме исплатата на субвенции за набавка на велосипеди. Скопје ќе биде просперитетен и отворен град. Планираме Скопје да стане европска зелена престолнина во 2021 година – рече Шилегов.

Работниот дел од конференцијата ќе продолжи и во наредните денови, и фокусот повторно ќе биде, подобрување на условите за користење на велосипедот во Скопје. На овие работилници, учесниците ќе се запознаат со примерите, за подобрување на условите за користењето на велосипедот како превозно средство, што се применуваат во повеќе градови низ Германија.


Димитров и Бутарис разговараа за зајакнување на соработката во културата и во образованието


Скопје, 16 ноември, 2017 - 19:55 (META) 

Шефот на македонската дипломатија, Никола Димитров, и градоначалникот на Солун, Јанис Бутарис, кој е во работна посета на Македонија, на денешната средба се согласиле дека комуникацијата меѓу граѓаните на двете земји е од извонредно значење за зајакнување на заемната доверба и разбирање, се наведува во соопштението на Министерството за надворешни работи.

На средбата, поконкретно, станало збор за прекуграничната соработка и за потребата од зајакнување на соработката во културата, образованието и меѓу невладините организации.

„Ова е втора средба меѓу министерот Димитров и градоначалникот Бутарис за помалку од два месеци, на која продолжија разговорите од Солун, за прашања од заеднички интерес, како и за можниот придонес на локалните власти во рамки на мерките за градење доверба и зближување на граѓаните од двете земји“, стои во соопштението на МНР.

Претходно денеска градоначалникот на Солун имаше средби со премиерот Зоран Заев и со претседателот на државата, Ѓорге Иванов.


Распишани годишните конкурси за културни проекти од национален интерес


Скопје, 30 септември, 2017 - 14:48 (META) 

Министерството за култура денеска ги распиша годишните конкурси за финансирање на проекти од национален интерес во културата за 2018 година. Тие се отворени до 15 ноември, резултатите ќе бидат објавени околу Нова година, а за поддршка и за помош на заинтересираните корисници ќе бидат организирани и инфосесии во наредните 45 дена.

Министерот Роберт Алаѓозовски на прес-конференција рече дека ја исполниле целта конкурсот да го објават во септември, кога е законскиот рок, но во исто време успеале значајно да ги редизајнираат конкурсните документи. Тие се во согласност со критериумите и приоритетите на новата стратегија за култура, која е се уште во јавна расправа.

– Бидејќи овој повик за годишна програма се објавува сега, а треба да опфати проекти дури до крајот на годината, веројатнио ќе го дополниме со уште еден отворен повик кој ќе трае во текот на целата година со т.н. ад хок повици за сите кои имаат поитни проекти да може да изреагираат – рече тој.

Конкурсите се наменети за физички лица кои се државјани на Република Македонија и за правни лица од областа на културата. На нив не може да се пријавуваат националните установи, кои се финансирани преку нивните годишни програми за кои постои посебен повик.


Шапуриќ – Тимоние: Економската соработка со Франција може да се подобри


Скопје, 28 септември, 2017 - 14:52 (META) 

Министерот задолжен за регулатива за подобрување на инвестициска клима за домашни компании, Зоран Шапуриќ се сретна со амбасадорот на Франција, Кристиан Тимоние.

На средбата двајцата соговорници констатирале дека подобрувањето на политичката клима во државата ќе придонесе и за подобрување на бизнис-климата.

Тимоние бил задоволен од активностите на Владата за ратификација на Парискиот договор за климатки промени, како и за определбата на Министерство за животна средина и просторно планирање и Владата да го поддржат Градот Скопје во изградба на пречистителна станица.

Шапуриќ и Тимоние констатирале дека соработката помеѓу двете држави е добра во сферата на политиката и културата, но економската соработка не е на задоволително ниво.

Амбасадорот на Франција се заложил да преземе чекори кон поврзување на македонските со француските компании, преку организирање на бизнис-форуми, во кои ќе учествуваат македонскиот и францускиот бизнис-сектор и посета на француските фирми во Македонија.


СДСМ: Апсурдните интерпелации нема да го сокријат криминалот на ВМРО-ДПМНЕ


Скопје, 12 август, 2017 - 16:12 (META) 

Со неоснованите, неиздржани и апсурдни иницијативи за интерпелации, ВМРО-ДПМНЕ продолжува очајнички да се обидува да ги закочи реформите и проектите за кои што гласаа мнозинството граѓани, се вели во реакцијата на СДСМ по интерпелацијата што пратенциите на ВМРО-ДПМНЕ денеска ја поднесоа за министерот за култура Роберт Алаѓозовски.

„Поднесената интерпелација за министерот за култура Роберт Алаѓозовски само докажува дека ВМРО-ДПМНЕ не се грижи ниту за културата, ниту за граѓаните, туку единствено се грижи да го сокрие деценискиот криминал што раководството на таа партија го правеше, особено со проектот ‘Скопје 2014’“, стои во соопштението на СДСМ.

Оттаму додаваат дека ВМРО-ДПМНЕ 11 години ја „партизираше културата и потроши над 600 милиони евра народни пари на сомнителни тендери за проектот „Скопје 2014“, додека вистинското културно наследство беше намерно оставано да скапува и да се распаѓа“.

„Наместо криминалниот и злосторнички пристап кон културата што ВМРО-ДПМНЕ го практикуваше со години, министерот за култура и министерството воведуваат нови, ефикасни и инклузивни политики и проекти во културата што носат напредок и заштита на културната дејност“, велат од СДСМ.


Конкурс за манифестацијата „Нов културен бран“


Скопје, 31 јули, 2017 - 9:59 (META) 

Министерството за култура денеска на својата веб-страница ќе ги објави условите и формуларите за пријавување на општини, здруженија на граѓани, асоцијации, неформални групи и автори од областа на културата и на уметноста за манифестацијата „Нов културен бран“.

Таа ќе се реализира од крајот на август до крајот на октомври годинава,  односно сè до исцрпување на средствата за реализација на манифестацијата.

„Цел на манифестацијата е да се обезбеди деметрополизација и децентрализација на културата, дисперзија во локалните средини и збогатување, омасовување и раздвижување на културната понуда во сите региони на Македонија. За разлика од претходниот пристап со манифестацијата „Топол културен бран“, на која право за аплицирање со проекти за културни настани имаа само општините, со овој повик, право на аплицирање со проекти и со идеи за манифестацијата ќе имаат здруженија на граѓани, асоцијации, неформални групи и автори од областа на културата и на уметноста, кои ќе треба да понудат квалитетна, естетски профилирана и вредносно издржана понуда, со која ќе внесат посвежи идеи и поиновативни пристапи во креирањето на културата, како и нови и современи форми во создавањето и во презентирањето на културниот и на уметничкиот продукт“, порачува Министерството за култура.