!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Пожарот кај Кондово ставен под контрола


Скопје, 13 август, 2017 - 11:11 (META) 

Големиот пожар кој синоќа избувна во близина на селото Кондово во Општина Сарај е ставен под контрола и нема опасност по куќите во селото за кои постоеше закана да бидат зафатени од огнот, соопштија денеска од Град Скопје.

Оттаму информираат дека на терен интервенирале повеќе од 40 пожарникари, со неколку противпожарни возила, како и голем број лица и механизација од Јавното претпријатие „Комунална хигиена“, кои цела ноќ го гаснеле пожарот и не дозволиле огнената ситхија да ги зафати куќите во Кондово.

Екипите на скопската противпожарна бригада ќе интервенираат на терен до целосното гаснење на пожарот, додаваат од Град Скопје.


Силен земјотрес го погоди грчкиот остров Лезбос, едно лице загинало


Атина, 12 јуни, 2017 - 20:45 (META) 

Силен земјотрес со јачина од 6,3 степени според Рихтеровата скала го погоди грчкиот остров Лезбос, при што едно лице загинало, а повредени се десетина лица при уривање на стари куќи, јавуваат грчките медиуми.

Локалните власти соопштиле дека телото на починатата жена било пронајдено во селото Вриса. Службите на противпожарната единица информирале дека немале повеќе информации за исчезнати лица.

Епицентартот на земјотресот бил 11 километри јужно од селото Пломари, на длабочина од седум километри.


Невреме во Албанија – исклучена струја, поплавени куќи, блокирани автопатишта


Тирана, 8 ноември, 2016 - 12:23 (META) 

Лошото време и обилните врнежи од дожд што синоќа и утрово зафатија делови од Албанија предизвикале прекин на електричната енергија во поголем дел од главниот град на земјата, јавува дописникот на „Мета“ од Тирана.

Од фирмата за дистрибуција на електрична енергија (ОШЕЕ) соопштиле дека некои од трансформаторите биле поплавени поради што морале да ја исклучат струјата за да можат да интервенираат и да го намалат нивото на водата.

Во изминатите неколку часа, поради силните ветрови, имало големи бранови во морето, поради што два траекти кои сообраќаат на релацијата Валона – Бриндизи (Италија) не можеле да испловат утрово од пристаништето во Валона, а околу 300 патници останале блокирани.

Силните врнежи поплавиле и неколку автопатишта во Албанија, а ризик од поплавување им се заканува и на повеќе куќи. Според информациите, сообраќајната полиција веќе интервенирала и евакуирала граѓани кои биле заробени во своите возила, а сообраќајот на дел од патиштата се одвива отежнато.

Во меѓувреме, метеоролозите предвидуваат дека слични временски услови, силни дождови и ветер, ќе преовладуваат во текот на целиот ден.


Најмалку 20 лица се повредени во земјотресот што го погоди централниот дел на Италија


Рим, 30 октомври, 2016 - 18:18 (META) 

Најмалку 20 луѓе се повредени во земјотресот што утрово го погоди централниот дел од Италија, соопштија италијанските власти. Како што пишуваат медиумите, станува збор за лесни повреди.

Шефот на италијанската служба за цивилна заштита, Фабрицио Курчо, изјави дека засега нема регистрирано човечки жртви од земјотресот со интензитет од 6,6 степени по Рихтеровата скала.

Италијанскиот премиер Матео Ренци рече дека властите ќе ги обноват сите куќи, цркви и други објекти уништени во низата земјотреси што ја погодија Италија во изминатите два месеца.


Свлечиште на ридот Балтепе над Тетово, голем број семејства во опасност


Тетово, 10 септември, 2016 - 15:53 (META) 

Врнежите од дожд предизвикаа ерозија на земјиштето над православните гробишта во Тетово на ридот Балтепе.

Жителите на овој дел од Тетово алармираат дека свлечиштата се голема закана за нивните домови, кои можат да се урнат доколку не се преземат превентивни мерки.

– Мора тука да се направат потпорни ѕидови, инаку мојот дом ќе ми се струполи долу во долот, ако свлечиштето пак се активира. Барам Општината да ми помогне затоа што сум социјален случај – вели Ферди Дрина, сопственик на една од куќите, чие семејство брои 30 лица.

Врнежите од дожд деновиве го зголемија водостојот во реката Пена на критично ниво, а поголемо свлечиште го блокираше патниот правец Шипковица – Бродец.

Сега, според надлежните, нивото на водата на Пена е опаднато, а наносите од камења и од земја од свлечиштето над патот Шипковица – Бродец се остранети.


Во невреме во Иран загинаа најмалку четири лица


Техеран, 2 септември, 2016 - 18:19 (META) 

Во невремето што го погоди северниот дел на Иран загинаа четири лица, јавуваат иранските медиуми.

Тричлено семејство се удавило во поплавите од надојдената река во провинцијата Голестан, а повозрасна жена загинала од гром.

Иранската државна новинска агенција ИРНА наведува дека ветерот кој дувал со брзина од 130 километри на час ја прекинал електричната енергија и ги оштетил покривите на повеќе од 900 куќи.


Краделе во куќи и во станови во Охрид


Охрид, 26 јули, 2016 - 12:20 (META) 

СВР од Охрид поднесе кривична пријава против М.А. (41) од битолското село Велушина и М.С. (53) од струшкото село Ливада, кои ги товари за осум тешки кражби.

Пријавените, во текот на минатиот месец, кражбите ги извршиле во неколку деловни објекти, куќи и станови во Охрид, како и во две цркви во Косел и во Лескоец. На тој начин, М.А. и М.С. стекнале противправна имотна корист од 429.900 денари.

При извршувањето на кражбите, пријавените користеле хебла, клешти, метални ножици за сечење арматура и друг соодветен алат со кои ги кршеле бравите и катинарите од влезните врати на неколку земјоделски аптеки, продавници и домови во Охрид. На ист начин насилно влегле во црквата „Св.Илија“ во селото Косел и во „Св. Наум“ во Лескоец.


Голем пожар на грчкиот остров Хиос


Атина, 25 јули, 2016 - 10:06 (META) 

На грчкиот остров Хиос рано утрово, околу 3.30 часот, избувна силен пожар. Пожарот избувна во јужниот дел на островот, а грчките противпожарни служби се обидуваат да го стават под контрола огнот, но гаснењето е отежнато поради силнот ветар.

Во гаснењето на пожарот се вклучени шест хеликоптери, 16 противпожарни возила, 40 волонтери и 40 камиони со вода.

Хеликоптерите имаат проблеми со фрлање вода поради ветрот. Засега во пожарот изгорени се две куќи и евакуирани се три помали села на островот. Од Атина се испратени дополнителни противпожарни авиони за да помогнат во борбата со огнената стихија.


Падна старата куќа подарок од Жан Митрев за Општината Штип


Штип, 19 јуни, 2016 - 16:35 (META) 

Силен трескот ги разбуди жителите на штипско Ново Село изутрината околу седум часот, по уривањето на една од четирите стари куќи подарени од кардиохирургот Жан Митрев. По првиот трескот се слушнал уште еден послаб. Две третини од куќата целосно се урнаа. Старите греди, сведочат новоселци, се закануваа на минувачите, кои во тоа време се движеа кон Градски гробишта за празникот Духовден. Една од гредите завршила на лозницата на соседната куќа. За среќа, нема повредени.

Куќата почна да паѓа лани во октомври по поројните дождови. Жителите на Ново Село побара Општината да ја урне распадната куќата на која е сопственик. Општината Штип е во неколкумесечно исчекување на донатор или да помине проектот поред Европската Унија за реконструкција на четирите стари куќи. Меѓутоа, граѓаните велат дека тоа не ја попречува Општината да ги урне руинираните куќи на чии места треба да се градат нови, во истиот автентичен стил. Општината тогаш соопшти дека со месеци чека дозвола за уривање од Управата за заштита на културното наследство, поради тоа што куќите се заштитено културно богатство. Богатството, во случајот, можеше да чини човечки животи.

По уривањето на куќата, попладнето шутот беше расчистен, улицата оспособена за минување, но граѓаните на Ново Село останаа без одговор на прашањата кога Општината ќе поведе сметка за руинираните куќи пред да се случи полошо.


Во експлозија на гас, оштетени работилница, автомобили и 13 куќи во Свети Николе


Свети Николе, 15 јуни, 2016 - 13:27 (META) 

Во експлозија која се случила поради истекување на пропан бутан од демонтирана плинска боца, ноќта меѓу понеделникот и вторникот неделава, целосно била уништена автомеханичарска работилница во Свети Николе, два автомобили, а оштетени биле и 13 куќи кои се наоѓаат во близина.

Експлозијата, како што информираат од полицијата, се случила во автомеханичарската работилница „Бацоц“, сопственост на 42-годишниот С.П. од Свети Николе.

Увид на местото извршил јавен обвинител од Основното јавно обвинителство Свети Николе и екипи на МВР и на Надворешната канцеларија за криминалистички работи Свети Николе.

„Од извршениот увид констатирано е дека пожарот е настанат при експлозија од истекување на гас пропан бутан од демонтирана плинска боца од автомобил, а при активирање компресор кој бил сместен во подрумската просторија. Од експлозијата комплетно е уништена работилницата, целокупната опрема во неа, оштетено е возилото на сопственикот, како и друго воизло марка „хјундаи тусон“, кое било оставено за поправка, како 13 куќи и помошни простории кои се наоѓаат во непосредна близина“, стои во информацијата за случајот на МВР.