Пијан прилепчанец избоил куче со црвена боја за чевли


Прилеп, 10 февруари, 2018 - 19:47 (META) 

Прилепската полиција поднела известување против М. М. (56) од Прилеп поради кривично дело мачење животни.

Според соопштението од МВР, во средата околу 11 часот, на плоштадот Методија Андонов – Ченто во Прилеп, пријавениот кој бил во пијана состојба дошол со куче, кое потоа го избоил со црвена боја за чевли.

Случајот в полиција го пријавил граѓанин на Прилеп.


Шарпланинец воден на синџир каснал дете во Неготино


Неготино, 3 јануари, 2018 - 11:20 (META) 

Шарпланинец воден на синџир од неговиот сопственик, каснал дете за рака во Неготино, соопшти полицијата.

Инцидентот се случил вчера околу 14 часот на местото викано Антена. Кога кучето дошло до група деца што си играле, каснало за левата рака едно десетгодишно дете. Детето потоа добило медицинска помош во најблиската здравствена ординација.


Скопјанец каснат од куче пред Ристиќева палата


Скопје, 18 декември, 2017 - 10:25 (META) 

Скопјанецот Б.Д. (71) вчера попладне во полиција пријавил дека на плоштад „Македонија“ пред Ристиќева палата бил каснат од куче.

Според неговото тврдење, бил нападнат од група кучиња – скитници, при што едно од нив го искасало за раката, по што се упатил во болница каде добил лекарска помош.


Две кучиња искасале 10-годишно дете


Скопје, 16 декември, 2017 - 16:15 (META) 

Десетгодишно дете вчера попладне било нападнато и искасано од две кучиња на ул. „Волгоградска“ во Скопје, соопшти полицијата.

Синоќа во 20.30 часот, 50-годишниот Т.С. во полициската станица Карпош пријавил дека истиот ден околу 17:20 часот, на ул. „Волгоградска“ две кучиња го нападнале неговиот 10-годишен син.

Детето, како што се наведува во полициското соопштение, се здобил со видливи повреди – расекотини на двете нозе.


Кучето што искаса десетина лица фатено и однесено во „Вардариште“


Скопје, 9 декември, 2017 - 21:05 (META) 

Откако вчера куче ротвајлер искасало девет лица на булеварот „АСНОМ“, нападнало и мајка и дете на улицата „Перо Наков“ по што било заловено од шинтерската служба и пренесено во стационарот „Вардариште“.

Како што соопшти МВР, последниот случај го пријавил таткото и сопруг на нападнатите, по што полициската станица Гази Баба побарала шинтерската служба да го пронајде животното. Тоа се случило по неколку часа.

Детето било укасано на левата рака, а неговата мајка на левата нога.


„Анима мунди“: Oдговорност за сопственикот на кучето што нападна деца во Аеродром


Скопје, 8 декември, 2017 - 13:55 (META) 

Здружението за заштита на животните, „Анима Мунди“ вели дека шесте лица, меѓу кои и четири деца, во општина Аеродром биле нападнати од расно куче. Од здружениеето бараат одговорност од сопственикот кој го пуштил кучето на слобода.

„Вината за овој настан е во неодговорните сопственици, во тие што го воспитале, односно го научиле кучето да напаѓа, а кои го пуштаат слободно да шета и на тој начин ја изложуваат јавноста на опасност. Во нив е целата одговорност и бараме итно да одговараат“, се вели во соопштението.

Тие велат дека првпат наидуваат на институционална подготвеност да се третира и да се надмине овој проблем, поточно интензивно се работи со Град Скопје за да се дефинираат хумани, применливи и ефикасни мерки што ќе го решаваат проблемот со бездомните кучиња и со стационарот Вардариште.


Две жени и четири деца каснати од куче во Општина Аеродром


Скопје, 8 декември, 2017 - 12:50 (META) 

Во изминатите два дена, во полициската станица Аеродром пријавени се шест настани во врска со напад на куче скитник врз граѓани на подрачјето на населбата Аеродром, помеѓу булеварите Јане Сандански и АСНОМ, се вели во билтенот на МВР.

Се работи за шест лица, од кои две жени на возраст од 40 и 44 години и четири деца на возраст од 10 до 14 години, кои се каснати од куче.

Од страна на полициската станица Аеродром била известена шинтерската служба на Град Скопје.


Жена од Белгија вдоми болно куче од Македонија


Скопје, 30 јануари, 2015 - 16:05 (META) 

Жена од Белгија дојде во Македонија за да го спаси напуштеното и фрлено куче, маламутот со име Вук, информираат од „Анима mунди“.

Кучето во септември 2014 година sе најден во ужасна состојба, со отворени и загноени рани и воопшто не можело да застане на нозетe, а при секој обид паѓало.

„Еден ден, на „Фејсбук“ го видела Кети Берг, жена од Белгија. И не зошто е убаво, весело или здраво куче, туку зошто останало изневерено, само, болно и немоќно, одлучи да го спаси и во целост го финансираше неговото лекување, а потоа и го вдоми. Кети, која веќе има други две кучиња (вдомени од Полска и од Хрватска), беше единствената која се нафати да го згрижи Вук, куче чие лекување трае и ден-денес и кое ќе претставува проект за цел живот“, се вели во соопштението од здружението.

Поради тоа што не било возможно да се транспортира кучето со авион, Кети во Скопје дошла со автомобил.


Царината на Табановце спречила шверц на половина килограм марихуана


Скопје, 9 јануари, 2015 - 16:59 (META) 

Инспектори од мобилната единица на царинската управа и службеници на граничниот премин Табановце, пред два дена спречиле обид за шверц на половина килограм марихуана, соопшти Царинската управа.

Дрогата, која била сокриена во куфер сместен во просторот за багаж на автобус кој сообраќал на редовната линија Кичево – Анзбах, била откриена со помош на царинско куче, кое било користено при прегледот на автобусот.

Возачите на автобусот изјавиле дека куферот им го дало непознато лице на автобуската станица во Гостивар. Одделението за истраги при Царинската управа веднаш почнало истрага за откривање на лицата вмешани во обидот за шверц.

„Царинските инспектори утврдија дека куферот до автобуската станица го донело и го предало на возачите, лицето А.Б. (18) од село Врапчиште, по што истото е лоцирано на територијата на општината Врапчиште и преземени се мерки за негово приведување“, стои во соопштението од царината.

Инспекторите на царината осомничениот го лоцирале и го уапсиле во угосителски објект во селото, откако предходно не го нашле во неговиот дом, каде по налог од Основниот суд – Гостивар извршиле претрес.

Осомничениот бил предаден во надлежност на Основниот суд, а Царинската управа до надлежното јавно обвинителство поднела кривична пријава за неовластено производство и за пуштање во промет на наркотични дроги, психотропни супстанции и на прекурсори, информираат од Царинската управа.


Борко пак протестираше со студентите


Скопје, 26 декември, 2014 - 17:16 (META) 

Борко, кучето-демонстрант од Скопје, како атинскиот Луканико, беше присутно и на третиот студентски протест. Тој се појави точно навреме кога почна протестот и предизвика воодушевување кај присутните.

Борко претходно се појаувавал на неколку протести, маршови и на настаните за промовирање на велосипедизмот. Како што пишува на „Фејсбук“, Борко го добил своето име поради присуството на протести, посветеноста на групата со која се движи и беспоштедната борба со автомобилите.