ВМРО-ДПМНЕ ќе блокира четири крстосници и ќе протестира пред Министерство за правда


Скопје, 19 декември, 2017 - 9:33 (META) 

ВМРО-ДПМНЕ соопшти дека денеска во знак на протест поради притворените за насилството во Собранието на 27 април ќе блокира четири крстосници во Скопје и ќе одржи протест пред Министерството за правда.

Партијата од 15 до 17 часот ќе ги блокира: Крстосницата кај Соборен Храм, крстосницата кај „Мавровка“, крстосницата кај „Нова Македонија“ и крстосницата кај зградата на Црвен Крст. Протестот пред Министерството за правда ќе почне во 18 часот.


ВМРО-ДПМНЕ денеска ќе блокира раскрсници и ќе протестира пред Министерството за правда


Скопје, 12 декември, 2017 - 9:42 (META) 

ВМРО-ДПМНЕ денеска во периодот од 15 до 17 часот во Скопје ќе ги блокира раскрсниците кај „Мавровка“, помеѓу улиците „Васил Чакаларов“ и „Ангел Динев“ во Влае и крстосницата „Рампа“ во Кисела Вода. Протестот против притворањето на триесетина лица поради насилствата во Собранието од 27 април е закажан во 18 часот пред Министерството за правда.

„ВМРО-ДПМНЕ останува на улиците се додека хунтата ги гази законите и се изживува со граѓаните. Демократијата и правната држава ќе бидат вратени. ВМРО-ДПМНЕ бара безусловно запирање на сите овие процеси на политичкиот прогон, итно и безусловно стопирање на малтретирањата, на теророт и изживувањето кое го прави СДС и итно пуштање на слобода на сите лица кои се опфатени со овој класичен политички прогон“, порача утрово партијата.


ВМРО-ДПМНЕ ќе блокира крстосници кај „Мавровка“, на Рампа и во Влае


Скопје, 4 декември, 2017 - 11:15 (META) 

ВМРО-ДПМНЕ денеска ќе ги продолжи своите активности со блокирање крстосници и со протест пред Министерство за правда, барајќи ослободување на приведените и на притворените во најновата серија постапки на Јавното обвинителство за расчистување на крвавите настании од 27 април во Собранието на Република Македонија.

„ВМРО-ДПМНЕ бара слобода за патриотите. ВМРО-ДПМНЕ бара да запрат неправдите, хајките и местенките. ВМРО-ДПМНЕ ќе остане на улиците сè додека ова лудило на власта не престане“, порачува опозициската партија.

Од 15 до 17 часот ќе бидат блокирани крстосницата кај ТЦ „Мавровка“, крстосницата  меѓу улиците Васил Чакаларов и Ангел Динев во Карпош и крстосницата кај Рампа во Кисела Вода.

Од 18 часот, пак, ќе се одржи протест пред Министерството за правда, на улицата Димитрија Чуповски.


ВМРО-ДПМНЕ во 18 часот ќе протестира пред Кривичен суд и ќе блокира три крстосници


Скопје, 1 декември, 2017 - 10:18 (META) 

ВМРО-ДПМНЕ повика на протест пред Основниот суд Скопје 1 во 18 часот, а ќе ги блокира крстосниците кај ТЦ „Мавровка“, кај Рампа во Кисела Вода и крстосницата помеѓу улиците Васил Чакаларов и Ангел Динев во Карпош од 15 до 17 часот.

„Притворањето на уметници, глумци, режисери, архитекти, пратеници, припадници на безбедносните сили и луѓе кои беа дел од иницијативата „За заедничка Македонија“, со конструирано обвинение за тероризам, е акт на безумие и политичка тортура. Измислувањето и конструирањето на обвинение за тероризам против луѓе кои не сториле ниту прекршок во својот живот е класичен политички реваншизам против сите кои не се согласуваат со антидржавните политики и имаа храброст јавно да го кажат тоа. Да се прогласат за терористи луѓе кои никогаш не држеле оружје в рака и да се изедначат со терористите од Диво Насеље кои убија осуммина бранители е срамно и недозволиво“, велат од ВМРО-ДПМНЕ.

Од партијата велат дека Република Македонија е заробена држава од хунтата на власт, дека се газат човековите права и слободи и дека неосновано се изрекуваат притвори.


ВМРО-ДПМНЕ еден месец ќе блокира крстосници


Скопје, 30 ноември, 2017 - 16:13 (META) 

Министерството за внатрешни работи информира дека партијата ВМРО-ДПМНЕ најавила дека во наредните триесет дена, во периодот од 15 до 17 часот, ќе блокира повеќе скопски крстосници.

Од МВР нагласуваат дека сообраќајната полиција ќе преземе засилени мерки за контрола и за регулирање на сообраќајот за олеснување на метежот што ќе настане за време на блокадите.

За време на блокирањето на крстосницата кај ТЦ „Мавровка“, кај Порта Влае, крстосницата на улицата Јане Сандански и булевар Србија, кај Рампа, кај „МИДА моторс“, на крстосницата на булеварот Александар Македонски и на крстосницата на улиците Васил Чакаларов и Ангел Динев, сообраќајот ќе се пренасочува по околните сообраќајници.


ВМРО-ДПМНЕ ќе блокира три крстосници и ќе протестира пред Кривичен суд


Скопје, 30 ноември, 2017 - 10:49 (META) 

ВМРО-ДПМНЕ и денеска ги повика членовите и симпатизерите од 15 до 17 часот да ги блокираат крстосниците кај ТЦ „Мавровка“, кај Рампа во Кисела Вода и крстосницата помеѓу Васил Чакаларов и Ангел Динев во Карпош.

Во 18 часот, ВМРО-ДПМНЕ закажа протест пред Основниот суд Скопје 1 бидејќи, според партијата, СДСМ спроведува класичен партиски реваншизам и брутален политички притисок.

„СДС го злоупотребува судството за креирање неосновани обвиненија за наводен тероризам против искрени патриоти. Сите институции се ставени под партиската чизма, а во функција на реваншизмот кој се спроведува, институциите наместо да го спроведуваат законот, ги спроведуваат партиските наредби. Законите се деградирани, а правната држава не постои“, велат од ВМРО-ДПМНЕ.


ВМРО-ДПМНЕ ќе протестира пред Министерство за правда во 18 часот


Скопје, 29 ноември, 2017 - 13:53 (META) 

ВМРО-ДПМНЕ денеска ги повика своите активисти и симпатизери да излезат и да им дадат поддршка на „патриотите“ и да искажат револт кон „политичкиот прогон на власта“, во врска со вчерашните апсења на партиски функционери, осомничени за настаните во Собранието од 27 април годинава.

Од опозициската партија најавуваат дека од 15 до 17 часот ќе ги блокираат крстосниците кај ТЦ „Мавровка“, Порта Влае, крстосницата помеѓу булеварите Јане Сандански и Србија во Ново Лисиче и крстосницата кај Рампа во населбата Кисела Вода.

ВМРО-ДПМНЕ во 18 часот ќе организира протест и пред Министерството за правда, каде од партијата најавија дека ќе има повеќе обраќања пред присутните.

„Во 21 век имаме брутален политички прогон. Македонија е единственото место во светот каде оперски пејач, режисер, актер, архитект, доктор и други десетици патриоти треба да одговараат за измислено дело тероризам. Целата оваа хајка е обид да се замолкне опозицијата и да се скрши отпорот против сите антидржавни политики, кои власта ги реализираше во изминатиов период“, велат од партијата.


Трајановски спинува околу неговата ефикасност


Скопје, 29 септември, 2017 - 21:30 (META) 

Градоначалникот Трајановски кој од граѓаните на Скопје го бара третиот мандат има нереализирани крупни проектни ветувања, особено во делот на инфраструктурата и екологијата. Оттука, неговото спротивно тврдење е извртена вистина или спин, пишува „Вистиномер“.

„Еден од кандидатите за нов градоначалнички мандат за Скопје, Коце Трајановски, презентирајќи ја својата програма на отворањето на градскиот изборен штаб, меѓу другото го искажа и следново тврдење што го сметаме за спин: Спин:  Моите програми никогаш не биле ветени, а да не се реализираат. Се надевам дека мојата посветеност и работа на терен веќе ви е позната…

Поединечните проверки што ги правеше „Вистинимер“ во изминатите години, исто така, покажуваат дека има проекти кои биле ветени, а до ден денес не се исполнети и тоа не било кои, туку поголеми и позначајни од областа на инфраструктурата и од областа на животната средина. Така, на пример, не е реализирано ниту едно од ветувањата за подземни улици или надземни крстосници на две нивоа, за што „Вистиномер“ направил проверка“, се вели во написот.

(Целиот текст од „Вистиномер“ можете да го прочитате и да го преземете ТУКА)


„Шарената револуција“ блокираше повеќе крстосници во Скопје отколку што најави


Скопје, 8 јуни, 2016 - 12:32 (META) 

„Шарената револуција“ денеска во 12 часот блокираше повеќе крстосници во центарот на Скопје. Покрај најавените три крстосници, ненајавено, со герила-акција, беше блокирана и крстосницата кај Министерство за економија, што ги изненади возачите.

Претходно, полицијата го расчисти сообраќајниот метеж на предвидените крстосници, на кои, додека беа блокирани, немаше нервозни возачи.

Како што најавија од „Шарената револуција“, тие ќе изведуваат вакви герила-акции и понатаму, сè до 18 јуни, рок кој го дадоа за решавање на политичката криза. Тие побараа оставка од претседателот Ѓорге Иванов, формирање на техничка влада, ослободување на сите притворени демонстранти и одржување на фер избори со прочистен избирачки список.


„Шарената револуција“ точно напладне ќе блокира три крстосници во Скопје


Скопје, 8 јуни, 2016 - 9:52 (META) 

Денеска точно напладне, „Шарената револуција“ и граѓанската иницијатива „Протестирам“ ќе ги блокираат крстосниците кај Судска палата, Црвен крст и кај Соборниот храм.

Со блокирањето на улиците и со мирен и достоинствен протест, демонстрантите сакаат да покажат како изгледала Македонија во годините што изминале. Тие велат дека оваа власт реагира единствено на силен притисок и на гласни граѓани. Од движењата ги повикаат граѓаните да бидат трпеливи и да се приклучат кон блокадата.

„Нашата борба продолжува со блокада на овие крстосници во центарот на градот. Нашиот протест ќе биде мирен и достоинствен. Ние живееме во блокирана држава, со блокиран пристап до правда, со блокирани и партизирани институции. Ќе го оневозможиме движењето како што со години оваа власт ги оневозможува еднаквоста пред законот и слободата на граѓаните. Ве повикуваме масовно да се приклучите кон овој протест! Наместо да се лутите, свирнете за поддршка. Сетете се, сè што бараме е правда и еднаквост за сите нас. Ова е нешто што секој треба да го поддржи“, пишува во известувањето од „Шарената револуција“.