Мукоски, Василевски, Димовски, Арнаудов и Тарчуловски добија амнестија


Скопје, 28 декември, 2018 - 11:42 (META) 

Пратениците Крсто Мукоски, Сашо Василевски, Љупчо Димовски, Љубен Арнаудов и Јохан Тарчуловски се помеѓу првите обвинети што добија амнестија за крвавиот четврток на 27 април минатата година, пишуваат дел од медиумите.

Покрај петте пратеници, амнестија е одобрена и за вработените во кабинетот на поранешниот претседател на Собранието, Елена Божиновска и Иван Цветановски, како и за обвинетиот Захарије Симовски, браќата Стефан и Михаил Младеновски, Митре Питроповски и Илија Славевски.

По барањата за амнестија одлучувал кривичен совет. Други одлуки се очекуваат во текот на утрешниот ден.

Од Јавното обвинителство информираа дека пристигнале 66 барања за амнестија, од кои за 12 биле дадени позитивни мислења.

Обвинетите на кои ќе им биде одбиено барањето за амнестија имаат рок од 3 дена за жалба по издавање на решението.

Од 33 обвинети за 27 април, барање за амнестија не поднесоа само Митко Чавков, Душко Лазаров, Игор Југ, Јане Ченто и Игор Дурловски.


Нацрт-амандманите треба да се достават денеска, Заев најави помеѓу 4 и 7 амандмани


Скопје, 2 ноември, 2018 - 9:43 (META) 

Денеска истекува рокот кога Владата треба да ги достави до Собранието нацарт-амандманите за промена на Уставот според Договорот од Преспа. Нацрт-амандманите денеска ќе се најдат на владина седница, а потоа ќе бидат доставени до Собранието. Вчера премиерот Зоран Заев имаше уште една средба со осумтемина пратеници од новата пратеничка група на ВМРО-ДПМНЕ и коалицијата „За подобра Македонија”. Тој рече дека бројот на амандмани ќе биде помеѓу четири и седум, но потенцираше дека секој пратеник може да поднесе амандмани на нацрт-амандманите.

-Остануваме отворени за се што е во духот на Договорот за да го направиме инклузивен овој процес и да обезбедиме поголема согласност во македонскиот парламент за заедно да застанеме зад заокружување на договорот од Преспа. Верувам дека имаме фер и праведен договор и времето ке потврди дека сме на вистинската страна – рече Заев.

Крсто Мукоски кој е член на новата Независна пратеничка група на ВМРО ДПМНЕ рече дека на средбата со Заев го усогласиле текстот на нацрт амандманите кои ке бидат инкорпорирани во Уставот.

-Добивме уште еднаш согласност од премиерот дека имаат разбирање за нашите амандмани и дека ќе бидат прифатени. Владата утре има состанок наутро, по што новата пратеничка група ќе излезе со текстот на амандманите – нашите нацрт амандмани што ги предложивме се однесуваат на зајакнување на македонскиот идентитет, на македонското културно и историско наследство и на македонскиот јазик, вториот амандман се однесува на обезбедување на гаранции за спроведување на целиот договор, односно нестапување на сила на уставните измени ако Грција не го ратификува Договорот во својот парламент и не го ратификува протоколот за влезот во НАТО и третиот амандман се однесуваше за внатрешната употреба на името – со нашиот предлог се предлага сукцесивна примена на новото име односно со отворање и затворање на поглавјата за кои треба да преговараме за влез во ЕУ на тој начин ќе биде и преименувано името – рече Мукоски.

Со доставувањето на Нацрт-амандманите во Собранието, почнува да тече рокот од 30 дена до одржувањето на собраниската седница. Комисиската расправа најверојатно ќе почне на 6 ноември, а пленарната на 3 декември. За гласање во оваа фаза е потребно мнозинство од пратениците, односно 61 глас.


Обвинетите за насилството во Собранието со поддршка за пратениците кои гласаа „за“


Скопје, 22 октомври, 2018 - 12:25 (META) 

Обвинетиот за насилството во Собранието, Вилијам Михајловски на денешното судско рочиште за настаните од 27 април рече дека сака да даде поддршка за пратениците кои во петокот во Собранието гласаа за пристапување кон уставни измени.

Михајловски во име на обвинетите рече дека „им изразуваат поддршка на храбрите пратеници кои гласаа за уставните измени“. Судијката Добрила Кацарска го прекина и го опомена Михајловски.

Претходно, пратеникот Љубен Арнаудов, обвинет за случувањата од 27 април во Собранието, на влегување во судот, изјави дека не смета оти некој е предавник и дека не знае кој стои за вчерашното писмо. Истакна дека не е точно дека имале закани и дека примиле пари.

Пред почетокот на денешното рочиште, обвинетиот Богдан Илиевски – Бетмен беше прашан дали се чувствува предаден, и посочи само „сите ние сме браќа“.

Денешното рочиште е прво по пуштањето од домашен притвор на тројцата пратеници на ВМРО-ДПМНЕ Сашо Василевски, Крсто Мукоски и Љубен Арнаудов и нивното гласање за уставните измени во петокот во Собранието.

Во судот денеска се сите обвинети за 27 април, а во судницата се прегледуваат видеоснимките од собраниските камери.


Укинат домашниот притвор на пратеникот Крсто Мукоски


Скопје, 19 октомври, 2018 - 14:02 (META) 

Апелациониот суд до Основниот суд, денеска доставил решение со кое ја уважил жалбата на пратеникот на ВМРО-ДПМНЕ, Крсте Мукоски, обвинет за настаните од 27 април 2018 година во Собранието и го преиначи решението на советот со што ја укина мерката куќен притвор.

На Мукоски му се определени мерки за претпазливост – Одземање на патна исправа, односно забрана за издавање нова и Обврска обвинетиот повремено да се јавува на овластено службено лице во судот во Струга.


Укинати притворите на Чавков, Мукоски и Василески, Тарчуловски и Димовски


Скопје, 27 март, 2018 - 9:36 (META) 

Поранешниот министер за внатрешни работи Митко Чавков и пратениците Крсто Мукоски и Сашо Василески излегуваат од истражниот затвор „Скопје“ во населбата Шуто Оризари, откако вчера попладне Врховниот суд донесе одлука да им го замени притворот со куќен притвор.

Врховен суд вчера решавашe по жалбите кои Чавков, Мукоски и Василески ги поднесоа на одлуките на Кривичниот и Апелацискиот суд, со кои им се одредуваше и продолжуваше притворот.

Врховниот суд одлучи од притвор да се пуштат и Митко Пешев, Душко Лазаров, Горан Ѓошевски, Оливер Поповски и Мунир Пепиќ сите вработени во МВР, на кои исто така им е одреден куќен притвор.

По вчерашната одлука во притвор остануваат уште четворица осомничени за настаните од 27 април. Меѓу нив се членовите на патриотското здружение од Велес, Горанче Анѓелов и Илија Славевски.

Врховен суд, исто така, вчера решаваше за жалбите на пратениците Јохан Тарчуловски и Љупчо Димовски, кои повеќе од еден месец се во куќен притвор, и им го укина притворот и им одреди мерка на претпазливост, односно одземени им се патните исправи и тие мора задолжително да се јавуваат во суд еднаш неделно.


Врховен суд треба ја соопшти одлуката за притворените од 27 април


Скопје, 26 март, 2018 - 10:02 (META) 

Врховниот суд на Република Македонија денеска, три дена откако истече рокот за тоа,  треба да ја донесе одлуката по жалбите за притворите на пратениците и другите осомничени за настаните во Собранието на РМ од 27 април минатата година.

Рокот од 48 часа за донесување на решението по однос на жалбите на притворените истече во четвртокот.

Осомничени за настаните од 27 април се 35 лица, меѓу кои пратеници, организатори на протестот и вработени во МВР.

Врховен решава за жалбите на пратениците Крсто Мукоски и Сашо Василевски и десетина осомничени граѓани.

Според претседателот на Врховниот суд, Јово Вангеловски, судот не доцни со решение, туку се работи за сложен предмет за кој не може да се очекува да има брза одлука.


Врховен суд решава за притворите на Мукоски и Василевски


Скопје, 20 март, 2018 - 9:31 (META) 

На јавна седница во Врховниот суд денеска ќе се одлучува за притворите на обвинетите за насилствата во Собранието на Република Македонија од 27 април 2017 година.

Судот треба да се изјасни дали ќе биде потребно продолжување на притворот на пратениците Крсто Мукоски и Сашо Василевски.

Тие се дел од 35-те осомничени за терористичко загрозување на уставниот поредок и безбедноста. Меѓу нив е и поранешниот министер на МВР, Митко Чавков.


Владо Јовановски заминува во куќен притвор, Мукоски останува во „Шутка“


Скопје, 22 февруари, 2018 - 17:08 (META) 

Кривичниот совет на Апелацискиот суд Скопје ја прифати жалбата на актерот Владо Јовановски и му ја ја замени мерката притвор во истражен затвор, со мерка куќен притвор.

Пратеникот Крсто Мукоски, чии жалби денеска ги разгледуваше Апелација, останува во притвор. Второстепениот суд го одби негово барање притворот да му биде заменет со куќен притвор.

Тој пред Кривичниот совет на Апелацискиот суд се пожали дека психичкото здравје му е сериозно нарушено и оти не планира да бега.

Јовановски и Мукоски се меѓу 35-те осомничени за насилствата во Собранието од 27 април, минатата година.

Вчера, Апелацискиот суд потврди дека ги прифатил жалбите на организаторите на протестите на „За заедничка Македонија“, Борис Дамовски и Богдан Илиевски и на пратеникот Љубен Арнаудов, и дека мерката притвор во истражен затвор им ја заменил со куќен притвор и одземање на пасошите. Покрај нив тројца, Апелација им одреди куќен притвор и одземање на пасошите и на Јане Ченто, Иван Цветановски и на Оливер Радулов.

Во исто време, Апелацискиот суд одлучи поранешниот министер за внатрешни работи, Митко Чавков да остане во притвор, пратеникот Јохан Тарчуловски во домашен притвор, а отфрлени се жалбите и на Горан Ангеловски, Илија Славевски, Сашо Марковски и Вилијам Михајловски.

Во притвор остануваат и пратеникот Сашо Василевски, шефот на обезбедувањето на поранешниот собраниски спикер Трајко Вељаноски, Горан Ѓошевски, началникот во МВР, Душко Лазаров и началникот на посебните и специјалните единици на МВР, Митко Пешов откако Апелација им ги одби жалбите и ја потврди одлуката на Кривичниот суд.


И Мукоски останува во притвор, одлучи Апелација


Скопје, 17 јануари, 2018 - 14:45 (META) 

Апелацискиот суд Скопје ја одби како неоснована жалбата за продолжувањето на притворот и на пратеникот од ВМРО-ДПМНЕ Крсто Мукоски, осомничен за минатогодишните насилства во Собранието од 27 април.

Второстепениот суд за жалбата на Мукоски одлучувал на затворена за јавност седница.

Со одлуката на Апелација Мукоски останува во притвор во истражниот затвор „Скопје“ во Шуто Оризари, кој на 27 декември, минатата година му беше продолжен за нови 30 дена.

Судот дополнително треба да решава и за жалбите на пратениците Жаклина Пешевска и Љупчо Димовски, на кои им е продолжен куќниот притвор.

Од Апелација информираат дека сè уште се чекаат одговорите на жалбите од Вишото јавно обвинителство за овие два предмети.

Инаку, Апелацискиот суд досега ги одби сите жалби за продолжените притвори на осомничените за 27 април, меѓу кои и на поранешниот министер за внатрешни работи, Митко Чавков, на актерот Владо Јовановски, на Игор Дурловски, Богдан Илиевски – Бетмен и на пратениците Сашо Василевски, Јохан Тарчуловски и Љубен Арнаудов.

За насилствата во Собранието се осомничени 36 лица, кои се товарат за кривичното дело терористичко загрозување на уставниот поредок и безбедноста.


Продолжен притворот на пратениците и на Чавков, Илиевски, Дамовски, Дурловски…


Скопје, 27 декември, 2017 - 15:55 (META) 

Кривичниот суд во Скопје денеска им го продолжи притворот за нови триесет дена на пратениците Крсто Мукоски, Сашо Василевски и Љубен Арнаудов, на поранешниот министер за внатрешни работи и директорот на Бирото за јавна безбедност Митко Чавков, организаторите на протестите на „За заедничка Македонија“ Игор Дурловски, Борис Дамовски, Богдан Илиевски и на уште шестнаесет лица осомничени за насилствата во Собранието од 27 април, оваа година.

„Кривичниот совет на одделението за организиран криминал и корупција при Основниот суд Скопје 1 – Скопје постапувајќи по предлог на ОЈО за гонење организиран криминал и корупција за продолжување на мерката притвор и мерката куќен притвор за 29 лица, а во врска со настаните од Собранието на Р.Македонија од 27 април, донесе решенија со кои го прифати предлогот на обвинителството и за К.М., С.В., Љ.А., М.Ч., Д.Л., Г.Ѓ., О.П., О.Р., М.П., А.А., Е.Д.Б., И.Ц., Б.Д., Б.И., В.Ј., И.Д., М.П., З.С., Ј.Ч., И.С., Г.А., В.Т. и В.М. ја продолжи мерката притвор во траење од 30 дена“, стои во соопштението на судот.

Куќниот притвор им е продолжен на пратениците Љупчо Димовски, Јохан Тарчуловски, Жаклина Пешевска и на уште еден осомничен, додека за С.М. и М.М. судот го прифати предлогот на обвинителството за укинување на мерката притвор и определување мерка куќен притвор.

Против овие решенија осомничените имаат право на жалба до Апелацискиот суд во рок од 48 часа од приемот на решенијата.

Обвинителството за гонење на организиран криминал и корупција на 28 ноември отвори истрага против 36 лица за насилствата во Собранието, кои ги товари за терористичко загрозување на уставниот поредок и безбедноста на државата.