!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Општина Тетово: Снегот се расчистува според приоритет, прво улиците, па тротоарите


Тетово, 10 јануари, 2017 - 15:06 (META) 

Од кризниот штаб на Општина Тетово велат дека постојано се работи на расчистување на улиците од снегот. Според нив, сите коловози се проодни и механизација постојано работи на терен и ја контролира состојбата.

– Наши екипи постојано се на терен и реагираат веднаш на расчистување на патиштата од снегот, кој периодично, поради силниот ветер, понекогаш може да се спушти на некој коловоз – вели Ука Алити од кризниот штаб од Тетово.

Граѓаните велат дека сепак снегот се чисти делумно. Тротоарите, според нив, воопшто не се исчистени.

– Тротоарите не се исчистени ниту во центар, а камоли на друго место. Човек може да падне и да скрши нога, се лизга – вели една повозрасна жителка на Тетово.

Од кризниот штаб од Тетово, пак, велат дека јавните површини се расчистувале според приоритет. Денеска општински екипи работеле на расчистување на снегот од тротоарите.

Денеска во Западна Македонија наврна нов снежен нанос, кој не предизвика проблеми во патниот сообраќај. Сите автопати и регионални патишта во овој дел на Македонија се проодни.


Реката Пена пред излевање, свлечиште го затрупа патот Шипковица – Бродец


Тетово, 8 септември, 2016 - 15:36 (META) 

Водостојот на реката Пена во долниот дел од Тетово постојано се следи откако водата од оваа река се искачи на критично ниво. Обилните врнежи од дожд изминатите неколку дена предизвикаа и свлечишта над патниот правец Шипковица – Бродец.

– Наносите од камења и од земја на патот Шипковица – Бродец, кои ги донесе вчерашното свлечиште, се остранети, но градежна механизација постојано е на терен и работи на остранување на нови помали наноси, предизвикани од ерозивни процеси кои сè уште се активни во овој дел. Главно е тоа што ситуацијата будно се следи и патот е прооден – изјави претседателот на кризниот штаб на Тетово, Хусеин Демири.

Од тетовската противпожарна единица изјавија дека се целосно подготвени во случај да дојде до поголемо излевање на реката Пена.

– Ние наполнивме повеќе вреќи со песок, во случај Пена да почне да се излева. Се надеваме дека нема да ги употребиме – изјави Ука Алити, командир на противпожарната единица од Тетово.

Надлежните најавија врнежи и во наредните неколку дена.


Во тетовско се нормализира состојбата по големото невреме


Тетово, 8 август, 2016 - 16:00 (META) 

Кризниот штаб е постојано на местата зафатени во невремето во тетовско. Градежна механизација се уште работи на расчистување на патниот правец Шипковица – Бродец каде се одвива сообраќајот, но со помали тешкотии. Се работи и на проширување на речните корита кои беа наполнети со земја и камења, по обилните врнежи кои го зафатија тетовскиот регион во саботата.

– Нашата механизација постојано работи на расчистување на терените, имајќи го предвид фактот дека синоќа имавме пообилни врнежи од дожд. И во наредните денови нема да ја повлечеме механизација, со цел превентивно да дејствуваме ако ни се случат нови свлечишта – изјави градоначалничката на Тетово, Теута Арифи.

Арифи додаде дека дел од нивните служби се испратени да помогнат во Скопје, каде Општината Тетово донирала и испратила големи количини на флаширана вода.