Гувернерите на банките од регионот и ЕУ ќе се обратат на конференцијата во Охрид


Охрид, 13 април, 2018 - 10:00 (META) 

Гувернерот на Централната банка на Белгија, Јан Сметс денеска ќе има воведно предавање на седматa годишна истражувачка конференција на Народна банка, која вчера почна во Охрид. Конференцијатa е насловена „Речиси една деценија по кризата: На патот кон новиот глобален циклус и нормализирање на монетарната политика“.

Излагачи на првата панел-дискусија на вториот ден од конференцијата, исто така ќе бидат и гувернерите на централните банки од Македонија, Белгија, Хрватска, Албанија и Косово. Темата на панел-дискусијата на гувернерите е новиот глобален циклус и нормализирањето на монетарната политика.

Во втората панел-дискусија на која тема е „Капиталните текови-изгледите и ризиците на регионот“, ќе учествуваат регионалниот резидентен претставник на ММФ за Централна и Источна Европа, директорот на Здружениот институт од Виена, заменик-директорот на Секторот за економија и политики на Европската банка за обнова и развој (ЕБРД) и вицегувернерот од банката на Словенија.

На конференцијата исто така учествуваат и претставници на повеќе централни банки од регионот и ЕУ.

„Оваа конференција претставува можност за размена на искуства со претставниците на пошироката меѓународна заедница за клучни прашања од областа на макроекономијата, монетарната политика и финансиската стабилност, како за претставниците на НБРМ, така и за домашните банки и другите финансиски институции“, се вели во соопштението на Народна банка.


Светска банка: Економијата во Македонија закрепнува, прогнозите се позитивни


Скопје, 11 април, 2018 - 12:02 (META) 

По минатогодишната стагнација на македонската економија, Светска банка за земјите од Западен Балкан за годинава предвидува раст од 3,2 проценти и 3,5 проценти во 2019 година.

Редовниот економски извештај за Западен Балкан покажува дека економиите на Македонија и Србија, влијаеле и на намалувањето на растот на економијата на Западен Балкан, од 3,1 процент во 2016 година на 2,4 проценти во 2017 година.

– Економското влијание на политичката криза во Македонија беше подолго од очекуваното. Растот забави на нула во 2017 година, заради големото намалување на инвестициите. Но, економијата веќе започнува да закрепнува во 2018 година, предводена од потрошувачката и закрепнувањето на инвестициите. Нашите прогнози се позитивни за блиска иднина – изјави директорот на Канцеларијата на Светска банка во Македонија, Марко Мантованели.

Градежната и преработувачката индустрија во првите три квартали лани забележале пад.

– Во четвртиот квартал лани имаме мало закрепнување на преработувачката индустрија, кое продложи и на почетокот на годината. Кај градежништвото нема јасна слика. По падот на активноста, имаме привремено пролонгирање на проектите во јавните инвестиции, бидејќи Владата го ревидира квалитетот. Во креирањето на 190.000 работни места на Балканот, Македонија учествува со 18.000. Така што и покрај стагнацијата на економијата, има позитивно поместување на пазарот на трудот. Мерките за вработување треба да бидат активни без фискални импликации како во минатото – рече економистот во канцеларијата на Светска банка во Македонија, Бојан Шимбов.

Тој додаде дека извозот растел побрзо од увозот, со што се придонело за намалување на трговскиот дефицит. Според Шимбов, позитивно е тоа што во него придонеле и домашните извозници, како резултат на закрепнувањето на економијата во Европа, која е наш најголем трговски партнер. Странските инвестиции лани имал мал пад, поради политичката криза и несигурноста.

Светска банка ја поздрави заложбата на владата за фискална консолидација со фискалната стратегија, а го нотираше и ланското намалување на јавниот долг, прв пат по 2008 година.

Од Светска банка препорачуваат зголемување на приходите и подобро менаџирање на расходната страна.

– Има простор за зголемување на приходната страна преку ефикасна наплата на даноците и зголемување на квантитетот на истите. Притоа, тие треба да бидат искористени за продуктивна цел, не на тековни трошоци и нетаргетирани социјални трошења како во минатото – додаде Шимбов.

Светска банка оценува дека потенцијалното членство во НАТО и преговорите со ЕУ, ќе бидат сидро за структурните реформи кои позитивно би влијаеле на економскиот раст, зголемување на сигурноста на странските и домашните инвеститори.

Во однос на емиграцијата на населението, податоците на Светска банка покажуваат дека 25 отсто се иселени, а пикот бил достигнат во 2015 година.

– Долго не е спроведен попис и точната бројка не може да се одреди. Извор на податоците се Обединетите нации и Виенскиот институт, со што проксимативно, бројката е 25 отсто од популацијата. Во 2015 година сме имале исторски максимум на иселување, споредено со 2000 година. Трендот на иселување на висококвалификувана работна сила продолжува – појасни Шимбов.

Од Светска банка ѝ препорачуваат на владата континуирани заложби за фискална консолидација, воведување на даночни реформи за мобилизирање на приходи, зајакнување на даночни проходи и ревидирање на даночните отстапки, рационализирање  и подобрување на квалитетот и ефикасноста на социјалните трошења, рационализација на субвенциите посебно во земјоделстовото, обезбедување на одржливост на пензискиот систем.


Мигрантските рути се затворени, владите во регионот ќе разменуваат информации


Скопје, 4 април, 2018 - 13:55 (META) 

Регионалната иницијатива за миграција, азил и бегалци (МАРРИ) ги поддржува шесте влади од Западен Балкан, Албанија, Босна и Херцеговина, Косово, Македонија, Црна Гора и Србија во усогласување на правната рамка со законодавството на Европска Унија, во изградбата на институции и персонал, како и размена на информации за мигрантите кои поминуваат низ овие држави.

На денешната презентација на МАРРИ, беше истакнато дека како делуваат на повеќе подрачја како азил, интегрирано гранично управување, визен режим, интеграција на бегалците, борбата против трговијата со луѓе.

– Ги поддржувме шесте влади за подобро да управуваат со миграцијата. Тоа е условено со евроатлантската перспектива на државите од регионот, а како членки на Обединетите Нации, одредени документи се обврзувачки. Државите исто така треба да имаат побрза соработка во размената на комунакции – изјави директорката на МАРРИ, Тамара Ругоша.

Иако рутата за мигрантите е затворена, сепак тие користат илегални премини преку државите од регионот за влез во државите од Европската Унија. Притоа, додаде Ругоша, постои опасност од нелегална трговија со луѓе, криумчарење на деца, трговија со органи.

Во следните две години, како предизвик за МАРРИ меѓудругото ќе биде и подигање на свеста во регионот од опасноста за криумчарење. Па оттука, граничните служби, посебно на аеродромите, ќе бидат обучувани од страна на Европската гранична служба, Фронтекс за препознавање на деца кои се жртви на криумчарење.

– Во моментов рутите се затворени, но опасноста од Блискиот Исток се уште ја има. Затоа овој период е потребно да превенираме. Кога беше кризата, на македонската и на српската граница имаше по 20.000 мигранти, а тоа навистина е тешко да се изменаџира. Властите овде и во Србија покажаа дека имаат капацитет за справување, но тој треба да се подобри и да биде поефикасен. Ние сме овде и да ги поврземе владите со донаторите, за тие да не трошат пари од буџетот. Имав информација дека вашата држава, ја чинело 50.000 евра дневно за регистрација, сместување, организација на мигрантите. Тоа е голем притисок – додаде Ругоша.

Во 2015 и 2016 година, низ територијата на Западен Балкан поминале еден милион бегалци.


Осум можни сценарија околу судбината на Законот за јазиците


Скопје, 15 март, 2018 - 10:40 (META) 

Вчера со 64 гласа и во тензична атмосфера, на раб на физичка пресметка, беше изгласан Законот за јазиците во трето читање, откако еднаш претседателот Иванов одби да го потпише.

Шефот на државата и синоќа во обраќање до јавноста изјави дека „Уставот и совеста не му дозволуваат да го потпише Указот за прогласување на Законот“.

Од сите страни стигнуваат реакции во кои или се поздравува или се оспорува Законот и начинот на неговото донесување.

Во моментов кружат неколку сценарија за судбината и примената на Законот.

  1. Иванов да го потпише Указот (малку веројатно)
  2. Иванов да не го потпише (иако, според Уставот, нема право на второ вето, односно ако веќе одбил да потпише указ за закон и тоа во повторена постапка на гласање повторно е донесен од пратениците е должен да го потпише указот)
  3. Уставна криза – Никој со сила не може да го натера Иванов да стави потпис на Указот, но тоа веќе ќе создаде уставна криза – веќе изгласано законско решение да остане непотпишано.
  4. Тужби пред Управниот суд за утврдување надлежност и повреда на управна постапка.
  5. Без потпишан указ од претседателот на Републиката законот НЕ МОЖЕ да биде објавен во „Службен весник“, а штом не е објавен не може да стапи на сила и не може да се применува во практика.
  6. Уставот не утврдил рок кога претседателот треба да го потпише указот што значи остава широк простор за блокада на објавувањето на законот и неговото влегување во сила.
  7. Да се поднесе (кој?) барање за автоматско објавување на Законот за употреба на јазиците во „Службен весник“ за да започне и официјално да се применува.
  8. Серија претставки до Уставниот суд.

Кризата во Каталонија ја чини шпанската економија една милијарда евра


Барселона, 2 јануари, 2018 - 14:30 (META) 

Шпанскиот министер за економија, Луис де Гуиндос изјави дека кризата во Каталонија, по повод иницијативата за независност на тој регион, ја чинело државата една милијарда евра и дека локалната економија се уште ги чувствува последиците.

Де Гуиндос изјави дека, успорувањето на економскиот пораст во Каталонија влијае на вкупната шпанска економија, која е четврта по големина во еврозоната.

„Каталонија имаше пораст повисок од шпанскиот и беше еден од двигателите на шпанската економија. Но, во четвртиот квартал таа е товар на државата“, изјавил Де Гуиндос.

Тој проценил дека кризата може да чини една милијарда евра.

Шпанија се најде во длабока политичка криза, кога регионалниот парламент на Каталонија прогласи независност во октомври, по референдумот кој Владата на Шпанија го прогласи за незаконски.


Европската комисија ги повика Шпанија и Каталонија на дијалог


Брисел, 4 октомври, 2017 - 18:42 (META) 

Европската комисија ги повика Шпанија и Каталонија на дијалог, дури и ако постои општ консензус дека Каталонците го прекршиле шпанскиот закон за распишување реферндум за независност.

Потпретседателот на Европската комисија, Франс Тимерманс, изјавил дека каналите на комуникација помеѓу Шпанија и Каталонија мора да останат отворени.

Тимерманс додал дека е време за разговор за да се најде решение за безизлезната ситуација, во рамките на шпанскиот уставен поредок.

Во однос на повикот од страна на Каталонците, ЕУ да интервенира во спорот помеѓу Барселона и Мадрид, тој додаде дека се работи за внатрешно прашање на Шпанија, кое мора да се реши во рамките на шпанскиот устав.


Европска Унија ги продолжи санкциите кон Русија за шест месеци


Брисел, 14 септември, 2017 - 18:05 (META) 

Европска Унија повторно ги продолжи санкциите кон Русија за шест месеци, до 15 март 2018 година, поради судирите во Украина.

Санкциите се однесуваат на руски и на украински поединци и на правни лица.

И покрај фактот што неколку членки на ЕУ се противеа за санкциите кон Русија и повикаа на нивно укинување, Брисел и понатаму ги продолжува рестрикциите кон Москва, кои подразбираат замрзнување на имотот на компании и забрана за патување за лица.

ЕУ ги воведе санкциите во март 2014 година, како одговор на кризата во Украина.


Ердоган: Никому не му е во интерес продолжувањето на катарската криза


Истанбул, 23 јули, 2017 - 12:50 (META) 

Турскиот претседател, Реџеп Таип Ердоган, во Истанбул изјави дека „никому не му е во интерес“ да продолжи кризата во Персискиот Залив.

Говорејќи пред почетокот на неговата дводневна поста на Катар и на Саудиска Арабија по повод дипломатската криза во регионот, Ердоган истакна дека веќе никој нема каков било интерес за пролонгирање на кризата.

Претседателот на Турција ги обвини „непријателите“ дека се обидуваат да ги „зајакнат тензиите помеѓу браќата“.

Саудиска Арабија, Обединетите Арапски Емирати, Бахреин и Египет на 5 јуни ги прекинаа дипломатските односи со Катар обвинувајќи ја земјата дека поддржува тероризам и дека е поврзана со Иран кој е регионален ривал на Саудиска Арабија.

Катар ги отфрли обвинувањата.

Ердоган денеска и утре ќе ги посети Катар и Саудиска Арабија, а медиумите пренесуваат дека тој ќе го посети и Кувајт, кој е главен посредник во решавањето на дипломатската криза во тој регион.


ВМРО-ДПМНЕ реагира на Мирчевски: ЛЕД-дисплеите се набавени законски


Скопје, 15 јули, 2017 - 15:08 (META) 

ВМРО-ДПМНЕ се огласи со реакција на денешната прес-конференција на  директорот на Службата за општи и заеднички работи, Пеце Мирчески, кој рече дека близу еден милион евра потрошила претходната влада за набавка на два ЛЕД-дисплеи и изрази очекување дека соодветна постапка ќе преземе Основното јавно обвинителство.

Партијата вели дека се е законски со набавката и порача дека СДСМ, ако има сомнежи во постапката, треба да поведе соодветна постапка.

„ЛЕД-мониторите кои ги спомнува партискиот директор на СОЗР се набавени во транспарентна процедура на законски начин и остануваат во сопственост на државата. Доколку има каков било сомнеж дека нешто е сторено надвор од законот, го повикуваме СДС да поведе соодветна постапка. Се друго е само гол политички популизам и манипулирање на јавноста од кое што граѓаните немаат никаква полза“, се вели во реакцијата.


Мирчески: Во време на криза, претходната власт дала милион евра за два ЛЕД-дисплеи


Скопје, 15 јули, 2017 - 13:15 (META) 

Близу еден милион евра потрошила претходната влада за набавка на два ЛЕД-дисплеи, соопшти денеска пред новинарите и пред јавноста директорот на Службата за општи и заеднички работи, Пеце Мирчески.

– Во услови кога Македонија била во севкупна економска и социјална криза, која била потребата некој да набавува ЛЕД-екрани за близу еден милион евра – праша тој.

Според постојната документација, првата од овие две набавки е за ЛЕД-дисплеј кој е наменет за фасадата за новата зграда на Факултетот за драмски уметности.  Таа е направена во 2015 година, а за дисплејот се платени 340.000 евра.

Вториот договор е склучен во 2016 година, за набавка на ЛЕД-екран за надворешна употреба, кој е поставен на палата АСНОМ. Овој дисплеј е платен 650.000 евра.

– Симптоматично е што овие исклучително нерационални набавки, платени со пари на граѓаните, ги направила една иста компанија. И во двата случаи фактурите се платени само еден ден по нивната испорака. Владата на Република Македонија, како и сите органи и министерства, ќе преземаат соодветни мерки секогаш кога ќе бидат констатирани и докажани злоупотреба на службената должност и злоупотреба на парите на даночните обврзници, во рамките на процедурите и интерните акти на институциите – рече Мирчески.

Тој изрази очекување дека соодветна постапка ќе преземе Основното јавно обвинителство.