!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Дачиќ: Кризата во Македонија е регионален проблем


Белград, 28 април, 2017 - 11:23 (META) 

Министерот за надворешни работи на Србија, Ивица Дачиќ, изјави дека политичката криза во Македонија не е само локален, туку и регионален проблем и дека меѓународната заедница не интервенирала за да дојде до компромис туку за да се прифати една опција.

– Ситуацијата не е добра. Србија ќе помогне колку што може, но ние можеме само да апелираме за мир и за смирување на ситуацијата зашто без тоа, ќе биде загрозена стабилноста на регионот – рече Дачиќ за РТС.

Запрашан дали македонската криза може да се прелие во Србија и во регионот, Дачиќ рече дека во Србија би била слична ситуацијата како во Македонија доколку некој друг би бил на власт.

– Затоа ние ја презедовме одговорноста да бидеме стожер на стабилноста во регионот – рече Дачиќ.

Премиерот на Србија, Александар Вучиќ, синоќа по повод случувањата во Македонија, апелираше за смирување на ситуацијата и за решавање на проблемот на мирен начин, а за денеска закажа седница на Бирото за координација на службите за безбедност.


Политичката криза лани ја намалила кредитната активност на банките


Скопје, 27 април, 2017 - 14:17 (META) 

Кредитите на банките ја завршија 2016 година со пораст од само 1,2 отсто, што е значително послабо остварување во споредба со претходната година, кога тој изнесуваше 9,7 проценти, велат од Народна банка во нивниот годишен извештај за 2016 година.

„Сепак, движењата на кредитите во голема мера беа условени од измената во постојната регулатива од страна на Народната банка, според која, најдоцна до 30 јуни 2016 година банките имаа обврска да ги „исчистат“ кредитните портфолија од нефункционални кредити“, се вели во извештајот на Народна банка.

Учеството на нефункционалните во вкупните кредити се спушти до нивото од 6,6 проценти на 31 декември 2016 година.

Лани банките имале за една третина повисока добивка во работењето споредено со 2015 година.


Стејт департмент: Лидерите да сторат сè што можат за брзо формирање влада


Вашингтон, 19 април, 2017 - 20:02 (META) 

„Соединетите Американски Држави ги поттикнуваат македонските лидери да сторат сè што можат за формирање на влада без понатамошно одложување, за државата да може да продолжи со реформите потребни да стане полноправна членка на евроатлантското семејство“, се вели во изјавата на Стејт департментот за политичката криза во Македонија, дадена за „Гласот на Америка на македонски“.

Во неа се додава дека македонските граѓани избраа парламентарни претставници во декември лани и дека постои јасно мнозинство во Собранието, што чека да формира влада.

„Политичарите кои се обидуваат да го блокираат формирањето на владата, ги обезвреднуваат владеењето на правото, демократските процеси и стабилноста на Македонија и на регионот. Ние ќе работиме со нашите европски партнери на охрабрување на овие политичари, да престанат со нивните опструкции, вклучувајќи и земање на одговорност за нивните постапки“, се вели во изјавата.


ВМРО-ДПМНЕ: СДСМ со своето деструктивно однесување предизвика штета на економијата


Скопје, 18 април, 2017 - 15:31 (META) 

„Лицемерно е СДС да се прикажува како партија на економски експерти ако се земе предвид дека во време на владеење на оваа партија, земјата достигна историски највисоко ниво на невработеност и највисока стапка на невработеност во Европа“, се вели во реакцијата на ВМРО-ДПМНЕ на прес-конференцијата на претседателот на комисијата за економија на СДСМ, Драган Тевдовски.

Од партијата велат дека СДСМ со своето „деструктивно однесување“ изминатиот период предизвикал доволно штета и на државата и на граѓаните и на економијата.

– Станува збор за невработеност од дури 38 отсто, која беше последица на криминалната приватизација што ја спроведе СДС и благодарение на која 200.000 семејства останаа без извор на егзистенција. Владата на ВМРО-ДПМНЕ, пак, отвори нови 170.000 работни места и ја намали невработеноста за 15 процентни поени – се вели во соопштението на ВМРО-ДПМНЕ.

Во него се додава дека и во екот на политичката криза, странските инвеститори продолжиле да веруваат во економските политики на владата на ВМРО-ДПМНЕ и отворале нови капацитети или ги прошириле постојните.


Билт дојде со црни прогнози, во Собранието нов обид за разврска на кризата


Скопје, 18 април, 2017 - 8:00 (META) 

Продолжението на конститутивната седница на Собранието е закажано за денеска во 11 часот. Според партиските соопштенија, од ВМРО-ДПМНЕ и од СДСМ  нема отстапување од рововските позиции на партиите.

Ново е само што денеска во Скопје ненајавено е и поранешниот шеф на шведската дипломатија, Карл Билт, кој на својот твитер-профил, исто така, напиша: „Нема изгледи за крај на уставната криза во Скопје. Разликите во ставовите помеѓу политичките партии се сè подлабоки. Ситуацијата е мошне сериозна.“

Официјално не е соопштено во каква мисија доаѓа Билт, дали станува збор за посредничка или, што е поверојатно, само за „извидничка“ улога.

Билт ќе се сретне со лидерите на политичките партии, а во агендата на претседателот Ѓорге Иванов не е предвидена средба со поранешниот шеф на шведската дипломатија.

Иванов, претходно во интервју за австрискиот „Винер цајтунг“, го повтори својот став дека нема да го додели мандатот и да се избере претседател на Собранието.

„Формирање влада без оправдан мандат е правно неиздржано“, изјави Иванов.

Пред денешната седница, СДСМ напиша дека „Трајко Вељаноски и Ѓорге Иванов не смеат противуставно и противзаконски да ги блокираат демократските процеси. Тие се должни, во согласност со Уставот и со законите, да овозможат мирен трансфер на власта“.

„Прво, парламентарно мнозинство веќе постои и тоа никој не го бара од него. А, и дали некои од опозициските пратеници на ВМРО-ДПМНЕ ќе најдат здрав разум и ќе ги поддржат реформите по формирањето на новата реформска влада, исто така не зависи од Груевски“, велат од СДСМ.

Од ВМРО-ДПМНЕ, пак, вчера порачаа дека „Македонија е заглавена во криза затоа што СДС сака да ја измами изборната волја на граѓаните и да го занемари гласот на мнозинството граѓани кои гласаа за ВМРО-ДПМНЕ“.

Од партијата го повторија ставот дека нови парламентарни избори заедно со локалните се најефективното решение за излез од кризата.


Вучиќ и Мекејн во Белград разговарале за ситуацијата во Македонија


Белград, 10 април, 2017 - 16:41 (META) 

Српскиот премиер Александар Вучиќ и американскиот сенатор Џон Мекејн на средбата во Белград денеска разговарале за ситуацијата во Македонија, јавува дописничката на „Мета“ од Белград.

Вучиќ се надевал дека работите во Македонија ќе се одвиваат мирно и со почитување на македонските закони.

„За нас тоа е од големо значење, бидејќи ако не се задоволни Албанците, може да имаме проблем на југот на Србија. Ако имаат меѓусебни македонски судири, што никој не ги сака, ќе има големи и тешки последици. Да не зборувам дека тоа би довело до несигурност и до повлекување на инвеститорите“, изјавил Вучиќ на заедничката прес-конференција.

Тој додал дека поради тоа, зачувувањето на стабилноста и на мирот на Западен Балкан е од пресудно значење за регионот.

Мекејн истакнал дека сè што се случува во Источна Европа е од витално значење за безбедноста на САД и дека не смее да се дозволи да се случи нешто, со што може да се влоши состојбата во регионот.

Освен за регионот, Вучиќ и Мекејн разговарале и за дијалогот помеѓу Белград и Приштина, европскиот пат на Србија и за билатералната соработка помеѓу Србија и САД.


Арсовска: Бизнис-секторот во Македонија се соочува со голема неизвесност


Истанбул, 5 април, 2017 - 15:52 (META) 

„Бизнис-секторот во Македонија се соочува со голема неизвесност поради внатрешни и надворешни фактори“, изјави претседателката на Сојузот на стопански комори на Македонија, Данела Арсовска, на обраќањето на 20. Евроазиски економски самит во Истанбул.

Таа како фактори ги посочи тешкотиите на економиите во регионот и влијанието на рецесијата во соседните земји, но пред сè мигрантската криза и бранот бегалци кои пристигаат на нашата јужна граница.

„Сведоци сме на перманентна криза и на огромни промени кои се случуваат на глобално ниво. Оваа состојба влијае не само на нашата економијата, туку и на сите европски држави по Коридорот 10, преку кризата предизвикана од блокади во патниот и во железничкиот сообраќај, а секако длабоко ги погодува секторите енергетика, трговија како и транспортната индустрија. Во вакви услови, бизнис-секторот меѓународно се воздржува од инвестиции и од развој и не ги вложува ресурсите за реализација на планираните проектните активности, што креира дополнителни долгорочни проблеми“, изјави Арсовска во своето обраќање.

Таа посочи дека потребно е да се движиме напред преку развиена економија во услови на здрава животната средина и преку поголемо искористување на модерната технологија во сите сегменти на животот.

На форумот во Истанбул присуствуваат претседатели на држави и на влади, како и истакнати високи владини претставници.


ВМРО-ДПМНЕ презентираше „Манифест за единствена Македонија“


Скопје, 2 април, 2017 - 14:00 (META) 

Членовите на извршниот комитет на ВМРО-ДПМНЕ, Антонио Милошоски, Никола Попоски и Илија Димовски, денеска презентираа манифест за единствена Република Македонија, во просториите на центарот за комуникации на ВМРО-ДПМНЕ.

Во документот се претставува „визијата“ на партијата за државата, која, како што се вели, „претставува единствена матична земја на Македонците, каде обединети живеат со сите граѓани кои се дел од албанскиот народ, турскиот народ, влашкиот народ, српскиот народ, ромскиот народ, бошњачкиот народ и другите народи“.

Според Милошоски, „патоказот“ кој беше промовиран пред неколку дена се однесува на актуелната политичка состојба и на надминување на кризата, додека манифестот е документ со насоки, начела и со принципи кои се однесуваат за владеењето во следните 15 години.

„Поттикнати од силна желба да живееме во успешна земја со пазарна економија, заснована врз знаење, умеење, претприемништво, креативност и праведност, предлагаме национално обединување околу манифестот за единствена Република Македонија“, изјави Милошоски.

Тој истакна дека прв принцип на манифестот е обединување околу националниот интерес, втор принцип е интеграција во едно општество, трет принцип е владеењето на правото за успех на државата и четвртиот принцип е пазарна економија за подобар стандард на секој граѓанин.

За реализацијата на мисијата, членот на извршниот комитет Никола Попоски го истакна воспоставувањето на редовен дијалог помеѓу секоја власт и опозиција за прашања од национален интерес.

Во однос на името, тој истакна дека нема да се прифати промена на Уставот за промена на уставното име.

„Нема да дозволиме кое било решение да биде прифатено од страна на политичари и поединци, влада или Собрание, без претходно за тоа да се изјаснат македонските граѓани на референдум, а притоа мнозинството граѓани кои ќе излезат на референдумот да се согласат со можното решение“, изјави Попоски.

Членот на извршниот комитет Илија Димовски изјави дека мора да се спроведе попис за квалитетно планирање на политиките, како и за конструктувен дијалог на меѓуетнички теми.

„Пописот мора да е статистичка, а не политичка операција кој ќе се води строго според методологијата на европската статистичка агенција Еуростат и на Обединетите нации“, изјави Димовски.


Кларк: Во интерес на земјата е да се најде излез од политичката криза што е можно побргу


Скопје, 2 април, 2017 - 11:23 (META) 

„Од гледна точка на Обединетите нации, ние навистина би сакале да видиме брза разврска на кризата во согласност со уставниот поредок, бидејќи гласачите очекуваат нивната волја да биде почитувана“, вели генералниот потсекретар на Обединетите нации и администратор на УНДП, Хелен Кларк, во неделното интервју за „Радио Слободна Европа.“

Таа вели дека во интерес на земјата е да најде излез од политичката криза што е можно побргу.

„Понекогаш е потребно повеќе време да се формира влада, тука, на пример, изборите се одржаа пред повеќе од три месеци. Секако, оваа земја има аспирации за членство во Европската Унија и во НАТО. Европската Унија сака да види дека сите изборни закони се почитуваат за време и по изборите“, одговори Кларк на прашањето за политичката криза.


Ахмети: ДУИ не донесе одлука вечерва, не се исклучува нова лидерска средба


Тетово, 31 март, 2017 - 20:13 (META) 

Претседателот на ДУИ вечерва во партиското седиште во Мала Речица соопшти дека партијата уште нема цврста одлука за решение за излез од кризата, но порача дека предвремени избори, како што бара ВМРО-ДПМНЕ, не би ја решилe кризата. Али Ахмети исто така најави дека е можна и нова лидерска средба.

По итен повик на Ахмети, попладнево и вечерва во Мала Речица заседаваше централното претседателство на ДУИ, со намера да се најде решение за кризата која се пресели и во Собранието.

Седницата на претседателството на партијата заврши, а нова седница се очекува дури по една седмица.

– Расправавме за деблокирање на состојбата, односно да дадат оставка министрите од ДУИ, но за оваа работа постојат две толкувања. Односно, министрите од ДУИ може да дадат оставка, но нема каде да ги поднесат оставките. Второто толкување е дека тие ќе мора да дадат оставки, но ќе мора да ги извршуваат функциите сè до избор на нова влада – појасни лидерот на ДУИ.

Според Ахмети, на денешната итна седница се разговарало и за продлабочувањето на проблемот со локалната власт, бидејќи на сегашните гарнитури во општините мандатите им завршуваат во средината на мај.

– Затоа овој проблем мора да се реши, оти нема да имаме ниту градоначалници, ниту совети, но за да се реши, мора да има функционално Собрание – рече Ахмети.

Одговарајќи на новинарско прашање, Ахмети појасни дека вечерва не се донела никаква одлука, затоа што ДУИ мора да се консултира со експерти околу можните решенија и начини за излез од кризата.

Тој рече дека е можна и нова лидерска средба.

– Не се исклучува можноста за лидерска средба, но секако отфрламе можност за нови избори, оти со оваа оппција нема да се реши кризата, туку повторно ќе има криза – рече претседателот на ДУИ вечерва пред партиското седиште.

Тој најави дека нова седница на централното претседателство ќе закажат за една седмица.