!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Радев: ЕУ и НАТО се стратешки избор на Бугарија, кој не треба да се проблематизира


Софија, 19 јануари, 2017 - 20:03 (META) 

Членството во Европската Унија и во НАТО е стратешки избор на Бугарија кој не треба да се доведува во прашање, рече денеска новиот претседател на земјата, Румен Радев, во својот говор по положувањето заклетва во бугарскиот парламент.

„Ефективното членство значи јасно разбирање и постајно бранење на националните интереси во двете семејства кои се вклучени во создавањето на заедничките вредности. Бугарската надворешна политика треба да се формулира внатре во земјата и на неа да се опстојува надвор, а не обратно, таа треба да биде отворена кон светот и да создава нови пријатели и партнери, а не непријатели“, рече Радев, пренесува БТА.

Новиот бугарски претседател рече дека сè повеќе се зголемува антиевропското расположение, но нагласи дека „обединета Европа треба да биде зачувана по секоја цена“ и дека спротивното би значело „изгубено време“.

Радев ја коментираше и кризата во релациите меѓу ЕУ, НАТО и Русија, истакнувајќи дека „Студената војна е тажно искуство од минатото“ и дека „меѓусебните конфронтации не се начин за решавање на кризата“.

Според него, новата политичка ситуација во светот дава можност за решавање на проблемот со дијалог, а резултатите од изборите во САД се надеж за воспоставување дијалог со Русија.


Пукната цевка ги остави граѓаните од „Топлана Исток“ до Порта Влае без греење


Скопје, 12 јануари, 2017 - 14:15 (META) 

Граѓаните што живеат на потегот од „Топлана Исток“ до Порта Влае се без парно греење од 13.20 часот, информира Регионалниот центар за управување со кризи.

Повикувајќи се на информација од „Балкан енерџи груп“, причината е голем губиток на вода во мрежата. Од фирмата додаваат и дека во моментот се трага по местото на дефектот.


Потребен е целосно нов пристап за спречување војни, смета Гутереш


Њујорк, 11 јануари, 2017 - 10:10 (META) 

Генералниот секретар на Обединетите нации, Антонио Гутереш, повика на „целосно нов пристап“ како да се спречат војните.

Во првото обраќање пред Советот за безбедност на ОН откако стапи на функција, Гутереш рече дека е потрошено премногу време и средства за одговарање на кризите, наместо за нивно спречување.

– Луѓето плаќаат превисока цена. Потребен ни е целосно нов пристап – рече тој.

Тој оцени дека премногу шанси за превенција на кризи се пропуштени затоа што државите членки на ОН немале меѓусебна доверба.

– Денеска е потребно да покажеме поголемо лидерство и зајакнување на капацитетите и на авторитетот на ОН, ставајќи го мирот на прво место – истакна Гутереш.


Политичка стабилност за кризата да заврши, посака Груевски во новогодишната честитка


Скопје, 31 декември, 2016 - 13:47 (META) 

И светот и ние во Македонија поминавме низ една тешка и турбулентна годинa, но и покрај политичката криза добро е што ја зачувавме економската стабилност, вели претседателот на ВМРО-ДПМНЕ, Никола Груевски, во новогодишната честитка до граѓаните.

– Сите нам и на економијата потребна ни е политичка стабилност. Таквата политичка стабилност би гарантирала уште поголем број инвестиции, отворање на нови работни места и зголемување на стандардот во 2017 година. Секој од нас, политичарите од различните политички партии, треба да извлече поука од пораките што граѓаните ги испратија на последните избори и да се фокусираме да направиме најдобро за земјата и за сите граѓани во неа – вели Груевски.

По формирањето влада, рече тој, треба да се работи на економски план, на реформите во сите области, како и на остварување на стратешките приоритети за приклучувањето на Македонија кон НАТО и ЕУ.

– Треба да се потиснат напорите за надворешни влијанија чија цел се туѓи, а не наши интереси, на нашата држава и на граѓаните – порача Груевски во честитката.

Лидерот на ВМРО-ДПМНЕ на граѓаните им посака добро здравје и среќа и да си ги остварат своите зацртани цели и планови.


Иванов упати новогодишна честитка до граѓаните за подобра 2017 година


Скопје, 31 декември, 2016 - 10:33 (META) 

„Годинава што одминува сакаме што побргу да ја заборавиме. Во неа се соочивме со многу кризи и предизвици. Редно е да извлечеме поуки од сето тоа и да излеземе посилни, помудри и поодговорни. Да не дозволиме сè што беше негативно да ни се повтори“, се вели во новогодишната честитка на претседателот Ѓорге Иванов упатена до граѓаните.

Во неа се додава дека Новата година кај секој од нас буди нови очекувања, надежи и желби.

– Во овие моменти, кога ја чувствуваме моќта на надежта и на радоста, се навраќаме на основните човечки вредности, на потребата да бидеме солидарни, хумани, праведни – се вели во честитката.

Иванов на граѓаните им посака желбите да им станат реалност, а реалноста да биде поубава и поблагопријатна за сите.

– Нека претстојните празници ни донесат нова сила, нова радост, позитивни мисли и обновена надеж за исполнет живот во мир, просперитет и во благосостојба – се додава во честитката.


СКСЗМ: Економскиот развој за кој слушавме во 2016 година е пропаганда


Скопје, 30 декември, 2016 - 12:47 (META) 

Владата во 2016 година немаше конструктивен однос кон бизнис-заедницата и терминот „развој“ што постојано го употребуваше не е ништо друго освен кампања, изјавија од Стопанска комора на Северозападна Македонија, кои на прес-конференција дадода оценка за економијата во 2016 годинава и ги кажаа очекувањата во 2017 година на економски план.

– Економскиот развој за кој толку многу слушавме повеќе е пропагандна политика отколку што е реален одраз на фактичката состојба. Јавниот долг и буџетскиот дефицит се покриваат преку задолжување, бидејќи недостига стратегија за нивно намалување – изјави Назми Ејупи од СКСЗМ.

Тој додава дека постои нерамномерен регионален развој и селективност кон слободните економски зони. Според Ејупи, во Западниот Регион има само две инвестиции и таму се наоѓаат само пет проценти од вработените во слободните економски зони, иако невработеноста е голема.

Од 35 предлози кои СКСЗМ ги доставила до Владата, само два биле прифатени. Биле одбиени предлозите за изградба на царински терминал на Јажинце, а не им било прифатено барањето компаниите кои претрпеа штети во поплавите, да бидат институиционално третирани.

За 2017 година сметаат дека гасификацијата е преценет проект кој тешко ќе се реализира и наспроти предвидувањата од 3,7 проценти економски пораст, од СКСЗМ велат дека тој нема да биде поголем од 2,5 проценти.

– И покрај предвидувањата за постабилна светска економија, Македонија има свои внатрешни проблеми, па оттука тешко е да се дадат позитивни оценки и очекувања за економијата. Повторно нè очекуваат избори (локални) и оттука, годината воопшто нема да биде лесна за бизнисот – додава Ејупи.

Од новата влада стопанствениците очекуваат да ја преземе одговорноста и да ги забрза заостанатите политички мерки што имаат влијание врз бизнисот.

Велат дека со исто темпо ќе влијаат на новата влада за да ги прифати нивните предлози од економската платформа, мерки кои, како што истакнаа, се наоѓаат и во дел од платформите на некои политички партии.


Милошоски: Заев ја продолжува кризата и се обидува насилно да ја преземе власта


Скопје, 23 декември, 2016 - 17:40 (META) 

Речиси две недели по изборите, кога сите граѓани ги знаат изборните резултати, Зоран Заев сè уште се обидува да манипулира, изјави членот на извршниот комитет на ВМРО-ДПМНЕ, Антонио Милошоски, на денешната прес-конференција.

– Не дека Заев не знае кој победи, а кој ги изгуби овие избори, тој многу добро знае, но претпоставуваме дека некој од горе, како што тој комуницира во своите СМС-пораки, му наложил така да се однесува. И тоа што се повикува на некаков црн 24 декември, на некои поранешни кризни ситуации, само е показател дека целта на Заев е со своето дејствување да продолжи да ја одржува во живот кризата во Македонија, која тој ја создаде – изјави Милошоски.

Тој додаде дека „тоа што аболираниот Зоран Заев се обидува да го спроведе во моментов е истото сценарио од пред две и пол години, а тоа значи насилно преземање на власта без признавање на волјата на народот и доаѓање до функциите по секоја цена“.

– Се обидуваат и со некои прегласувања да изманипулираат или да создадат услови за фалсификување на волјата на народот, но ВМРО-ДПМНЕ е сигурна дека и народот во Теарце, без разлика на нашиот политички став, е позрел од господинот Заев и ќе го победи и таму каде што треба да се прегласува – додаде Милошоски.

Денеска лидерот на СДСМ, Зоран Заев, ги повика албанските партии да не коалицираат со Никола Груевски.


Се зголемуваат корпоративните и депозитите на домаќинствата


Скопје, 16 декември, 2016 - 10:38 (META) 

Стабилизацијата на очекувањата на економските субјекти во третиот квартал позитивно се одрази на банкарското работење во целина, соопшуваат од Народна банка.

– Квартално зголемување е забележано како кај корпоративните, така и кај депозитите на секторот домаќинства. Речиси еднаков придонес за зголемувањето на вкупните депозити забележаа и денарските и девизните депозити – се вели во соопштението на Народна банка.

Намалувањето на ризиците по економијата во третиот квартал се гледа и од зголемувањето на ликвидните средства на банките од 5,5 проценти во третиот квартал.

Тоа овозможи речиси целосно обновување на ликвидните средства што се употребија во текот на вториот квартал за амортизирање на кризата со одливот на депозитите.


Народна банка ја намали основната каматна стапка од 4 на 3,75 проценти


Скопје, 15 декември, 2016 - 13:57 (META) 

Каматната стапка на благајничките записи, како основна каматна стапка, Народна банка ја намали за 0,25 процентни поени, и таа сега изнесува 3,75 проценти.

– Ваквата реакција на монетарната политика е одраз на видливото стабилизирање на очекувањата на економските субјекти, кое во континуитет е присутно во последните шест месеци, и на значително повисоката структурна ликвидност на банкарскиот сектор. Сигналите за стабилизација се видливи во двата пункта каде што политичката криза имаше најголеми ефекти – девизниот пазар и депозитите во банкарскиот систем – се вели во соопштението на Народна банка.

Каматната стапка на благајничките записи, како основна каматна стапка, беше зголемена за 0,75 процентни поени, од 3,25 на 4 проценти на 4 мај, како реакција на Народна банка на зголемената побарувачка на девизи и на притисоците врз депозитната база на банките.

Ова намалување на каматната стапка, според некои од банките, нема значително да влијае врз намалување на каматите на кредитите и на заштедите.


Флоријан Бибер смета дека ЕУ ќе се обиде да го спречи продлабочувањето на кризата


Грац, 13 декември, 2016 - 19:00 (META) 

Европската Унија и меѓународната заедница веројатно ќе се обидат да спречат продлабочување на политичката криза во Македонија, изјави за „Мета“ експертот за Балканот и професор на Универзитетот во Грац, Австрија, Флоријан Бибер, коментирајќи ги тесните изборни резултати.

– Тешко може да се каже, но очекувам дека ќе има некаква инволвираност на ЕУ во обид да се спречи продолжување на кризата и организирање на нови избори, кои нема да дадат некои поинакви резултати. Дали тоа ќе биде преку притискање за формирање голема коалиција или поширока коалиција без ВМРО-ДПМНЕ, останува да се види. Секако, се чини дека нема да биде статус кво – вели Бибер, одговарајќи на прашање дали ваквите изборни резултати и отежнатото формирање на влада може да ја продлабочат кризата во земјата и да водат кон нови предвремени избори или може да се очекува ново инволвирање на ЕУ.