Со концептот „Едно општество” и со кривични пријави владата ќе се бори против говорот на омраза


Скопје, 31 октомври, 2018 - 17:02 (META) 

Владата преку националната стратегија за развој на концептот „Едно општество” и на интеркултурализмот во Македонија, ќе се бори против говорот на омраза, појава што достигнува загрижувачки размери и со тужби за прекршителите. Досега се поднесени пет такви тужби, а најавена е нова тужба од страна на Министерството за внатрешни работи за лица кои ширеле и шират говор на омраза на социјалните мрежи и на други места, јави Порталб.мк.

„Владата нема да го толерира развојот и порастот на говорот на омраза и ќе работи посветено на уништувањето на оваа појава. Министерството за внатрешни работи во изминатите две недели поднесе пет кривични пријави до Основното јавно обвинителство, а следат и пријави од Министерството за внатрешни работи во Основното јавно обвинителство за говор на омраза што се шири во медиумите и социјалните мрежи. По долго време институциите во Република Македонија дејствуваат за да го спречат говорот на омраза“, велат од Владата.

Се планира да се подобри правната рамка за превенција и санкционирање на говорот на омраза, преземање мерки за да се намали нивото на омраза меѓу младите луѓе од различни заедници, работа со навивачките групи за да искорени меѓуетничката омраза и манифестации на расизам, за градење на политики и организирање на голем број настани и манифестации, со чии содржини актерите и пораките ќе имаат за цел да ја зголемат интеркултурната толеранција. Стратегијата ќе се изготвува за период од шест месеци во седум работни групи.


ВМРО-ДПМНЕ ќе поднесе 200 кривични пријави за нерегуларности на референдумот


Скопје, 5 октомври, 2018 - 9:31 (META) 

Потпретседателот на ВМРО-ДПМНЕ, Александар Николовски информираше дека Централниот комитет на синоќешната седница ги потврдил заклучоците од седницата на Извршниот комитет, за разрешување на јавниот обвинител и избор на јавен обвинител на предлог на опозицијата, формирање на Анкетна комисија во Собранието која ќе ги истражи сите нерегуларности во врска со референдумот и почитување на законот за Влада и за избори со цел доколку има избори да се формира Влада по Пржински модел со мандат од 100 дена.

-ЦК вечерва донесе заклучок итно општинските комитети да формираат општински изборни штабови кои ќе функционираат до завршувањето на претседателските избори. ЦК детални ги анализираше нерегуларностите во одредени општини каде што над 50.000 гласови беа злоупотребени во текот на референдумскиот ден, односно имаше грубо полнење на кутии, како и сите притисоци кои се случија пред референдумскиот ден и сите континуирани притисоци кои се случуваат по референдумскиот ден. Скоро сите претседатели на општински комитети, информираа дека голем број на граѓани кои не излегле на референдумот или имаат сознанија дека излегле, ама гласале против, се разместени од своите работни места надвор од законот за јавна администрација и се бркани од работа од приватните компании – рече Николоски.

Партискиот потпретседател рече дека според набљудувачите, се случило грубо и насилно фалсификување на волјата на граѓаните и тоа резултирало со незапамтен грабеж до сега. Затоа, рече Николоски, Централниот комитет ја потврди одлуката дека не го признава резултатот од референдумот и истиот да го смета за груб фалсификат.

-Од тие причини, ВМРО-ДПМНЕ, во текот на утрешниот ден, ќе поднесе кривична пријава до јавното обвинителство против повеќе од 200 лица. Станува збор за претседатели, заменици-претседатели, членови и заменици-членови на избирачки одбори на избирачките места во општините Струга, Центар Жупа, Кичево, Желино, Боговиње, Пласница и Сарај – рече тој.

Николовски по седницата на Централниот комитет, порача дека ВМРО-ДПМНЕ не води битка за власт и за избори, туку за зачувување на името на Македонија.


Обвинителството ги отфрли кривичните пријави на Тодор Петров против уставни судии


Скопје, 2 јули, 2018 - 15:54 (META) 

Основното јавно обвинителство (ОЈО) Скопје ги отфрлило кривичните пријави поднесени против судии од Уставниот суд од страна на Тодор Петров, претседател на Светскиот македонски конгрес (СМК). Петров ги товари судиите дека ја злоупотребиле службената положба и направиле самовластие со тоа што не постапиле по трите иницијативи што гој ги поднел, со кои барал поништување на законот за Специјалното јавно обвинителство, поништување на изборот на претседателот на Собранието Талат Џафери и поништување на Одлуката за стапување на Македонија во членство на Северноатланската Алијанса – НАТО.

„Надлежен јавен обвинител од Основното јавно обвинителство Скопје утврди дека нема основано сомнение дека осомничените ги сториле кривичните дела за кои беа пријавени, по што донесе Решение за отфрлање на кривичните пријави. Утврдено дека во Уставниот суд веднаш по приемот на иницијативите, а согласно на Деловникот за работа на Уставниот суд, се оформени предмети по кои во континуитет се преземани дејствија од судско-аналитички карактер, барани се податоци потребни за одлучување по предметот и вршено е споредбено истражување на нормативните решенија и  уставно судски одлуки. Проверена е и уставно-судската практика како елемент кој се зема предвид при одлучувањето на Уставниот суд“, соопштија од ОЈО Скопје.

Постапката по две иницијативи е во тек во Уставниот суд, додека за иницијативата за поништување на Одлуката за стапување на Република Македонија во членство на Северноатланската Алијанса – НАТО е одлучувано на седница на уставниот суд, при што е донесено Решение за неповедување на постапка за оценување на уставноста и законитоста.


„Паднаа“ кривичните пријави на Владимир Панчевски


Скопје, 7 мај, 2018 - 16:49 (META) 

Основното јавно обвинителство – Скопје соопшти дека ги отфрлила трите кривични пријави што против Специјалната обвинителка Катица Јанева, судијката Злата Попова од Основен суд Гевгелија и вработени во СЈО и МВР, односно вкупно 10 лица ги поднесе судијата во Основен суд Скопје 1, а поранешен претседател на судот, Владимир Панчевски.

„Надлежен обвинител оцени дека во дејствијата на пријавените нема битни елементи на кривични дела наведени во пријавите, ниту на други дела што се гонат по службена должност и со Решение ги отфрли пријавите“, соопштија од јавното обвинителство, каде Панчевски ги поднел пријавите.

Тој ги товарел за Злоупотреба на службена положба и овластување, а три лица за Противправно присвојување на предмети при претрес, поради претресите што во октомври минатата година беа извршени во неговата канцеларија во судот и во неговиот дом.

„Според прибавените докази, Јавното обвинителство за гонење на кривични дела поврзани и кои произлегуваат од содржината на незаконското следење на комуникации во тек на истражна постапка, доставило барање за издавање на наредба за претрес на дом и лице, како законски предвидено истражно дејствие. Со оглед на тоа што лицето за кое е побаран претрес е судија во Основниот суд Скопје 1 Скопје, а заради постоење на висок ризик од нарушување на тајноста на дејствието и на предистражната постапка, барањето за издавање на наредба било поднесено до Основниот суд – Гевгелија, што е во согласност со воспоставената практика на Европскиот суд за човекови права. Обвинителството утврди дека истражните дејствија на пријавените биле преземени согласно Законот за кривична постапка“ се вели во соопштението.


Обвиненија за 12 лица за смртта малата Тамара


Скопје, 7 мај, 2018 - 15:57 (META) 

За смртта на Тамара Димовска од Велес, која во 2015 година почина чекајќи операција на рбетот во странство, Основното јавно обвинителство поднесе кривични пријави против 12 лица, меѓу кои и за тогашните директори на Фондот за здравствено осигурување на Република Македонија (ФЗОМ), Маја Парнарџиева – Змејкова и Џемали Мехази.

Обвинението е за „несовесно работење во службата“.

Обвиненија се поднесени против членовите на првостепената лекарска комисија, односно Владимир Поповски, Александар Чапароски, Лилјана Тозија, Наталија Долненец Банева и Никола Граматиковски, како и против членовите на второстепената комисија, Александар Стојановиќ, Шабан Мемети, Ристе Симеонов, Елена Трпковска и Аспазија Софијанова.

Како што велат од Обвинителството, предметот е оформен по допрен глас, а подоцна е припоена и кривичната пријава поднесена од Хелсиншкиот комитет за човекови права на Република Македонија и законскиот застапник на семејството.

„Како резултат на многубројните спроведени истражни дејствија во една темелна и сеопфатна преткривична постапка, беше утврдено дека сега обвинетите пет члена од Првостепената лекарска комисија за одлучување по правото на лекување во странство, во рамките на Фондот за здравствено осигурување го донеле првичното негативно мислење за лекувањето на Тамара Димовска. Мислењето дека не се исцрпени можностите за лекување на пациентот во Република Македонија тие го донеле по истекот на законски предвидениот рок и е спротивно на мислењето на Стручниот конзилиум на УК ТОАРИЛ УЦ. Притоа предвид ја зеле изјавата на тогашниот министер за здравство кој најавил дека пациентите со деформитет на ’рбетот во иднина нема да одат да се лекуваат во странство, затоа што оперативните зафати ќе се вршат во новоформиран Спинален центар на Клиниката за ортопедски болести во Скопје“, појаснуваат од Обвинителството.

Во однос на постапката на двајцата директори на ФЗОМ, Парнарџиева – Змејкова и Мехази, ОЈО- Скопје вели дека донеле решение со кое барањето за лекување во странство се одбива како неосновано, а истото Решение било потврдено и од сега обвинетите членови на второстепената лекарска комисија, и на крајот потпишано од тогашниот претседател на Управниот одбор на ФЗОМ, се вели во соопштението од ОЈО – Скопје.

Хелсиншкиот комитет, кој поднесе кривични пријави против двајцата директори на ФЗОМ и тогашниот министер за здравство, Никола Тодоров, речиси веднаш по смртта на Тамара, ја поздрави одлуката на ОЈО – Скопје, но истовремено посочи и дека обвинителството доцни, оти се изминати повеќе од три години од смртта.

Истовремено, посочува дека кривична пријава треба да добие и Тодоров.

„Земајќи го предвид очигледното пречекорување на законските овластувања на тогашниот министер Никола Тодоров преку давањето неточна информација до јавноста за отварање на центар кој ќе врши операции на пациенти со деформитет на рбетот при Клиниката за ортопедски болести во Скопје, Хелсиншкиот комитет не се согласува со одлуката на Основното јавно обвинителство дека во конкретниот случај не постои Злоупотреба на службената положба и овластување од негова страна, поради што во овој дел одлуката сметаме дека треба да биде обжалена до Вишото јавно обвинителство“, порачаа од Хелсиншки.


МТСП подготвува кривични пријави за случајот со малолетничката од „25 мај“


Скопје, 21 февруари, 2018 - 11:26 (META) 

Вонредниот инспекциски надзор утврдил низа прекршувања на законите од страна на Центарот за социјални работи во случајот со малолетната девојка Р.И. од Заводот за згрижување на деца со вопитно – социјални проблеми и нарушено поведение „25 Мај“, информираат од Министерство за труд и социјална политика (МТСП).

Од таму додаваат дека се подготвуваат прекршочни и кривични пријави за одговорни и стручни лица. Покрај лоцирањето на одговорност во Центарот за социјална работа, МТСП врши и инспекциски увид во Заводот.

„Во периодот додека Р.И. била згрижена во згрижувачко семејство и во постапката за водење старателство врз малолетното лице, констатирано е дека старателите биле често менувани и притоа отсуствувале клучните елементи од старателската функција. При поставувањето на старател, Центарот не изготвувал наод и мислење на стручен работник, наод и мислење на стручен тим и лист за следење за работа со корисникот. Од извештајот на старателот кој непосредно ја вршел старателската должност, не може да се види неговата грижа за лицето ставено под старателство, а особено за неговото здравје, издржувањето и оспособувањето за самостоен живот, за негово воспитание и образование, како и за сѐ друго што е од значење за лицето ставено под старателство“, велат од МТСП.

Од таму додаваат дека Центарот во повеќе наврати давал согласност за видување и престој на малолетната Р.И. кај нејзините родители и покрај тоа што им било одземено вршењето на родителското право врз три малолетни деца, поради континуирано злоупотребување и занемарување на родителските должности.

„Документирано е дека за време на престојот кај родителите, таа била повторно присилувана и наведувана на питачење. По информациите добиени од Р.И. во октомври 2016 година дека во текот на летото имала полов однос со одредено лице, назначениот старател не повел постапка за утврдување на фактите, ниту пријавил до Министерството за внатрешни работи“, додаваат од МТСП.

По промената на координаторот на предметот во јули 2017 година, било утврдено дека тој ги преземал сите потребни мерки.

„До МВР се доставуваат редовни пријави, а кога се појавиле индиции дека Р.И. е можна жртва на трговија со луѓе, таа е привремено сместена во шелтер центар и со неа разговарале инспектори од Одделот за организиран криминал и жртви на трговија со луѓе. И покрај овие интервенции изостанала реакција од ОЈО“, се наведува во соопштението на МТСП.

Европскиот центар за правата на Ромите (ЕЦПР) го обелодени случајот со 13-годишното девојче, кое минатата недела било подложено на абортус, а забременило по сексуално злоставување како штитеничка на Домот за деца „25 Мај“.

Директорот на Заводот за згрижување на деца со воспитно – социјални проблеми и нарушено поведение „25 мај“, Стевчо Соколовски, на 19 февруари поднесе оставка од морални причини.


Кривични пријави против четворица момчиња за извршени разбојништва во Карпош и Центар


Скопје, 7 јануари, 2018 - 12:27 (META) 

Секторот за внатрешни работи Скопје поднесе кривични пријави против Л.А. (21), Ф.С. (20), Џ.Ќ. (17) и Б.Е. (19), сите од Скопје, поради постоење основи на сомнение за сторени кривични дела, разбојништво.

Пријавените ги извршиле кривичните дела во периодот од 27 до 30 декември 2017 година, на подрачјето на општините Карпош и Центар во вечерните часови, и на тој начин се стекнале со противправна имотна корист од околу 80.500 денари.

На 27 декември 2017 година, околу 20.30 часот во Градски парк во Скопје, кај големото езерце, Л.А., Ф.С. и Џ.Ќ. со закана со нож на оштетениот му го побарале мобилниот телефон и пари, по што го турнале во езерцето. После тоа побегнале од местото на настанот.

На 28 декември 2017 година, околу 20.00 часот на улица Јордан Хаџи Константинов-Џинот, четворицата пријавени пресретнале четири малолетници и со закана со нож и метален боксирач од оштетните одзеле пари и мобилни телефони.

На 29 декември 2017 година околу 22.30 часот на пешачката патека на кејот на реката Вардар, Л.А., Ф.С. и Џ.Ќ., со закана со ножеви, од две лица одзеле паричник и мобилен телефон. Пријавените физички нападнале едно од оштетените лица затоа што им се спротивставил. Откако го извршиле кривичното дело, Л.А. го продал телефонот на лице од село Кондово. Лицето кое го купило мобилниот телефон подоцна заклучило дека телефонот не му припаѓал на продавачот. Настанот го пријавил во полициска станица, а мобилниот телефон го вратил.

По преземени оперативни мерки било утврдено дека можни сторители на кривичните дела се горенаведените лица. Подоцна, во полициска станица, пријавените биле препознаени од оштетените. По извршен разговор со четворицата пријавени, истите ги признале делата.


СВР Штип околу Нова година запленил три килограми марихуана – двајца притворени


Штип, 2 јануари, 2018 - 13:16 (META) 

Секторот за внатрешни работи Штип во два одвоени случаи запленил околу три килограми марихуана и поднел кривични пријави против три лица, кои се товарат за неовластено производство и пуштање во промет на наркотични дроги и психотропни супстанции и прекузори.

Во едниот случај, кривична пријава е поднесена против 33-годишниот штипјанец Б.М. во чиј, при претрес полицијата пронашла и запленила околу половина килограм марихуана, псакувана во три најлонски ќеси.

Вториот случај бил реализиран од екипа на надворешната канцеларија за криминалистички работи Кочани кои по добиени инофрмации на 29 декември, минагтата година извршиле претрес во домот на 20-годишната Н.Ј. од каде заплениле 2.245 килограми марихуана, 133 таблети амфетамин и дигитална вага.

Истиот ден бил извршен и претрес во домот на 22-годишниот К.С. во Кочани. Кај него биле пронајдени 21,82 грама марихуана и дигитална вага.

На Б.М. и на Н.Ј. судија на претходна постапка им одредил мерка притвор од 30 дена.


Кривична пријава за полициски инспектор поради злоупотреба на службената положба


Кочани, 22 декември, 2017 - 13:37 (META) 

Одделот за внатрешна контрола, криминалистички истраги и професионални стандарди при МВР поднесе кривична пријава против полициски инспектор од надворешната канцеларија за криминалистички работи во Кочани, поради злоупотреба на службената положба и овластување.

Како што соопшти МВР, инспекторот со иницијали З.С. е осомничен дека „со непреземање на службени дејствија дозволил да застарат кривични пријави со што предизвикал штета на засегнати граѓани од 409.000 денари (околу 6.650 евра)“.

Против полицаецот е поведена и постапка за утврдување на дисциплинска одговорност и ќе биде суспендиран од работното место до завршување на постапката, додаваат од МВР.


Mалолетници од Битола осомничени за 14 кражби на мотоцикли


Битола, 28 октомври, 2017 - 12:50 (META) 

Секторот за внатрешни работи Битола поднесе извештај до надлежното Oсновно јавно обвинителство против шест малолетни лица на возраст од 13 до 17 години, поради сомневање дека извршиле 14 кражби и тешка кражба.

„Имено, пријавените во 14 случаи, при тоа во различен состав од лица, во периодот од 11 април до 14 август годинава низ повеќе локации во Битола, од пред куќи, визби, влезови на згради, одземале различни марки мотоцикли – скутери, како и велосипед. Пријавените со преземените дејства предизвикале вкупна материјална штета од 904.000 денари“, се вели во соопштението на МВР.