ВМРО-ДПМНЕ ќе поднесе кривична пријава против Џафери и директорот на Службен весник


Скопје, 15 јануари, 2019 - 13:55 (META) 

Генералниот секретар на ВМРО-ДПМНЕ, Игор Јанушев на денешната прес-конференција најави кривична пријава против Талат Џафери и директорот на Службен весник, Мартин Костовски за објавувањето на Законот за употреба на јазиците без потпис од претседателот на државата Ѓорге Иванов.

Тој повика сите институции на централно и локално ниво да го игнорираат и бојкотираат операционализирањето на законот за двојазичност.

– Секое објавување во службен весник на законот за двојазичност без потпис на претседателот на државата не е ниту легално, ни легитимно и носи политички и правни последици. ВМРО-ДПМНЕ ќе поднесе кривична пријава против Талат Џафери и директорот на Службен весник, но и против сите за кои ќе биде утврдена одговорност дека го прекршиле законот за објавувањето на законот за двојазичност без потпис на претседателот на државата. Дополнително ќе поднесеме иницијатива за испитување на уставноста на законот за двојазичност до Уставниот суд. Со овој закон се урива уште еден темел на Република Македонија, еден темел кој ги поврзува сите етнички заедници кои живеат тука – рече Јанушев.


Кривична пријава за скопјанец што на Фејсбук им се заканувал на пратеници


Скопје, 10 јануари, 2019 - 15:12 (META) 

Секторот за компјутерски криминал и дигитална форензика при МВР, во координација со Основното јавно обвинителство – Скопје, почнал постапка поради објава на Фејсбук од страна на Б.Б. (49) од Скопје. Од полицијата велат дека тој „предизвикал загрозување на сигурноста на пратеници во Собранието“ и „ширел расистички и ксенофобичен материјал“.

Б.Б. вчера бил повикан на службен разговор во полициска станица, а му биле и одземени предмети за вештачење.

По документирање на случајот, против Б.Б. ќе биде поднесена кривична пријава, велат од Секторот за компјутерски криминал и дигитална форензика, порачувајќи им на граѓаните вакви и слични случаи да  пријавуваат во најблиската полициска станица или на мејлот/адресата cybercrime@moi.gov.mk.


Обвинителството ја отфрли кривичната пријава против новинарот Бранко Тричковски


Скопје, 26 декември, 2018 - 16:25 (META) 

Основното јавно обвинителство Скопје ја отфрлило кривичната пријава поднесена од МВР против новинарот Бранко Тричковски, соопштија од Обвинителството.

Кривичната пријава беше за загрозување на сигурноста, потоа за повик на убиство на претставници од највисоките државни органи од член 309 на Кривичниот законик, како и за повикување на насилна промена на уставниот поредок и за предизвикување омраза, раздор или нетрпеливост врз национална, расна, верска или друга дискриминаторска основа. Кривичната пријава беше поднесена поради колумна на Тричковски.

„Јавниот обвинител ја анализираше објавената колумна на пријавениот, како и  неговите објави на една социјална мрежа кои беа предмет на известувањето доставено од Секторот за компјутерски криминал и дигитална форензика при Министерството за внатрешни работи. Заради оцена на наводите во кривичната пријава, пријавениот беше повикан на распит во Основното јавно обвинителство Скопје“, објаснија од Обвинителството.

Според одлуката на јавниот обвинител, делата за кои бил пријавен Тричковски не се дела за кои се гони по службена должност, односно „во пријавените предметни настани не се содржани суштествените обележја на пријавените кривични дела“.

Во соопштението се напоменува дека јавниот обвинител се водел од праксата на Европскиот суд на човекови права и обврската да се обезбеди заштита на слободата на говорот во демократско општество „особено имајќи го предвид тоа што пријавениот во овој предмет е новинар, а оштетените се политичари“. Обвинителот сепак проценил дека слободата на изразување не е апсолутно право и дека не ги негувал културата на говорот и етиката.

„Пресудите на Европскиот суд упатуваат на фактот дека иако политичарите имаат право на еднаква заштита како и сите други, границите за новинарите се пошироки за изнесување на критицизам и мора да се избалансирани со јавниот интерес за отворена дискусија во однос на политички прашања. Пријавениот, во својот исказ пред јавниот обвинител, потенцирал дека никогаш немал вистинска намера да изврши кривично дело, туку со изнесените ставови само сакал да апелира кон наведените политичари да го променат своето однесување. Сепак, анализирајќи го предметот во целост, јавниот обвинител констатира дека слободата на изразување не е апсолутно право и дека пријавениот во изразувањето на своето мислење не ја негувал културата на говорот и етиката, па со тоа ги повредил честа и угледот на споменатите политичари“, се вели во образложението.


Фазлиу: Раководителот на Финансиска полиција да се зафати со вистинскиот криминал


Скопје, 11 декември, 2018 - 15:20 (META) 

Министерот за локална самоуправа Сухејл Фазлиу, против кого Управата за финансиска полиција вчера поднесе кривична пријава за овозможување незаконска исплата на хонорари во износ од 37.750 евра, денеска се огласи со реакција.

Фазлиу порачува дека тој нема одговорност во овој случај, туку дека вината треба да се бара кај неговиот претходник, кој исто така доби кривична пријава вчера за овој случај. Министерот за локална самоуправа објаснува дека пред една година, кога дознал за случајот, им наложил на двете вработени во Министерството за локална самоуправа, кои исто така добија кривични пријави за овој случај, да ги вратат парите што ги зеле како хонорар и дека тие тоа и го сториле.

Дополнително, Фазлиу ги повика и Управата за финансиска полиција и нејзиниот директор да се зафатат со витинскиот криминал, а не да водат политички игри.

„Апелирам до сите релевантни институции во државата, а исто и до Финансиската полиција сериозно да се зафатат со истражување, откривање и документирање на злоупотребите, корупцијата во сите сегменти на државата, без да поштеди ниту поединец, ниту група на организиран криминал.  Крајно време е раководителот на Управата за финансиска полиција сериозно да се зафати со реалните злоупотреби кои се вкоренети во Македонија во последните 20- 30 години, и да не дозволи да стане дел од политичките игри, барајќи криминал таму кадешто не му е место, а затворајќи очи таму кадешто и слепиот гледа реален и организиран криминал“, напиша министерот за локална самоуправа.


Кривични пријави против сегашниот и поранешниот министер за локална самоуправа


Скопје, 10 декември, 2018 - 18:06 (META) 

Актуелниот министер за локална самоуправа Сухејл Фазлиу, како и неговиот претходник Лирим Шабани, министер за локална самоуправа во периодот 2015-2017 година, потоа една државна советничка од Министерството за локална самоуправа како и една одговорна службеничка за спроведување на ИПА Оперативната програма меѓу Македонија и Бугарија, денеска добија кривични пријави за незаконска исплата на хонорари во износ од 37.750 евра.

Управата за финансиска полиција ги товари актуелниот и претходниот министер, како и М.М.П., државна советничка за европски интеграции во министерството, но и четврто пријавената Б.Р. за договори со кои последните две, иако редовно вработени во Министерството, преку четири договори како дополнително ангажирани лица, добиле хонорари во вкупен износ од 2,2 милиони денари (35.750 евра).

Притоа, како што вели Финансиска полиција, за да се прикрие трагата, сите четиримина дозволиле наместо лични податоци, во договорите за хонорарите советничката и одговорната да бидат наведени како „експерт бр. 12“ и „експерт бр. 13“.

Од Финансиска полиција објаснуваат дека оваа малверзација ја открил Ревизорскиот извештај бр. 2007СВ161РО007-2009-ТА-006, со кој е утврдена незаконска исплата на вработени што биле ангажирани како експерти. Според Државниот завод за ревизија, станувало збор за 2.198.243 денари (35.571 евра), кои Министерството за локална самоуправа ги вратило на ИПА Фондовите, а со тоа предизвикало штета на сопствениот буџет.


Во Македонија „врие“ од говор на омраза, но случаите ретко имаат судска завршница


Скопје, 29 октомври, 2018 - 11:16 (META) 

Од стапувањето на сила на новите законски измени на Кривичниот законик за говор на омраза во февруари 2014 година, Кривичниот суд Скопје има осудено само две лица со парична глоба поради говор на омраза.

Бројот на казни е многу мал, споредено со пријавите на дигиталната платформа „Пријави и спротивстави се на говорот на омраза” каде за истиот период се евидентирани 341 случаи, додека полицијата има поднесено кривични пријави за 24 случаи, пишува „Порталб.мк“.

Полицијата го истражува говорот на омраза со бавно темпо, додека судството не го казнува, со оглед на големиот број пријави кои се поднесени во граѓанската дигитална платформа за пријавување на говор на омраза. Освен тоа, во Македонија, особено за време на владеењето на ВМРО-ДПМНЕ, според анализата на „Порталб.мк“, говорот на омраза бил многу нагласен, а имало и еклатантни случаи кога некои лица и групи јавно го користеле, но истовремено не бил санкциониран од органите за редот.

Според податоците кои ги обезбедил порталот, во текот на периодот 2014-2018, Кривичниот суд има осудено само две лица со парична глоба, и тоа во 2017 година.

За истиот период, Министерството за внатрешни работи има евидентирано уште 22 други случаи на говор на омраза, но ниту еден од нив нема судски епилог во Кривичниот суд.

Судот ги осудил двете лица според член 181 од Кривичниот законик, кој предвидува парична глоба или затвор до три години за лице кое се потсмева со странска држава или со нејзините највисоки државни претставници.

Дополнителни податоци за говор на омраза може да се најдат и преку интернет платформата „Пријави и спречи говор на омраза”. Граѓаните во оваа веб-платформа пријавиле десет пати повеќе случаи на користење на говор на омраза во споредба со кривичните пријави кои се покренати од страна на полицијата.

Според статистичките податоци кои се објавуваат преку оваа веб-платформа, од 2014 до 2018 година, граѓаните пријавиле 341 случаи на користење на говор на омраза, а во повеќето од нив ваков вид говор се користел врз основа на етничка, политичка и сексуална припадност.

Инаку, овој месец, МВР има поднесено кривични пријави против лица кои користеле говор на омраза и им се заканувале на пратениците кои гласаа за уставните измени, како и против новинарот Миленко Неделковски и актерот Тони Михајловски, и двајцата блиски со поранешната влада на ВМРО-ДПМНЕ. Неделковски е обвинет за „Загрозување на безбедноста” и „Дистрибуција на расистички и ксенофобични материјали”, додека Михајловски е обвинет заради упатена закана кон новинарот Бранко Тричковски.

Сите граѓани кои се изложени на говор на омраза, случаите може да ги пријават во полиција односно МВР, во Обвинителство, Комисијата за заштита од дискриминација, Агенцијата за аудио и аудиовизуелни медиумски услуги, Здружението на новинари на Македонија – Совет на Честа, во Советот за етика во медиумите во Македонија (KЕММ), но и во онлајн платформа “www.govornaomraza.mk”.


ОЈО Скопје ја отфрли пријавата против 10 судии за бегството на Грујевски и Бошковски


Скопје, 26 октомври, 2018 - 16:34 (META) 

Основното јавно обвинителство денеска соопшти дека ја отфрлило кривичната пријава поднесена од Здружението за истражување, развој и анализа „Зелена лупа“ против десет судии, со која тие се товареа за злоупотреба на службената положба и овластување.

„Зелена лупа“, чиј претседател е Ване Цветанов, поранешниот прв човек на Управата за спречување перење пари, поднесе кривични пријави за судиите што одлучувале за притвор за поранешните функционери на МВР, Горан Грујевски и Никола Бошковски, кои избегаа од земјава. Станува збор за тројца судии од Кривичен суд Скопје, тројца од Апелациски суд Скопје и четиримина од Врховен суд.

Здружението ги товареше првите тројца судии дека како членови на Советот на Основен суд Скопје 1 Скопје, во кривичната постапка против Грујевски и Бошковски, и покрај постоење докази за опасност од бегство, го одбиле предлогот за определување притвор на двајцата поранешни функционери во МВР.

Пријавените тројца судии од Апелацискиот суд Скопје, пак, според наводите во пријавата, како членови на Советот на второстепениот суд донеле решение со кое ја прифатиле жалбата на обвинителството и го преиначиле решението на Советот на Основен суд Скопје 1 Скопје спрема обвинетите, но во решението навеле дека против истото е дозволено право на жалба, која го одложува извршувањето.

Според пријавата, четиримината судии на Врховниот суд како членови на Советот на највисокиот суд во земјава одлучувале по жалбата на обвинетите, наместо да ја отфрлат како неоснована.

Основното јавно обвинителство ја отфрлило кривичната пријава на „Зелена лупа“ против десетте судии, бидејќи не утврдило злоупотреба на службената положба од страна на судиите, за кои смета дека постапиле согласно чл.11 ст.1 од Законот за судовите, кој пропишува дека судијата одлучува непристрасно со примена на законот врз основа на слободна оцена на доказите.

„Во донесените одлуки пријавените јасно ги образложиле причините за одлуката што ја донеле“, велат од Обвинителство.


Обвинителството за организиран криминал го презеде случајот „Мост Око“


Скопје, 26 октомври, 2018 - 13:45 (META) 

Основното јавно обвинителство за гонење организиран криминал и корупција го презело од Основното јавно обвинителство – Скопје, случајот за изградбата на мостот „Око“ во Скопје. Во овој случај осомничени се поранешниот градоначалник на Центар, бизнисменот Владимир Тодоровиќ и двајца негови тогашни соработници. Обвинител донел наредба за истражна постапка против тројцата.

Осомничените, во периодот 2009 – 2012 година во постапката за јавни набавки овозможиле изведувачот да се стекне со незаконска користи од 26,6 милиони денари, односно 433.000 евра, на штета на буџетот на општина Центар.

Тодоровиќ и соработниците летово уплатија 433.000 евра на сметката на општина Центар, но тоа не значи крај на нивното кривично гонење, кое сега го презеде Обвинителството.

Случајот почна на 4 јули годинава, откако Управата за финансиска полиција поднесе кривична пријава против тројцата.


Екс-градоначалникот на Демир Капија подарил половина објект и Фондација на роднини


Демир Капија, 25 октомври, 2018 - 14:18 (META) 

Управата за финансиска полиција соопшти дека до Основното јавно обвинителство за гонење на организиран криминал и корупција поднела кривична пријава за злоупотреба на службената положба и овластување против поранешниот градоначалник на општина Демир Капија, Трајче Димитриев (61), во врска со малверзации со општински објект, како и против Т.П. (48), овластен проценител и П.М. (60) тогашен претседател на Совет на општина Демир Капија. Пријава како поттикнувач добила и М.Ј. (65), која станала сопственик на објектот.

Според пријавата, во март 2012 година, Делегацијата на Европската Унија во Скопје и Трајче Димитриев, како градоначалник на општина Демир Капија, потпишале договор за грант за проект „Центар за едукација и вмрежување во туризмот Ценет“,  во вредност од 262.366 евра. За овој центар се реконструирала стара училишна зграда, која половина била сопственост на општината, а половина на четвртопријавената М.Ј., а за тоа биле употребени 101.230 евра од грантот, додека останатите потребни пари, 82.000 евра, биле од буџетот на општината.

Потоа општинската половина од објектот со 800 квадратни метри површина, како и општинската половина од катастарската парцела, Димитриев на 12 јуни 2013 година ги продал на својата братучетка за 1,67 милиони денари (27.100 евра).

Тој износ е десет пати помал од реалната пазарна цена, велат од Финансиска полиција, дополнувајќи дека тој износ Димитриев прво од својата трансакциска сметка го префрлил на братучетката, а потоа и префрлил уште 4,49 милиони денари (73.000 евра) за да го доврши реконструирањето.

Реконструираниот објект бил наменет за сместување на фондацијата „Центар за едукација и вмрежување во туризмот – Ценет“, основана од страна на Општина Демир Капија, но Димитриев во април минатата година и таа Фондација без надомест ја отстапил на близок роднина.

Финансиска полиција ги товари сите обвинети за нанесена штета на  Буџетот на Општина Демир Капија во износ од 15.456.106 денари (251.000 евра).


Обвинителство: На референдумот регистрирани 40 нарушувања


Скопје, 5 октомври, 2018 - 13:42 (META) 

Јавното обвинителство на Република Македонија денеска ја објави информацијата за привремената комисија што ги  следеше нерегуларностите и инцидентите во кампањата и на денот на референдумот.

Вкупно се регистрирани 40 нерегуларности, а од нив еден случај е во текот на кампањата, за повик за поткуп на гласачи на подрачјето на Вишото јавно обвинителство Скопје.

Нерегуларности на денот на референдумот не се регистрирани на подрачјата на основните јавни обвинителство од Куманово, Крива Паланка, Велес, Кавадарци и Гевгелија, а на подрачјето на скопското обвинителство се регистрирани 29 настани, од кои 27 се разјаснети веднаш. Имало и пријави за неовластено снимање, но најчесто полицијата утврдувала дека се работи за новинарски екипи кои немале истакнато легитимации.

На подрачјето на Вишото јавно обвинителство Битола не се регистрирани нерегуларности освен еден во Битола, кога набљудувач ги повикувал гласачите да не гласаат, а за два случаи на подрачјето на Струга, постапката е во тек. Толку случаи се евидентирани и во Гостивар.

На територијата на Основно јавно обвинителство Штип се регистрирани два настани, исто толку и на подрачјето на кочанското обвинителство, а еден случај на подрачјето на обвинителството од Радовиш.

До Јавното обвинителство преку електронска пошта стигнале 15 информации од граѓани и две кривични пријави од една политичка партија, кои се доставени до Основно јавно обвинитество Скопје.