!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Мукоски, Арнаудов, Дамовски и Јовановски остануваат во притвор, одлучија Кривичен и Апелација


Скопје, 7 декември, 2017 - 16:40 (META) 

Кривичниот совет на Основниот суд Скопје 1 ги отфрли жалбите и ги потврди притворите на пратенците Крсто Мукоски и Љубен Арнаудов, како и решенијата со кои им беше одредена мерка домашен притвор на нивните колеги Јохан Тарчуловски и Жаклина Пешевска.

Во врска со жалбата на пратеникот Сашо Василевски, судот дополнително ќе информира, откако ќе го донесе решението.

Пратеникот Љупчо Димовски, пак, како што соопштија денеска од судот, воопшто не поднел жалба на одлуката на судијата на претходна постапка, кој му одреди домашен притвор.

Шестемина пратеници се осомничени за насилствата во Собранието од 27 април годинава и се товарат за терористичко загрозување на уставниот поредок и на безбедноста на државата.

Инаку, во врска со истиот случај, и Апелацискиот суд Скопје денеска ги одбил жалбите на Борис Дамовски, на актерот Владо Јовановски и на Горан Ѓошевски, поранешниот шеф на обезбедувањето на поранешниот собраниски спикер, Трајко Вељаноски.

Нивните адвокати, како што потврдија од Апелацискиот суд, денеска на јавна седница побарале до судот на тројцата осомничени да им го укине притворот и да им ореди поблага мерка, односно куќен притвор.


Тројца осомничени за 27 април од куќен притвор одат во истражен затвор


Скопје, 1 декември, 2017 - 10:23 (META) 

Кривичниот совет на Основниот суд Скопје 1 вчера уважил дел од жалбите на Јавното обвинителство за гонење организиран криминал и корупција и на тројца осомничени за насилствата во Собранието од 27 април, им го заменил куќниот притвор, што претходно им беше одреден, со построга мерка – притвор, потврдија од судот.

Како што соопштија оттаму, станува збор за лицата М.П., Г.Ѓ. и Е.Д.Б.

Ова значи дека овие тројца осомничени треба, а според дел од медиумите, веќе и се префрлени од домашен притвор во притвор во истражен затвор.

За другите двајца кои добија куќен притвор, за кои се жалеше Обвинителството, Кривичниот совет ќе одлучува дополнително.

Инаку, уште еден осомничен, кој ѝ беше недостапен на полицијата, вчера самиот им се предал на органите на прогонот. Тој, како што информираат од судот, бил изведен пред судија на претходна постапка, кој по распитот му одредил мерка притвор од 30 дена.

Со ова вкупниот број на осомничени за насилствата од 27 април кои добија притвор, сега изнесува 19 лица.

Денеска, Собранието ќе одлучува за одземањето на имунитетот на пратениците Крсто Мукоски, Љубен Арнаудов, Јохан Тарчуловски, Сашо Василевски, Љупчо Димовски и Жаклина Пешевска, во врска со барањето на Кривичниот суд за нивно притворање.

Обвинителството за гонење организиран криминал и корупција во вторникот оваа недела, соопшти дека отворило истрага против 36 лица за насилствата од 27 парил во Собранието.

Осомничените, меѓу кои се поранешниот директор на Бирото за јавна безбедност и поранешен министер за внатрешни работи, Митко Чавков, како и дел од организаторите на иницијативата „За заедничка Македонија“, Владо Јовановски, Борис Дамовски, Игор Дурловски и Богдан Илиевски, се товарат за терористичко загрозување на уставниот поредок и на безбедноста на државата.


За слободата на обвинетите во „Монструм“ сега треба да одлучува Кривичниот суд


Скопје, 24 ноември, 2017 - 16:38 (META) 

Дали по укинувањето на пресудите на кривичниот и на Апелацискиот суд во Скопје обвинетите во случајот „Монструм“ ќе останат во притвор или ќе се бранат од слобода во текот на повторното судење, ќе одлучува Кривичен совет на Основниот суд Скопје 1.

Ова за „Мета“ го изјави адвокатот Насер Рауфи, кој е бранител на дел од обвинетите во случајот.

Рауфи вели дека очекува Кривичниот совет да го укине притворот и, евентуално, на обвинетите да им одреди други поблаги мерки на претпазливост – одземање пасош, обврска за јавување во суд, забрана за напуштање на живеалиште…

Врховниот суд денеска соопшти дека донел пресуда со која ги укинува пресудите за „Монструм“ и го враќа случајот на повторно судење.

За Рауфи ваквата одлука на највисокиот суд била очекува и според неговите информации, пресудата била донесена едногласно од петчлениот Кривичен совет на Врховниот суд.

За петкратното убиство кај Смиљковското Езеро, Кривичниот суд во Скопје на доживотен затвор ги осуди Алил Демири, Африм и Аѓим Исмаиловиќ, Езим и Хаки Азири и Самил Љута, а Апелацискиот суд Скопје ја потврди ваквата пресуда. Двете пресуди, кои беа неправосилни, сега се укинати од Врховниот суд.

На Алил Демири и на Африм Исмаиловиќ им се судеше во отсуство бидејќи побегнаа на Косово, каде беа уапсени за поседување оружје и по отслужувањето на дветгодишната затворска казна беа пуштени на слобода. Косовоските власти одбија да ги екстрадираат во земјава.

Масакрот кај Смиљковското Езеро се случи на 12 април 2012 година, на Велики четврток, пред големиот христијански празник Велигден, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски.


Судот одлучи и на Мијалков да не му го врати пасошот


Скопје, 28 септември, 2017 - 13:40 (META) 

Поранешниот директор на Управата за безбедност и контраразузнавање, Сашо Мијалков кој е обвинет во случајот „Таргет“, останува без пасош, откако судот го одбил како неосновано неговото барање да му биде вратена патната исправа што му беше одземена како мерка за обезбедување на присуство.

„Кривичниот совет на одделението за организиран криминал и корупција при Основниот суд Скопје 1 – Скопје, постапувајќи по предлог на обвинетиот С.М. поднесено преку неговите бранители за укинување на мерките за претпазливост, на нејавна седница, донесе решение со кое барањето се одбива како неосновано. Мерката на претпазливост, привремено одземање на патната исправа за преминување на државната граница и забрана за издавање на нова патна или друга исправа за преминување на државната граница, и мерката – обврска на обвинетиот еднаш неделно да се јавува кај надлежно службено лице во судот остануваат на сила“, соопштија денеска од Кривичниот суд во Скопје.

Адвокатот на Мијалков, Љупчо Шврговски, претходно неделава изјави дека за враќањето на пасошот се повикале на судската практика, односно на одлуката на судот да му биде вратен пасошот на лидерот на СДСМ и актуелен премиер, Зоран Заев, во еден од предметите во кои тој беше обвинет.

Вчера судот соопшти дека е одбиено барањето на лидерот на ВМРО-ДПМНЕ, Никола Груевски да му биде вратен пасошот.

Инаку, покрај Мијалков и Груевски уште тројца обвинети во случаите на СЈО барале судот да им ги врати патните исправи што им беа одземени како дел од мерките на претпазливост што им беа одредени.


Врховен суд го потврди притворот за Грујовски и за Бошковски, Јакимовски останува без пасош


Скопје, 26 јули, 2017 - 16:37 (META) 

Врховниот суд денеска ја одбил жалбата на бранителите  на поранешниот началник на петтата управа во МРВ, Горан Грујовски, и на неговиот соработник Никола Бошковски и ги потврдил решенијата од Апелацискиот суд Скопје за притвор од 30 дена за обајцата, се вели во соопштението.

Петчлениот совет на Врховниот суд истовремено ја уважил жалбата на бранителите на обвинетиот Тони Јакимовски, поранешен функционер во УБК, и ја преиначил одлуката за притвор што ја донесе Апелацискиот суд, а наместо неа му одредил мерки на претпазливост, како што беше првичната одлуката на Кривичниот совет на Основен суд Скопје 1. Јакимовски ќе мора на одреден период да се јавува во Кривичниот суд, а одземени му се и пасошите – и обичниот и дипломатскиот – и изречена е забрана за издавање други патни исправи.

Сите тројца се обвинети од СЈО во предметите „Тврдина“ и „Таргет“, кои се споија, за нелегално прислушување на илјадници граѓани преку злоупотреба на системите за следење во МВР и за физичко уништување на системите со кои се прислушувало. Грујовски е првообвинет, а Бошковски, според обвинението, е извршителот на наредбите.


Пешевски и Латас остануваат без пасоши, Апелација досега ги одби сите жалби на СЈО


Скопје, 17 јули, 2017 - 12:00 (META) 

Поранешниот вицепремиер за економски прашања, Владимир Пешевски, кој е обвинет во случајот „Траекторија“ на Специјалното јавно обвинителство, останува без пасош и со обврска еднаш неделно да се јавува во суд. Вака одлучил Апелацскиот суд Скопје по разгледувањето на жалбите на СЈО и на одбраната на Пешевски минатата недела.

СЈО до Апелацискиот суд се жалеше на одлуката на Кривичниот совет на Основниот суд Скопје 1, кој одби на Пешевски да му биде одреден притвор и наместо тоа, одлучи да му одреди мерки на претпазливост. Од СЈО бараа второстепениот суд да му одреди притвор на Пешевски, а одбраната на поранешниот вицепремиер поднесе жалба со која бараше укинување на мерките за претпазливост.

Според решението, Кривичниот совет на Апелацискиот суд, составен од судиите Љиљана Ивановска-Шопова (претседател на Советот), Африм Фидани и Јани Нича, ги одбил како неосновани жалбите на СЈО и на одбраната и ја потврдил одлуката на Кривичниот суд.

Обвинителите на СЈО, во жалбата, меѓу другото, навеле дека обвинетиот Пешевски „поседува 24 активни банкарски сметки, на кои има постојан прилив и одлив на поголем износ на парични средства, па токму паричните средства што ги поседува и неговиот развиен бизнис надвор од границите на Македонија упатуваат дека може да се даде во бегство и да ја напушти државата“.

Од СЈО навеле и дека со обвинението се предложени и други сведоци кои сè уште не се испитани, што „упатува на оправдан страв дека обвинетиот, доколку се брани од слобода, ќе ја попречува кривичната постапка со влијание на сведоците, кои се предложени на листата на докази“.

Кривичниот совет на Апелацискиот суд ги одбил ваквите наводи како неосновани и оценил дека Основниот суд Скопје 1 донел правилна одлука дека „во оваа фаза на постапката, примената на мерката притвор не е оправдана и дека со примена на поблаги мерки, како што се определените мерки на претпазливост – обврска за јавување во судот и привремено одземање на патната исправа, успешно ќе се елиминира опасноста од бегство“.

Второстепениот суд ја одбил жалбата на одбраната на поранешниот директор на Агенцијата за државни патишта, Љупчо Георгиевски, кому му остануваат мерките за претпазливост, односно да му биде одземен пасошот и да се јавува во судот еднаш неделно.

На сила остануваат истите мерки и за новинарот Драган Павловиќ-Латас, обвинет во случајот „Тотал“, откако Апелацискиот суд го одбил барањето на СЈО да му биде одреден притвор, како и жалбата на обвинетиот против одлуката на Кривичниот суд да му биде одземен пасошот и еднаш неделно да се јавува во суд.

Апелацискиот суд досега ги одби сите жалби што ги поднесоа Специјалното јавно обвинителство и обвинетите против одлуките на првостепениот суд.

Инаку, денеска во Апелацискиот суд треба да се одржат нови пет јавни седници, на кои ќе бидат разгледувани жалбите на СЈО и на обвинети во случаите што ги отвори ова обвиниелство и за кои кон крајот на минатиот месец поднесе обвиненија.

СЈО бараше притвори за вкупно 18 обвинети, меѓу кои и за лидерот на ВМРО-ДПМНЕ и поранешен премиер, Никола Груевски, но кривичните совети на Основниот суд Скопје 1 ги одбија сите предлози и наместо притвор им одредија мерки на претпазливост.


Судот не знае како обвинетите во „Титаник“ дознале кои судии ќе одлучуваат за притворите


Скопје, 7 јули, 2017 - 15:22 (META) 

Обвинетите во случајот „Титаник“, меѓу кои и лидерот на ВМРО-ДПМНЕ, Никола Груевски, барале изземање на еден од тројцата судии од кривичниот совет што одлучуваше по барањето на Специјалното јавно обвинителство да им биде одреден притвор, потврди денеска Основниот суд Скопје 1.

Како обвинетите и нивната одбрана дознале кои судии го сочинуваат советот, од судот велат дека тоа не му е познато и не можат да дадат одговор ниту коментар за случајот.

Од судот ги отфрлаат како шпекулации наводите што вчера ги објави порталот „Сакам да кажам“, кој повикувајќи се на анонимни извори од судот објави дека Груевски, како и другите обвинети во „Титаник“ – Гордана Јанкулоска, Мартин Протогер, Миле Јанакиески и Кирил Божиновски од тричлениот кривичен совет првично добиле притвор. Како што објави порталот, претседателката на советот веднаш му јавила на претседателот на Основниот суд Скопје 1, Стојанче Рибарев, за соодносот на гласовите од 2 – 1 за одредување притвор, по што од советот незаконски бил отстранет еден од судиите.

Во соопштението на Кривичниот суд се наведува дека првично во советот што одлучувал за притворите, биле определени судиите Билјана Коцевска, Дарко Тодоровски и Диана Груевска-Илиевска. Судијата Билјана Коцевска, поради здравствени проблеми, велат од судот, била спречена да учествува во одлучувањето, поради што на нејзино место, како член на советот, била определена судијката Џенета Бектовиќ.

„Според списите од предметот, од страна на обвинетите лица истиот ден (сабота, 1 јули), во 17.20 часот, во судската писарница е поднесено барање за изземање на судијата Дарко Тодоровски од одлучување по тој предмет. Како дознале обвинетите лица и одбраната за составот на советот, не ни е познато и не можеме да дадеме одговор ниту коментар“, стои во соопштението од судот.

Оттаму објаснуваат дека доколку работата по предметот не е завршена, во согласност со членот 37 од Законот за кривична постапка (ЗКП), судијата чие изземање се бара е „должен да престане со работење по предметот и за тоа да го извести претседателот на судот кој е должен да одлучи по барањето“.

Судијата Дарко Тодоровски дал изјава за поднесеното барање за негово изземање и в.д. претседателот на Кривичниот суд, Стојанче Рибарев, го иззел судијата Тодоровски, а за нов член на советот го определил судијата Марин Станевски, кој во саботата вечерта, околу 23.30 часот, дошол во судот.

„Доколку по конкретниот предметот веќе било одлучено, ќе бил подготвен записник за советување и за гласање и судијата Дарко Тодоровски ќе дал изјава со таква содржина, а барањето за изземање ќе било отфрлено. При составувањето на советот е постапувано итно, за да се овозможи почитување на рокот од 24 часа во кој треба да се одлучи по барањето за притвор“, велат од Кривичниот суд.

Оттаму додаваат дека кој судија како гласал при донесувањето на одлуката е забележано на записник, кој е таен и може да му биде достапен само на повисокиот суд при одлучување по жалба.

Инаку, кривичните совети на Основниот суд Скопје 1 како неосновани ги отфрлија сите 18 барања за притвор што ги поднесе Специјалното јавно обвинителство и бараната мерка ја замени со мерки за претпазливост, односно одземање на пасошите и обврска за јавување во судот еднаш неделно.


Повторно одбиено барањето на СЈО за замрзнување на имотот на ВМРО-ДПМНЕ


Скопје, 29 мај, 2017 - 12:12 (META) 

Кривичниот совет денеска вторпат го одби барањето на СЈО да се замрзне имотот на ВМРО-ДПМНЕ поради истрагата за случајот „Талир“, во кој осомничени се 11 високи функционери на поранешната владејачка партија, меѓу кои и лидерот на партијата, поранешниот премиер Никола Груевски.

„Кривичниот совет на одделението за организиран криминал и корупција при Основен суд Скопје 1, постапувајќи по несогласноста на судијата на претходна постапка, во врска со барањето за привремено одземање на имот, поднесено од Јавното обвинителство за гонење кривични дела поврзани и кои произлегуваат од содржината на незаконското следење на комуникациите (СЈО), на нејавна седница одржана на 27 мај 2017 година, во согласност со член 202, став 3 од ЗКП, донесе решение со кое се уважува несогласноста на судијата на претходна постапка, при што од страна на судот не е определена предложената привремена мерка – забрана на отуѓување на недвижен имот со ставање на хипотека“, стои во соопштението.

Ова е второ одбивање на барањето на СЈО за замрзнување на имотот на ВМРО-ДПМНЕ. Минатата недела судот ги одби 12 барања за замрзнување на имот на партијата, поради недостиг од транскрипт од прислушуваните разговори. Денеска, како што неофицијално дознаваме, барањето е отфрлено поради „недостиг од докази кои укажуваат дека имотот е стекнат со кривично дело“. Според истите извори, судот оценил дека приложените докази укажуваат за склучени договори за градежни активности, а не за кривично дело.

СЈО нема право на жалба на одлуката, бидејќи е второстепена.


Одбиени барањата на СЈО за замрзнување имот на ВМРО-ДПМНЕ


Скопје, 23 мај, 2017 - 17:34 (META) 

Кривичниот совет на Основниот суд Скопје 1 не ги прифатил 12. барања на Специјалното јавно обвинителство за замрзнување на имотот на ВМРО-ДПМНЕ. Судија на претходна постапка изразил несогласување за барањата за привремено одземање на имот, по што решавал Кривичниот совет, кој ја потврдил одлуката на судијата.

„Судиите од Кривичните совети на Одделението за организиран криминал и корупција при Основен суд Скопје 1 – Скопје, постапувајќи по несогласноста на судиите на претходна постапка, во врска со барањата за привремено одземање на имот поднесени од страна на СЈО, на нејавна седница одржана на 23.05.2017 година согласно чл.202 ст.3 од ЗКП донесоа решенија со кои се уважува несогласноста на судијата на претходна постапка при што од страна на судот не е определена предложената привремена мерка Забрана на оттуѓување на недвижен имот со ставање на хипотека“, гласи соопштението на Основен суд Скопје 1.

Од СЈО за „Мета“ изјавија дека немаат право на жалба на одлуката и дека деновиве ќе излезат со официјална реакција.

Во случајот „Талир“ осомничени се 11 високи функционери на ВМРО-ДПМНЕ, меѓу кои и лидерот на партијата. Тие се товарат за перење пари и за незаконско финансирање на партијата.


Одбиена жалбата на СЈО, Кочан ќе се брани од слобода


Скопје, 21 мај, 2017 - 9:19 (META) 

Кривичниот совет синоќа ја одби жалбата на Специјалното обвинителство покрената поради укинувањето на мерката притвор за бизнисменот Сеад Кочан, кој е првоосомничен во случјот „Труст“.

Обвинителите на СЈО, Гаврил Бубевски и Артан Ајро на вчера изнесоа аргументите дека постојат индиции Кочан да го повтори делото и оти гаранцијата од околу 900.000 евра и одземениот пасош не се доволна гаранција. Одбраната на Кочан, предводена од адвокатот Никола Додевски истакна дека гаранцијата е пракса на сите демократски држави, поради што СЈО нема причина повторно да бара притвор.

Судијата на претходна постапка минатата недела донесе одлука на Кочан да не му биде одреден притвор, туку тој да се брани од слобода со гаранција од околу 900.000 евра, да му биде одземен пасошот и обврска еднаш неделно да се јавува во судот. Кочан повеќе од два месеци не беше достапен за органите на прогонот, а се врати во Македонија веднаш по укинувањето на потерниците и на притворот.