!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Лондон со остри критики до Трамп поради „твитовите“ за терористичкиот напад


Лондон, 17 септември, 2017 - 14:53 (META) 

Високиот британски функционер Демијан Грин денеска го критикуваше претседателот на САД, Доналд Трамп, поради неговите пораки на „Твитер“ во врска со полициската истрага за терористичкиот напад во метро-станицата во Лондон.

Грин, кој ја има почесната титула прв државен секретар, за „Скај њуз“ изјавил дека „твитот“ на Трамп за полициската истрага не бил од помош. Тој ѝ се придружи на британската премиерка Тереза Меј која во петокот, исто така, го критикуваше Трамп за истата порака.

Американскиот претседател во петокот, по бомбашкиот напад во кој беа повредени 29 лица, на „Твитер“ напиша дека извршителите ѝ биле познати на британската полиција. Тој во неколку твитови експлозијата во Лондон ја оцени како напад на „терористи – губитници“ и алудираше дека лондонската полиција пропуштила да ги спречи.

Грин ги замолил сите, од претседателот на САД, па натаму, да не пишуваат пораки на „Твитер“ додека трае полициската истрага за терористичкиот напад.

Тој додал дека разузнавачка соработка меѓу САД и Велика Британија постои и дека таа помага граѓаните да бидат безбедни.


Заев би го вратил Таравари на министерската функција ако не стане градоначалник


Скопје, 15 септември, 2017 - 20:51 (META) 

Премиерот Зоран Заев е подготвен да го врати Арбен Таравари за министер за здравство ако тој изгуби во градоначалничката трка, без оглед што самиот си поднесе оставка. Гостувајќи во емисијата „Топ-тема“, Заев рече дека не е проблем Таравари да се врати ако загуби на изборите, оти демократијата подразбира право за битка за гласовите на граѓаните.

Тој нагласи дека, пред сè, локалните избори се битка на личности.

– Во овој човек гледам квалитетен министер. Оставете ги луѓето слободно да ги донесуваат одлуките. Мојата демократска поставеност како шеф на оваа влада има граници. Да не преминеме во диктаторство. Не би сакал да се откажам од квалитетен човек ако изгуби – порача Заев.

 


Трамп го нападна лидерот на републиканците во Сенатот поради „Обамакер“


Вашингтон, 10 август, 2017 - 21:25 (META) 

Претседателот на САД, Доналд Трамп, денеска остро го критикуваше лидерот на републиканците во Сенатот, Мич Меконел, поради неуспехот во укинувањето на законот за здравствена заштита (Обамакер) и донесувањето нов закон, јавуваат американските медиуми.

Трамп го обвини Меконел дека е виновен за неуспехот на републиканците, кои имаат мнозинство во Сенатот, да го укинат законот за здравствена заштита што го воведе претходниот американски претседател, Барак Обама.

„Можете ли да верувате дека Мич Меконел, кој седум години грмeше ‘да се укине и да се замени’, не успеа да го направи тоа. ‘Обамакер’ мора да биде укинат и заменет“, напиша Трамп на „Твитер“.

Американскиот претседател оваа недела реагираше бурно, откако Меконел јавно изјави дека Трамп „досега не се занимавал со ваква работа“ и дека имал „преголеми очекувања за брзината со која се одвиваат работите во демократскиот процес“.

Кон крајот на минатиот месец пропадна и третиот обид на републиканците во Сенатот да го отповикаат законот на Обама од 2010 година, откако републиканците Џон Мекејн, Сузан Колинс и Лиса Мурковски гласаа против отфрлањето на законот за здравствена заштита. Предлогот беше отфрлен со 51 спрема 49 гласа.


Хан: Барањата на граѓанскот сектор од Балканот се прифатливи


Трст, 12 јули, 2017 - 16:16 (META) 

Најголем дел, околу 90 отсто од барањата и од препораките на граѓанскиот сектор од Балканот се прифатливи, само треба да се најде начин за нивна имплементација, оцени еврокомесарот за проширување, Јоханес Хан, денеска во Трст, откако присуствуваше на средбата меѓу претставниците на граѓанскиот сектор и шефовите на дипломатиите на земјите од Западен Балкан. На средбата шефот на македонската дипломатија ги охрабри граѓанските организации и иницијативи да ја критикуваат власта.

По вчерашниот целодневен Форум на цивилното општество, барањата на министрите и на еврокомесарот им ги презентираше Срѓан Сушиќ, консултант на германската фондација „Хајнрих Бел“, која е коорганизатор на настанот.

Министрите, меѓу кои и шефот на македонската дипломатија, Никола Димитров, позитивно реагираа и побараа од граѓанскиот сектор уште поактивна улога. Димитров ја истакна улогата на невладиниот сектор во неодамнешната криза во Македонија, оценувајќи дека таа помогнала во евроинтеграциските процеси.

– Желбата на регионот е да влезе во ЕУ. Веќе изгубивме многу време и крајно време е да ја завршиме работата. Критичкиот однос е многу важен и затоа немојте да се двоумите дали да нè критикувате –  изјавил Димитров.

Препораките се однесуваат на демократските процеси, владеењето на правото, деловното опкружување и иновациите, енергијата и климатските промени и слободата на говорот и улогата на медиумите, што беше посебно нагласена од еврокомесарот Хан, како многу важен услов за евроинтеграциите и како критична точка во регионот.

– Медиумските слободи можат да бидат унапредени само доколку создадеме медиумски пазар и со тоа да им овозможиме на медиумите да не бидат зависни од финансиска помош – оцени Хан.

Третиот Форум на цивилното општество од Западен Балкан, на кој учествуваа и претставници од Македонија, беше замислен како претходница на денешниот самит во Трст. Шефовите на дипломатиите и премиерите на Македонија, Албанија, БИХ, Црна Гора, Косово и на Србија треба да ги земат предвид барањата на граѓанскиот сектор, кој од страна на ЕУ е оценет како значаен фактор за побрза евроинтеграција и е составен дел од Берлинскиот процес.

Состанокот на Западен Балкан со ЕУ завршува вечерва, со заедничка декларација и со одлуки кои ќе бидат сериозно придвижување кон регионалната соработка и забрзување на евроинтеграциските процеси.


Северна Кореја успешно тестирала интерконтинентална балистичка ракета


Пјонгјанг, 4 јули, 2017 - 11:35 (META) 

Северна Кореја денеска соопшти дека извршила успешно тестирање на интерконтинентална балистичка ракета, јавуваат светските агенции.

Лансирањето на ракетата „хвасонг-14“ го следел и лидерот на Северна Кореја, Ким Џонг-ун, кој го наредил тестирањето, било наведено во специјалната емисија на севернокорејската телевизија.

„Тестирањето на интерконтиненталната ракета е голем успех во историјата на нашата Република. Северна Кореја е јака нуклеарна сила која може да го нападне кое било место на земјата“, било кажано во емисијата.

Според јапонското министерство за одбрана, лансираниот проектил достигнал височина од 2.802 километри. Аналитичарите сметаат дека тоа одговара на карактеристиките на интерконтинентална ракета.

„Проценките се дека ракетата достигнала височина од 2.500 километри и летела околу 40 минути пред да падне во Јапонското Море, во економската зона на Јапонија, по лет од 900 километри“, било наведено во соопштението.

Станува збор за најуспешниот ракетен тест на Пјонгјанг, а некои аналитичари сметаат дека ракетата би можела да стигне и до Алјаска.

На тестирањето на ракетата реагираше американскиот претседател Доналд Трамп, кој на својот твитер-профил
го критикуваше севернокорескиот лидер Ким Џонг-ун, прашувајќи се дали тој „нема попаметна работа во животот“ од истрелување ракети.

„Тешко е да се поверува дека Јужна Кореја и Јапонија тоа долго ќе го толерираат. Можеби Кина ќе направи силен гест во врска со Северна Кореја со што би ѝ се ставило крај на оваа бесмисленост еднаш засекогаш“, наведува Трамп.


Димовски: Владата на Заев има мал и слаб економски тим


Скопје, 30 мај, 2017 - 14:51 (META) 

Пратеникот Илија Димовски, кој беше прв говрник по експозето на мандатарот за составување на новата влада, Зоран Заев, истакна дека пратеничката група на ВМРО-ДПМНЕ ќе биде активна и конструктивна опозиција, која нема намера да ги повторува грешките на СДСМ, кога тој беше во опозиција.

– Пратениците од ВМРО-ДПМНЕ ќе доаѓаат на работа и ќе бидат активни на пленарните и на седниците на комисиите. Нема да ја повториме грешката на СДСМ, чии пратеници со месеци го бојкотираа Собранието. Ќе бидеме активни во работата, на добрите предлози ќе даваме поддршка, на лошите ќе се соочуваме со аргументи, на коректноста ќе одговориме со коректност, а остро ќе реагираме на немањето транспратеност и на кршењето на принципите – рече Димовски од собраниската говорница.

Тој рече дека во изминатиот период се нарушиле многу правила и принципи, но додаде оти се надева дека мандатарот Заев и лидерот на ДУИ, Али Ахмети, се свесни за сериозните чекори што ги презедоа досега и за одговорноста што ја преземаат отсега и дека пратениците ВМРО-ДПМНЕ ќе бидат тука да ги контролираат да не направат некоја постапка на штета на државните и на националните интереси.

Димовски повторно истакна дека се крши деловникот на Собранието и дека на пратениците треба да им бидат оставени најмалку 10 дена за да можат да ги анализираат материјалите од програмата на владата и кандидатите за министри.

Токму критиката за предложените кандидати за министри беше една од главните што ги упати Димовски кон мандатарот Зоран Заев. Тој нагласи дека со исклучок на одредени лица, најголемиот дел од кандидатите за министри се „класични партиски послушници“.

Како позитивен пример, Димовски го посочи кандидатот за министер за здравство, Арбен Таравари, за кого рече дека и тие како пратеничка група би го поддржале неговиот избор, доколку се гласа за секој кандидат посебно.

– Владата има мал и, со исклучоци, слаб економски тим. Има огромен број на кандидати за министри без ресор. И претходно имаше голем број министри без ресор, но најголем дел од нив работеа во економскиот тим на владата. Тоа е голем пропуст – рече Димовски.

Тој истакан дека во експозето на мандатарот Заев не слушнале ништо детално за Законот за употребата на јазиците, ниту за тоа како идната влада планира да го реши проблемот со Грција за името.

– Во програмата има многу памфлетни ветувања. Но, има јасни одредници за зголемување на даноци. Ова ќе биде првпат по 10 години да се зголемуваат давачките. Нема збор за зголемени пензии, за платите на војската и на полицијата и во јавниот сектор. Збор нема за поддршка на странските инвестиици, освен дека ќе помогнете на домашните компании да соработуваат со странските инвеститори – рече Димовски.


Вучиќ: Не ми пречи што Заев ме навредува, важно ми е како ќе се однесува кон Србија


Белград, 18 мај, 2017 - 16:21 (META) 

Премиерот на Србија, Александар Вучиќ, денеска изјави дека не го интересираат внатрешните односи во Македонија, ниту дали мандатарот за состав на новата македонска влада го навредува, туку го интересира како Македонија ќе се однесува кон Србија.

– Не би сакал да зборувам што мислам за Зоран Заев. Ниту сакам ниту можам да зборувам остро, иако тоа некои можеби го сакаат. Тој ја претставува втората партија по сила во Македонија. Ќе судиме во делата – изјави Вучиќ.

Лидерот на СДСМ, Зоран Заев, вчера во интервју за регионалната телевизија „Н1“ изјави дека е непријатен начинот на кој Србија ги коментира случувањата во Македонија, но дека ќе се труди да има добри односи со Белград.

„Вучиќ водеше кампања и буквално на секој од своите настапи зброуваше за некакво „македонско сценарио“. За жал, мене ми беше непријатно за слушање како нашиот сосед зборува за Македонија“, рече Заев.

Вучиќ денеска додаде и дека не му пречи „кога Заев го навредува“, туку дека „единствено го интересира Србија да ја остават на мира“.

– Не сакам да ги коментирам односите во Македонија. Мене не ми пречи што ме навредуваше, за мене е важно како ќе се однесувате (мисли на Македонија, н.з.) кон Србија. Ако сум ја критикувал Македонија, тоа сум го направил затоа што гласаше за влегување на Косово во УНЕСКО – рече Вучиќ.

Во врска со можноста Рамуш Харадинај, кого Србија го товари за воени злосторства, да биде новиот косовски премиер и главен преговарач во дијалогот меѓу Белград и Приштина во Брисел, Вучиќ изјави дека тоа би било понижување и за ЕУ. Тој додаде дека останува да се види што ќе се случи на изборите на Косово, „каде има две коалиции, едната во која се поранешните водачи на ОВК и другата – „американска“ – на чело со Беџет Пацоли, додека „Србија и српскиот народ треба да се гледаат себе“.


Хан ја искритикува опозицијата во Албанија поради одлуката за бојкот на изборите


Брисел, 11 мај, 2017 - 18:32 (META) 

Еврокомесарот за проширување и за добрососедска политика, Јоханес Хан, денеска преку отворено писмо до граѓаните на Албанија ја искритикува опозицијата за одлуката да ги бојкотира изборите, закажани за 18 јуни. Тој им порача на политичките лидери во земјата дека „ќе сносат одговорност доколку се обидат да ги попречат аспирациите на граѓаните за подобра иднина“.

„Актуелната опозиција намерно одлучи да не оди на изборите. Јас ја почитувам, но истовремено длабоко жалам поради ваквата одлука, од демократска перспектива. Албанците бараат и заслужуваат избори кои ќе овозможат широка политичка пoнуда и почитување на изборните стандарди. Сепак, демократскиот процес мора да продолжи, дури и ако некои одлучиле да не учествуваат во него. Демократијата и демократските стандарди нема да бидат кочени со бојкотирање на институциите и на демократските избори“, пишува Хан, додавајќи оти очекува од сите надлежни институции во Албанија да обезбедат целосна соработка и транспарентност со мисијата на ОДИХР, која ќе го следи изборниот процес.

Еврокомесарот, во писмото, жестоко ги осудува повиците за „акции“ кои имаат цел да го поткопаат правото на граѓаните да гласаат, како и другите фундаментални слободи, нагласувајќи дека ваквите „акции“ не можат да се оправдаат и не соодветствуваат со стандардите на Европската Унија.


Иванов ја одложи посетата на Австралија


Скопје, 16 март, 2017 - 13:20 (META) 

Претседателот на Република Македонија, Ѓорге Иванов, донел одлука за одложување на посетата на Австралија, соопштиле од неговиот кабинет за државната новинска агенција МИА.

Оттаму посочиле дека политичката состојба во земјава и тензиите меѓу Европската Унија и Турција за прекин на договорот за мигрантите се причините поради кои Иванив нема да ја реализира посетата на Австралија, каде, како што велат од неговиот кабинет, тој требало да има средби со државниот врв на земјата, со претставници на македонско-австралиската група за пријателство во парламентот на Австралија, како и со претставници на македонската заедница.

Иванов сега е во дводневна посета на Азербејџан, каде учествува на петтиот Глобален форум во Баку.

Отсуството на Иванов од земјава, во момент на тензична атмосфера и на институционална блокада, наиде на критики во јавноста. СДСМ го обвини претседателот Иванов дека опасно си игра со безбедноста и со стабилноста на државата, бидејќи во време кога Македонија се соочува со една од најголемите политички и институционални кризи, тој решил да замине од земјата.


Малезија го протера амбасадорот на Северна Кореја од земјата


Куала Лумпур, 4 март, 2017 - 17:20 (META) 

Малезија го протера амбасадорот на Северна Кореја во Куала Лумпур, поради неговото критикување на истрагата за убиството на полубарот на лидерот на Северна Кореја, соопштило денеска малезиското министерство за надворешни работи, јавува „Би-би-си“.

Шефот на малезиската дипломатија, Анифах Аман, изјавил дека до амбасадата на Северна Кореја било испратено известување дека амбасадорот Канг Чол има 48 часа да ја напушти Малезија.

Аман неодамна изјави дека Малезија бара извинување од властите во Пјонгјанг поради критиките за истрагата за убиството на Ким Јонг-нам, кое се случи на 13 февруари на аеродромот во Куала Лумпур. Според него, Малезија одлучила да го протера амбасадорот бидејќи Северна Кореја не се извинила.

Според наодите на истрагата, Ким Јонг-нам е убиен со нервниот агенс „ве-икс (VX), кој од Обединетите нации е класификуван како оружје за масовно уништување. За убиството се обвинети две жени.

Малезиските власти досега директно не ја обвинија Северна Кореја дека стои зад нападот, иако постојат силни сомневања дека Пјонгјанг е одговорен за убиството на Ким Јонг-нам.