Ѕанакопулос: Договорот е неопходен политички и дипломатски компромис


Атина, 13 јуни, 2018 - 14:03 (META) 

Станува збор за политичка победа бидејќи се решава прашање што ја измачуваше земјата, но и Балканот над 30 години, вели портпаролот на владата на Грција и министер без ресор Димитрис Ѕанакопоулос во интервју за грчката телевизија „ЕРТ“ и додава дека тие како влада се задоволни и горди за она што го постигнале, пренесува МИА.

– Убеден сум дека со текот на времето и оние кои не се согласуваат или изразуваат спротивставеност, ќе сфатат дека станува збор за неопходен политички и дипломатски компромис, кој и покрај тоа што е компромис, целосно ги заштитува и ги гарантира интересите на нашата земја – рече Ѕанакопулос и додаде дека вчера беше направен многу важен чекор за стабилизација на поширокиот регион на Балканот.

Во однос на обвинувањата од опозициската Нова демократија, Ѕанакопулос рече дека Мицотакис можеше да одбере критика поврзана со суштината на договорот.

– Премиерот и министерот за надворешни работи имаат надлежности за да потпишат меѓународни договори. Ако Мицотакис се сомнева во тоа дали владата има доверба од парламентот, не му преостанува ништо друго освен да достави предлог за гласање на недоверба на владата. Зошто не го стори тоа? – рече Ѕанакопулос во однос на критиките од лидерот на Нова демократија дека владата нема „правен легитимитет за да го потпише договорот“.


„Стандард“: Настапот на Курц во Скопје е задоцнета и лоша исплата за бегалската криза


Виена, 30 ноември, 2016 - 13:36 (META) 

Настапот на шефот на австриската дипломатија, Себастијан Курц, на централниот митинг на ВМРО-ДПМНЕ во Скопје, во неделата, е задоцнета и лоша исплата на долгот кон македонските власти за затворањето на македонско-грчката граница и за запирањето на протекот на мигранти кон Австрија и кон Западна Европа, пишува виенски „Стандард“.

„Изминативе месеци, многумина се прашуваа што доби македонската влада со затворањето на границата кон Грција во март, за бегалците да не можат лесно да стигнат до Централна Европа и до Германија и со што се стави крај на големата бегалска криза. Одговорот од Скопје секогаш беше – ништо. Од неделата сите сме попаметни: наградата ја испорача лично министерот Себастијан Курц, кој дојде во Скопје за да ја поддржи национал-конзервативната ВМРО-ДПМНЕ во изборната кампања“, се наведува во коментарот на „Стандард“ за контроверзното гостување на Курц во Скопје.

Тоа што Курц, се додава во коментарот, поддржува една ваква партија, покажува дека поддршката за демократијата и за владеењето на правото се многу ниско на листата на приоритети, а тоа има последици и по Европската Унија која „го губи својот кредибилитет“.

„Повеќето партии во Југоисточна Европа се клептократски здруженија кои на луѓето им делат работни места во замена за гласови и ги залажуваат со дози национализам. Но, ВМРО-ДПМНЕ води на негативната ранг-листа: режимот во изминатите години стануваше сè похрабар и поавторитарен, контролирајќи ги полицијата и судството и ги прислушуваше граѓаните“, пишува „Стандард“.

Идентичен е ставот и на бегискиот неделник „Њу Јуроп“, кој исто така пишува дека учеството на Курц во изборната кампања на ВМРО-ДПМНЕ е враќање услуга на македонската владејачка партија за нејзината помош околу затворањето на балканската мигрантска рута.

„Неговата изјава (на Себастијан Курц н.з.) за членство (на Македонија во ЕУ) е во директна спротивност со духот на извештајот на Европската комисија за напредокот на земјата, во кој се зборува за заробување на демократските институции, кршење на слободата на говорот и на владеењето на правото“, пишува „Њу Јуроп“.

Настапот на шефот на австриската дипломатија на митингот на ВМРО-ДПМНЕ беше критикуван и од повеќе европски политичари кои оценија дека на Македонија ѝ се потребни слободни избори, без влијание од странски министри или влади.

Европската комисија не сакаше да го коментира настапот на Курц. Од Брисел за „Мета“ рекоа дека стојат зад изјавата што на 18 ноември ја даде евроамбасадорот Самуел Жбогар и амбасадорите на земјите членки на ЕУ во Македонија за претстојните избори, во која истовремено се повикува и на одвојување на партиските од државните активности.


Грчкото МНР со остра критика до Иванов за интервјуто во „То вима“


Атина, 4 април, 2016 - 9:20 (META) 

Грчкото министерство за надворешни работи со жестока критика одговори на обвинувањата на македонскиот претседател Ѓорге Иванов кон грчката страна. Преку соопштение, во одговор на прашања на грчки новинари за интервјуто на Иванов во весникот „То вима“, потпаролот на министерството, Константинос Кутрас, го нарекува Иванов неинформиран за односите меѓу двете држави.

– Грчката влада не е надлежна дa обезбеди потребни информации до претседателот на БЈРМ. Секако, не е одговорна што тој е неинформиран за состојбата во која се наоѓаат односите меѓу двете држави – вели Кутрас во соопштението.

Во вчерашното интервју во „То вима“, Иванов остро ја критикуваше грчката влада за слаба соработка со македонската околу бегалската криза, ја нападна дека со тоа што дозволила да се формира импровизираниот бегалски камп на Идомени се поттикнале бегалците и мигрантите илегално да преминуваат кон Македонија.

Иванов беше критичен кон Грција и околу спорот за името, коментирајќи дека Грција треба да прифати дека Македонија е независна и суверена држава и дека преку еднострани, наметнати барања нема да може да се реши спорот.

Ги обвини и претходниот и сегашниот грчки претседател дека не сакаат да се сретнат со него, игнорираат и избегнуваат комуникација со него, што не може да доведе до решавање на спорот за името, ниту бегалската криза.

Ваквите реакции од двете страни, пинг-понг мечот меѓу Иванов и Павлопулос, кој во секоја пригода, исто така, ја критикува Македонија, со остри меѓусебни обвинувања, се чини дека повторно создаваат сопки во односите меѓу двете држави кои тргнаа во нагорна линија преку зачестените средби на македонскиот и на грчкиот шеф на дипломатијата, разговорите за мерките за градење доверба, посетата на група грчки новинари на Скопје, посетата на група 100 македонски студенти на Солун.

 


Грчкиот претседател остро ја нападна Македонија за бегалската криза


Атина, 19 март, 2016 - 11:11 (META) 

Грчкиот претседател, Прокопис Павлопулос, упати остра критика и обвинување до македонските политичари дека се обидуваат да го искористат моментот на бегалската криза за поентирање околу спорот за името.

Говорејќи на настан во Солун, Павлопулос истакна дека Грција покажува солидарност со бегалците како држава, благодарение на античкиот грчки дух и култура. Истото тоа побара да го покажат и другите европски држави, истакнувајќи дека ЕУ се заснова на идеите за хуманоста, демократијата и за правдата.

– ЕУ не е прибежиште за плашливи народи, ниту брод кој плови со знамиња на политички опортунизам. Оваа порака се однесува и на соседната држава Поранешна Југословенска Република Македонија, чии лидери треба да разберат со време дека со барањето имиња кои се обидуваат да ја фалсификуваат историјата, но и со кревањето жичани огради и варварски чинови против бегалците, отворено ги кршат и одат против европските вредности и немаат место во Европската Унија – изјави Павлопулос.


Новинар од Турција добил отказ зашто ја критикувал политиката на Ердоган


Анкара, 23 јули, 2015 - 15:15 (META) 

Турскиот весник „Милиет“ му дал отказ на еден од најпознатите коментатори затоа што ја критикувал политиката на претседателот Ердоган, во однос на џихадистите од Исламска држава.

Раководството на весникот објави дека договорот со новинарот Кадри Гурсел го прекинале затоа што тој на „Твитер“ објавил коментар што бил спротивен на уредувачката политика.

Новинарот го обвинил претседателот дека е главниот фактор за подемот на ИД и дека е срамно што светските лидери изразија сочувство пред него поради жртвите од нападот во Суруч извршен од џихадисти.
„Застрашувачки е што изразија сочувство за Суруч. Светските лидери се јавија на човекот кој е број еден како фактор за појава на тероризмот на ИД во Турција“, напиша коментаторот.


ЛДП: Груевски повторно се обидува да ја манипулира македонската јавност


Скопје, 25 јуни, 2015 - 12:08 (META) 

Премиерот Никола Груевски повторно се обидува најдрско и лицемерно да ја манипулира македонската јавност и меѓународната заедница, најавувајќи „План за нови реформи за европска интеграција на РМ“, што е уште една негова срамна и патолошка реакција на крајно сериозниот извештај на Рејнхард Прибе, реагираат од опозициската ЛДП.

„Човекот кој ја има најголемата заслуга што Македонија денес се соочува со срамно губење на препораката за членство во ЕУ, сето тоа поради неговата желба суверено и криминално, без право и правда, да владее со Македонија и со нејзините граѓани, денеска ја засмејува јавноста со неговите изјави дека ќе се бори против сите работи што тој ги инсталира во државата и служат како единствен извор на неговата моќ“, пишува во соопштението на партијата.


Конкурс за најдобра филмска критика на „Синедејс“


Скопје, 7 ноември, 2014 - 14:13 (META) 

Конкурс за најдобра филмска критика распиша Фестивалот на европски филм „Синедејс“, а рокот за пријавување е до 12 ноември 2014 година.

Конкурсот е од отворен карактер, а добредојдени се сите млади  на возраст до 35 години, кои би сакале да го прикажат својот потенцијал и талент за пишување во овој специфичен новинарски израз.

Текстовите не би требало да се подолги од една страница, односно повеќе од околу 70 реда текст, а секој од пријавените може да испрати максимум три рецензии.

Наградата за најдобрата филмска критика ќе изнесува 20.000 денари, а ќе ја додели тричлено жири. Конкурсот важи само за филмовите во натпреварувачките програми на фестивалот, официјалната селекција, како и селекцијата „Сине Балкан“.

Заинтересираните може да се пријават на следнава електронска адреса: contact@cinedays.com.mk

Oваа година, 13. издание на фестивалот на европски филм ќе се одржи во периодот од 13 до 22 ноември.