Рускиот новинар Бабченко, кој беше силен критичар на Путин е убиен во Киев


Киев, 30 мај, 2018 - 12:53 (META) 

Рускиот новинар, Аркади Бабченко e убиен во Киев во својот стан, соопшти украинската полиција и наведе дека најверојатно бил мета поради работата што ја работел.

Неговата сопруга го пронашла ранет и повикала служба за Итна медицинска помош, но тој починал по пат.

Шефот на киевската полиција изјавил дека „прва и најочигледна верзија“ е дека врз Бабченко било пукано поради неговите професионални активности.

Претставникот на Организацијата за европска безбедност и соработка (ОЕБС) за слобода на медиумите на неговиот твитер-профил напиша дека е згрозен од убиството на Бабченко и ги повика украинските власти итно да спроведат истрага.

Tекстовите на Бабченко предизвикуваа големи реакции во Русија, а во еден од нив напиша дека не жали поради смртта на рускиот хор кој настрада во авионска несреќа во декември 2016 година. Поединци бараа да му се одземе руското државјанство.

Тој ја напушти Русија во 2017 година, изјавувајќи дека добива закани и дека се плаши дека може да биде уапсен. Лани тој се пресели во Киев и работеше за телевизијата „АТР“.


Критичарот на Путин, Алексеј Нaвaлни, осуден на условна, а неговиот брат на затворска казна


Москва, 30 декември, 2014 - 11:17 (META) 

Рускиот суд му одредил условна казна на Алексеј Навални, жесток критичар на Кремљ и на политиката на претседателот Владимир Путин, додека неговиот брат Олег Навални е осуден на три и пол години затвор, објави денеска лондонски „Гардијан“.

Навални ги предводеше протестите против претседателот Владимир Путин пред три години, кога десетици илјади граѓани излегоа на улиците на Москва и на Санкт Петерсбург да демонстрираат против корупцијата во внатрешните кругови на владата на Путин.

Неговиот случај се смета за дел од кампањата за „задушување на дисидентите“.

Браќата Навални беа обвинети дека во периодот меѓу 2008 и 2012 година, украле 30 милиони рубљи, или околу 430.000 евра, според тековниот девизен курс, од две фирми, од кои едната е филијалата на француската компанија за козметика „Ив Роше“.

Кремљ ги отфрла обвинувањата дека го користи судот за гонење на опонентите, пишува „Гардијан“, наведувајќи дел од изјавите со кои Алексеј Навални ѝ се обратил на судијката Јелена Коробченко.

– Зарем не се срамите од тоа што го правите. Зошто го ставате брат ми во затвор? За да ме казните посурово – рекол Навални.

Алексеј Навални во моментот е во домашен затвор, издржува друга условна казна од пет години затвор, изречена минатата година за друго дело.

– Властите ги мачат и ги уништуваат роднините на политичките опоненти. Овој режим не заслужува да постои, мора да биде уништени – изјавил Навални пред репортерите надвор од судницата додека бил придружуван до возилото за затвореници.

Пресудата е донесена еден месец порано, откако подржувачите на Навални најавија дека планираат големи протести на 15 јануари 2015 година.

Неговите подржувачи, наместо во јануари, најавиле протести за денеска, на плоштадот пред Кремљ.