Тимоние: Не го разбрав законот за јазици, постои простор за подобрување на текстот


Скопје, 21 јануари, 2018 - 10:36 (META) 

Мислам дека не сум единствениот што не успеал да го разбере законот за јазици, бидејќи се работи за многу комплициран текст, барем во однос на неговата содржина, но и на последиците и мислам дека постои простор за подобрување во самиот текст вели францускиот амбасадор Кристијан Тимоние во неделното интервју на „Радио Слободна Европа“.

Францускиот амбасадор вели дека сега доаѓа фазата на спроведување на рефрмските приоритети и дека тоа е најсложениот дел затоа што било изгубено големо количество енергија последните години.

Тој го поздравува фактот што ВМРО-ДПМНЕ присуствуваа на обраќањето на генералниот секретар на НАТО, Јенс Столтенберг во Собранието

-Тоа се гестови коишто се важни зашто покажуваат единство кај македонското општество за постигнувањето на големите цели во земјата. Без да сакам да давам совети и да се мешам, мислам дека ќе треба од секоја страна да се направат чекори кон другиот, затоа што постојат можности во рамки на Собранието. Ќе кажам дека господинот Џафери покажува голема трпеливост и желба во начинот на функционирање на собранието и голема објективност од негова страна и добивам впечаток дека постојат сили во рамки на собранието и кај опозицијата и кај мнозинството коишто сакаат нормализирање на односите – вели Тимоние.

Тој вели дека бил постигнат забележителен напредок во македонско-грчките односи и смета дека тој напредок треба да се искористи.

– Морам да кажам дека новата Влада даде сè од себе за подобрување на односите со Атина. Забележавме дека и грчките власти исто така покажаа дух на отвореност, којшто е нешто ново нели, за создавање на поинаква клима, бидејќи нели за танго се потребни двајца, а и со самиот факт што е постигнат договор за да се најде решение, тоа е нешто што само по себе е позитивно. Од друга страна, пак, тоа изолирање, кое што е ономастично за Македонија, повеќе не е одржливо, особено не на долгорочен план, и мислам дека постои генерална согласност кај меѓународната заедница за да мислиме дека е неопходно решение, затоа што не можеме повеќе да прифатиме дека таа блокада би можела постојано да се повторува, затоа што тоа не е добро и за европската изградба и генерално за безбедноста на Унијата, и сега се наоѓаме во период во којшто, најверојатно, од секоја страна има вистинска добра волја – вели францускиот амбасадор.


Мицкоски му соопштил на Тимоние дека ВМРО-ДПМНЕ ќе стори се за членство во НАТО и ЕУ


Скопје, 16 јануари, 2018 - 17:53 (META) 

Лидерот на ВМРО-ДПМНЕ, Христијан Мицкоски, денеска заедно со членот на Извршниот комитет на партијата, Игор Николов се сретна со амбасадорот на Франција, Кристијан Тимоние.

Од партијата информираат дека Мицкоски истакнал дека стратешка определба на Република Македонија е членство на државата во ЕУ и НАТО и дека ВМРО-ДПМНЕ ќе стори се во насока на остварување на тој стратешки интерес.

„Мицкоски го информираше Тимоние и за политичкиот прогон кој се врши врз политичките неистомисленици, како и репресијата на слободната мисла. Претседателот на ВМРО-ДПМНЕ истакна и дека е загрижувачка насоката во која се движи економијата на државата и изрази сомнеж за капацитетот на властите, судејќи по економските параметри во изминатиов период, но и забрзаното задолжување“, се вели во партиското соопштение.


Тимоние: И новинарите и дипломатите мора да се борат за слободата на изразување


Скопје, 19 декември, 2017 - 16:09 (META) 

И новинарите, но и дипломатите имаат одговорност за демократијата и за борбата за слободата на изразување и во таа борба не смее да се молчи, порача амбасадорот на Франција, Кристијан Тимоние на денешната промоција на публикацијата „Слободата на изразување низ праксата на Европскиот суд за човекови права“ од д-р Мирјана Лазарова – Трајковска, која се одржа во Клубот на новинари во Скопје.

– Од многу тажниот ден 24 декември 2012 година поминавме тежок, но успешен пат и искуствата може да служат како материјал за размислување за еволуцијата и барањето демократија. Книгата на д-р Мирјана Лазарова – Трајковска претставува потсетување на огромната одговорност што вие како новинари ја носите и потсетува на храброста на некои новинари, но и на недостиг на храброст на други. Истовремено, ни служи и како лекција нам дипломатите да не молчиме кога станува збор за прекршување на законите и фундаменталните права и јасно и гласно да кажеме дека нешто e неприфатливо – порача Тимоние.

Во книгата посебен акцент се става на случајот „Селмани и другите против Република Македонија“ во Европскиот суд за човекови права во Стразбур (ЕСЧП), како прв случај од Република Македонија за оневозможена слобода на изразување во врска со насилното изнесување на новинарите од Собранието на Република Македонија на 24 декември 2012 година.

Како што рече авторката, д-р Лазарова – Трајковска, овој случај е важен сегмент од практиката на ЕСЧП.

– Многу сум горда на таа пресуда на ЕСЧП, а мора да се напомене дека таа пресуда не е против Република Македонија, туку е ЗА Република Македонија – рече авторката.

Државата мора да биде чувар на слободата на изразување, како основно право, но мора да биде и чувар во поглед на говорот на омраза, рече евроамбасадорот Самуел Жбогар, порачувајќи дека очекува книгата на Лазарова – Трајковска да не биде читана само од новинарите, туку и од судиите и другите чинители во правосудството, но и од политичарите, пратениците, претставниците на граѓанските организации, како битен учебник за слободата на изразување, но и за борбата против говорот на омраза.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Ахмети: Меѓународна истрага и анкетна комисија во Собрание за случајот „Диво Насеље“


Скопје, 6 ноември, 2017 - 19:14 (META) 

Претседателот на Демократската унија за интеграција, Али Ахмети, на средба со францускиот амбасадор во земјава, Кристијан Тимоние, му кажал дека очекува за случајот „Диво Насеље“ да биде вклучена меѓународна истрага, да биде формирана анкетна комисија во Собранието и да има целосно расветлување на вистината.

Како што се наведува во соопштението на ДУИ, соговорниците разговарале за локалните избори, политичката ситуација, реформските процеси во Македонија, како и за евроатлантската интеграција на земјата.

„Во однос на реформите, Ахмети рече дека ДУИ останува посветена да ги води реформите во Собранието и во Владата, како услов за продолжување на реформскиот процес со истиот интензитет по завршувањето на изборите. Ахмети говореше и за интензивирање на напорите за надминување на споровите со соседите и за отворање на нашиот пат кон Брисел. Периодот пред нас припаѓа на спроведувањето на политиките кои се поддржани од граѓаните“, се вели во партиското соопштение.


Тимоние: Франција ги поддржува изградбата на правната држава и унитарноста на Македонија


Скопје, 15 јули, 2017 - 14:45 (META) 

Четвртина век како Франција е на страната на Македонците за да се зајакне државата и нејзината унитарност и ги придружува во изградбата на правната држава, што е услов кој важи за сите идни интеграции кон кои земјата легитимно се стреми, порача амбасадорот на Франција во Македонија, Кристијан Тимоние, на вчерашниот говор на свечениот прием на Националниот ден на Франција.

На приемот во Македонско село, Тимоние ги нагласи заложбите на Франција за спроведување на неопходните реформи во Македонија и за Европа, која ќе стане целосна кога ќе се приклучат земјите од Западен Балкан.

– Оваа година, францускиот празник е во знакот на споделената надеж која уште повеќе ќе нè обедини, надежта за европска иднина за која се изјаснија нашите два народa, со која им се дава нов патоказ, оној за спроведување на неопходните реформи, за изградба на простор за мир и за просперитет, колективна амбиција за она што треба да биде Европа. Европа, која нема да биде целосна, како што напиша нашиот претседател Макрон во писмото до претседателот Иванов, сè додека не се приклучат земјите од Западен Балкан. Тоа е огромната задача која ни престои на сите и поради која сè уште сме и ќе бидеме секогаш на ваша страна. Тоа не е само Европа на автопатишта и на тендери, на помош и на субвенции, туку Европа на заеднички вредности кои посакуваме да ги имаме сите, а кои ние Французите ги славиме денес заедно со Вас. Вредностите на нашата девиза: слобода, еднаквост, братство – рече, меѓу другото, францускиот амбасадор.

На приемот беа и премиерот Зоран Заев и претседателот на Собранието, Талат Џафери, како и министри, странски амбасадори, градоначалници и верски великодостојници.


Заев до Тимоние: Подготвени сме за брзо и ефикасно спроведување на реформите


Скопје, 7 јуни, 2017 - 15:26 (META) 

Премиерот Зоран Заев денеска со францускиот амбасадор Кристијан Тимоние разговарал за приоритетите на новата Влада, како и за отворањето на перспективите на Република Македонија кон Европската Унија и кон НАТО.

– Подготвени сме за брзо, квалитетно и ефикасно спроведување на клучните реформи што ќе обезбедат квалитетен живот за сите граѓани, а ќе ги осигураат и евроатлантските интеграции на Македонија – рече Заев.

Заев изразил очекување дека посветеноста на Владата кон реформите ќе биде охрабрување за сите граѓани, за бизнис-секторот во Македонија, за странските инвеститори да вложуваат во Македонија со своите капацитети и со своето знаење, со што ќе придонесат за развојот на економијата во Македонија.

– Стратешки определби на Република Македонија се Европската Унија и НАТО и јас, како премиер, и новата Влада сме подготвени да работиме посветено и темелно на европската агенда која ќе го отвори патот за развој Република Македонија – рече Заев.


Франција ќе ја одликува директорката на Академијата за судии и јавни обвинители


Скопје, 19 мај, 2017 - 17:54 (META) 

Амбасадорот на Франција во Македонија, Кристијан Тимоние, во име на претседателот на Република Франција, в понеделник ќе ја одликува директорката на Академијата за судии и јавни обвинители, Анета Арнаудовска со орден Витез на Националниот ред за заслуги, соопштија денеска од француската амбасада.

„Како директор на Академијата за судии и јавни обвинители, г-ѓата Арнаудовска постојано се залагаше во последните десет години за развој на соработката помеѓу Франција и Македонија во областа на обуката на судиите и на јавните обвинители, како клучна за зајакнување на владеењето на правото преку примена на европски стандарди од доменот на кривичното, на граѓанското право и на индивидуалните слободи. Со својата компетентност и непристрасност, г-ѓа Арнаудовска, поддржувајќи ја обуката на судиите и јавните обвинители преку постојана соработка со Националната школа за судии и јавни обвинители на Бордо, даде свој придонес за развојот на односите со Франција, како и за иднината на европската интеграција на земјата“, стои во соопштението.

Инаку, орденот за Национални заслуги на Франција, воспоставен во 1963 година од страна на генералот Жарл Де Гол, е едно од најпрестижните француски одликувања. Со него се наградуваат воени или цивилни лица, Французи или странци, коишто имаат особени заслуги за Република Франција. Одликувањето се доделува со указ на претседателот на Франција.


Ахмети – Тимоние: ВМРО-ДПМНЕ и СДСМ без одложување да најдат решение за кризата


Тетово, 20 април, 2017 - 15:57 (META) 

Лидерот на ДУИ, Али Ахмети, денеска во Тетово имал средба со амбасадорот на Франција во земјава, Кристијан Тимоние, на која, како што соопштуваат од партијата, било разговарано за политичката ситуација во Македонија, геополитичкитe околности и за можности за решавање на политичката и институционална криза.

Ахмети на средбата ги образложил „сите конструктивни чекори што ДУИ ги презела за излез од кризата, а во согланост со очекувањата на граѓаните и на меѓународната заедница“.

– ДУИ, како победничка партија на Албанците, даде поддршка на реформското парламентарно мнозинство за да се формира нова влада, која ќе ја спроведува агендата и однапред утврдената програма од страна на меѓународната заедница преку строго спроведување на реформите во судството, заокружување на Охридскиот рамковен договор и на евроатлантските интеграции – рекол Ахмети на средбата.

Тој го информирал Тимоние дека ДУИ продолжила со дополнителни напори за решавање на кризата и дека ги поканил двете македонски политички партии да се вклучат без одложување во наоѓањето решение заради остварување мир, стабилност и безбедност на граѓаните.

– Секое доцнење претставува можност за противниците на нашиот пат кон интеграцијата во НАТО и во Европската Унија да го прошират своето влијание и да го продлабочат јазот помеѓу граѓаните на нашата земја – нагласил Ахмети на средбата со Тимоние.


Заев – Тимоние: Потребно е да се покаже зрелост за државните интереси на Македонија


Скопје, 12 април, 2017 - 18:01 (META) 

Претседателот на СДСМ, Зоран Заев, денеска се сретнал со амбасадорот на Франција во Македонија, Кристијан Тимоние.

Од СДСМ информираат дека двајцата соговорници констатирале дека е неопходно стабилизирање на државата преку продолжување на демократските процеси во Македонија.

На средбата било оценето дека е потребно да се покаже зрелост за државните интереси на Македонија, а тоа се реформските процеси за квалитетен живот на сите граѓани и евроатлантски перспективи на Македонија.

– Никакви седнувања на заедничка маса од типот на Договор од Пржино 3, 4 и слично не се во интерес на потребниот развој на државата. Постои програма на новата реформска влада на унитарна Македонија, која е единствениот валиден документ за граѓаните и која гарантира просперитет за сите луѓе во Македонија и за државата. Груевски се обидува да се наметне како фактор, преку тоа што наметнува непостоечки теми, поттикнува провокации, но ние сме јасни, договор за амнестија нема. ВМРО-ДПМНЕ мора да прифати дека е опозиција. Следува формирање на новата реформска влада, воспоставување на правната држава и на независни институции – изјавил Заев на средбата со францускиот амбасадор Тимоние.


Политичката состојба во Македонија е како изгребана плоча, оцени Тимоние


Битола, 30 март, 2017 - 13:14 (META) 

Политичката состојба во Македонија во моментов наликува на изгребана плоча и не сакам да додадам уште една гребнатина на тоа што веќе е, изјави денеска во Битола францускиот амбасадор Кристијан Тимоние, каде учествуваше на форумот „Европските перспективи за локалната самоуправа“.

– Посакувам што побргу да се излезе од оваа состојба затоа што македонскиот граѓанин сака да види излез од оваа ситуација бидејќи светот не чека – рече Тимоние, одговарајќи на новинарско прашање.

Тимоние рече дека француската амбасада тесно соработува со Секретаријатот за европски прашања и дека Франција назначила технички експерт кој во рамките на СЕП помага како да се постигне поголема искористеност и пристап до ЕУ-фондовите.

– Но, за тоа е потребна влада што ќе ја спроведува потребната динамика, а административната празнина што постои во моментов, не ни помага во работата – истакна Тимоние.