!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: Мандатот на Заев е затруен плод на затруено дрво


Скопје, 18 мај, 2017 - 10:00 (META) 

Криминалецот Зоран Заев веќе нема простор од една страна да го лаже народот за заштита на националните интереси, а од друга да дава ветувања за реализација на тиранската платформа затоа што јавно се обврза дека ја отфрла платформата, велат од ВМРО-ДПМНЕ во нивното редовно утринско соопштение.

„Сега целата одговорност останува кај криминалецот Заев. Тој ќе мора да избере дали ќе ја отфрли двојазичноста на банкнотите, униформите и носењето резолуција за геноцид врз Албанците или ќе си го погази зборот и ќе тргне спротивно на ветувањата дадени пред сопствениот народ. Народот секогаш победува. Истрајноста и упорноста во барањата да се отфрлат туѓи платформи, дадоа плод. Доколку Заев одлучеше да се откаже од тиранската платформа уште кога му беше понудено од ВМРО-ДПМНЕ, Република Македонија немаше непотребно да биде заглавена во криза изминативе месеци“, велат од партијата.

Од ВМРО-ДПМНЕ велат дека мандатот на Зоран Заев е затруен плод на затруено дрво и дека неговото неодговорно и деструктивно однесување нема иднина.


ВМРО-ДПМНЕ: Внесување знаме на туѓа држава во кабинет на спикер е срамен чин


Скопје, 4 мај, 2017 - 9:50 (META) 

„Уценетиот криминалец Зоран Заев го газеше македонскиот Устав и ги прогласуваше македонските граѓани за терористи за да обезбеди поддршка и за да го внесе знамето на Република Албанија во кабинетот кој треба да му припадне на претседателот на Собранието“, се вели во редовното утринско соопштение на ВМРО-ДПМНЕ.

Во него се додава дека „уценетиот криминалец“ Зоран Заев го навредувал македонскиот народ дека му е валкан образот за да обезбеди поддршка да се пее албанската химна од собраниската говорница.

„Внесувањето на знамето на туѓа држава во кабинетот кој треба да му припадне на претседателот на Собранието е срамен и недостоен чин, но уште посрамен и понедостоен е молкот на уценетиот криминалец Заев кој не смее да му каже на Талат Џафери дека доколку не го отстрани знамето, СДС ќе побара негова смена“, се вели во соопштението.

Од ВМРО-ДПМНЕ велат дека СДСМ од гнев нарачува прогон на недолжни луѓе.

„Единствен грев на овие граѓани е тоа што си ја бранеа државата и националните интереси и се противеа на реализирањето на тиранската платформа. СДС треба кривично, морално и политички да одговара, а најважно да одговара и пред судот на народот од кој упорно бега“, се додава во соопштението.


ВМРО-ДПМНЕ: Тиранската платформа значи директно мешање во внатрешните работи


Скопје, 13 март, 2017 - 10:04 (META) 

„Меѓу тиранската платформа и државните и национални интереси на својот народ, аболираниот криминалец Зоран Заев ја одбра платформата. Тиранската платформа значи директно мешање во внатрешните работи на Македонија“, се вели во редовното утринско соопштение на ВМРО-ДПМНЕ.

Во него се додава дека „овојпат Заев ја продава цела Македонија, само за да ја засити својата патолошка желба за власт без поддршка од народот“.

– Зоран Заев, играјќи по нотите од Тирана, е подготвен да направи Влада со Зијадин Села, човекот кој јавно признава дека сака да ја смени македонската химна и македонското знаме и дека не постои македонски идентитет. Зоран Заев и СДСМ само да се доберат до власт, која изворно не им припаѓа, затоа што не победиле на изборите од 11 декември, мораат да прават секакви отстапки на штета на унитарноста на Македонија – се додава во соопштението.

Во него, исто така, се вели дека „Зоран Заев и СДСМ се подготвени на целосна двојазичност на државата, двојазични амблеми на војската и на полицијата, двојазични банкноти и монети, прогласување за геноцидни народи на: Турците, Србите, Бугарите, Хрватите, Словенците, Црногорците, Германците, Италијанците, како и прогласување за геноциден и својот сопствен народ“.

– Крајно време е Зоран Заев да покаже барем малку државност и чувство на припадност кон сопствениот народ, да смогне сили и да ѝ каже не на платформата од Тирана, да ја прифати понудата на ВМРО-ДПМНЕ со што ќе се обврзе да не ја реализира тиранската платформа. Доколку Зоран Заев до таа мера е импресиониран од платформата од Тирана, нека прифати парламентарни избори заедно со локалните избори во мај и нека излезе пред граѓаните со барањата од Тирана – се вели во соопштението.


Данев: Заев ќе прави отстапки за да се спаси од 9 години затвор


Скопје, 17 февруари, 2017 - 15:38 (META) 

Лидерот на СДСМ е подготвен на секакви отстапки само за да формира владина коалиција, оти во спротивно ќе заврши во затвор на 9 години поради земање поткуп и поради насилство кон претставници на највисоките државни органи, порача Драган Данев од ВМРО-ДПМНЕ на прес-конференција попладнево.

– Јасно е зошто Заев е подготвен на секакви отстапки и секакви пазарења. Заев знае дека ја нема поддршката од народот. Знае дека изгуби на изборите на 11 декември и дека народот се спротивстави на можноста аболицирани криминалци да ја водат државата. Затоа пред Заев се две можности или да се обиде по секоја цена, ветувајќи се и сешто да ја заобиколи волјата на народот и да дојде на власт или да се помири со фактот дека наредните години ќе ги помине во казнено-поправниот дом Идризово – рече Данев.


ВМРО-ДПМНЕ апелира притисоците и нападите врз судот да престанат


Скопје, 26 септември, 2016 - 14:36 (META) 

ВМРО-ДПМНЕ ги осудува обидите на аболираниот криминалец Зоран Заев, преку напади и закани врз судот да изврши притисоци и да ги заплаши судиите да одлучуваат во согласност со законот, се вели во реакцијата на ВМРО-ДПМНЕ по повод боењето на Кривичниот суд од страна на „Шарена револуција“.

„Срамниот ноќен вандалски чин на хулиганите од платеничката револуција на СДСМ и на Сорос е резултат на желбите на аболираниот криминалец Зоран Заев да бидат заплашени судиите кои треба да го судат за барањето поткуп и за случајот „Пуч“, порачувајќи им дека дивите орди кои се под негова команда ќе дејствуваат секогаш кога ќе биде донесена одлука што не е по негова волја“, се вели во соопштението на ВМРО-ДПМНЕ.

Од партијата на власт апелираат „притисоците и нападите врз судот да престанат, а членството на СДСМ да се дистанцира од неразумните чекори на аболираниот Зоран Заев“.


ВМРО-ДПМНЕ: Заев е главен статист во фарсата која ја играат со Катица Јанева


Скопје, 16 септември, 2016 - 16:40 (META) 

Аболираниот криминалец Зоран Заев повторно ја излажа јавноста. Претседателот на ВМРО-ДПМНЕ, Никола Груевски не добил покана да сведочи за предметот „Пуч“, така што изјавите дека тоа е причината за одложување на денешното рочиште се само уште една во низата манипулации.

Политичкото слепило и непознавањето на процедурите од страна на Зоран Заев и Катица Јанева добиваат драматични размери па и двајцата мислат дека се и обвинители и судии, реагираат од ВМРО-ДПМНЕ на денешните изјави на специјалната јавна обвинителка и на лидерот на опозицијата.

„Аболираниот криминалец Зоран Заев е човекот кој јавно ги погази македонските судови, изјавувајќи дека нема намера да ги почитува нивните наредби и одлуки. Истиот тој аболиран криминалец сега е главен статист во фарсата која што ја играат со Катица Јанева. Заев е комотен затоа што знае дека има заштита од Катица Јанева. Аболираниот криминалец Заев е комотен затоа што доби јавна благодарност од Соња Верушевска бидејќи Катица Јанева го ослободила од притвор Зоран Верушевски“, пишува во соопштението на ВМРО-ДПМНЕ.

Во соопштението се вели дека тоа се двојните аршини кои политички ги наметнува Катица Јанева.

„Благодарение на Катица Јанева, битолскиот градоначалник Владимир Талевски е трет месец во притвор, а аболираниот криминалец Зоран Заев на слобода“, реагираат од владејачката партија.