!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Јакимовски го повика ОЈО да го гони лицето што синоќа се закануваше пред штабот на ГРОМ


Скопје, 16 октомври, 2017 - 16:14 (META) 

Лидерот на ГРОМ, Стевчо Јакимовски, бара кривично да биде гонет напаѓачот што синоќа во штабот на партијата, на улицата Митрополит Теодосиј Гологанов, извадил лисици и нож и им се заканувал на присутните.

Јакимовски вели дека тоа што полицијата поднела прекршочна, а не кривична пријава против напаѓачот, покажува дека СДСМ го штити криминалот.

– Тие што дојдоа да се тепаат се хулигани, бивши затвореници и членови на подземјето. Како може СДСМ да не се огради и да не го осуди ваквиот настан? Уште помага делото да биде прекршочно, а не кривично. Ова кажува дека политиката и криминалот се заедно, дека СДСМ и криминалот се заедно и дека и понатаму ќе продолжат да вршат насилство – изјави Јакимовски, кој го повика Основното јавно обвинителство да реагира.

Тој потсети дека уште во 21.30 часот, по преброени 48 проценти од гласовите, излегол и го признал поразот и му го честитал изборот на новиот градоначалник на општина Карпош, додавајќи дека политичарите треба да се носат и со победата и со поразот.

Настанот е забележан и во денешниот полициски билтен, во кој се вели дека возило „мерцедес“ застанало пред штабот на ГРОМ, по што од автомобилот излегол С.Р. кој извадил нож и лисици, упатил закани на присутните и заминал со возилото.


СДСМ: Кривичната против Јанакиески е уште еден доказ за криминалот на ВМРО-ДПМНЕ


Скопје, 7 септември, 2017 - 13:07 (META) 

Испливува на површина криминалот на функционерите на ВМРО-ДПМНЕ, а последен доказ за тоа е кривичната пријава против поранешниот министер за транспорт и врски и близок соработник на Никола Груевски, Миле Јанакиески, велат од СДСМ.

„Со кривичната пријава против Јанакиески, пресудите против градоначалниците од ВМРО-ДПМНЕ, Марјан Ристески и Александар Панов, како и со кривичните пријави и обвиненија против Христијан Делев и Владимир Талески, на површина испливуваат криминалите на соработниците на Груевски“, стои во соопштението на СДСМ.

Од владејачката партија додаваат дека овие случаи се доказ дека „криминалното работење“ на ВМРО-ДПМНЕ било присутно на секое ниво и дека затоа биле блокадите во Собранието околу разрешувањето на Марко Зврлевски од функцијата државен јавен обвинител.

„Залудни беа обидите на ВМРО-ДПМНЕ да го заштитат Зврлевски и со тоа да се спасат од одговорноста. Залудни ќе бидат и обидите да ги спречат реформите во судството што носат независен и професионален судски систем и правда за сите“, порачуваат од СДСМ.


СДСМ: Апсурдните интерпелации нема да го сокријат криминалот на ВМРО-ДПМНЕ


Скопје, 12 август, 2017 - 16:12 (META) 

Со неоснованите, неиздржани и апсурдни иницијативи за интерпелации, ВМРО-ДПМНЕ продолжува очајнички да се обидува да ги закочи реформите и проектите за кои што гласаа мнозинството граѓани, се вели во реакцијата на СДСМ по интерпелацијата што пратенциите на ВМРО-ДПМНЕ денеска ја поднесоа за министерот за култура Роберт Алаѓозовски.

„Поднесената интерпелација за министерот за култура Роберт Алаѓозовски само докажува дека ВМРО-ДПМНЕ не се грижи ниту за културата, ниту за граѓаните, туку единствено се грижи да го сокрие деценискиот криминал што раководството на таа партија го правеше, особено со проектот ‘Скопје 2014’“, стои во соопштението на СДСМ.

Оттаму додаваат дека ВМРО-ДПМНЕ 11 години ја „партизираше културата и потроши над 600 милиони евра народни пари на сомнителни тендери за проектот „Скопје 2014“, додека вистинското културно наследство беше намерно оставано да скапува и да се распаѓа“.

„Наместо криминалниот и злосторнички пристап кон културата што ВМРО-ДПМНЕ го практикуваше со години, министерот за култура и министерството воведуваат нови, ефикасни и инклузивни политики и проекти во културата што носат напредок и заштита на културната дејност“, велат од СДСМ.


ВМРО-ДПМНЕ: СДСМ нема фатено дрога не затоа што ја нема, туку зашто е во коалиција со криминалот


Скопје, 11 август, 2017 - 12:27 (META) 

МВР под водство на СДС и на неспособниот Оливер Спасовски нема фатено ни грам дрога, не затоа што ја нема, туку затоа што СДС е во коалиција со криминалот, обвини Сашо Павлоски од ВМРО-ДПМНЕ на прес-конференција денеска.

Тој додаде дека приоритет за СДСМ и за Оливер Спасовски било да се пресметаат со сите полициски службеници кои професионално воделе истраги за нарко-дилерите што одработувале за Заев на минатите избори.

– За неполни три месеци од доаѓањето на власт, СДС направи целосен хаос и партизација во министерството за внатрешни работи. За неполни три месеци Оливер Спасовски подели 500 решенија, унапредувајќи партиски послушници по четири-пет скалила, што е спротивно на системот на кариера и на Законот за внатрешни работи. Сведоци сме дека и во минатото, кога СДС беше на власт, наместо структурни реформи во полицијата и унапредување на ефикасноста на министерството, наместо откривање и неутрализирање на криминални групи, се случуваше токму спротивното – изјави Павлоски.

Тој додаде СДСМ ја препушта безбедноста на граѓаните во раце на неспособни и на непрофесионални кадри, кои имаат цел да го штитат криминалот на луѓето блиски до врвот.


ВМРО-ДПМНЕ: Нема да дозволиме СДС да ја претвори државата во Северна Кореја


Скопје, 14 јули, 2017 - 10:32 (META) 

Поминаа 20 дена од објавувањето на скандалозната снимка на која се гледа како пратеникот од СДС, Курто Дудуш, ветува амнестија за сторен криминал за граѓани што поседуваат членска книшка од СДС, а сè уште нема реакција и осуда од партијата на власт, се вели во утринското соопштение на ВМРО-ДПМНЕ.

„Зоран Заев пред изборите со полна уста зборуваше за еднаквост помеѓу граѓаните, а сега гледаме дека под режимот на Заев некои ќе бидат поеднакви од другите. Скандал од невидени размери и срам за целиот демократски свет е пратеник од владејачка партија да ветува неказнивост при сторен прекршок или криминал, привилегии на лекар и добивање социјална помош за граѓаните кои поседуваат членска книшка на политичка партија“, стои во соопштението.

Од опозициската партија велат дека нема да дозволат Македонија од „демократската држава да се претвори во приватна сопственост на СДС“.

„ВМРО-ДПМНЕ ги повикува сите општествени чинители и меѓународните претставници во Република Македонија да го осудат овој чин на партизација на државата. Македонија е демократска држава, каде владеењето на правото е основен постулат врз кој се засноваат односите помеѓу граѓаните и државата и никако поинаку не смее да биде. Граѓаните заслужуваат еднакви можности за живот и за успех. ВМРО-ДПМНЕ нема да дозволи СДС да ја претвори државата во Северна Кореја“, порачуваат од ВМРО-ДПМНЕ.


ВМРО-ДПМНЕ: Со запирањето на изградбата на автопатиштата, СДС подготвува криминал


Охрид, 3 јули, 2017 - 14:57 (META) 

Запирањето на изградбата на автопатиштата од страна на владата на СДС отвора сериозен сомнеж дека се подготвува криминал, изјави денеска Снежана Стефановска од окружниот комитет на ВМРО-ДПМНЕ од Охрид.

– Имено, штом првата одлука на министерот за транспорт е запирање на изградба за која се обезбедени пари, многу јасно е дека борбата е некои други фирми, блиски до СДС, надвор од законите да го добијат милионскиот бизнис. Токму затоа министерот Сугаревски и владата се служат со комплетни лаги, но и лагата им се распрснува како меур од сапуница. Тие посочија дека биле направени грешка во проектирање, а проектот е изработен и поради недостиг од капацитети и способност оставен како нереализиран за време на мандатот на владата на СДС 2002 до 2006 година. На крај, пред да почне градбата и откако владата на ВМРО-ДПМНЕ обезбеди средства, ревизијата го одобри изработениот проект. Совршено е јасно дека СДС е фатен во офсајд и зад прекинот се крие неспособноста на СДС да го реализира конкретниот проект и нивната одлучност да прават криминал од понатамошната негова реализација – вели Стефановска.

Стефановска порача дека кога ќе дојде ВМРО-ДПМНЕ на власт, ќе продолжи со градбата на автопатишта и ќе го догради автопатот кој, како што рече, СДСМ сега го блокира.


Села: Јасно е кои се нарачателите на насилствата, треба да одговараат пред правдата


Скопје, 25 мај, 2017 - 17:26 (META) 

„Мислам дека нема потреба од многу докази, се беше јасно и се случуваше пред очите на јавноста. Сите тие кои си земаа за право и влегоа во Собранието, треба да одговараат пред органите на правдата ако сакаме да имаме правна држава,“ изјави претседателот на Движење за реформи на ДПА (ДР-ДПА), Зијадин Села, откако даде исказ во Основно јавно обвинителство за настаните на 27 април во Собранието, кога тој, најтешко беше повреден од сите пратеници.

Села додаде дека „уште еднаш е јасно кои се нарачателите, бидејќи не се срамат и уште ги поддржуваат таквите односи и дејствија кои сите ги видовме во Собранието.“

„Тие се претседатели на партии и луѓе кои треба да одговараат пред органите на правдата и кои се подготвени на се, за да избегнат да не одговараат пред правдата за злоделата, за криминалот, за корупцијата која ја направиле овие десет години. Уште еднаш покажаа дека институцијата пратеник за нив не е ни малку важна, со наредбата која ја дадоа и одлуката на судот за условно казнување на неколку лица кои беа вклучени во случувањата на 27 април,“ додаде Села.


ВМРО-ДПМНЕ: СДС со години ги оштетува граѓаните и се богати на нивниот грб


Скопје, 24 мај, 2017 - 10:21 (META) 

Криминалното раководство на СДС со години ги оштетува граѓаните на Република Македонија и се богати на нивен грб, се вели во редовното утринско соопштение од ВМРО-ДПМНЕ.

„СДС е политичка партија која својот централен штаб го има добиено во наследство од поранешната СКМ, за чија наследничка се прогласија и со тоа ги изиграа законите стекнувајќи се со имот од 3.583 метри квадратни, во центарот на Скопје. Централното седиште на партијата како објект на државата од претходниот систем им припаѓа на сите граѓани на Република Македонија, а не на СДС. СДС секогаш била насочена кон црпење на што е можно повеќе ресурси за богатење на партијата и тесното раководство во врвот“, велат од партијата.

Од ВМРО-ДПМНЕ велат дека народот тоа го видел со приватизацијата, со „бонбона бизнисите“, и сега со прифаќањето на Tиранската Платформа.


ВМРО-ДПМНЕ: Зоран Заев и СДС се во спрега со криминално-мафијашките структури


Скопје, 12 мај, 2017 - 9:50 (META) 

„Зоран Заев и СДС се во спрега со криминално-мафијашките структури од Македонија и од регионот,“ се вели во редовното утринско соопштение на ВМРО-ДПМНЕ.

Од партијата додаваат дека медиумите неколкупати објавиле фотографии на Зоран Заев и на други високи функционери на СДС со наркодилери и со други криминалци.

„Шпетин Положани, претседател на здружението на албански политички затвореници во Македонија, во интервју за телевизија „Шења“ кажа: „Имам евидентирано неколку случаи каде на албански семејства, СДСМ им има ветено дека ако гласаат за нив, ќе ги ослободи од различни кривични пријави, дека ќе им дадат некакви си привилегии, ако дојдат на власт“. Положани објаснува дека СДС извршил огромна манипулација кај нашите сограѓани од албанско етничко потекло“, се додава во соопштението.


Јанева: ВМРО-ДПМНЕ преку криминал и уцени останувала на власт од лукративни причини


Скопје, 11 мај, 2017 - 13:41 (META) 

Во последните 10 години, владејачката партија го злоупотребила избирачкиот процес од лукративни мотиви за да остане на власт, вели специјалната јавна обвинителка Катица Јанева во интервју за „Дојче веле“.

– Моралните вредности во македонското општество се изместени. Тоа го видовме со самиот начин на владеење во последните 10 години и го слушнавме и од јавно објавените, а го слушаме и од необјавените (прислушувани, н.з.) разговори. Најважно е тоа што бил злоупотребен избирачкиот процес од лукративни мотиви за самата владејачка партија да остане на власт. Со криминални дејства ги уценувале финансиерите и правните лица за да добијат финансиски средства за да продолжат да бидат на власт – вели Јанева.

На прашањето дали очекува дека поранешниот премиер Никола Груевски ќе биде обвинет пред суд, Јанева вели дека се надева дека тоа ќе биде така.

– Ние мораме да ги поднесеме нашите обвиненија за кои имаме докази, но сепак останува одлуката на судот да донесе осудителна или ослободителна пресуда. Ние сме само обвинители, нашата работа е само да собереме докази за одредени криминални дејства на одредени личности и да докажеме дека сите се еднакви пред законите во Македонија – додаде Јанева.

Специјална обвинителка е убедена дека СЈО како институција ќе продолжи со својата работа сè додека не ја заврши својата мисија, односно додека не ги истражи сите снимки.