Кремљ внимателно ја следи ситуацијата во Македонија, вели портпаролот на Путин


Москва, 1 октомври, 2018 - 13:29 (META) 

Кремљ внимателно ја следи ситуацијата во Република Македонија по вчера одржаниот референдум за промена на името и членството на земјата во НАТО и ЕУ, изјави денеска Дмитриј Песков, портпаролот на рускиот претседател Владимир Путин.

– Ние сметаме дека безусловно сите процеси треба да останат во рамките на владеењето на правото и почитување на законите – рече Песков во изјава за медиумите во Москва, пренесува ТАСС.


Кремљ ја оцени одлуката на САД за „Раша тудеј“ како непријателски чекор


Москва, 30 ноември, 2017 - 18:58 (META) 

Одлуката на Вашингтон да ги повлече акредитациите на новинарите на руската агенција „Раша тудеј“ за пристап во Конгресот на САД, поради нејзиниот статус на „странски агент“, е непријателски чекор, соопшти денеска Кремљ.

Портпаролот на Кремљ, Дмитриј Песков, изјави дека Москва е длабоко разочарана од ваквата одлука на Вашингтон и додаде дека рускиот парламент може „емотивно да одговори“ на новите рестрикции во САД кон оваа руска медиумска куќа.

„Раша тудеј“ синоќа објави писмо од извршната Комисија за радиска и телевизиска галерија на дописници во Конгресот, во кое се наведува дека се повлечени акредитациите поради прогласување на телевизијата „Раша тудеј“ за „странски агент“.

Одлуката да ја прогласат „Раша тудеј“ за „странски агент“, според Вашингтон, е одговор на обидите на Русија да се вмеша во претседателските избори во САД минатата година, обвинувања кои Москва повеќепати ги негираше.

Како контрамерка, Русија донесе закон кој овозможува американските и другите странски медиуми официјално да бидат прогласени за „странски агенти“.


Лидерите на ЕУ го поддржаа новото примирје во Украина, соопшти Кремљ


Москва, 23 август, 2017 - 10:30 (META) 

Лидерите на Русија, Украина, Германија и Франција го поддржаа новото примирје на истокот на Украина, кое би требало да стапи на сила на 1 септември, соопшти Кремљ.

„Лидерите ја поддржаа одлуката на Контакт групата за воведување ново примирје од 1 септември, кога почнува школската година“, стои во соопштението на Кремљ издадено по телефонскиот разговор на германската канцеларка, Ангела Меркел и претседателите на Русија, Владимир Путин, на Украина, Петро Порошенко и на Франција, Емануел Макрон.

Властите во Киев исто така соопштија дека за време на разговорот е поддржано воведувањето на новото примирје и додадоа дека е неопходна натамошна примена на мировниот договор од Минск од 2015 година.

Судирите на истокот на Украина избија во април 2014 година, откако во февруари беше соборен од власт претседателот Виктор Јануковиќ. Жителите на овој дел од Украина на референдум се изјаснија за отцепување и приклучување кон Русија, по што судирите се засилија. Во немирите настрадаа повеќе од 10.000 луѓе, а во февруари 2015 година е потпишан мировен договор кој подразбира прекин на огнот, повлекување на оружјето од првите линии на фронтот и спроведување уставни реформи.


Путин и Трамп ќе имаат телефонски разговор денеска попладне


Вашингтон/Москва, 2 мај, 2017 - 10:54 (META) 

Портпаролот на Кремљ, Дмитриј Песков, потврдил дека рускиот претседател Владимир Путин за денеска попладне планира телефонски да разговара со својот американски колега, Доналд Трамп, јавуваат светските агенции.

„Го потврдуваме разговорот“, рекол Песков за порталот „Спутник“, откако Белата куќа го објави денешниот дневен распоред, кој почнува со разговор на Трамп со Путин, во 14.20 часот по средноевропско време.

Ова, како што јавуваат агенциите, ќе биде трет разговор помеѓу двајцата претседатели, по инаугурацијата на Трамп, во средината на јануари годинава.

Првиот беше одржан во јануари, а двајцата лидери развораа за борбата против тероризмот, конфликтот во Сирија и за ситуацијата во Украина и разменија мислења за главните прашања околу билатералните односи помеѓу САД и Русија.

Вториот разговор беше одржан на почетокот на април, по терористичкиот напад во Санкт Петерсбург.


Западните санкции кон Русија нема наскоро да бидат укинати, смета Медведев


Москва, 22 јануари, 2017 - 16:39 (META) 

Русија не би требало да се залажува дека западните санкции кон земјата наскоро ќе бидат укинати, изјавил денеска рускиот премиер Дмитриј Медведев, јавуваат светските агенции.

„Очигледно е дека сето ова ќе трае уште долго. Да не се потпираме на нечиј избор, на нови странски лидери“, рекол Медведев на состанокот на владејачката партија Единствена Русија.

Коментирајќи го неодамнешното интервју на новиот претседател на САД, Доналд Трамп, за лондонски „Тајмс“, во кое, меѓу другото, тој вели дека би можел да им стави крај на санкциите кон Русија во замена за договор за намалување на нуклеарното оружје, портпаролот на Кремљ, Дмитриј Песков, вчера изјави дека тие две прашања е тешко да се поврзат.


Кремљ ги отфрла обвинувањата на МИ5 за зголемување на агресивноста на Русија


Москва, 1 ноември, 2016 - 15:05 (META) 

Кремљ денеска ги отфрли обвиненијата на шефот на разузнавачката служба на Велика Британија, МИ5, Ендрју Паркер, дека Русија изведува сè повеќе кибернетички напади и користи други агресивни методи кои претставуваат сè поголема закана за Европа.

Портпаролот на Кремљ, Дмитриј Песков, рече дека обвиненијата на Паркер не одговараат на реалноста.

Тој додаде дека сè додека некој не понуди докази за изјавите, тие ќе се сметат за неточни и за неосновани.

Endrju ParkerШефот на британската разузнавачка служба МИ5, Паркер, за весникот „Гардијан“ вчера изјави дека Русија користи цел спектар државни органи и разузнавачки елементи за својата надворешна политика да ја спроведува на сè поагресивен начин и тоа да вклучува пропаганда, шпионажа, субверзии и кибернетички напади.

Паркер рече дека Русија сè поинтензивно се обидува да се дефинира себеси како опозиција на Западот и прави сè да изгледа така.

Како што рече првиот човек на МИ5, докази за тоа се гледаат во активностите на Русија во Украина и во Сирија. Тој додаде дека Русија, исто така, спроведува активности од голем обем кои засега не претставуваат кибернетички закани.


Путин и Меј ќе ги затоплуваат односите во четири очи


Москва, 10 август, 2016 - 10:36 (META) 

Претседаателот на Русија Владимир Путин и премиерката на Велика Британија, Тереза Меј во телефонски разговор изразија незадоволство од сегашната состојба на руско-британските односи, соопшти Кремљ.

Во соопштението се наведува дека двете страни се сложиле за зајакнување на соработката на голм број прашања, вклучувајќи го и подобрувањето на дијалогот меѓу разузнавачките служби на двете земји околу осигурување на безбедноста во авионскиот сообраќај.

„Путин и Меј планираат да одржат состанок очи во очи во блиска иднина“ соопшти Кремљ и додаде дека телефонскиот разговор е направен на иницијатива на Британија.


Москва: „Ататурк“ се случи затоа што нè игнорираа


Москва, 6 јули, 2016 - 13:18 (META) 

Официјален Кремљ наведува дека неодамнешниот напад на аеродромот „Ататурк“ во Истанбул се случил како последица на тоа што турските и европските служби го игнорирале предупредувањето на Москва.

– Во текот на изминатите години, руската страна ги информираше своите турски и европски колеги дека лицата за кои се сомнева дека се поврзани со тероризам, нашле засолниште како во Турција така и во некои европски земји. Во поголемиот дел од случаите на сигналите од руска страна не е посветено соодветно внимание. На наша жалост, нападот во Истанбул би можел да биде последица на тоа невнимание – изјави портпаролот на Кремељ, Димитриј Песков, на прес-конференција во Москва.

Тројца напаѓачи вооружени со огнено оружје и со појаси со експлозив на 28 јуни извршија терористички напад на истанбулскиот аеродром, при што беа убиени 45 лица, вклучувајќи и 19 странци.

Сè уште никој не ја презеде одговорноста за нападот, но турски официјални лица веруваат дека тоа е дело на Исламска држава.


Кремљ: Не навиваме ниту за Трамп ниту за другите


Москва, 3 јуни, 2016 - 15:06 (META) 

Москва не се меша во внатрешните прашања на САД и нема да ја слави победата на ниту еден од кандидатите на претседателските избори, изјави портпаролот на Кремљ, Дмитриј Песков.

По повод изјавата на кандидатката на Демократската партија, Хилари Клинтон, дека ако победи републиканецот Доналд Трамп, ќе биде празник во Кремљ, Песков запраша зошто тоа би било празник.

– Навистина не го разбирам прашањето, така што нема што да одговорам – рече Песков, кој додаде дека Русија не се меша во внатрешните прашања на другите земји и дека најдобар кандидат е тој што ќе добие најмногу гласови, без разлика на чудните особини на изборниот систем во САД.

– Дозволете ми да ве потсетам на основниот став на претседателот Владимир Путин по ова прашање. Русија има една особина по која се разликува од многу земји: никогаш не се мешаме во внатрешните прашања на другите земји – рече Песков.

 


Русија не сака да се врати во Г8


Москва, 19 април, 2016 - 13:38 (META) 

Русија нема да се врати во Г8, без разлика на повиците на некои западни политичари, порача Кремљ, додавајќи дека таквиот политички формат е надживеан.

Министерството за надворешни работи на Руската Федерација смета дека на големата осумка на развиени земји „не ѝ е потребно враќање во живот“.

Поради тоа Русија не планира да исполнува никакви барања на Г7, односно на остатокот од големата осумка, која по случувањата во Украина го замрзна членството на Русија.

Германската канцеларка, Ангела Меркел, минатата година нагласи дека учеството на Русија на самитот Г7 е незамисливо.

Истовремено, министерот за надворешни работи на Германија, Франк Валтер Штајмаер, повеќепати се заложи за враќање на Русија во големата осумк, нагласувајќи дека на Западот му е потребен ангажманот на Москва за да се решат судирите во Сирија и во Ирак.

Тој, исто така, наведе дека Русија треба да „преземе чекори кои би довеле до отворање пат за преговарачки формат Г8“.

Портпаролката на руското МНР, Марија Захарова, порача дека обидите да се натера Русија да „плати некои сметки“ за обнова на големата осумка се апсолутно неосновани.