!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Царовска: Нема да има кратење на пензиите, годишно ќе се зголемат за 2.160 денари


Скопје, 18 август, 2017 - 14:06 (META) 

Секој пензионер, согласно законот за пензии и членот од законот за усогласување со порастот на трошоци за живот и порастот на плати, ќе добива по 180 денари секој месец, од јануари до декември, или за 2017 година ќе добие вкупно 2.160 денари, изјави денеска на прес-конференција министерката за труд и социјална политика, Мила Царовска.

Таа рече дека ова право на пензионерите нема да им биде скратено.

– Во 2016 година пензионерите едонкратно добија 630 денари зашто усогласувањата кои се правеа двапати годишно, ВМРО-ДПМНЕ ги скрати. На крајот на секоја година ќе ја процениме кондицијата на буџетот и ќе обезбедиме дополнително зголемување на пензиите ако тоа го дозволува државната каса – рече Царовска.


Интерпелација и за Тевдовски оти бил „министер за кратење и за задолжување“


Скопје, 10 август, 2017 - 14:18 (META) 

Пратениците на ВМРО-ДПМНЕ денеска до Собранието ќе поднесат интерпелација за работата на министерот за финансии, Драган Тевдовски, изјави пратеничката Лилјана Кузмановска.

Како главни причина за интерпелацијата се наведуваат „целосно неразвојниот ребаланс на буџетот за значителното намалување на капиталните расходи, засилено и неосновано задолжување на граѓаните на домашниот пазар, зголемување на износот предвиден за задолжување на меѓународните финансиски пазари, непочитување на народните претставници во Собранието и манипулирање со економски податоци, параметри и индикатори“.

Кузмановска вели дека министерот за финансии е „министер за кратење и за задолжување“.

– Поради демонстрираното незнаење и неспособност да ја извршува оваа фукција, сметаме дека е потребно што поскоро Драган Тевдовски да заминине од функцијата – изјави Кузмановска.

Досега, пратениците на ВМРО-ДПМНЕ поднесоа интерпелации и за министерот за земјоделство, шумарство и водостопанство, Љупчо Николовски, министерката за труд и социјална политика, Мила Царовска, и за министерот за надворешни работи, Никола Димитров.


СДСМ скрати цели 213 милиони денари наменети за образованието, велат од ВМРО-ДПМНЕ


Скопје, 19 јули, 2017 - 15:34 (META) 

„СДС скрати цели 213 милиони денари наменети за универзитетите и за факултетите во земјава, а ветуваше подобри услови во високото образование“, изјави денеска на прес-конференција Јован Јаулески, член на извршниот комитет на Унијата на млади сили на ВМРО-ДПМНЕ.

Тој додаде дека во текот на изборите се ветувало квалитетно високо образование и подобри услови за студирање, а сега „се блокираат инфраструктурни проекти, се укинуваат мерки и се кратат финансии за образованието.“

– СДС скрати цели 30 проценти од буџетот за Универзитетот во Охрид. СДС крати и 50 проценти од парите наменети за ФИНКИ. Ниту универзитетите „Св. Кирил и Методиј“ и „Гоце Делчев“ не останаа имуни на негрижата од страна на СДС – додаде Јаулески.


Владата смета дека кратењето на ИПА-фондовите не е санкција од ЕУ


Скопје, 2 јули, 2016 - 17:14 (META) 

Откако Европската комисија официјално потврди дека ќе се скратат 27,1 милион евра од ИПА-фондовите за Македонија, од Владата соопштија дека не станува збор за санкции, туку за намалување на програмските средства.

– Има два аспекти, внатрешен и надворешен. Внатрешниот е поврзан со фактот дека повеќе од една година се очекуваше спроведувањето избори. Во тој период институциите беа политички хендикепирани преку блокирачки механизми во неколку клучни министерства, вклучително и Министерството за финансии – се вели во соопштението на Владата.

Оттаму додаваат дека најголемата опозициска партија фокусот го ставила на блокирање на институциите и на правење што поголема штета за државата.

– Надворешниот фактор, пак, е поврзан со искуствата на Европската комисија со претходните процеси на проширување, поради што со новите инструменти се предвидени повеќе рестрикции кои ги ограничуваат обемот и областите на прилив на европски фондови – велат од Владата.

Партијата на власт ВМРО-ДПМНЕ соопшти дека „политичката криза во која Зоран Заев ја турна Македонија, придонесува за одлуки кои се на штета на граѓаните“.

– Тоа е целта на тие што посакуваат проблеми во Македонија, а бегаат од демократско соочување со народот на избори – се вели во соопштението на ВМРО-ДПМНЕ.


Коцијанчич: Обврските се неисполнети, ЕУ ја крати финансиската помош за Македонија


Брисел, 2 јули, 2016 - 14:30 (META) 

Влошениот политички амбиент е една од причините зошто Владата и администрацијата не беа во можност или немаа волја да ги исполнат обврските за реформа или да ја покажат потребната подготвеност да ги планираат потребните реформи и да ги имплементираат фондовите на ЕУ, одговори портпаролката на Европската комисија, Маја Коцијанчич, на прашањето на „Мета“ зошто Европската комисија скрати 27 милиони евра од ИПА-фондовите.

Таа потврди дека кратењето на финансиската помош за Македонија ќе изнесува и повеќе од 27 милиони евра.

– Последните неколку години, а особено минатата година, Европската комисија неколкупати ја објасни својата загриженост до надлежните органи во врска со недостигот од подготвеност, зрелост во планирање во клучните сектори, како и со недостигот од политичка посветеност за реализација на потребните секторски и општи реформи. Како резултат на тоа, Комисијата мораше да ја намали финансиската помош на ЕУ за 2016 година, како и да одлучи да не продолжи со уште еден проект – додаде Коцијанчич.

Портпаролката на Европската комисија, исто така, смета дека државата треба да се фокусира на мерки кои ќе обезбедат одржливост на големи инвестиции во инфраструктурата.

– Има многу недостатоци во транспортниот сектор, кои спречија правилно планирање и координација во тој сектор – вели Коцијанчич.


Поцков: Со ребалансот скратени 15 милиони евра за земјоделски субвенции


Скопје, 30 јуни, 2016 - 14:04 (META) 

„Со последниот ребаланс, буџетот на Агенцијата за финансиска поддршка на земјоделството и на руралниот развој е намален за 912 милиони денари. Тоа се 15 милиона евра помалку пари за субвенции за земјоделците“, изјави пратеникот на СДСМ, Сашко Поцков.

Тој потсетува дека во последните пет години на земјоделците им се скратени повеќе од 140 милиони евра за субвенции.

– Годинава се кратат многу пари за земјоделците, кога коси болеста јазлеста кожа и на повидок е млечна криза. Се кратат пари за земјоделците кога раноградинарските култури се откупуваат по багателно ниски цени, кога 75 проценти од оризот сè уште е непродаден. Земјоделците треба да знаат дека се кратат пари за нив во услови кога со ребалансираниот буџет долгот на државата и на сите граѓани ќе се зголеми од 309 милиони евра на 344 милиони евра – изјави Поцков.