Теодоракис: Следната недела е клучна дали ќе се реши или нема проблемот со името


Атина, 3 април, 2018 - 9:56 (META) 

Лидерот на грчката партија Река, Ставрос Теодоракис, кој е еден од политичарите со кои Никос Коѕиас имаше средби за да ги информира за текот на преговорите во Виена, по средбата изјави дека „следната недела ќе биде клучна дали ќе се реши или нема да се реши проблемот со името“.

Шефот на грчката дипломатија Коѕиас по разговорите во Виена со македонскиот колега Никола Димитров и со медијаторот Метју Нимиц, одржува серија средби со лидерите на грчките политички партии.

– Коѕиас ме информираше детално, а се надевам и искрено. Си ги кажавме нашите познати ставови. Мислам дека следната недела ќе биде клучна дали прашањето за името ќе се реши или нема да се реши – изјави кусо по средбата Теодоракис.

Денес Коѕиас треба да има уште две средби со лидерката на ПАСОК и на Движењето за промени, Фофи Јенимата и со претседателот на Унијата на центристите, Василис Левендис, додека лидерот на конзервативната Нова Демократија, Кирјакос Мицитакис, одби да се сретне со него и бара за текот на преговорите да биде информиран лично од премиерот Алексис Ципрас.


Атина: Изјавата на Димитров фрла сенка врз преговорите и посетата на Коѕиас


Атина, 19 март, 2018 - 12:02 (META) 

Изјавата на министерот за надворешни работи Никола Димитров кој наводно, при контактитe со европски колеги рекол дека некои грчки ставови за името се „блиску до апсурдни“ го намалија оптимизмот во Атина за брз исход од преговорите.

Оваа изјава грчките медиуми ја припишуваат на „добро информирани дипломатски извори“ и сметаат дека ќе фрли сенка, или како што вели „Катимерини“, „облаци на хоризонтот“ врз преговорите.

Оваа игра топло–ладно во рамките на генералната полуинформираност или клишеата за состојбата во Македонија, се толкува и по малку комично, па, на пример,  се вели дека изјавата на Димкитров не треба да се гледа изолирано од улогата што тој ја игра во владата на Зоран Заев, „иако тој доаѓа од националистичката ВМРО-ДПМНЕ и неговите позиции се далеку од тие на Никола Груевски, сепак се различни и од оние на Заев“.

Во Атина се смета дека сега, по настаните околу  усвојувањето на Законот за употреба на јазиците, атмосферата во Скопје е „особено тензична“, и симлифицирано се прикажува со сликата дека “Владата на Заев успеала да го донесе законот, но не успеала тоа да го стори зна начин кој е во согласност со парактиката на парламентите на европските држави, како и дека улогата на Груевски била негативна“.

 


Коѕиас ѝ го претставил подновениот договор на владата, следната недела слетува во Скопје


Атина, 8 март, 2018 - 10:51 (META) 

Според грчките медиуми, шефот на дипломатијата Коѕиас, на вонредна владина седница ја преставил грчката верзија на нацрт-договорот околу проблемот со името, во кој наводно, се додаден и нови елементи.

Според последните информации, можно е Коѕиас со документот да допатува во Скопје кон средината на следната недела.

За сега, наспроти минатите искуства, содржината на договорот, се држи во тајност и далеку од медиумите.

Грчката страна по секоај цена сака да одбегне содржината на документот да протече и „дипломатските консултации да ги врши преку насловните страници на весниците“.

Премиерот Алексис Ципрас во последно време води политички битки на многу полиња, а оваа околу името е една од најсериозните.

Ципрас и покрај тоа тврди дека е решителен да го затвори проблемот, вели весникот „ИЕфимерида“.

Се очекува Коѕиас договорот прво да му го презентира на неговиот македонски колега, Никола Димитров.

Главната пречка, сепак, според Атина, е нивното инсистирање на промената на уставот, за што засега нема согласност од македонска страна.


Атина била „вознемирена“ од тајмингот на посетата на Заев на Анкара


Атина, 14 февруари, 2018 - 11:57 (META) 

Грчката влада не крие дека е вознемирена оти премиерот Зоран Заев „побрзал“ да ја посети Анкара и „да побара јавна поддршка од Турција“. Во Атина сметаат дека овој потег ја отвора вратата за поголема улога на Турција на Балканот, особено во овој период кога грчко-турските односи пак се во криза, овој пат околу островите Имиа, пишува грчкиот весник „Иефимерида“.

Премиерот Заев, пред посетата на Анкара, на новинарско прашање, одговори дека таа била планирана од поодамна.

Според весникот, сите индикации се дека се преговара околу името „Горна Македонија“ и дека терминот „Македонија“ дефинитивно останува во името.

Коѕиас и Димитров утре и задутре во Софија ќе се сретнат и на маргините на неформалната средба на шефовите на дипломатиите на земјите од ЕУ и државите кандидати за членство.

Министрите за надворешни работи се согласија да ги продолжат напорите под покровителство на ОН, соопшти македонското Министерство за надворешни работи, известувајќи за вчерашната средба на личниот пратеник на Генералниот секретар на ОН, Метју Нимиц со министрите за надворешни работи на Македонија и Грција.

„По конструктивната средба која е дел од напорите за наоѓање на заедничко прифатливо решение за надминување на разликата околу името, министрите за надворешни работи се согласија да ги продолжат напорите под покровителство на ОН“, се вели во соопштението на грчкото и македонското МНР по вчерашните маратонски разговори во присуство на Нимиц во Виена.


Димитров: Идентитетските прашања ќе останат надвор од процесот на преговори


Скопје, 2 октомври, 2017 - 15:34 (META) 

Министерот за надворешни работи на Република Македонија, Никола Димитров, денеска ги негираше информациите дека во преговорите со Грција се разговара и за идентитетот.

– Преговорите не се почнати, во моментов ги исцртуваме контурите на кое ниво, во каков формат и кога ќе почнат. Не е корисно да се шпекулира за нешто што е брифинг на министерот Коѕиас или не е. За тоа треба директно да се праша Коѕиас. Сметам дека идентетитските прашања треба да ги извадиме од тој процес на преговори, затоа што во спротивно, проблемот никогаш нема да биде решен – рече Димитров, додавајќи дека не е историски соодветно да се оспорува идентитетот на сосед кој не е член на ЕУ ниту на НАТО.

Министерот истакна дека во јавноста честопати ова прашање се одбегнува, но дека политиката подразбира преземање одговорност, како и дека носи одговорност за нерешавање проблеми и за пропуштени шанси.

Во однос на информациите за ревидирање на историјата, особено на делот кој се однесува на бегалците од Егејска Македонија, Димитров рече дека ако сакаме да се развијат односите меѓу двете земји, треба да се прашаат историчарите како Грците гледаат на нас и обратно.

За претстојната регионалната средба во Солун, на која ќе учествуваат министрите за надворешни работи и од Албанија и од Бугарија, Димитров рече дека ќе биде фокусирана на енергетската, економската и на регионалната соработка.

На прашање дали е можно вклучување на земјите од регионот во посредувањето во спорот за името со Грција, тој истакна дека во оваа фаза сепак разговорите ќе се одвиваат на билатерално ниво, додавајќи дека ова прашање е особено важно не само за двете земји, туку и за регионот и за самата Европа.


Атина: Ахмети доаѓа на своја иницијатива, ние сè што требаше му кажавме на Попоски


Атина, 6 јануари, 2016 - 11:57 (META) 

Посетата на лидерот на ДУИ, Али Ахмети, на Атина задутре, во Грција се најавува како дел од напорот да се најде побрзо решение за безизлезот во кој е заглавен спорот за името. Во анализа на грчкиот весник „То вима“, средбата на Ахмети со шефот на дипломатијата Никос Коѕиас се оценува како дел од грчката стратегија периодов да се најде компромисно решение за спорот.

Грчки извори за „Мета“, пак, коментираат дека посетата на Ахмети е по негова иницијатива во рамки на неговите напори да се одржат контактите со меѓународната јавност.

Нашите извори велат дека оваа средба не е некаква порака од грчката влада, ниту нејзина иницијатива и сите клучни работи што требало да бидат кажани биле разговарани со министерот Никола Попоски.

Али Ахмети со вицепремиерот за Рамковен договор, Муса Џафери, и со вицепремиерот за евроинтеграции, Фатмир Бесими, на средбата со шефот на грчката дипломатија не одат во својство на владини претставници, соопштија за „Мета“ од македонското Министерство за надворешни работи.

Од МНР велат дека станува збор за партиска средба и оти владиниот коалициски партнер не се координирал со нив во врска со темите за разговорите.

Шефот на кабинетот на лидерот ДУИ, Артан Груби, кој исто така ќе патува за Атина, одби да даде одговор на чија иницијатива ќе се одржи средбата. На сите прашања тој вели дека „сè што треба да се знае, го има во соопштението на ДУИ“.

„То вима“ забележува дека зачестените средби на македонските политичари со Коѕиас може да се прочитаат како знаци што ги потврдуваат информациите дека грчката влада, а особено Коѕиас сметаат дека по априлските избори ќе се отвори прозорец на можности за решавање на спорот за името. Во таа насока се и информациите дека Коѕиас работи на тајни предлози за името.

„Дипломатски извори коментираат дека Коѕиас турка идеи за името што ја следат досегашната практика и се држат далеку од очите на јавноста“, пишува „То вима“.

Весникот пренесува дека посредникот Метју Нимиц е изолиран од овие нови интензивирани грчки активности околу решавање на спорот за името. На страна се чини дека е оставен и грчкиот преговарач Адамантиос Василакис, иако досега двапати бил испратен тајно во Софија по налог на Коѕиас за да го испита пулсот кај бугарската влада околу идеите за решавање на спорот за името.

Како еден од можните мотиви за засилената грчка активност, весникот ја посочува загриженоста на Атина за идниот самит на НАТО во Варшава. Повикувајќи се на дипломатски извори, „То вима“ забележува дека Атина е загрижена дека на овој самит можно е да се разговара за измена на одлуката од Букурешт и да се покани Македонија во Алијансата без претходно решение за името.


ЕУ и САД барале името бргу да се реши, Коѕиас имал „нови и храбри“ иницијативи


Атина, 12 октомври, 2015 - 15:20 (META) 

Шефот на грчката дипломатијата, Никос Коѕиас, подготвува нови храбри потези и иницијативи во преговорите за решавање на спорот за името. Ова го тврди грчкиот весник „Етнос“, кој пишува дека Коѕиас имал подготвено план за напредок во преговорите од јуни, чие спроведување доцниело поради септемвриските парламентарни избори. Наводно, САД и Европската унија барале 20-годишниот спор да се реши во следните месеци, за Македонија да може да биде примена како членка на НАТО за време на Самитот на НАТО во Варшава идниот јули.

Оценката е дека поради притисоците од американска и од европска страна, решавањето на спорот за името се враќа високо на агендата на грчката влада. Според „Етнос“, грчката страна поради ова планира да продолжи со спроведување на мерките за градење доверба, но и да се отвори за дискусија за нови идеи околу потенцијалното име во преговорите со македонската влада.

Причината за засилените притисоци кон Македонија и Грција за поскоро решавање на спорот, според весникот, се и актуелната бегалска криза и стравовите од можна дестабилизација на Македонија. Прогнозите се дека овие притисоци ќе се зголемат за време на посетата на американскиот државен секретар Џон Кери и на заменичката на државниот секретар, Викторија Нуланд, на Грција во текот на ноември.

Сепак, во анализата на ситуацијата, „Етнос“ објаснува дека Грција ќе се најде пред нова комплексна ситуација и нови замки. Како еден пример се посочува идејата на посредникот Метју Нимиц да се дозволи прием на Македонија во НАТО под привремената референца, со тоа што владата ќе треба да гарантира дека ќе го реши спорот за името до приемот во ЕУ. Една алтернатива на оваа идеја на Нимиц, наводно, е Македонија да влезе во НАТО со едно сложено име кое ќе биде за севкупна употреба, односно „ерга омнес“, кое би почнало да се употребува како уставно откако Македонија ќе стане дел од ЕУ.


Иванов се сретна со Коѕиас


Скопје, 24 јуни, 2015 - 16:16 (META) 

Претседателот на Република Македонија, Ѓорге Иванов, и министерот за надворешни работи на Грција, Никос Коѕиас, размениле мислења за севкупните билатерални односи меѓу двете држави, при што Иванов го поздравил усогласувањето на мерките за доверба меѓу двете земји, оценувајќи дека тоа претставува значаен чекор за понатамошно унапредување на билатералните односи и може да придонесе за создавање позитивна атмосфера за надминување на разликата околу името.

Претседателот Иванов констатирал дека и покрај отвореното билатерално прашање, соработката меѓу двете општества никогаш не била на подобро ниво и порачал дека политичарите треба да ја следат таа нова реалност што постои меѓу општествата, граѓаните и бизнис-заедницата на двете земји, информираат од претседателскиот кабинет.

– Република Македонија опстојува на определбата за градење добрососедски односи и сестрана соработка и се залага низ отворен дијалог да се бара решение за надминување на разликата за отвореното прашање – рече претседателот Иванов.

Од кабинетот на Иванов информираат дека двајцата соговорници се согласиле за неопходност од соработка и од доверба на македонските и на грчките разузнавачки и полициски служби за заканите со кои се соочува регионот, но и за заканите по националната безбедност на двете земји.


Попоски – Коѕиас: Да се стопи деценискиот мраз на недоверба


Скопје, 24 јуни, 2015 - 14:41 (META) 

Грција и Македонија договорија 11 мерки со кои ќе се работи на зајакнување на довербата и на креирање поволна клима за надминување на спорот за името. Грчкиот министер за надворешни работи, Никос Коѕиас, и шефот на македонската дипломатија, Никола Попоски, на денешната средба во македонското Министерство за надворешни работи, не донесоа некој конкретен заклучок за поместување на црвените линии околу спорот за името, но ги потврдија согласноста и договорот околу соработка на повеќе полиња, кои ќе помогнат да се продлабочи билатералното разбирање и соработка, кои потоа полека би донеле до решавање на спорот за името.

Зголемувањето на комункацијата и топењето на деценискиот мраз беше главниот заклучок од денешната средба. Мерките ќе бидат во насока на зајакнување на економската и на трговската соработка, преку зајакнување на бизнис-релациите и организирање бизнис-форуми, посилна политичка соработка преку зачестени средби и политички консултации меѓу двете министерства, подобрување на енергетската, транспортната и на инфраструктурната поврзаност, соработка во здравството и поголема соработка на културно и на образовно ниво, меѓу универзитети, истражувачки и научни институти, како и соработка во врска со правните прашања, како подобра размена на информации, поголема соработка меѓу граничните сили во насока на борба против нелегалната миграција и организираниот криминал.

– Правиме еден чекор за заемен активен пристап и за поттикнување практична соработка. Најслабата алка во изминатите неколку децении во нашите билатерални односи е, секако, довербата, која очигледно била на недоволно високо ниво, најсилна алка бил интересот и мотивот на нашите граѓани, бизниси и општества да се поврзуваат и да соработуваат – истакна Попоски.

Според министерот Попоски, оваа листа со 11 мерки, која понатаму ќе се проширува, е добра основа за подобрување на климата меѓу двете страни. Попоски посочи дека најслабата алка меѓу двете страни е немањето доверба, а без неа е невозможно да се реши големо прашање, како спорот за името.

Попоски оцени дека меѓу двете страни постои традиција на недоверба која може да се надмине заеднички, преку соработка. Негова оцена е дека преку соработката ќе се создаде клима за да може да се адресира спорот за името, кој толку години тапка во место токму поради тоа што нема соодветни услови за справување со него.

Коѕиас беше дециден дека мерките за градење доверба им се неопходни на Македонија и на Грција, посочувајќи дека луѓето кои меѓусебно си веруваат може потоа да имаат разбирање и да ги надминат сите проблеми. Шефот на грчката дипломатија забележа дека Грција работи во насока на тоа да придонесе за стабилноста и за безбедноста на регионот и се труди да помогне за поскоро интегрирање на Македонија во европското семејство и во НАТО, како држава со целосно европски вредности.

– Сакаме сите наши соседи да се во ЕУ, да имаат правна држава, економски развој, затоа што и мојата држава зависи во голема мера од тоа што се случува на Балканот. Во рамки на патот за градење доверба, се согласивме на 11 мерки. Верувам дека ќе има и други во идина и верувам дека ќе имаме можност да разговараме и да го решиме во рамки на меѓународното право и добрососедските односи и спорот за името – истакна Коѕиас, додавајќи дека и покрај тоа што постои несогласување околу спорот за името, за секој проблем може да се најде решение.

Тој подвлече дека во време кога глобализацијата создава проблеми и кога европското единство е отежнато, Македонија и Грција, како соседни земји, мора да ги стабилизираат меѓусебните односи, да ги зачестат контактите и да ги продлабочат врските.

Тој упати апел да не дозволиме да станеме заробеници на историјата, туку да учиме од неа. Според Коѕиас, Балканот има чудно однесување кое доведува до две опасности – народите да останат заробени во историјата и да се создава повеќе историја од што може да се консумира.

– Историјата ни е важна, но историјата треба да е училиште, а не затвор, да учиме од неа. Ние имаме научено дека развој, стабилност и безбедност на Балканот ни се потребни на сите и потребна е соработка за тоа од сите страни – додаде Коѕиас.

Тој испрати и порака дека е потребно откажување од иредентизмот и од екстремниот национализам и од едната, но и од другата страна. Говорејќи за иредентизмот од македонска страна, забележа дека ѝ верува на македонската влада дека нема територијални претензии, но индиректно се осврна на делата на поранешниот министер за надворешни работи, Антонио Милошоски, како неговото веење на знамето од Вергина на Олимп или, пак, креирањето географски карти со делови од Грција.

– Секој има право на свој идентитет. Но, не треба начинот на кој се користи да создава впечатоци дека ќе дојде до негова злоупотреба. Ако поранешен политичар крене знаме кое не е легално на Олимп, без причина – тоа е иредентизам. Кога креираат географски карти кои интегрираат делови од друга земја, тоа е иредентизам – истакна Коѕиас.

Тој отворено посочи дека е погрешно мислењето дека Грција сака Македонија да биде уништена и да не постои, забележувајќи дека Грција е среќна и задоволна што постои Македонија и работи во насока на нејзин подобар развој и интегрирање во ЕУ. Забележа дека грчката влада ги почитува тие што имаат патриотски чувства, но се бори и реагира отворено против иредентизмот и ултранационализмот, кој постои и од едната и од другата страна.

– Грчката надворешна политика верува дека оваа држава е добра за Грција, дека оваа држава е подарок за Балканот, дека нејзиното постоење, стабилноста и безбедноста се добри за Грција и правиме сè што можеме да помогнеме за нејзиниот пат за влез во ЕУ и во НАТО и сакаме да помогнеме со нашето искуство за одржување на единството, стабилноста и на безбедноста – истакна Коѕиас.


Бесими утре ќе се сретне со Коѕиас во Атина


Атина, 3 јуни, 2015 - 12:00 (META) 

Вицепремиерот за европски прашања, Фатмир Бесими, утре ќе се сретне со грчкиот министер за надворешни работи, Никос Коѕиас, во Атина. Од грчка страна не се откриваат детали што ќе биде на агендата на разговорите.

Ова е втора посета на Бесими на Атина во рок од две години. Тој имаше средба во 2013 година со тогашниот министер за надворешни работи, Димитрис Аврамопулос. Со посетата на Бесими продолжува практиката на грчкото Министерство за надворешни работи за средби со вицепремиерот за европски прашања, но не и средби на атинско тло со министерот за надворешни работи на Македонија.

Средбата изненадува бидејќи доаѓа во ден кога на Грција ѝ гори под нозе поради притисокот од меѓународните кредитори и само еден ден по ненадејната итна средба на премиерот Алексис Ципрас со првиот човек на Европската комисија, Жан Клод Јункер. Истовремено, може да се види и како увертира и подготовка на теренот пред најавената балканска турнеја на Коѕиас низ државите од Западен Балкан, меѓу кои е предвидена и посета на Македонија.

Грчки аналитичари кои ги следат македонско-грчките односи, коментираат дека не ја гледаат суштината на оваа средба во момент кога постои неизвесност за опстанокот на владата во Македонија со најавата за предвремени избори идната година. Оценуваат дека фактот што доаѓа Бесими во Атина е потврда дека грчките влади одржуваат постабилен контакт и отворен канал на комуникација со албанските политичари во македонската влада и можно е да ги гледаат како покредибилен соговорник во преговорите за името.