ВМРО-ДПМНЕ: Шилегов ги партизираше јавните претпријатија и културните институции


Скопје, 3 февруари, 2018 - 17:01 (META) 

Советничката во Град Скопје од ВМРО-ДПМНЕ, Светлана Колариќ реагираше на отчетот на градоначалникот, Петре Шилегов и на прес-конференција рече дека, „100-те дена поминале во лаги, неработење и партизација на адмнистрација и јавните претпријатија на Град Скопје.“

Таа додаде дека, иако Шилегов ветувал чист воздух, Скопје се уште е најзагаден град во светот.

„Градот Скопје е меѓу првите пет најзагадени градови во светот. Викаа дека имаат студија, а дури сега најавија дека таа ќе се изработува. Нема ни една нова мерка за загадениот воздух, а единствената најава за борба против загадувачи, беше онаа против коледарските огнови, промовирајќи го бројот 193 како нова мерка или како порано 93, на кој се пријавува пожар со децении“, рече Колариќ.

Таа додаде дека нема ништо од најавите за зелено Скопје и додаде дека „СДСМ не ги броела 250.000 засадени дрва од Коце Трајановски, а сега 615 садници и најавените 4.000 на пролет ќе биле голема акција за зазеленување на градот.“

„За 100 дена Шилегов ги партизира јавните претпријатија и културните институции со 138 партиски војници во управни и надзорни одбори, вклучувајќи го и целиот негов кабинет. Груба партизација се врши и во администрацијата со вработување на десетици партиски и „шарени“ активисти. Ги вработи „шарените“ револуцонери Никола Наумовски како шеф на кабинет и Влатко Васиљ како лице за односи со јавност“, додаде таа.


Централниот комитет на ВМРО-ДПМНЕ го избра новиот Извршен комитет


Скопје, 12 јануари, 2018 - 21:19 (META) 

Централниот комитет на ВМРО-ДПМНЕ вечерва го избра новиот состав на Извршниот комитет (ИК) на партијата, а во неговиот состав се најдоа и актерот Тони Михајловски, актуелниот градоначалник на Кавадарци и сопственик на „Кожувчанка“, Митко Јанчев, и поранешниот директор на ЈСП Скопје, Игор Јанушев.

Покрај нив се е и долгодишниот парламентарец и функционер на партијата Александар Николоски, како и поранешниот министер за транспорт и врски, Владо Мисајловски.

Изненадување е и изборот на Трајко Славески, поранешен министер за финансии до 2009 година и универзитетски професор, а во ИК на опозициската партија се и актуелните пратенички Даниела Рангелова, Дафина Стојаноска, Ане Лашкоска, како и нивниот колега Владимир Ѓорчев.

Во Извршниот комитет на ВМРО-ДПМНЕ е и поранешниот скопски градоначалник Коце Трајановски.


Андонов: Власта го лажеше народот дека ќе владее демократски, сега покажува насилство


Скопје, 6 декември, 2017 - 20:37 (META) 

Оливер Андонов од ВМРО-ДПМНЕ на вечерашниот протест пред Министерството за правда рече дека „власта го лажела сопствениот народ дека демократски ќе владее, но сега покажува терор, насилство и уништување на човечки судбини и животи“.

– Знам дека на тие што го тероризираат сопствениот народ, ништо не им значи оваа држава. Очигледно е дека покрај недостигот од патриотизам, имаат недостиг и од човечко чувство, етичност. Ќе ве повикам на максимална храброст во справувањето со тие луѓе, кои не се луѓе, на хунтата на Заев, на нивните платеници – изјави Андонов.

Тој ги повика граѓаните да се солидаризираат со пратениците и со уметниците што се во притвор и да излезат на протести.

На вечерашниот протест беше и лидерот на ВМРО-ДПМНЕ, Никола Груевски, но и поранешниот градоначалник на Град Скопје, Коце Трајановски. ВМРО-ДПМНЕ најавија протест и за утре пред Министерството за правда.


Незадоволството ќе роди нови поделби и тензии, порача Милошоски


Скопје, 4 декември, 2017 - 19:41 (META) 

Со местените апсења и со нарачани судски пресуди се прави неправда, а неправдите ќе родат и нови неправди, реваншизмот ќе роди друг реваншизам, незадоволството ќе роди нови поделби и тензии, нагласи Антонио Милошоски, пратеник и член на извршниот комитет на ВМРО-ДПМНЕ, на денешниот протест пред Министерството за правда.

Опозициската ВМРО-ДПМНЕ една недела одржува протести против приведувањето и притворањето на нејзини членови и пратеници поради учество во насилствата во Собранието од 27 април годинава.

– Својата неспособност, Владата ја прикрива со местени апсења и со нарачани судски пресуди и прогони. Сегашната влада не е дојдена на власт за да ги зголеми платата и животниот стандард бидејќи нема економски план – рече Милошоски.

Поранешниот градоначалник на Град Скопје, Коце Трајановски, пред собраните граѓани рече дека гревот на приведените лица бил тоа што си ја сакале нивната земја. Тој праша дали може да бидат терористи луѓето што немаат допрено оружје, немаат направено никакво насилство, а пеат песни за Македонија.

-ВМРО-ДПМНЕ ги користеше сите легални средства за избор на претседател на собранието и за формирање нова влада, но граѓаните почувствуваа дека се подготвува предавство и формираа здружение наречено „За заедничка Македонија“ и секојдневно маршираа мирно по улиците, се пееја песни за Македонија, песни за соживот и за љубов и имаа цел да го зближат народот. Во говорите на „Шарената револуција“ имаше омраза, заплашување, имаше страв, а во говорите на „За заедничка Македонија“ имаше песни за патриотизам и за нашата земја. Тие на нелегален начин избраа претседател и народот влезе во парламентот и сето тоа треба да се расветли на еден демократски начин, а не со масовен прогон и со апсења на луѓето што влегоа – рече Трајановски.

На протестот беше присутен и лидерот на ВМРО-ДПМНЕ, Никола Груевски. Милошоски најави нов протест утре во 18 часот, за, како што рече, солидарност и поддршка на жртвите на политичкиот прогон, но не ја соопшти локацијата.


ВМРО-ДПМНЕ: Шилегов бесрамно се фали со проекти на Трајановски


Скопје, 15 ноември, 2017 - 12:46 (META) 

Петре Шилегов бесрамно продолжува да се фали со проекти на Коце Трајановски, реагираа денеска од опозициската ВМРО-ДПМНЕ, истакнувајќи дека денешниот повик на Град Скопје за субвенционирање на печки за греење со пелети е трет по ред и бил планиран во годишниот план донесен во време на Трајановски.

„Шилегов затскрива дека ова е трет по ред повик, а претходно беа објавени уште два други во март оваа година и во октомври минатата година. Разликата е што и за ова ги скратија парите. Ако во март за време на управувањето со град Скопје на Коце Трајановски беа обезбедени 7 милиони денари за субвенции, денес Шилегов се фали со повеќе од дупло помалку пари, или само 3 милиони денари. Со четириесетина илјади евра не може да се прочисти загадениот воздух во Скопје“, стои во ракцијата.

Од партијата наведуваат дека е обидот да се престави дека само со оваа мерка ќе се прочистеле воздухот е лага и дека оти всушност претставува обид да се избегне одговорност и да се создадат лажни надежи.

„Ниту СДС, ниту Шилегов имаат конкретен план за прочистување на загадениот воздух поради кој секој ден се губат човечки животи. Ќе потсетиме на 24-ти октомври 2016-та година потпретседателот на СДС, Дамјан Манчевски на прес-конференција од Средно Водно излажа дека имале план, цитирам -„Имаме план и точни предлог мерки“. Една година потоа гледаме дека Шилегов допрва вели дека ќе правеле план, а СДС не превзема ниту една мерка за загадувањето, воздухот не е почист, туку секој ден се повеќе загаден“, велат од ВМРО-ДПМНЕ.


Шилегов: Одлуките ќе ги носиме со граѓаните и во консултација со стручната јавност


Скопје, 25 октомври, 2017 - 16:04 (META) 

Новиот градоначалник на Град Скопје, Петре Шилегов, рече дека ќе работи одговорно, транспарентно, домаќински и, пред сè, во интерес на сите граѓани на Скопје.

По преземањето на функцијата од досегашниот градоначалник Коце Трајановски, тој рече дека сите одлуки ќе се носат заедно со граѓаните, а во консултација со граѓанските здруженија и со стручната јавност.

– Посветено и одговорно ќе ги спроведуваме мерките зацртани во програмата што носи живот за сите. Сериозно работиме на горливите проблеми, веќе од утре и официјално, на загадениот воздух, урбанистичкото дивеење и на сообраќајниот хаос што владее во Скопје. Ќе работиме заедно со градоначалниците на сите скопски општини, кои исто така треба да се развиваат заедно со градот – рече Шилегов.

При предавањето на функцијата, Трајановски им се заблагодари на сите што гласале за него и му порача на Шилегов да ги заврши веќе почнатите проекти.

– Благодарност до сите што гласаа за мене, што го препознаа мојот труд и моите резултати. На Шилегов му посакувам сè што вети да го исполни и да ги заврши дел од почнатите досегашни проекти. Јас не избркав никого, Шилегов треба да ги искористи капацитетите на градската администрација – рече Трајановски.


Шилегов неофицијално во првиот круг победува во Скопје


Скопје, 16 октомври, 2017 - 11:17 (META) 

Според неофицијалните информации на веб-страницата на ДИК, од преброените гласачки ливчиња од 657 избирачки места од вкупно 685 во Скопје, кандидатот за градоначалник од СДСМ, Петре Шилегов, оствари победа во првиот круг, со речиси 135.000 гласови, наспроти малку повеќе од 96.000 на неговиот противкандидат, Коце Трајановски од ВМРО-ДПМНЕ, кој во изминатите два мандати беше на чело на главниот град.

Според членот 132 од Изборниот законик, победник е кандидатот што освоил мнозинство гласови ако на изборите излегле една третина од запишаните избирачи. Бидејќи излезноста во Скопје, според резултатите од ДИК, е повеќе од 60 отсто, со сигурност може да се смета дека преостанатите околу 4 отсто гласови што се очекуваат не може да му попречат на Шилегов да освои победа во првиот круг.


Трајановски очекува да биде изгласан тој што нуди нови проекти за Скопје


Скопје, 15 октомври, 2017 - 19:20 (META) 

Кандидатот за градоначалник на Град Скопје од ВМРО-ДПМНЕ и Коалицијата за подобра Македонија, Коце Трајановски, денеска гласаше на избирачкото место 2489 во просториите на урбаната заедница Автокоманда.

„Имав задоволство денеска да го искористам своето гласачко право. Мислам дека граѓаните на Градот Скопје ќе дадат поддршка на тие што имаат реализирано проекти и на тие што ветуваат и нудат нови проекти за подобро и поубаво Скопје“, изјави Трајановски.


Кандидатите за градоначалник на Скопје се обврзаа дека ќе се грижат за чиста средина


Скопје, 12 октомври, 2017 - 15:15 (META) 

Kандидатите за градоначалник на Скопје денеска потпишаа изјава со која ја прифаќаат платформата на „Коалицијата O2“ за чист воздух и за остварување на правото за чиста животна средина.

Од коалицијата, меѓу другото, бараат активно вклучување на претставници од граѓанските иницијативи и на граѓани во подготовката на сите планови, програми, стратегии, буџети, ГУП, мерки против загадувањето, во носење на сите одлуки што ги засегаат жителите на Скопје.

Граѓанската иницијатива, исто така, бара ограничување или привремено запирање на градежните активности, во  зависност од учеството во загадувањето на воздухот.

– Задоволни сме што проблемот со загадениот воздух е централна тема во изборните програми на политичките партии и дека конечно гласот на граѓаните треба сериозно да биде земен предвид. Очекуваме од идниот градоначалник на Скопје да ги вклучи граѓаните во процесот на носење на одлуките, особено кога тие се однесуваат на нашето здравје и на квалитетот на животот – велат од „Коалицијата О2“.

Од невладината организација предлагаат да се стимулира греење на гас, суви и нетретирани дрва, пелети и на брикети од чисто дрво, а по потреба во критичните периоди и да се постави забрана за греење на други горива во домаќинствата, приватните и во државните институции.

Истовремено, тие апелираат зелените површини да се заштитат од узурпација, да се зголемат зелените површини во урбаните средини и да се формираат зелени коридори по течението на Вардар, Серава, Треска и на Лепенец.

Изјавата ја потпишаа Коце Трајановски од ВМРО-ДПМНЕ, Петре Шилегов од СДСМ, Марија Џонс од Левица, Ванчо Шехтански од ТМРО, Нафије Селмани од Движењето Беса и Ѓорѓи Тодоров од НДМ.

Наим Бајрами од Алијанса на Албанците и Беким Фазлиу од ДПА не успеале да стигнат на заедничкото потпишување, но се обврзале дека согласноста официјално ќе ја достават до крајот на денот.


Анкета: Трајановски и Шилегов најверојатно во втор круг во трката за градоначалник на Скопје


Скопје, 9 октомври, 2017 - 20:08 (META) 

Изборите за градоначалник на Скопје ќе бидат неизвесни, покажа телефонска анкета што во периодот од 23 септември до 2 октомври ја спроведе „М-проспект“ на барање на „Телма“ и на МЦМС, на примерок од 1.560 испитаници, со статистичка грешка од 2,5 отсто.

Според податоците, разликата меѓу двајцата кандидати за градоначалник на Скопје, на ВМРО-ДПМНЕ , Коце Трајановски, и на СДСМ, Петре Шилегов, е 2,5 отсто, односно мала е веројатноста дека победникот ќе се знае по првиот круг гласање.

Вкупно, 37,1 отсто од анкетираните би гласале за Шилегов, 34,6 отсто за Трајановски, 5,8 отсто за друг кандидат, додека 22,5 отсто не би гласале за ниту еден кандидат. Според етничката припадност на анкетираните, Трајановски најмногу поддршка има од Македонците, односно 42,3 отсто, додека за Шилегов би гласале 30,9 отсто Македонци. Кандидатот на СДСМ има поголема поддршка кај албанското гласачко тело, односно 58,6 отсто од Албанците би гласале за Шилегов, додека за Трајановски би гласале 4,8 отсто.

Слична е состојбата и со советничките листи за Град Скопје. Вкупно 33,8 отсто од анкетираните би гласале за советничката листа на СДСМ, 31,7 отсто својот глас би го дале за листата на ВМРО-ДПМНЕ, 4 отсто од анкетираните се изјасниле за листата на советници на ДУИ, 3,7 отсто за Беса, 0,7 отсто за Алијанса за Албанците, а 2 отсто за друга советничка листа. Сепак, 24 отсто од анкетираните рекле дека нема да гласаат за ниту една листа или, пак, не дале никаков одговор.

Анкетата, исто така, покажува дека три скопски општини – Центар, Гази Баба и Карпош – би можеле да добијат градоначалник уште во првиот круг на гласање.