!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Нишани ги обвини српските политичари дека се враќаат во времето на Милошевиќ


Тирана, 19 јануари, 2017 - 16:40 (META) 

Претседателот на Албанија, Бујар Нишани, ги обвини српските политичари дека се враќаат во времето на поранешниот претседател Слободан Милошевиќ и дека поттикнуваат тензии и конфликт на Балканот, јавува дописникот на „Мета“ од Тирана.

Нишани обвинувањата ги изнесе за време на вчерашниот прием за дипломатскиот кор во Тирана, по повод Нова година, притоа алудирајќи на потерницата издадена од српските власти за апсење на лидерот на Алијанса за иднината на Косово, Рамуш Харадинај, и случувањата со возот во боите на српското знаме и испишан со паролите „Косово е Србија“, кој требаше да сообраќа на линијата Белград – Косовска Митровица.

„Дијалогот меѓу Косово и Србија, посредуван од Европската Унија и силно поддржан од Соединетите Американски Држави, беше и останува суштински елемент за мирот, безбедноста и за помирувањето во регионот на Западен Балкан. Но, додека ги очекуваме резултатите од договорите постигнати меѓу двете земји во последните шест години, гледаме дека сè уште има тенденции и акции кои ги поткопуваат преговорите и ја поткопуваат имплементацијата на веќе договореното, а кои не одат во прилог на понатамошниот напредок во односите, не само меѓу двете земји, туку и на стабилноста на регионот во целина. Тоа што Србија кон Косово спроведува политичко-правни мерки карактеристични за времето на Милошевиќ, не оди во прилог на духот на помирување, туку кон продолжување на српската блокада на Косово на регионално и на меѓународно ниво, што е спротивно на обврските преземени досега“, рече Нишани.

Тој нагласи дека Албанија го поддржува напредокот на регионот и е против какво било враќање во „мрачните денови на режимот на Милошевиќ кој промовираше и ја спроведуваше политика на етничко чистење во регионот“.

„Помирувањето меѓу земјите бара политичка храброст и визија, кои Албанија е подготвена да ги поддржи без двоумење“, рече Нишани.


Вучиќ им забрани на министрите да ги коментираат случувањата во регионот


Белград, 19 јануари, 2017 - 15:06 (META) 

Министерот за надворешни работи на Србија, Ивица Дачиќ, денеска потврди дека премиерот Александар Вучиќ на сите министри, државни функционери и службеници им забранил да ги коментираат случувањата во регионот, јавува дописникот на „Мета“ од Белград.

„Премиерот нè замоли да му овозможиме, поради сериозноста на темите и на регионалните односи, тој да одговара на прашањата во врска со регионалните политички теми“, рече Дачиќ по разговорот со шефот на ирачката дипломатија, Ибрахим ал Џафари во Белград.

Според пишувањата на белградскиот весник „Блиц“, Вучиќ на ова се одлучил по последните случувања во Косово и по запирањето на возот кој требаше да сообраќа на линијата Белград – Косовска Митровица, а за да се оди во правец на смирување на ситуацијата во регионот, а не кон нејзино понатамошно заострување.

Во писмото кое вчера им го испратил на министрите, Вучиќ побарал од сите државни функционери поради чувствителноста на ситуацијата да не даваат изјави, туку да му остават нему да зборува за односите со Приштина, Загреб и со Сараево, пишува „Блиц“.


Возот украсен со фрески, наместо на Косово, ќе вози од Краљево до Пожега


Белград, 18 јануари, 2017 - 12:43 (META) 

Возот во боите на српското знаме, испишан со паролите „Косово е Србија“ на дваесетина јазици, нема да сообраќа од Белград до Косовска Митровица, како што претходно беше планирано, туку од утре ќе превезува патници од Краљево до Пожега, јавува дописникот на „Мета“ од Белград.

– Поради безбедност на патниците и на вработените во железницата, одлучив овој воз повеќе да не сообраќа на линијата до Косовска Митровица, која беше воведена на предлог и со финансиска поддршка од канцеларијата за Косово и Метохија. Но, затоа овој воз со истиот ентериер ќе биде воведен во домашниот железнички сообраќај и тој уште од утре ќе превезува патници од Краљево до Пожега – рече министерката за градежништво, сообраќај и инфраструктура, Зорана Михајловиќ.

Таа рече дека одлуката возот повторно да сообраќа, но по друга траса, е донесена само од економски причини, затоа што „возовите за кои се платени 100 милиони долари не смеат да стојат и да прават трошоци, туку мора да превезуваат патници и да прават профит“.

Според пишувањето на весникот „Политика“, украсувањето на возот, на кој однадвор се испишани пароли, а однатре е украсен со српски средовековни фрески, го организирала канцеларијата за Косово на владата на Србија. Возот на 14 јануари тргна од Белград кон Косовска Митровица, но беше запрен во Рашка и вратен во Белград од безбедносни причини.


Вонредна седница на албанскиот парламент поради српскиот воз на Косово


Тирана, 17 јануари, 2017 - 19:13 (META) 

Одборот за надворешна политика на парламентот на Албанија одржал вонредна седница за неодамнешните случувања на Косово, јавува приштинскиот весник „Коха“, додавајќи дека од истите причини е свикана седница и на албанскиот парламент.

На седницата се разговарало за пробната линија на возот Белград – Косовска Митровица, како и за апсењето на лидерот на Алијанса за иднината на Косово, Рамуш Харадинај, по потерницата издадена од Србија.

Претседателката на одборот, Арта Даде, најавила дека ќе биде одржана посебна седница на албанскиот парламент за да се разговара за ситуацијата на Косово.

– Неодамнешните случувања се загрижувачки и штетни за стабилноста на регионот – рече Даде.


Лавров: Не смее да се дозволи вооружен конфликт на Балканот


Москва, 17 јануари, 2017 - 13:15 (META) 

Шефот на руската дипломатија, Сергеј Лавров, рече дека војна на Балканот не смее да има, како и дека на албанските сили не им е местото на северот на Косово и Метохија.

Тој го истакна ова на годишната конференција на руското министерство за надворешни работи, на кој една од темите беа и неодамнешните „искри“ помеѓу Белград и Приштина.

– Силите на косовските Албанци не треба да бидат присутни на северот на Косово и Метохија, кој е населен со Срби – рече Лавров.

Тој се осврна и на приказните што се појавија во јавноста за „војна на Балканот“.

– Се надевам дека сите сфаќаат дека не смее да се дозволи да избие вооружен конфликт на Балканот – истакна Лавров.


Николиќ: Испраќањето војска на Косово е заклучок на Советот за национална безбедност


Белград, 17 јануари, 2017 - 12:24 (META) 

Претседателот на Србија, Томислав Николиќ, ги отфрли обвинувањата дека „ѕвечка со оружје“ и додаде дека неговата изјава за испраќање војска на Косово е заклучок на Советот за национална безбедност.

– Ние не ѕвечкаме со оружје туку на тоа предупредивме доколку биде загрозен српскиот народ на Косово и Метохија. Србија ќе ги одбрани Србите. И тука постои согласност помеѓу владата и претседателот. А тоа што реков дека ќе испратиме војска, всушност е дел од заклучоците на Советот за национална безбедност. И, да, реков дека ако треба, и јас ќе одам во војна, па и моите синови – изјави Николиќ.

Српскиот претседател за време на викендот, по повод запирањето на возот од Белград за Косовска Митровица поради безбедносни закани, изјави дека Србија ќе испрати војска на Косово ако се убиваат Срби, што беше остро критикувано од опозициските партии и од официјални лица од Европска Унија.

Николиќ рече дека ЕУ не требало да реагира на неговата изјава туку требало да реагира на „минираната пруга“ и кога не било дозволено да помине српскиот воз на Косово.

– Ако европскиот комесар Јоханес Хан вели дека јас не гледам во иднината и дека иднината на Србија е независно Косово, тогаш немаме за што да разговараме. Тогаш тој е измама на сите времиња. И тоа што го прави ЕУ е измама – рече Николиќ.

Претседателот на Србија рече дека ова не го говори поради изборната кампања туку затоа што се грижи за животите на Србите на Косово.

– Ако нападнат Срби и почнат егзодус и убивање, тогаш Србија треба да молчи? Јас на таква Србија не би бил претседател – додаде Николиќ.


Николиќ: Ако бидат загрозени Срби, ќе испратиме војска на Косово


Белград, 15 јануари, 2017 - 15:46 (META) 

Претседателот на Србија, Томислав Николиќ, вели дека Србија е подготвена да испрати вооружени сили на Косово и Метохија доколку биде загрозено српското население.

– Ако бидат убиени Срби, да – рече Николиќ на прашањето дали Србија е подготвена да испрати војска на Косово и Метохија.

Николиќ по седницата на Советот за национална безбедност, одржана во Генералштабот на војската на Србија, рече дека Србија не сака конфликт и дека никого нема да нападне, но дека како држава и по уставот има обврска да ги штити своите граѓани.

Претседателот на Србија додаде дека секој нареден обид на Приштина да предизвика конфликт ќе заврши лошо.

Тој побара ЕУ и САД да се изјаснат по изјавата на косовскиот премиер Иса Мустафа, во која тој им се заблагодарува за поддршката и додаде дека додека тоа не се расчисти, не може да стане збор за продолжување на бриселскиот дијалог помеѓу Белград и Приштина.

Седницата на советот беше одржана по најновото заострување на односите помеѓу Белград и Приштина откако вчера во Косовска Митровица не пристигна возот од Белград поради можност за избивање на конфликт.


ЕУ ги повика Белград и Приштина на воздржаност и на разумност


Брисел, 15 јануари, 2017 - 12:29 (META) 

Високата претставничка за надворешна и за безбедносна политика на Европската Унија, Федерика Могерини, и нејзиниот тим внимателно го следат развојот на односот помеѓу Белград и Приштина во последните неколку дена, а тоа ги вклучува и вчерашните случувања, велат од кабинетот на шефицата на дипломатијата на Европската Унија.

– ЕУ е во постојан контакт со двете страни по повод случувањата во саботата. Високата претставничка Могерини веќе разговараше со премиерот Вучиќ – изјави портпаролката Маја Коцијанчич.

Коцијанчич наведува дека ЕУ ги повикала двете страни да покажат неопходна воздржаност и разумност и да се вратат на дијалог.

Според нејзините зборови, дијалогот Белград-Приштина веќе покажал „опипливи, конкретни и позитивни резултати“ како за народот така и целиот напредок и за нормализирање на односите на двете страни што е резултат кој не би смеел да се испушти.

– Дијалогот е единствен начин за решавање на отворените прашања од заеднички интерес – додава Коцијанчич.


Поради безбедносни причини, запрен возот од Белград за Косовска Митровица


Белград, 14 јануари, 2017 - 19:56 (META) 

Возот кој утринава од Белград тргна за Косовска Митровица стигна денеска попладне до Рашка, на последната станица пред границата со Косово, каде е запрен поради безбедносни причини.

Првиот воз од Белград за Косовска Митровица по 18 години тргна утринава и требаше да стигне на крајната дестинација во 19 часот. Возот е украсен со боите на знамето на Србија и на 20 јазици е испишано „Косово е Србија“. Внатрешноста на возот е декорирана со фрески од српските манастири на Косово кои се под заштита на УНЕСКО.

Косовските власти ова го оценија како провокација и ја повикаа ЕУ да го забрани влезот на возот на Косово. Попладневно е објавено дека косовскиот претседател Хашим Тачи му наредил на министерот за внатрешни работи, Скендер Хисени, по секоја цена да го спречи влегувањето на возот на Косово. На преминот Јариње е зголемено присуството на полицијата, додека во близина на преминот забележани се и припадници на специјалните единици на полицијата на Косово.

Исто така, специјални единици на косовската полиција ја проверуваат пругата на северот на Косово затоа што на социјалните мрежи беше објавено дека пругата е минирана, но не пронајдоа никаков експлозив.

Поради оваа ситуација во Белград беше одржана вонредна седница на бирото за координација на службите за безбедност, по која премиерот Александар Вучиќ рече дека возот бил запрен во Рашка по негов налог, „за да се зачуваат животите на луѓето и да се спречи конфликт од пошироки размери“.

Вучиќ на прес-конференција рече дека Албанците и нивните специјални сили се обиделе да минираат дел од пругата, но наведе дека „ни тоа не се способни да го направат на соодветен начин“. Според неговите зборови, Албанците, исто така, испратиле специјални единици на преминот Јариње за да ги уапсат машиновозачот и патниците на возот.

За утре е закажана седница на советот за национална безбедност, со која ќе претседава претседателот на Србија, Томислав Николиќ.


Од Белград со фрески и во боите на српското знаме, тргна возот за Косовска Митровица


Белград, 14 јануари, 2017 - 13:35 (META) 

Од белградската железничка станица утринава тргна возот за Косовска Митровица, украсен со боите на српското знаме и испишан со паролите „Косово е српско“ на 21 јазик, вклучувајќи го и албанскиот.

Тоа е првиот воз што од Белград тргна за Косовска Митровица по 18 години. Станува збор за промотивно возење на пробната линија Белград – Косовска Митровца, која ќе биде воспоставена од 20 јануари до 26 февруари, по што ќе биде донесена одлука дали возот редовно ќе сообраќа.

Внатрешноста на возот е излепена со репродукции на фрески и на фотографии од српски културни и историски споменици на Косово под заштита на УНЕСКО, а патниците беа дочекани од хостеси облечени во боите на знамето на Србија.

Возот од Белград го испрати директорот на јанцеларијата на владата на Србија за Косово, Марко Ѓуриќ, кој рече дека запирањето на возот значело кршење на основните човекови права и слободи на движење.

– Секој ден повеќе од десетина автобуси на албански превозници од Косово и Метохија поминуваат низ Централна Србија и тука нема никакви проблеми. Сè друго би претставувало кршење на човековите права и јас искрено се надевам дека до тоа нема да дојде – вели Ѓуриќ.