!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

„Карпош соколи“ ќе играат во квалификациите за Лигата на шампионите


Скопје, 30 јуни, 2017 - 19:09 (META) 

Кошаркарскиот клуб „Карпош соколи“ ќе биде единствениот македонски претставник во квалификациите за Лигата на шампионите на ФИБА. Кошаркарите од Карпош ќе одиграат три квалификациски натпревари за пласман во Лигата на шампионите. „Соколите“ ќе стартуваат од првото квалификациско коло и ќе треба да минат голем филтер, за да изборат пласман меѓу осумте клуба (од вкупно 32) кои ќе се пласираат во групната фаза од натпреварувањето.

Според ФИБА, во првото квалификациско коло ќе се натпреваруваат вкупно 16 тимови, меѓу кои и македонскиот претставник „Карпош соколи“. Само најдобрите ќе се пласираат во групната фаза, каде ги чекаат тимовите кои веќе се одредени како учесници во регуларниот дел од сезоната.


Перо Антиќ ослободен од обвиненијата


Њујорк, 10 септември, 2015 - 13:27 (META) 

Откако обвинителот ги отфрлил сите обвиненија против македонскиот кошаркар Перо Антиќ и неговиот соиграч од Атланта, Табо Сефолоша, кои беа дел од немила случка пред неколку месеци, во ноќен клуб во Њујорк, судот воопшто не го почна процесот.

Тогаш Антиќ беше притворен заедно со Сефолоша, кој при апсењето доби скршеница на ногата, поради давање отпор на полицајците за време на приведувањето.


„Евробаскет 2015“: Македонија загуби од Грција со 65 – 85


Загреб, 5 септември, 2015 - 20:14 (META) 

Кошаркарската репрезентација на Македонија загуби од селекцијата на Грција со резултат 65 – 85, во првиот натпревар од групната фаза на Европското првенство, кое се игра во Хрватска, Германија, Летонија и во Франција.

Македонските кошаркари во поголемиот дел од натпреварот беа резултатски близу со противникот. Грците клучната разлика ја направија во последната четвртина, која ја добија со 15 – 26.

Најефикасен играч во тимот на Грција беше Георгиос Принтезис, кој постигна 18 поени, додека во нашиот тим најдобра игра покажаа Александар Костоски со 20 поени и Војдан Стојановски, кој постигна 13.

Наредниот меч на „Евробаскетот 2015“ македонските кошаркари го играат утре во 15 часот, против репрезентацијата на Холандија.


Почнува „Евробаскет 2015“: Македонија денеска игра против Грција


Загреб, 5 септември, 2015 - 11:56 (META) 

Со почетокот на натпреварите во групната фаза, денеска почнува 39. Европско кошаркарско првенство „Евробаскет 2015“, на кое, првпат во неговата историја, домаќини се четири земји, односно Германија, Хрватска, Летонија и Франција.

Репрезентацијата на Македонија, која игра во групата „Ц“, денеска од 18 часот го игра првиот натпревар против тимот на Грција.

Покрај Македонија и Грција, во оваа група се уште и репрезентациите на Хрватска, Холандија, Грузија и на Словенија.

Најголеми фаворити за освојување на шампионатот се тимовите на Шпанија, Србија и на Франција, како и репрезентациите на Хрватска, Литванија и на Турција.

За Македонија оваа е петто учество на европските првенства, а четврто во низа.


Македонија ја совлада Украина на кошаркарскиот турнир во Охрид


Охрид, 9 август, 2015 - 12:37 (META) 

Македонската репрезентација во кошарка ја совлада репрезентацијата на Украина со резултат од 81:51.

Со оваа победа, нашата репрезентација го осигура првото место на подготвителниот турнир за Европското првенство.

Турнирот во Охрид завршува утре, со мечот меѓу Украина и Израел.


МКФ му даде отказ на селекторот Џикиќ


Скопје, 22 јули, 2015 - 15:16 (META) 

Четириесетина дена пред почетокот на Европското првенство во кошарка, Македонската кошаркарска федерација (МКФ) му врачи отказ на селекторот на репрезентацијата, Александар Џикиќ.

„Македонската кошаркарска федерација со консензуална одлука на Комисијата за итност и со одобрување од телефонски консултираните членови на управниот одбор, го разреши од должност селекторот на сениорската репрезентација, Александар Џикиќ, поради нарушена соработка и недоверба во органите на Федерацијата, заблагодарувајќи му се за досегашната работа со репрезентацијата“, се вели во соопштението на МКФ.

Џикиќ на селекторкста позиција беше именуван минатата година и успеа со репрезентацијата да обезбеди пласман на Евробаскет 2015, иако во квалификациите играше со помлад состав.

Попладнево, порталот „Спортмедиа.мк“ објави дека нов селектор на македонската машка кошаркарска репрезентација ќе биде Марјан Србиновски, на кого ќе му помага спортскиот директор на МКФ, Заре Марковски.


Џикиќ останува на селекторското место во македонската кошаркарска репрезентација


Белград, 15 јуни, 2015 - 16:38 (META) 

Александар Џикиќ останува на селекторското место во македонската кошаркарска репрезентација, пренесе „Македонски спорт“.

Она што новиот предводник на МКФ, Петар Наумоски, го најави денеска, се реализира на состанокот во Белград.

Џикиќ веќе го има составено поширокиот список, а на него се и Перо Антиќ, Предраг Самарџиски и Лестер Бо Мекејлеб. Во следните неколку дена и официјално ќе бидат обајвени имињата на кошаркарите на кои ќе смета селекторот.

Европското кошаркарско првенство почнува на 5 септември, а Македонија е во групата Ц заедно со домаќинот Хрватска, со Словенија, Грција, Холандија и со Летонија.


Перо Антиќ бурно поздравен од навивачите на Олимпијакос во Атина


Атина, 15 јуни, 2015 - 10:05 (META) 

Страсните навивачи на грчкиот кошаркарски гигант Олимпијакос не ја заборавија љубовта и почитта кон македонската НБА-ѕвезда Перо Антиќ.

Антиќ, кој викендов се најде во Атина за да го проследи натпреварот меѓу вечните ривали Олимпијакос и Панатинаикос, беше френетично поздравен и испратен од навивачите кои верно го следеа две години додека играше за црвено-белите во Пиреа.

Во моментот кога заминуваше од салата на стадионот на Олимпијакос, навивачите громогласно и бурно го поздавија, извикувајќи го неговото име, покажувајќи на овој начин дека спорот за името и политичките проблеми немаат место на спортските терени.

Антиќ беше две години во тимот на Олимпијакос и со него во тимот црвено-белите двапати ја освоија европската шампионска титула.

Македонскиот кошаркар и неговото семејство од првиот момент беа одлично прифатени и од соиграчите, но и од страсните навивачи на грчката кошаркарска сензација, без да има какви било проблеми поради политичкиот спор.

Навивачите на црвено-белите редовно го дочекуваат позитивно и со голема љубов при секоја негова посета на Атина и на натпреварите на Олимпијакос.

М.П.


Вечерва почнува финалето на македонскиот кошаркарски плејоф


Скопје, 29 мај, 2015 - 11:19 (META) 

Вечерва, во Спортскиот центар „Јане Сандански“, со почеток во 19 часот, се игра првиот финален натпревар меѓу МЗТ Скопје Аеродорм и Куманово од борбата за шампионската титула во кошаркарското првенство на Македонија.

Актуелниот шампион МЗТ Скопје Аеродорм одбраната на титулата ќе ја почне на домашен терен, што е голема предност врз основа на резултатите на тимовите одиграни досега.

За МЗТ Скопје ова ќе биде 10. финале во плејофот, а имаат три титули (2012, 2013 и 2014 година), додека Куманово беше финалист само во 2002 година.

Оваа сезона меѓусебните дуели на двата тима резултираат со 3-1 во победи за МЗТ Скопје. Финалната серија се игра до три победи, со тоа што домаќинот наизменично ќе се менува (1-1-1-1-1), а доколку се играат пет натпревари, шампионот ќе биде познат на 7 јуни.


Здружение на кошаркари: Спортскиот интерес е пред кој било друг


Скопје, 15 април, 2015 - 10:37 (META) 

Здружението на кошаркари на Македонија со соопштение се обрати до јавноста со апел проблемите што поскоро да се надминат во интерес на спортот во државата.

Во соопштението на македонските кошаркари стои:

„Сакаме да ѝ се обратиме на целокупната спортска и поширока јавност и да го изнесеме нашиот заеднички став. Ова е став на сите македонски играчи од сите клубови што учествуваат во Суперлигата, без исклучок.

Свесни сме дека нашите интереси, како играчи, се подредени на интересите на клубовите во кои настапуваме и нивните спонзори и тоа го почитуваме.

Најпрво сакаме јавно да им се заблагодариме и на општините и на приватните компании за нивните огромни напори да обезбедат соодветни буџети за квалитетна кошарка, можеби во просек на квалитет по екипа, и најквалитетна клупска кошарка во целиот регион, а со сигурност најизедначена и најнеизвесна. Квалитетот на нашата клупска кошарка оваа година кулминира. Никогаш досега немало шест рамноправни екипи со еднакви шанси да се борат за титулите, никогаш немало првенство во кое не може да се прогнозира ниту еден резултат, никогаш немало првенство во кое играле толку многу квалитетни играчи, и домашни и странски. Затоа и никогаш претходно не биле толку посетени кошаркарските натпревари.

Но, не можеме да разбереме и прифатиме кога интересите се спротивни од основниот интерес, кој сите нас нè обединува, и навивачите и играчите и тренерите и управите и спонзорите – спортскиот интерес – спортот во вистинска смисла на зборот, спорт кој единствено се игра на спортскиот терен, во спортска борба за извојување спортска победа, која единствено има вредност доколку е остварена на спортските терени. Не веруваме дека има спортист што може да се радува на победа која не е извојувана на спортскиот терен.

Ние сме играчи и не сме компетентни да ги толкуваме пропозициите, правилниците и другите акти на федерацијата. Како играчи само можеме од срце да апелираме и да ги замолиме сите инволвирани страни, што е можно побргу да најдат начин да се реши оваа ситуација. Убедени сме дека постои решение, но единствено ако спортскиот интерес се стави пред кој било друг интерес. Во спротивно, сите ќе бидеме губитници, а најмногу македонската кошарка“.