ЕУ ќе обезбеди 68,6 милиони евра за модернизација на железницата


Скопје, 14 декември, 2018 - 13:15 (META) 

Владата потпиша Договорот за грант во износ од 68,6 милиони евра наменет за ко-финансирање, доделен од Европската унија преку Инвестициската програма за Западен Балкан (ИПЗБ), за модернизација на железницата.

Овој грант ќе биде искористен за ко-финансирање на изградбата на приближно 34 километри железничка инфраструктура, од Бељаковце до Крива Паланка, втора фаза на проектот за Коридор 8, кој откако ќе биде финализиран, ќе биде дел од трансевропската транспортна мрежа, поврзувајќи ја Македонија со Албанија на запад и Бугарија на исток.

Поддршката следи по одобрување на двата суверени кредити од 46,4 милиони евра и 145 милиони евра од страна на ЕБОР на македонската влада, за натамошно имплементирање, преку Јавното претпријатие „Македонски железници – инфраструктура“.

Првата фаза на проектот, рехабилитација на железничкиот сектор во должина од околу 31 километар помеѓу Куманово и Бељаковце, е во фаза на имплементација. Втората фаза на активности поврзани со набавки веќе започна, и се избира изведувачот кој ќе ги реализираат работите поврзано со проектот.

ИПЗБ обезбедува и грантови за техничка соработка во износ од 5,7 милиони евра, за подготовка на проекти и имплементација. Развојот на македонската економија зависи од поврзаноста на главните меѓународни транспортни копнени рути, по кои стоката може слободно да се транспортира. Низ земјата поминуваат и 215 километри од железничкиот Коридор 10.

На церемонијата на потпишување на Договорот за грант присуствуваа министерот за транспорт и врски, Горан Сугарески, министерот за финасии, Драган Тевдовски, амбасадорот на Делегацијата на ЕУ, Самуел Жбогар, и Анка Јоана Јонеску, претставник на ЕБОР за Македонија.


Автопатот Демир Капија – Смоквица треба да обезбеди економски развој и безбедно патување


Гевгелија, 23 април, 2018 - 15:02 (META) 

Со отворањето на 28,2 километри од автопатот Демир Капија – Смоквица го додадовме делот од Коридор 10 кој недостасуваше во земјата, рече генералниот директор за соседски политики и преговори за проширување во Европската комисија, Кристијан Даниелсон.

Тој додаде дека овој автопат ќе го олесни движењето, ќе го поттикне економскиот развој и ќе обезбеди одржливо и побезбедно патување.

Новата автопатска делница Демир Капија – Смоквица, која е во рамки на Коридорот 10, е дел од вкупните вложувања на Европската Унија во транспортната инфраструктура на земјата, кои во изминатите неколку години достигнаа речиси 325 милиони евра. Со нив се изградени и обновени над 100 километри автопатска мрежа, 64 километри патишта во повеќе од 40 општини и 60 населени места, 16 километри железничка пруга и 11 железнички станици.

Премиерот Зоран Заев рече дека овој автопат поврзува и води кон ЕУ.

– Оваа делница од автопатот „Пријателство“ во себе ја има вградено и искрената приказна за поддршка и соработката. Нашата темелна вредност и определба, да ги издигнеме капацитетите на нашата земја на ниво достојно за да биде членка на ЕУ, е силна мотивација за усогласување на нашата, национална патна инфраструктурна стратегија, со онаа на Европската Унија – рече Заев.

Министерот за транспорт и врски Горан Сугарески рече дека оваа автопатска делница е прва од овој тип на Балканот.

– Автопатот ги содржи сите потребни каректеристики за сообраќајна безбедност што ни дава сигурност дека сообраќајот по оваа делница ќе се одвива побезбедно за сите учесници. Истиот е проектиран и изграден согласно нормите и стандардите на Европската унија за заштита на животната средина, што дополнително влијае на намалување на емисијата штетни гасови – рече Сугарески.

Продолжување на поддршката и инвестициите кои треба да обезбедат поефикасно инфраструктурно и енергетско поврзување на целиот регион е една од шестте приоритетни иницијативи во новата Стратегија на Европската Унија за поддршка на трансформацијата на Западен Балкан. Со неа се предвидуваат дополнителни инвестиции на ЕУ од над една милијарда евра во натамошниот развој и инфраструктурата на земјите од Западен Балкан.

На настанот беше означен стартот на „ЕУ за тебе“ кампањата за инвестициите на Европската Унија во транспортната инфраструктура“, велат од Делегацијата на ЕУ во Македонија.

На отворањето на автопатот, присуствуваше и министерот за транспорт и врски на Грција, Христос Спирцис.


Се отстрануваат старите табли на автопатот со името „Александар Велики“


Скопје, 20 февруари, 2018 - 13:25 (META) 

Јавното претпријатие „Македонија пат“ почна да ги отстранува сообраќајните табли со досегашниот назив на автопатот „Александар Велики“ на Коридорот 10, кои според одлука на Владата треба да бидат заменети со нови што ќе го содржат името „Пријателство“.

Од Јавното претпријатие за државни патишта,пак, информираат дека веќе ги нарачале 19-те сообраќајни табли со новото име. Набавката на новите табли ќе ги чини 4,94 милиони денари (80.120 евра).


Сугарески: Автопатот Демир Капија – Смоквица ќе биде пуштен в година


Битола, 22 декември, 2017 - 14:59 (META) 

Министерот за транспорт и врски Горан Сугарески на форумот „Важност на Пан-европскиот коридор 10 за Република Македонија, Балканскиот полуостров и Европската Унија” кој се одржа денеска во Битола порача дека очекува следната година да биде пуштена новата автопатска делница Демир Капија – Смоквица, со што ќе се добие комплетен автопат на Коридорот 10 низ Македонија. Тој посочи и дека проблемот со неизградената пруга од Битола до Меџитлија е веќе во рацете на обвинителството, а најави и судски процес за неисполнетите обврски.

Министерот Сугарески истовремено најави дека се планира магистралниот пат од Прилеп преку Битола до граничниот премин Меџитлија да се надгради до ниво на експресен пат, што би било готово за две до три години.

– Многу значаен проект на кој во наредниот период ќе посветиме големо внимание е проширување на државниот пат Прилеп – Битола се до граничниот премин Меџитлија. Овој патен правец планираме да го изградиме на ниво на експресен пат, a во меѓувреме делот од Битола до Меџитлија ќе го реконструираме. Генерално следната година очекувам да имаме целосно функционален Коридор 10 на ниво на автопат, а за две до три години да имаме и модерни патни правци на кракот 10 Д – рече министерот во обраќањето пред учесниците на форумот.

За неизградената пруга Битола – Меџитлија, Сугарески најави судски процес, јави СДК.

– Судска постапка ќе се води во делот на одговорноста. Се што имаме поврзано со овој случај доставуваме до органите на прогонот. Тие малверзации ги открива обвинителството – рече Сугарески, не прецизирајќи кој ќе добие тужба.

Пругата требаше да ја гради бугарски конзорциум на фирми кој за подизведувачи зеде домашни компании, а на крај не им го исплати сработеното. Пругата требаше да биде готова до јули минатата година, но е незавршена. Потоа беше распишан нов тендер, на кој за изведувач е избрана австриската „Штрабаг“, која треба да ја заврши пругата следната година.


Компаниите бараат функционалност на Коридорот 10 зашто нема алтернатива


Скопје, 16 март, 2017 - 14:59 (META) 

Воспоставувањето целосна инфраструктурна функционалност на Коридорот 10 и обезбедувањето непречен пристап на стоките од и до пристаништето во Солун треба да биде приоритет, бидејќи во моментов нема алтернатива.

Ова е еден од заклучоците на тркалезната маса на тема „Сигурност во снабдувањето со стоки и со нафтени деривати – Можности и алтернативи“, која се одржа во Стопанска комора на Македонија.

– Инфраструктурата, царинските премини и терминали на коридорот Исток – Запад не се доволни и не се соодветни за редовно снабдување со стоки, а особено за нафтени деривати во подолг период. Инцидентно, може да помогне во одредени ситуации, кога има нарушување на снабдувањето преку Коридорот 10. Краткорочно гледано, во случај на нарушување на снабдувањето со деривати и со други стоки, неопходна е диверзификација на превозните средства (користење на железница и автоцистерни или камиони) и користење на повеќе влезни и излезни царински премини во државата – се предлог-заклучоците на тркалезната маса, информираат од Стопанска комора.

Еден од предлозите бил и промена на легислативата за зголемување на капацитетот на резервоарскиот простор кај трговските компании, како услов за добивање лиценци за трговија.

– Со заокружување на процесот на приватизација на пристаништето во Солун, односно негово давање под концесија, како и со либерализација на пристапот кон грчката железничка инфраструктура и влез на приватни оператори, ќе се овозможи либерализирање на односите по повеќе основи (избегнување на можни штрајкови, подобрување на брзината на испораките, намалени трошоци) – велат од Стопанска комора.

Преку пристаништето во Солун поминале 3.322.000 тони стока во 2016 година и 4.056.840 тони во 2015 година, од кои, во увоз и во извоз, количеството на стока за Македонија за 2016 година е 885.000 тони.


За бизнис-заедницата важно е да нема кратење средства од капиталните проекти


Скопје, 27 јуни, 2016 - 15:04 (META) 

За бизнис-заедницата е важно да не се намалат средствата за развој на патната и на железничката инфраструктура со предлог-ребалансот на буџетот.

Според директорката на Дирекцијата на здруженија според дејности при Стопанската комора, Билјана Пеева-Ѓуриќ, од реализирањето на капиталните проекти зависи работењето и економското дејствување на компаниите во следниот период.

– Ребаланост на буџетот е нормална појава во услови на изостанување на резулти кои стопанството се очекувало да го испорача. Но, според она што беше кажано, нема да има намалување на средствата за капиталните ставки, односно за реализација на клучните проекти, како коридорот 10, коридорот 8 и енергетската инфраструктура. Предвидени се и дополнителни средства за изградба на коридор 10 – изјави директорката Пеева-Ѓуриќ.

Со предлог-ребаланост на буџетот, сумата предвидена за капитални инвестиции се намалува од предвидените 412 милиони евра на 366,9 милиони евра.


Пристигна третиот кинески воз


Скопје, 29 февруари, 2016 - 21:03 (META) 

Третиот кинески воз пристигна денеска во Македонија. Директорот на МЖ „Транспорт“, Никола Костов, рече дека тој ќе биде пуштен во употреба откако ќе му бидат направени сите техничко-безбедносни контроли.

До крајот на првата половина од оваа година во Македонија треба да пристигнат и другите три патнички возови. Четири ќе бидат на дизел-гориво, а два со електромотор.

Првиот патнички воз кој пристигна во Македонија веќе е пуштен на Коридорот 10, од Табановце до Гевгелија, а наскоро ќе биде пуштен за сообраќај кон Битола.

Костов вели дека возовите се безбедни за сообраќај по македонските пруги, а цената на билетите ќе остане непроменета.


Вучиќ: До крајот на годината ќе се пуштат 23 километри од Коридорот 10


Белград, 15 декември, 2015 - 16:26 (META) 

Српскиот премиер Александар Вучиќ денеска рече дека до крајот на 2015 година ќе отвори 23 километри од источниот крај од Коридорот 10.

– Пред неколку минути добив информација дека пред крајот на годинава, како што тоа кај нас се вели предвреме, ќе бидеме во состојба да отвориме 23 километри од источниот крај од Коридорот 10 – рече Вучиќ на приемот по повод отворањето на првите две поглавја во преговорите со ЕУ.

Планот е Коридорот 10 да биде завршен до крајот на 2016 година или најдоцна до почетокот на 2017 година.