!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Мартин Шулц е избран за нов претседател на германските социјалдемократи


Берлин, 19 март, 2017 - 17:53 (META) 

Германската социјалдемократска партија (СПД) денеска одржа конвенција на која за нов претседател на партијата едногласно е избран поранешниот претседател на Европскиот парламент и актуелен кандидат за германски канцелар, Мартин Шулц, пренесува ХРТ.

Новиот претседател на СПД е сè поголема закана за Ангела Меркел, која сè до неодамна имаше отворен пат до нов мандат, но последните анкети покажуваат дека таа и Шулц се изедначени.

Шулц не ги крие своите амбиции да стане канцелар и да ја направи СПД најголема политичка сила во земјата.

Парламентарните избори во Германија се закажани наесен.


Обама 45 минути ја фалеше Клинтон и го критикуваше Трамп


Филаделфија, 28 јули, 2016 - 11:02 (META) 

Претседателот на САД, Барак Обама, ги повика своите сонародници да ја доведат Хилари Клинтон до Белата куќа.

Во говорот на претпоследниот ден од националната конвенција на демократите во Филаделфија синоќа, американскиот претседател укажа на вистинската опасност што во неговите очи ја претставува републиканскиот претседателски кандидат, Доналд Трапм, кој го нарече демагог и самопрогласен спасител на земјата.

Тој го фалеше силното искуство на Клинтон, која е негова поранешна државна секретарка.
– Америка е веќе голема, Америка е веќе силна. И можам да ви ветам дека нашата сила, нашата големина не зависат од Доналд Трамп – рече 44. претседател на САД.

Со силен аплауз во салата, Хилари Клинтон му се придружи на сцената на крајот од говорот. Двајцата сојузници се ракуваа и се фатија за раце во знак на единство.

Клинтон денеска на последниот ден на демократската конвенција, официјално ќе ја прифати претседателската номинација на партијата.

Говорот на Обама, кој траеше 45 минути, преку директен телевизиски пренос го следеа милиони Американци. Тој ги повика сите демократи да се мобилизираат и на изборите на 8 ноември да гласаат за Клинтон дури и ако не се согласуваат во сè со неа.

– Ништо не може навистина да ве подготви за барањата на Овалната соба, но Хилари беше присутна во таа просторија и учествуваше во донесувањето одлуки. Таа е подготвена за местото врховен командант – изјави Обама.

На конвенцијата се обратија и потпретседателот Џо Бајден и Тим Кејн, кандидатот за потпретседател на Клинтон, како и актерката Сигурни Вивер, поранешниот гувернер на Мериленд Мартин О’Мајли.

По говорот што ќе го одржи вечерва, Хилари Клинтон ќе тргне во кампања со автобус заедно со нејзиниот потпретседателски кандидат Кејн, во американските држави Пенсилванија и Охајо.


Трамп доби доволно делегати за номинација за претседател на САД


Вашингтон, 26 мај, 2016 - 20:04 (META) 

Милијардерот Доналд Трамп го достигнал потребниот број на делегати потребни за да биде избран за кандидат за претседател на САД од Републиканската партија, јавуваат светските агенции.

Трамп, според информациите, има 1.238 делегати, еден повеќе од што е потребно за да ја добие кандидатурата на партиската конвенција која треба да се одржи во јули во Охајо.

Според правилата, потребно е мнозинство од 2.472 делегати за номинација, а Трамп ја поминал таа бројка по добивањето на поддршката на одреден број на делегати, која досега не беше потврдена.

Неколку часа претходно, претседателот на САД, Барак Обама изјави дека светските лидери имаат добра причина да бидат вознемирени поради Трамп.

„Тие се вознемирени и имаат добра причина за тоа. Во најголемиот број предлози што ги изнесе покажа или непознавање на светската политика или интерес за твитови и наслови – рече Обама на маргините на самитот на земјите од Г7.


Милевски: Иванов е најдобар кога молчи


Скопје, 13 март, 2016 - 14:25 (META) 

Либерално-демократската партија синоќа во објектот на Македонската опера и балет ја одржа својата програмска конвенција под мотото „Има избор. Овде и сега“ на која ја презентираше својата изборна програма.

Претседателот на ЛДП, Горан Милевски, зборуваше за актуелните политички случувања и проблемите со кои се соочуваат граѓаните.

-Додека Груевски и ДПМНЕ градат споменици, младите секојдневно се иселуваат од Македонија. Даваат привилегии за странските инвеститори, а од друга страна, ги малтретираат и рекетираат домашните фирми. Трошат пари за барок споменици и скулптури, а земаат кредити за плати и пензии. Еве, Иванов за германските медиуми изјави дека Европската унија не лажела и манипулирала 25 години. Иванов е најдобар кога молчи затоа што кога прозбори, не скара со цела Европа. Му порачуваме да продолжи да си молчи, затоа што импичмент за вакво однесување не му бега – рече Милевски.

На конвенцијата се обратија и генералниот секретар на Либералната интернационала, Емил Кирјас, Никица Корубин, професор Никола Пановски, Драган Малиновски и професор Зоран Шапуриќ, кои презентираа делови од програмата, секој од својата област.

Пред присутните се обратија и Даниел Кадик, директор на германската фондација Фридрих Науман за југоисточна Европа и Ханс ван Баален, европратеник и претседател на АЛДЕ – Европската алијанса на либерали и демократи.


Мемети: Институциите немаат волја за спроведување на прописите


Скопје, 29 ноември, 2015 - 11:21 (META) 

Институциите во Македонија немаат волја да ги спроведат прописите и законите, да се справат со предизвиците, да ги решaваат проблемите и тоа е главниот проблем, вели народниот правобранител, Иџет Мемети, во неделното интервју за „Радио Слободна Европа“.

„Ние во Република Македонија, во парламентарна демократија формиравме посебно јавно обвинителство, тоа доволно говори на кое ниво сме. Тоа доволно говори колкава е волјата на институциите да се справат со предизвиците и со проблемите и да ги решaваат. Ние дозволивме како општество да доаѓаат однадвор и да ни зацртуваат како треба да постапуваме, што е исклучително лош знак или лоша состојба за општество наречено парламентарна демократија“, вели Мемети.

Во врска со бегалската криза и so новите мерки за селекција и за профилирање на мигрантите, омбудсманот смета дека од самиот почеток на мигрантската криза во Македонија, земјава ги прекршува принципите на Меѓународната декларација за бегалци за недискриминација, неказнивост и за невраќање.

На прашање дали конкретно мисли на одлуката на Македонија да ги пропушта само бегалците од Сирија, Ирак и од Авганистан, но не и тие што доаѓаат од земји кои не се зафатени со војни, Мемети вели дека не знае дали формално е донесена таква одлука, но ако постои, вели дека таа треба „многу дебело да се образложи“.

„Затоа што со таква одлука прекршуваш одредби на конвенцијата, треба и апелирам не на национална дискриминација на лицата кои или се бегалци или се мигранти. Според конвенцијата сме должни да им дадеме привремена заштита. Македонија е должна да им даде шанса ним да влезат во процедура, ако не исполнуваат услови, тогаш во согласност со процедурата, да се протеруваат, а не да се протеруваат без никаква процедура“, вели народниот правобранител.

За постапката што Народниот правобранител ја отвори во врска со незаконското прислушување, уште во март годинава, Мемети вели дека „тој предмет сè уште е отворен“, но засега нема никаква соработка од надлежните институции.

„Јас не знам како на друг начин да го затворам освен со законито постапување и инсистирам на одговор од Владата и од Министерството за внатрешни работи за сите тие клучни прашања што ги поставив уште тогаш, затоа што тие се должни тоа да го направат. Не е во ред да игнорираат“, вели Мемети во интервјуто.