СОЗР го пoвика менаџментот на „Македонско село“ да информира за одлуката за затворањето


Скопје, 17 октомври, 2018 - 14:27 (META) 

Службата за општи и заеднички работи (СОЗР), како надлежна за стопанисувањето на објектите во сопственост на Владата, известува дека Владата не била запознаена за намерата, ниту информирана за одлуката на менаџментот на комплексот „Македонско село“, објектот да биде затворен и да престане да работи.

„Во договорот склучен меѓу СОЗР и концесионерот, претставуван од компаниите „Тинекс“ и хотелот „Квинс“, има член кој јасно определува дека за ваква одлука давателот на концесијата треба да биде известен најмалку шест месеци однапред. СОЗР денеска ќе ги покани претставниците на менаџментот на концесионерот утре на состанок да информираат за причините за нивната одлука. Од таа средба со менаџментот на концесионерот на „Македонско село“, и од разговорот за новонастанатата ситуација, СОЗР ќе постапи согласно одредбите регулирани со договорот за концесија“, се вели во соопштението.

 


Порибени акумулацијата Глобочица и ревирот Црн Дрим 2


Струга, 15 август, 2018 - 15:54 (META) 

Со порибувањето на риболовните води кои немаат концесионер, Министерството за земјоделство, шумарство и водостопанство се грижи за зачувување и заштита на автохтоните видови риби во речните води, порача министерот Љупчо Николовски при денешното порибување на акумулацијата Глобочиџа со 40 килограми, односно 8.000 единки подмладок од речна пастрмка и со 1.700 единки крап.

Во текот на денот ќе биде порибен и риболовниот ревир „Црн Дрим 2“ со 20 килограми подмладок од речна пастрмка. Потоа ќе се продолжи со порибување на другите водни текови и езера кои се без концесионер, за да овозможи одржување на популацијата. Планирано е порибување со пастрмка и на ревирите Охридски слив, Треска 1 – Кичевски регион и Црна река 1 – Демирхисарски регион, додека со крап ќе биде порибена и акумулацијата Ратево, односно Беровско Езеро.

Предвидени се  150 килограми подмладок од речна пастрмка, или околу 30.000 единки и 350 килограми подмладок од крап, односно околу 2.350 единки, појасни министерот Николовски.
Инаку, постапката за доделување на концесија на рибите за организирање на рекреативен риболов на овие риболовни води е во тек и се очекува да биде финализирана до крајот на септември.

Покрај за риболовните води без концесионер, МЗШВ ќе даде дополнителни 7,7 милиони денари за порибување на  Охридско, Преспанско и Дојранско Езеро, како и на акумулацијата Шпилје.


МЗШВ: Започнати се постапки за доделување на концесии за повеќе риболовни води


Скопје, 18 јули, 2018 - 12:41 (META) 

Владата на вчерашната седница донесе одлуки за започнување на постапки за доделување на рибите по пат на концесија за повеќе риболовни води, информираат од Министерство за земјоделство, шумарство и водостопанство (МЗШВ).

„Започнатите постапки за доделување концесии на рибите за органзирање рекреативен риболов се однесуваат на рекреативните зони на Охридското и Дојранското езеро, риболовните ревири Црна Река 1 – Демир Хисарски, Црн Дрим 2, Злетовска Река, Треска 1 – Кичевски и aкумулација Матка, а за вршење стопански риболов на риболовните подрачја Охридско и Дојранско езеро“, се вели во соопштението на МЗШВ.

Во него се додава дека риболовната основа за риболовнта вода Охридско Езеро во почетокот на 2018 година е изменета во правец на целосна заштита и одржливо користење на рибите во езерото.

„Конкретно, направени се измени во делот на утврдување на периодот на мрест и времето во кое е дозволен риболовот и детално се уредени специфичните локации на мрест на рибите, особено за охридската пастрмка, охридската белвица и крапот. Исто така, заради одржување на популацијата намалени се количините на дозволен улов на видот охридска белвица. Направени се измени кои ги задоволуваат потребите на рекреативните риболовци, а со тоа и развојот на риболовниот туризам“, велат од МЗШВ.


Владата го раскина договорот за „Казандол“


Скопје, 27 март, 2018 - 16:54 (META) 

На денешната 61. седница, Владата донела одлука за едностран раскин на договорот за рудникот „Казандол“, информираше премиерот Зоран Заев на прес-конференција попладнево.

Тој, напоменувајќи дека Владата е посветена на економскиот раст, но посебно на заштита на здравјето на граѓаните од општините Валандово, Богданци и Дојран, рече дека е донесена одлука еднострано да се раскине договорот за концесија со компанијата „Сардич ДООЕЛ увоз-извоз„ Скопје, бидејќи не е исполнет условот во рок од две години од доделувањето на концесијата да се изгради постројка за експлоатација на катоден бакар со капацитет да експлоатира најмалку 50 проценти.

Договорот е потпишан од претходната влада, на 22 јули 2015 година.

– Тоа е услов во јавниот повик и тендерската документација. Оваа одлука за раскинување ќе влезе во сила наредниот ден од денот на објавување во „Службен весник“ – рече Заев.

Прашан за најавите за тужба и обештетување од 380 милиони евра, односно за финансиската штета за државата, Заев рече дека одлуката е донесена оти не е исполнет специјалниот услов што е ставен во јавниот повик.

– Ако не постоел тој услов, веројатно можеле да се јават и други концесионери. И тој услов е дел од договорот. Прекршувањето на ваквите посебни услови е апсолутно сериозно прекршување на договорот и Македонија, ако не го раскине договорот, може да биде тужена од секој концесионер што можел да ја добие концесијата. Ние ги разгледавме сите аспекти и Владата и Министерството за економија нема како да постапат поинаку – рече Заев.


Заев: Парите од концесионерот „ТАВ“ ќе бидат вложени во значајни проекти


Анкара, 12 февруари, 2018 - 9:48 (META) 

Премиерот Зоран Заев, во рамките на неговата дводневна посета на Турција, утрово се сретна со претставници на групацијата „ТАВ“, при шти биле утврдени приоритетите за инвестицијата од 45 милиони евра од концесионерот на аеродромот во Скопје.

Парите, соопштуваат од Владата, ќе бидат вложени во значајни проекти за граѓаните.

– Станува збор за инвестиции во градинки, училишта, одводни и канализациски мрежи и локални и регионални патишта, она што им е реално потребно на нашите граѓани – рече Заев.

Премиерот денеска ќе се сретне со државниот врв на Турција, со премиерот Бинали Јилдирим и претседателот Реџеп Таип Ердоган.


Србија ќе има приходи од 1,5 милијарди евра од концесијата на аеродромот „Никола Тесла“


Белград, 6 јануари, 2018 - 17:08 (META) 

Премиерката на Србија, Ана Брнабиќ изјави дека планираните приходи од концесијата на белградскиот аеродром „Никола Тесла“, ќе бидат 1,5 милијарди евра. Концесијата ја доби француската компанија „Ванци ерпорт“, која со аеродромот ќе стопанисува во наредните 25 години, а потоа аеродромот ќе се врати во сопствеништво на државата.

Таа сопшти дека француската корпорација дала најдоба понуда за концесија и станува збор за компанија која има осум аеродроми во светот.

Српскиот претседател. Александар Вучиќ изјави дека проектот е започнат во време на неговата влада, но најголем дел од работата ја завршила сегашната влада.


Охридско Eзеро порибено со сто илјади пастрмки


Охрид, 28 септември, 2017 - 17:26 (META) 

Охридско Езеро денеска беше порибено со 100.000 пастрмки, а оваа количина е дел од вкупно планираните 2.500.000, информираат од Министерство за земјоделство, шумарство и водостопанство (МЗШВ).

Порибувањето почна на 11 септември и ќе се спроведува до првата половина на октомври. Вкупната финансиска поддршка за годинешната Програма за рибарство и аквакултура изнесува 90 милиони денари.

„Во насока на заштита и одржување на рибниот фонд, како и заради планско експлоатирање на рибите, а во согласност со Законот за рибарство и аквакултура, рибите од риболовните води од Охридското Eзеро се доделени на концесија. Со оглед на тоа дека концесијата за вршење стопански риболов на сегашниот концесионер за Охридско Eзеро истекува наредната година, на почетокот на 2018 година е предвидено започнување на постапка за доделување на нова концесија за наредниот шестгодишен период“, се вели во соопштението на МЗШВ.


„Тополки“: Концесискиот договор го потпишавме со владата предводена од ВМРО-ДПМНЕ


Скопје, 23 септември, 2017 - 16:31 (META) 

Опозициската ВМРО-ДПМНЕ и одредени медиуми шират невистини за работата на друштвото „МХЕ Тополки“ служејќи се со фотографии од хидроелектрана која има правосилно одобрение за градење од април 2017 година, потпишано од тогашниот министер за транспорт и врски, Владо Мисајловски, во владата предводена од ВМРО-ДМПНЕ, реагираат од компанијата на прес-конференцијата на Бојан Стојаноски од ВМРО-ДПМНЕ.

Во соопштението се вели дека фотографиите кои ВМРО-ДПМНЕ ги прикажува од оваа хидроелектрана се од сосема друга мала хидроелектрана.

„Фотографиите кои ги приложуваат од терен се од „МХЕ Тополка 317“, за која е добиено правосилно одобрение за градење од 13 април, односно пред пет месеци. Почитувајќи ги законските постапки, „МХЕ Тополки“ на 20 април ги извести сите државни институции и инспекторати за почнувањето на изградбата на „МХЕ Тополка 317“. Друштвото „МХЕ Тополки“ работи според обврските и динамиката одредени во концесискиот договор потпишан со владата, предводена од ВМРО-ДПМНЕ уште во 2015 година“, се вели во соопштението на компанијата.

Од таму додаваат дека тие како фирма се само една од многуте македонски компании кои последниве месеци јавно говорат за репресиите и проблемите што ги имале со претходната влада на ВМРО-ДПМНЕ.

„За секое понатамошно ширење невистини и неосновани обвинувања за друштвото „МХЕ Тополки“, ќе поведеме соодветни судски постапки“, велат од компанијата.


Владата на Србија бара концесионер за белградскиот аеродром „Никола Тесла“


Белград, 12 февруари, 2017 - 17:13 (META) 

Владата на Србија и белградскиот аеродром „Никола Тесла“ објавија јавен повик за давање под концесија на аеродромот на 25 години, јавува дописникот на „Мета“ од Белград.

Концесијата се дава за финансирање, развој преку изградба и реконструкција, одржување и управување со инфраструктурата на аеродромот, како и извршување на дејноста оператор, се наведува во повикот објавен на интернет-страницата на белградскиот аеродром.

На огласот не можат да се пријават, односно концесија на можат да добијат компании кои управуваат со аеродроми во радиус од 450 километри од Белград.

Владата на Србија верува дека годишниот приход од концесијата за аеродромот „Никола Тесла“ би можел да изнесува 10-11 милиони евра, плус надоместокот за концесија од околу 350 милиони евра.


Тројца кинески рудари пронајдени мртви во рудникот Булќиза во Албанија


Тирана, 10 февруари, 2017 - 10:25 (META) 

Три лица, рудари од Кина, се пронајдени мртви во рудникот за хром во албанскиот град Булќиза, јавува дописничка на „Мета“ од Тирана.

Со овој рудник стопанисува Самир Мане, еден од најбогатите бизнисмени во Албанија. Но, за рудникот постојано има обвинувања дека рударите работат во небезбедни услови. Тие досега протестираа двапати, поради смрт на нивни колеги.

Според пишувањата на албанските медиуми, повеќе од 30 рудари загинаа во овој рудник во последните пет години.