!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ИД ја презеде одговорноста за терористичкиот напад во Манчестер


Манчестер, 23 мај, 2017 - 11:03 (META) 

Исламска држава ја презеде одговорноста за нападот во Манчестер во кој загинаа 22 лица. Припадниците на терористичката организација на социјалните мрежи објавија видео запис во кој велат дека тие се одговорни за нападот.

Во експлозијата за време на концертот на американската пејачка Ариана Гранде во Манчестер синоќа загинаа 22 лица, а повредени се 59.

Полицијата соопшти дека експлозијата се третира како терористички напад и верува дека напаѓачот делувал сам и дека загинал во експлозијата.


Најмалку 22 лица загинаа, а 59 се повредени во терористички напад во Манчестер


Манчестер, 23 мај, 2017 - 8:40 (META) 

Најмалку 22 лица загинаа, меѓу кои и деца, а 59 се повредени во експлозија која се случи на завршување на концертот на пејачката Ариана Гранде во Манчестер, изјави шефот на полицијата Јан Хопкинс.

Според него, полицијата е уверена дека напаѓачот кој ја активирал бомбата загинал во експлозијата и дека само тој го извршил нападот. Тој информираше дека напаѓачот носел импровизирана експлозивна направа и дека истрагата ќе утврди дали бил дел од терористичка мрежа.

Британската премиерка Тереза Меј рече дека инцидентот се третира како терористички напад и ако тоа се потврди, тоа ќе биде најсмртоносниот напад во Велика Британија од 2005 година, кога четворица муслимани во бомбашки напад убија 52 лица во Лондон.

– Работиме на утврдување на сите детали и она што полицијата го третира како терористички напад. Нашите мисли се со жртвите на семејствата на оние кои се повредени во овој инцидент – се вели во соопштението од кабинетот на премиерката.

Улиците околу арената каде што се одржал концертот и понатаму се затворени, а има голем број на полицајци и припадници на антитерористички единици кои и понатаму го пребаруваат теренот.

Полицијата соопштила дека експлозијата се случила око 22.30 часот по локално време во арената каде што се одржувал концертот, а во кој може да собере 21.000 публика.

Сведок кој присуствувал на концертот изјавил дека слушнал голема експлозија додека излегувал од арената, а потоа и врескање и стампедо на луѓе кои се обидувале да ја напуштат зградата.

На видео-снимките се гледа дека посетителите на концертот, претежно млади, врескаат и трчат низ арената, но и родители кои си ги бараат своите деца.


Вечерва во Струга, концерт на вокалниот ансамбл „Симбиоза“


Струга, 13 април, 2017 - 11:34 (META) 

Вечерва, од 20 часот, во холот при Центарот за култура „Браќа Миладиновци“ во Струга, ќе се одржи хорски концерт на вокалниот ансамбл „Симбиоза“.

„Симбиоза“ е мултиетнички, мултикултурен и образовен проект кој произлегува од секојдневната соработка на двајца млади просветни работници, Дамјан Темков (композитор) и Бехар Весели (диригент).

Проектот „Симбиоза“ досега има реализирано шест концерти на реномирани фестивали.

Овој проект, иако најавен само како образовен, има многу поширока мултиетничка, спојувачка димензија, за што сведочи и самата програма.

Публиката, меѓу другото, ќе може да ги доживее македонските изворни песни „Параходот“, „Не си го продавај Кољо“ на албански јазик.

Влезот за концертот е бесплатен.


Концерт по повод Меѓународниот ден на полетувањето на човекот кон вселената


Свети Николе, 6 април, 2017 - 11:55 (META) 

Вечерва, од 19 часот, во амфитеатарот на Меѓународниот славјански универзитет „Гаврило Романович Державин“, во Свети Николе, целовечерен концерт ќе исполнат солистки, членки на врвниот руски вокален ансамбл од градот Електростаљ, Московска област во Руската Федерација.

Овој културен настан го организира Амбасадата на Руската Федерација во Македонија, по повод 12 април, Меѓународниот ден на полетувањето на човекот кон вселената, пишува порталот „Исток прес“.

Тоа е денот кога советскиот космонаут Јуриј Алексеевич Гагарин како прв човек во светската историја, полета од земјата кон вселената.

Јуриј Гагарин, истовремено е првиот човек кој ја прелета Земјата околу нејзината орбита.
Јуриј Алексеевич Гагарин, руски космонаут, е роден во 1934 година во местото Гжатска, а животот го загуби во авионска несреќа во 1968 година.

На 12 април 1961 година во „Васток-1“ од Земјата полета кон вселената. Летот беше успешен и траеше 108 минути, по што Гагарин се спушти на земјата, јужно од Саратов.


Црвен крст организира хуманитарен концерт за помош на самохрана мајка


Скопје, 3 март, 2017 - 16:49 (META) 

Под мотото „Подај рака – спаси некого од мака“, ќе се одржи хуманитарен фолклорен концерт на 10 март во Домот на АРМ во Скопје, со почеток од 20 часот.

Целта на овој хуманитарен концерт е собирање финансиски средства за самохрана невработена мајка од населбата Козле во Скопје, која со своето малолетно дете живее во многу тешка состојба.

Билетите ќе чинат 100 денари и може да се купат на билетарницата во Домот на АРМ или пред почетокот на концертот.

Хуманитарниот концерт е дел од програмата „Црвен крст во акција – Промоција на хумани вредности“ (ЦКА-ПХВ),  кој претставува национална алатка за привлекување и за задржување на волонтери во Црвениот крст на Р.Македонија.

Истата се имплементира во сите општински организации на Црвен крст и на годишно ниво обучува околу 1.200 младинци, потенцијални волонтери во организацијата и 40 дисеминатори кои работаат со младинците.

Младите добиваат обука за вредностите на Црвениот крст, учат за културата како систем од вредности, за културата на дијалог како основен услов за градење интеркултурно опшество.


Во Македонија гостува „Гласот на Јунан“, светската атракција од Кина


Охрид, 26 јануари, 2017 - 12:55 (META) 

Со два концерти, вечерва во Скопје и еден в сабота во Охрид, во Македонија гостува светската атракција од Кина „Гласот на Јунан“.

Овој музички спектакл на ансамблот од Пекиншката академија на традиционалната музика, го организира Фестивалот „Охридско лето“.

Класичната кинеска музика пренесувана од генерации на генерации е дел од овој перформанс, исто како што е и восхитувачки богатата фолклорна култура од различните региони на Кина.

– Кинеската музика може да се пофали со историја која се протега и до неколку илјади години во минатото, а токму провинцијата Јунан е позната по исклучително високиот степен на етничка разноликост. Тука припаѓаат најголемиот број етнички групи помеѓу провинциите на Кина. Од 56 официјално признати етнички групи на Кина, дури 25 се наоѓаат во Јунан – велат од „Охридско лето“.

Билетите за двата концерти се веќе во продажба преку продажната мрежа на „МК тикетс“, по цена од 300 денари за концертот во Скопје и 200 денари за концертот во Охрид.


Вечерва ќе се одржи традиционалниот концерт „Божиќна слава“


Скопје, 7 јануари, 2017 - 13:01 (META) 

Во организација на хорот „Св. Злата Мегленска“, вечерва, од 19,30 часот, во градската православна црква „Пресвета Богородица“, во Скопје, ќе се одржи традиционалниот концерт „Божиќна слава“. Влезот е слободен, а концертот е од хуманитарен карактер.

Присутните ќе можат доброволно и според своите можности да донираат, додека собраните средствата се наменети за деца со посебни потреби и за ранливи категории граѓани.

Програмата ќе ја исполнат Младинскиот црковен хор на Повардарската епархија „Св.Кирил и Методиј“, детскиот хор „Фалсето“при МОБ и камерниот хор „Херувими“ од Скопје.

Солисти се Биљана Стефансон од Шведска, Лилјана Јовановиќ од Србија и Дарко Нешовски од Скопје.
Покровител на концертот е сопругата на претседателот Иванов, Маја Иванова.


Жан Мишел Жар го отвори „Таксират“


Скопје, 14 ноември, 2016 - 12:01 (META) 

Пионерот на електронската музика, Жан Мишел Жар, синоќа го одбележа отворањето на 18. издание на фестивлот „Таксират“. Станува збор за прв настап на францускиот музичар во Македонија кој на аудиовизуелниот перформанс во „ВИП арена“ во Скопје настапи со добро познати композиции од неговата 40-годишна кариера. Жар се смета за основоположник на мултимедијални перформанси и има заслуги за етаблирање на електронската и „њу ејџ“ музика.


Протестни концерти во Албанија целосно цензурирани од медиумите


Тирана, 2 ноември, 2016 - 11:31 (META) 

Протестни концерти на албански пејачи и на артисти, кои се противат на изградба на електрани и на увоз на отпад, се одржаа во Националниот парк Валбона и во Тирана, но тие беа целосно игнорирани од главните албански медиуми.

На протестот кој се одржа во Тирана минатата недела присуствуваа неколку илјади граѓани.

Артистите извикуваа „Не допирајте ја Валбона“ и „Да не се увезува отпад во Албанија“.


Албански уметници со протестен концерт против изградба на хидроцентрали


Тирана, 10 октомври, 2016 - 10:34 (META) 

Протестен концерт на 29 октомври во Валбона, а на 30 октомври во Тирана, против изградба на 14 хидроелектрични централи, ќе одржат познатите албански пејачки Еда Зари и Елина Дуни. Ова е првпат во Албанија уметници да протестираат против економските политики на власта. Преку пораката „Заштита на нашата земја, вода, воздух и живот“, пејачките ги повикаа и другите колеги да им се предружат.

Регионот Валбона е дел од национален парк на Албанија и има високо ниво на заштита од Обединетите нации.

Локалната заедница од регионот се противи на плановите за изградба на хидроцентрали во таа област од еколошки, економски и од правни причини.

Досега беа одржани неколку протести откако владата потврди дека концесиите се веќе потпишани од претходната власт и дека повлекувањето ќе биде премногу скапо.

Против изградбата на хидроцентралите поведена е и интернет-петиција, која досега има 3.000 потписи.