Зголемени контроли во Тетово поради сообраќајниот хаос


Тетово, 8 ноември, 2018 - 15:15 (META) 

Погрешно паркираните возила во Тетово се секојдневие, особено во централното градско подрачје. Од полициската станица за безбедност во патниот сообраќај во Тетово, во изминатиот период активно работат на подобрување на ваквата состојба.

Велат дека контролните активности се засилени, а погрешно паркираните возила се дислоцираат и санкционираат. Тие упатија апел и до сите оние кои возат со прекумерна брзина, која е најчестата причина за сообраќајни несреќи во Полошко.

– Оваа наша должност ја реализираме со засилено темпо, се со цел а се ослободат пешачките патеки и безбедноста на граѓаните да биде зголемена. Исто така, упатуваме апел за прилагодување на брзината на возење, особено во централното градско подрачје. Обезбедени сме со најсовремени радари преку кои се детектираат возачите кои возат со брзина над дозволената – истакна командирот Зоранчо Талев.

Во октомври годинава, на подрачјето на Тетово, регистрирани се вкупно 65 сообраќајни несреќи, во кои немало човечки жртви. Несреќите завршиле со тешки и лесни повреди на патниците, и со причинета материјална штета.


Спасовски: Сите истраги против граѓанските организации официјално се затворени


Скопје, 1 март, 2018 - 14:46 (META) 

Сите истраги против граѓанските организации и фондации што почнаа во 2016 година, а се одвиваа и во голем дел од 2017 година се официјално затворени, соопшти министерот за внатрешни работи Оливер Спасовски, на денешната средба со претставници на дваесетината организации.

На средбата на која присуствуваа и директорот на Бирото за јавна безбедност Лазо Велковски, директорот на Управата за финансиско разузнавање Блажо Трендафилов и директорот на Управата за финансиска полиција Арафат Муареми, тој ги увери учесниците дека не се потврдени сомнежите, односно „не се обезбедени докази за субјектите кои се предмет на криминалистичката обработка“.

МВР по завршување на проверките по барањата од Основното јавно обвинителство за гонење организиран криминал и корупција, доставило известувања до обвинителството дека „сомнежите се неосновани, а врз основа на прибавените информации е констатирано дека нема основи за понатамошна истрага“.

„Врз основа на тоа, истражните органи до јавното обвинителство доставија предлог за затворање на истрагата“, известија подоцна од МВР.

На средбата било истакнато и дека во тек е истрага против тие што го иницирале политичкиот прогон преку злоупотреба на институциите на системот, но детали не се соопштуваат.

Големите контроли во организации што беа критички кон власта во 2016 и 2017 година од граѓанската јавност беа оквалификувани како огромен притисок и заплашување од тогаш владејачката ВМРО-ДПМНЕ врз критичарите на власта.

Со месеци во истрагите беа вклучени и МВР и УЈП, но беа пронајдени никакви докази за сомнително работење или направени прекршоци.


УЈП најави засилени контроли во пресрет на Супер-купот


Скопје, 11 јули, 2017 - 21:09 (META) 

Управата за јавни приходи најави дека ќе го засили контролите во пресрет на Супер-купот во Скопје, фестивалите за пиво и настаните од културата.

Директорката Сања Лукаревска соопшти дека мерките за надзор на готовинскиот промет се превентивни, но и за поефикасно да се соберат даноците. Таа исто така најави и казни за фирмите кои не плаќаат данок.

Од УЈП соопштуваат дека во периодов е најизразено одбегнувањето плаќањето данок кај хотелите, рестораните, баровите, превозот и други дејности во услужниот сектор. На тоа укажуваат и 195 контроли што инспекторите викендов ги спровеле. Тие утврдиле неправилности во 325 објекти. Дел од компаниите кај кои се забележани неправилности издавале компјутерски, но нефискални сметки, други имале паралелен систем неповрзан со УЈП, а трети користеле стари, одјавени фискални апарати.


ДКСК: Очигледно сме погодиле во целта штом не стивнуваат реакциите на невладините


Скопје, 4 јуни, 2017 - 19:44 (META) 

Државната комисија за спречување на корупцијата (ДКСК) постапувала и постапува во сите случаи каде што има индиции за несовесно работење и за злоупотреба на службената позиција и на овластувањата, се вели во реакцијата на Антикорупциската комисија на денешното соопштение од 22 граѓански организации и фондации во кои шест месеци се вршат контроли по налог на Комисијата.

Од ДКСК велат дека очигледно погодиле во целта штом реакциите и нападите на граѓанските организации врз комисијата не стивнуваат.

„Доколку граѓанските организации немале што да кријат, ќе ја поздравеа постапката поведена од државен орган и ќе излезеа уште помотивирани да работат понатаму. Во кој дел овие граѓански организации препознаа постапување за партиски цели? Контрола на работењето на граѓанските организации мора да има не само од донаторите туку и од надлежните органи во согласност со законските прописи во Република Македонија, исто како што се вршат контроли врз сите државни институции и приватни фирми“, стои во соопштението на ДКСК.

Во врска со наводите дека Антикорупциската комисија не треба да се занимава со работата на граѓанските организации, оттаму велат дека станува збор за елементарно непознавање на надлежностите, работата и на постапувањето на Државната комисија за спречување на корупцијата.

Во соопштението на ДКСК се наведува дека предметите против организациите се оформени врз основа на „објавени информации и фотографии на интернет-порталите во Македонија, кои укажуваат на сомневања за сторени незаконити дејства на поединци, здруженија на граѓани и една политичка партија во периодот од денот на донесување на одлука за распишување избори до завршување на изборот за пратеници во Собранието на Република Македонија и изборот на Владата“.


Невладините бараат власта и институциите да ја испитаат работата на Тантуровски и на ДКСК


Скопје, 4 јуни, 2017 - 16:17 (META) 

Власта и институциите да ја проверат основаноста на контролите во невладините организации и да ја истражат злоупотребата на службената должност за политички притисок и дискриминација од сите засегнати раководители кои се дел од прогонот. Ова денеска повторно го побараа 22 граѓански организации и фондации во кои изминатите шест месеци Управата за јавни приходи (УЈП) и Финансиската полиција вршат контроли иницирани од Државната комисија за спречување на коруција (ДКСК).

Организациите велат дека се револтирани од изјавите на претседателот на Антикорупциската комисија, Игор Тантуровски, во кои, според нив, тој покажува целосно непознавање за начинот на нивното функционирање и работа.

„Ако подобро ја познава работата на НВО-секторот, тогаш Тантуровски ќе знае дека секој домашен и странски донатор што одлучил да поддржи проект и дал финансиска поддршка на невладина организација, пропишал правила според кои грантистите се обврзуваат да му подготвуваат детални месечни, квартални и годишни наративни и финансиски извештаи. На тој начин се следат трошењата на парите од страна на грантистите. Дополнително, организациите на крајот на проектите најчесто ангажираат надворешни ревизори чија лупа детално го котролира начинот на трошење. Тантуровски и неговите антикорупционери како државно тело имаат начини како да ги проверат средствата доколку им се сомнителни и притоа воопшто да не ги малтретираат организациите. Антикорупционерите само треба да ги земат податоците од Централниот регистар или од Управата за јавни приходи каде се евидентирани сите проекти за да ја проверат работата, наместо да иницираат повеќемесечни контроли кои ги чинат пари и организациите и граѓаните“, стои во заедничкото соопштение на 22 невладини организации.

Тие велат дека е смешна и неиздржана изјавата на Тантуровски дека „тој се исплашил од влезот на пари за тероризам во Македонија преку граѓански организации и фондации“.

„Образложението на Тантуровски, иако е апсурно смешно, покажува на сериозен проблем дека ДКСК наместо да ја врши работата за која е платена од народни пари и да трага по стотиците веќе откриени коруптивни скандали на политичари, државни институции или јавна администрација, се вплеткува во спроведувањето на груевистичките методи за линч на неистомислениците“, велат од НВО.

Од организациите велат дека сега, токму од Антикорупциската комисија очекуваат да се ангажира и да спроведе постапка за граѓански организации кои добивале пари од владата и да провери како тие ги трошеле народните пари во последните години.

„Тантуровски може да почне од последната распределба, објавена во „Службен весник на Република Македонија“ на 23 мај, вредна токму 800.000 евра дадени на граѓански организации главно непознати во Македонија“, се вели во соопштението.


Исплашени од инцидентите, бегалците си заминуваат од Идомени


Атина, 13 април, 2016 - 9:46 (META) 

Околу 800 до 1.000 бегалци си заминаа од Идомени во последните 48 часа. Во понеделникот и во вторникот од Идомени заминаа 15 автобуси полни со бегалци, а во кампот и понатаму доаѓаат автобуси подготвени да ги пренесат бегалци до организираните центри.

Исплашени од насилството во неделата, бегалците кои се главно дојдени со семејства по повеќе од два месеци во Идомени одлучија да го напуштат кампот кој сметаат дека веќе не е безбеден ниту за нив, ниту за нивните деца.

Со заминувањето од Идомени бегалците покажуваат дека веќе се губи надежта дека ќе може како било да се премине границата и да се замине од Грција. Бегалците се префрлаат во центрите во Северна Грција и во Пиреја каде има место, а грчката влада бара празни стари индустриски хали околу Солун и Атина кои би можеле да се расчистат и да се уредат како привремени прифатни центри за бегалците.

Новиот бегалски центар Скарамага, кој е со капацитет за 1.000 луѓе, во рок од два дена се преполни и таму веќе има и повеќе од што може да собере. Идејата на грчката влада е да се најдат нови простори и да се обезбедат дополнителни 20.000 места за да може комотно да се згрижат сите бегалци од Идомени каде има повеќе од 10.000 бегалци во моментов, од Пиреја каде има околу 3.800 луѓе, но и од стариот аеродром Елинико каде веќе има околу 6.000 бегалци.

Грчката полиција која продолжува со построгите контроли на влезот на Идомени вчера приведе 17 странски активисти и волонтери од Германија, Британија, Шведска, Чешка, Австија, Португалија, Палестина, но и тројца Грци. Повеќето беа ослободени, а полицијата задржа само еден активист од Германија поради поседување нож.

Тензичната клима и насилството, за жал, продолжуваат во камповите. Тензично е и на Идомени, но и во Пиреја каде доцна ноќеска дојде до тепачка меѓу бегалци од Авганистан и од Сирија.

Во меѓувреме Европската комисија ѝ даде рок од две недели на Грција да се подобри начинот на кој се заштитуваат надворешните граници. Во европскиот извештај од надзорот на начинот на кој Грција се справува со бегалската криза, се наведува дека Грција има направедно напредок од последниот извештај, меѓутоа треба да направат уште ред други работи за да се осигури дека ќе може да продолжи да добива финансиска помош од ЕУ за неопходната инфраструктура, техничка и експретска помош за справување со бегалските проблеми.

Во извештајот е наведено дека од 2015 година Грција има добиено 181 милион евра за бегалската криза и тоа 75 милиони на државните органи како министерствата, полицијата, војската и 106 на невладини организаии како УНХЦР, Европската канцеларија за поддршка за азил и Меѓународната организација за миграција.


Отворен аеродромот во Брисел – 12 дена по терористичките напади


Брисел, 3 април, 2016 - 14:40 (META) 

Дванаесет дена по терористичките напади во Брисел повторно е отворен аеродром „Завентем“ во Брисел, од кој денеска е планирано да полетаат три патнички авиони, јавуваат светските медиуми.

Како што пренесува „ХРТ“, патниците се повикуваат да дојдат три часа пред полетувањето поради строгите безбедносни мерки. Патниците мора да дојдат со автомобили бидејќи сè уште не е воспоставен железничкиот и автобускиот превоз до аеродромот.

На аеродромот се поставени специјални камери кои ќе ги вчитуваат регистерските таблички и ќе се прават проверки на автомобилите по случаен избор.

Патниците и нивниот багаж ќе бидат подложени на детални контроли, а ќе бидат засилени потролите на полицијата и војската.

Првиот од трите планирани лета е во 13.40 часот за Фаро, Португалија. Другите два лета се до Торино, Италија и до грчката престолнина, Атина.

Во терористичките напади во Брисел загинаа 32 лица, од кои 16 на аеродромот „Завентем“.


Министрите на ЕУ ќе разговараат за граничните контроли


Амстердам, 25 јануари, 2016 - 10:03 (META) 

Министрите за внатрешни работи на земјите-членки на ЕУ денеска во Амстердам ќе разговараат за продолжување на привремените гранични контроли во шенген-зоната, кои беа воведени за да се намали напливот на бегалци.

Словенечката новинска агенција СТА наведува дека кон средина на мај истекува рокот за погранична контрола на границите на Германија и на Австрија, а во пресрет на пролетта членките на ЕУ може да одлучат да го активираат членот 26 од Шенгенскиот договор, кој досега не е користен, а овозможува воведување двегодишна контрола.

– Сè уште го немаме употребено тој механизам, но постои таква можност и комисијата е подготвена да ја искористи доколку е потребно – истакна неодамна портпаролка на Европската коммиција, Наташа Берто, додавајќи дека ЕУ сè уште не е во таква ситуација, но дека министрите во Амстердам ќе имаат можност да разговараат во врска со тоа.


Царината заплени 117 литри алкохолни пијалаци без бандероли


Скопје, 31 јули, 2015 - 13:55 (META) 

Околу 117 литри жестоки алкохолни пијалаци без или со странски бандероли, за кои не била платена акциза, заплениле тимовите на Царинската управа и на Упрвата за јавни приходи (УЈП) во заедничка акција што била спроведена во периодот од 27 до 30 јули.

Како што соопштуваат од Царинската управа, контроли биле извршени во педесетина кафе-барови, ресторани, супермаркети и продавници во Велес, Куманово, Охрид, Ресен, Струга, Битола и во Прилеп.

Во 13 од нив, инспекторите на Царината и на УЈП откриле незаконска продажба на алкохолни пијалаци.

„Привремено се задржани околу 117 литри жестоки алкохолни пијалоци без или со странски бандероли за кои не е платена акциза и за кои не постојат документи за потекло и за здравствена исправност. Од нив 69 литри се домашна ракија, а остатокот се различни видoви жестоки алкохолни пијалоци (виски, узо, ракија, ликери)“, стои во соопштението на Царинската управа.

Оттаму додаваат и дека во продавница во Струга, во бункер во подот под пултот за продажба, биле откриени и 23 кутии цигари од марките „марлборо“ и „престиж“, со странски или без бандероли.

„Овие контроли се спроведуваат за да се обезбедат основните принципи за фер конкурентност, правилна наплата на буџетски приходи, но, пред сè, да се заштити здравјето на луѓето. Како резултат на сите мерки поврзани со акцизите што ги презема Царинската управа во континуитет, но и зајакнатите контроли на употребата на акцизните маркички, во периодот од јануари до јули годинава, наплатени се приближно 15 отсто повеќе акциза за тутун и за тутунски производи отколку во истиот период во 2014 година“, велат од Царината, додавајќи дека „акциите за откривање нелегална продажба на акцизна стока ќе продолжат и понатаму“.


Парични глоби и привремено затворање на осум деловни објекти во Охрид


Охрид, 20 јули, 2015 - 12:08 (META) 

Управата за јавни приходи (УЈП) во Охрид изрече парични глоби и привремено затвори осум деловни објекти во Охрид.

Во акцијата, спроведена викендов, инспекторите констатирале неправилности во работењето. Поради неиздавање фискални сметки, им биле изречени глоби и мерка привремено затворање во период од 15 дена, а дополнително кај уште два деловни субјекти било утврдено дека се продаваат алкохолни пијалаци без бандероли.

Управата за јавни приходи претходно најави дека поради зголемениот обем на работа, ќе врши засилени контроли во туристичките центри, за превенција од појава на финансиски малверзации и даночен ризик кај одредени дејности, кои се особено активни во екот на туристичката сезона.