Оранжерии за марихуана како печурки никнуваат во карбинскиот регион


Штип, 21 јануари, 2019 - 9:59 (META) 

Нови пластеници за одгледувањето на коноп, речиси целосно подготвени за пролетната сезона, можат да се забележат во близина на седиштето на Општината Карбинци. Околу оранжериите, поставен е видео надзор со предупредување за електрифицирана ограда. Ова е вториот комплекс на оранжерии со површина од близу три хектари на територијата на Општината Карбинци.

Од таму соопштуваат дека во подготовка е поставување на најголемата плантажа со марихуана во селото Долни Балван. Покрај новите две, веќе две години на производство на коноп работи компанијата „Оаза алкалоиди“. Практично, на воздушна линија од три километри во овој регион, ќе има вкупно три плантажи, кои ќе работат на производство на цвет од марихуана. Најновата, третата плантажа, која е во подготовка ќе биде поставена на 12 хектари. Земјиштето е земено под закуп.

Од Општината Карбинци соопштуваат дека немаат никаква улога во давање дозволи и други административни работи, туку само даваат одобрение при поставувањето времени контејнери. А за тоа зошто токму оваа општина станува мека за производство на коноп, го гледаат во фактот дека има квалитетна и разработена земја, која често стои и необработена, па лесно оди процесот на добивање на земјиштето за поставување на оранжериите.

Инаку, во близина на овие три плантажи за марихуана, во атарот на Општината Свети Николе, се наоѓа плантажата на компанијата „МАМ“, зад која стои капиталот на братот на премиерот Зоран Заев, Вице Заев.


Државата догодина ќе може да се задолжи на домашниот пазар за 88,6 милиони евра


Скопје, 28 декември, 2017 - 19:34 (META) 

Владата денеска ја одржа 46. седница на која, меѓу другото, донесе одлука за утврдување на максималниот износ на ново задолжување преку издавање на државни хартии од вредност на домашниот финансиски пазар во 2018 година, кој ќе изнесува 5,4 милијарди денари или околу 88,6 милиони евра, соопштија од владината прес-служба.

Издавањето на државните хартии од вредност се врши согласно календарот за планираните емисии на државните хартии од вредност кој го утврдува и објавува Министерството за финансии на почетокот на периодот за кој се однесува, во согласност со Буџетот за 2018 година и врз основа на Законот за јавен долг.

На денешната седница Владата ја разгледала информацијата и ѝ дала одобрување на фирмата „ТХОР Имепекс ДООЕЛ, Скопје“ за изградба на ветерна електрана Богословец. Тоа е првата приватна ветерна електрана во земјава.

Владата на седницата ја усвоила и информацијата дека Друштвото за производство, трговија и услуги „Медикал 420“ од Битола ги исполнило условите за одгледување на коноп (марихуана) за медицински цели.


Душко Илиевски не се согласува со отштетата од 6.500 евра


Битола, 26 ноември, 2014 - 15:34 (META) 

Фармерите Душко, Цане и Томе Илиевски од Битола добија 6.500 евра отштета за душевна болка за  12 дена поминати во притвор, пред четири години. Тие беа осомничени дека во нивата со компири одгледуваат марихуана. Вештачењето покажа дека во нивната нива, во индустрискиот дел на Битола, расте див коноп.

Оваа одлука вчера ја донел Основниот суд во Битола, откако поранешните фармери на „Сведмилк“ ја тужеа државата за нанесена душевна болка и за претрпен старав во притворското одделение на битолскиот затвор.

Летото 2010 година, кога фамерите беа притворени, Илиевски тврдеше дека бил тепан и удиран со стол и од него било барано да потпише дека намерно одгледувал марихуана во нивата. Фармерот по излегувањето од притвор тврдеше дека уништен му е сточниот фонд од 86 грла добиток.

Сега, според изјавата на Душко Илиевски , неговото семејството од државата бараше отштета од 80.000 евра, но судот досуди по 1.000 евра за деновите поминати во притвор и по 1.150 евра за нанесена душевна болка.

– Мојата болка не вреди колку на Груевски и на Мијалков, кога ги тужеа Заев и весникот „Фокус“. Зошто? Зошто сум селанец и сиромав. Јас ќе ѝ дадам 10.000 евра на министерката за внатрешни работи да помине 12 дена во притвор исто како јас и моите блиски – рече Илиевски.

Фармерот Душко Илиевски вели дека не е задоволен од пресудата и дека правдата ќе ја бара во второстепениот суд во Битола. Ако не е задоволен и од таа пресуда, вели дека нивниот предмет ќе замине за Стразбур.

– Ова е понижување од судот, јас се чувствувам како политички затвореник бидејќи сите докази беа во моја полза, а за џабе бев во притвор. Ако добиев 20.000 евра отштета од државата, можеби ќе бев задоволен од правдата. Но, вака не сум воопшто среќен, јас најавив дека тие пари ќе ги донирам на оние кои им се најпотребни. За мене ќе останеше само правдата – рече Душко Илиевски.

А.Б.