!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Објавен конкурсот за наградите „Крсте Чачански“ и „Јован Котески“


Струга, 21 декември, 2016 - 10:02 (META) 

Културниот центар „Бран“ и ревијата за книжевност „Бранувања“ од Струга, седми пат распишаа конкурс за наградите „Крсте Чачански“ – за необјавена збирка на кратки раскази и „Јован Котески“ – за необјавена поетска збирка.

Расказите, односно песните, не треба да се претходно објавувани.

Секој расказ треба да не биде подолг од 100 реда (три страници новинарски проред) и да има наративна форма.

Поетската збирка треба да содржи најмногу 50 песни, а секоја песна да не биде подолга од 30 стихови.

Ракописите во четири примероци треба да се испратат, најдоцна до 20 април 2017 година или по електронски пат на: raskazchachanski@hotmail.com, zbirkakoteski@hotmail.com.

Досегашни добитници на наградите „Крсте Чачански“, односно „Јован Котески“ се: Христо Петрески, Трајче Кацаров, Милован Стефаноски, Санде Стојчески, Петре Димоски, Витомир Долински, Марина Мијаковска, Добре Тодоровски, Славчо Ковилоски, Зоран Пејковски и Васил Тоциновски.


Втор уписен рок во средните училишта


Скопје, 4 јули, 2016 - 9:52 (META) 

Во средните училишта денеска се спроведува второто пријавување од јунскиот уписен рок за запишување ученици во прва година во учебната 2016/2017 година. Резултатите од запишувањето и слободните места ќе бидат објавени на 6 јули.

Првото пријавување за упис во средните училишта за гимназиско, стручно и за уметничко обазование и за спортската академија се одржа на 28 и на 29 јуни, а резултатите од запишувањето и слободните места беа објавени на 30 јуни.

Пријавувањето и запишувањето на учениците во августовскиот рок ќе биде на 24 август, а објавувањето на резултатите и слободните места е следниот ден (25 август).

Училиштата кои во двата уписни рока нема да ги пополнат местата утврдени со конкурсот што го објави Министерството за образование и наука, ќе продолжат со запишување ученици до 31 август.


Објавен конкурсот за наградата „Живко Чинго“


Охрид, 2 јули, 2016 - 10:34 (META) 

Општина Охрид го распиша традиционалниот конкурс за најдобар расказ за наградата „Живко Чинго“.

Наградата ќе биде врачена на 13 август, на културната манифестација „Вечер на Живко Чинго“, која ќе се одржи во неговото родно место, Велгошти.

Краен рок за доставување на трудовите до Општината е 31 јули. Жири-комисијата ќе ги објави резултатите од конкурсот во дневниот печат најдоцна до 8 август.

 


Француски институт го објави конкурсот „Моето минивидео 2016“


Скопје, 11 април, 2016 - 14:36 (META) 

Францускиот институт во Скопје, во соработка со Фондацијата за интернет и општество „Метаморфозис“ и регионот Нормандија, го организира второто издание на конкурсот „Моето минивидео“.

Конкурсот е отворен за млади од 18 до 28 години, кои се интересираат за мултимедијалната сфера и потребно е да имаат паметен телефон со камера.

Кандидатите треба да имаат желба слободно да го изразат своето мислење на конкретна актуелна тема, а оваа година тема ќе биде слободата на изразување.

Најуспешните минивидеозаписи од три минути ќе бидат прикажани на новото издание на Фестивалот на француски филм, кој ќе се одржи од 15 до 18 јуни 2016 година.

Победникот на конкурсот ќе биде гостин на фестивалот „Оф корт“ (Off-Court) во Трувил, Нормандија, а воедно ќе добие и подготвителни часови по француски јазик од Францускиот институт во Скопје.

За слектираните 15 кандидати наменети ќе бидат две подготвителни работилници, кои ќе се одржат на 12 и на 13 мај 2016 година, за да им се дадат упатства за пишување сценарио, за технички совети и за практична реализација на видеозаписот.

Формуларот за учество на конкурсот и на подготвителните работилници треба да се испрати на culture@ifs.mk најдоцна до 6 мај 2016 година.


„Бибер“ објави збирка раскази на тема помирување


Сараево, 5 април, 2016 - 14:45 (META) 

Книжевно-активистичкиот тим „Бибер“ денеска соопшти дека е објавена збирка кратки раскази на тема помирување, избрани на конкурсот што беше објавен минатата година.

Во збирката има 25 избрани ракази, меѓу кои и на авторите Владимир Табашевиќ, Надиа Герас и Слаѓана Љубичиќ, кои се наградени на конкурсот.

Обајвените и наградените раскази ги избра жирито во состав Дорунтина Баша, Фарук Шехиќ и Бојан Кривокапиќ.

Во збираката сите раскази се објавени на босански, хрватски, црногорски, српски, македонски и на албански јазик.

„Промоциите на збирката ќе бидат одржани во текот на мај во Сараево, Скопје и во Белград, а се надеваме, подоцна, и во други градови во регионот“, велат од тимот на „Бибер“.

„Бибер“ е книжевно-активистички тим формиран околу идејата дека уметноста може да инспирира општествена промена.


МОН со грант од 700.000 евра ќе финансира проекти меѓу средни училишта и фирми


Скопје, 3 април, 2016 - 15:08 (META) 

Министерството за образование и наука (МОН) почнува со реализација на грант програма вредна 700.000 евра чија цел е поврзување на јавните стручни средни училишта со малите, средни и големи компании во земјава, соопшти денеска заменик-министерот за образование и наука, Спиро Ристовски.

Програмата се спроведува во соработка со Светската банка преку „Проектот за развој на вештини и поддршка на иновации“, а крајниот исход што се очекува од нејзината реализација, како што изјави Ристовски, е подобрување на практичната настава и вештините за вработување на учениците.

Конкурсот за аплицирање со предлог проекти е објавен на интернет-страница на МОН, mon.gov.mk.

– Програмата нуди неколку типови на грантови, односно нуди можност за финансирање на проекти за реализација на практичната настава во склоп на училиштата, за организирање на кампови за техничка обука за време на летен распуст, курсеви за практична обука во училиштата, проекти за реализација на практична настава во компаниите – директно на работно место, проекти за основање на реални училишни компании. Износот на средства кои можат да се добијат се движи од 5.000 до 20.000 евра по проект, во зависност од самиот проект. Може да се аплицира со повеќе проекти за повеќе типови на грантови. Предлог-проектите се доставуваат до Министерството за образование и наука најдоцна до 15 мај – рече заменик-министерот.

За распределбата на средствата, односно за прифаќање на апликациите, како што појасни Ристовски, ќе одлучува посебна комисија, формирана специјално за оваа намена, во која ќе учествуваат претставници на МОН и на стопанските комори.


Штипскиот универзитет ќе додели 500 стипендии


Штип, 26 јануари, 2016 - 18:52 (META) 

Универзитетот „Гоце Делчев“ од Штип распиша конкурс за доделување 500 стипендии за најдобрите студенти. Преку донации од бизнис-секторот и од стопанството, обезбедени се средства за кои ќе можат да конкурираат студенти од сите факултети и сите студиски програми.

– Ова е фонд за поддршка на добрите студенти. Сакаме да ги стимулираме за нивно квалитетно образование, а ние како универзитет ќе ја поддржуваме оваа акција до крајни граници и секоја година ќе го правиме ова понатаму, сè во зависност од тоа какви средства ќе обезбедиме во овој фонд – рече ректорот Блажо Боев.

Стипендиите ќе изнесуваат 200 евра за вкупно 500 студенти. Вакви стипендии, штипскиот универзитет ќе додели првпат. Во исто време, ова ќе биде и прва ваква соработка со бизнис-заедницата. Досегашната соработка се одвиваше во рамките на задолжителната практична настава за студентите.

Стипендиите се однесуваат на студенти со просек поголем од девет. Студентите потоа само ќе склучуваат договори со компаниите.


96-годишниот Мирко Иваноски, најстар жител во општините Охрид и Дебарца


Охрид, 29 ноември, 2015 - 11:36 (META) 

Охриѓанецот Мирко Иваноски(96), кој е роден на 17 ноември 1919 година, е прогласен за најстар жител во општините Охрид и Дебарца на конкурсот објавен од охридскиот Црвен крст, како дел од активностите за одбележување на Неделата на грижа за стари лица.

Како што пренесува порталот „Охрид њуз“, за брачна двојка со најмногу години поминати заедно, во рамките на истиот конкурс, се избрани Костадина и Душан Лошкоски од село Оровник, општина Дебарца, кои во брак стапиле на 15 февруари 1949 година, односно пред 66 години.

Првопрогласените на овој необичен конкурс добија пригодни подароци и признанија на свеченост наречена „За сончева есен на животот“, која се одржа во Центарот за култура „Григор Прличев“ во Охрид.

Во рамките на манифестацијата, на која модератор беше актерот Љупчо Тодоровски-Упа, на сцената настапија членовите на Културно-уметничкото друштво „Далги“, кое функционира во рамки на Здружението на пензионери од Охрид и од Дебарца.

Како дел од активностите во рамките на Неделата на грижа за стари лица, екипи на Црвениот крст, заедно со медицински тимови, организираат бесплатни здравствени прегледи за старите и изнемоштени лица во општина Дебрца, со посета во нивните домови.

Пунктови за бесплатни прегледи се поставени и на подрачјето на Охрид.


Доделени наградите за најдобрите фотографии за климатските промени во Македонија


Скопје, 20 ноември, 2015 - 13:51 (META) 

Министерот за животна средина и просторно планирање, Нурхан Изаири, француската амбасадорка Лоренс Оер и постојаниот претставник на УНДП, Луиза Винтон, денеска ги доделија наградите од првиот фото-конкурс за климатските промени во Македонија, насловен „#Делувај сега“.

Изаири ги поздрави учесниците во конкурсот и ја истакна важноста за зачувување на животната средина.
Дваесетте победнички фотографии во 10 категории, кои се избираа со гласање на социјалната мрежа „Фејсбук“ и со гласови од стручно жири, на фотографите им донесоа фото-камери, како и велосипеди, за првонаградените.

Посебни награди беа доделени на двајца новинари, кои со својата работа придонеле за зголемување на свеста за климатските промени.

vinton oer i izairiАмбасадорката Оер рече дека натпреварот е клучен настан за зголемување на свесноста во Република Македонија за ова многу важно прашање и истакна дека ова е само подготовка и придонес за претстојната Конференција за климатските промени во Париз.

Претставничката на УНДП, Винтон, рече дека е среќна што имало толкав голем интерес за првиот фото-натпревар и истовремено изрази задоволство од „веќе традиционалниот љубовен триаголник на соработка со француската амбасадорка и со министерот за животна средина“.

– Ги поздравуваме напорите на Министерството и на Владата за намалување на емисијата на гасови за 30 до 36 отсто. Досега 160 земји, односно речиси сите земји членки на ОН, се залагаат за овие промени, што ќе придонесе за намалување на емисијата на штетни гасови за 93 отсто – рече Винтон.

Фото-конкурсот „#Делувајсега“ беше повик до сите граѓани да ги искористат своите фотографски вештини и со својот објектив да го забележат климатските промени во Македонија.


МВР: Почна обуката на 660 кандидати за полицајци


Скопје, 7 октомври, 2015 - 15:00 (META) 

Денеска во Центарот за обука на кадри на Министерството за внатрешни работи (МВР) во Идризово, почна едногодишната обука на 660 кадидати за полициски службеници, селектирани по огласот за прием на 600 полицајци што беше објавен на 10 јули годинава, соопшти МВР.

На конкурсот за работно место полицаец, според МВР, биле пријавени околу 3.000 кандидати.

„Кандидатите беа избрани по завршување на неколку фази на проверки по принципот на рангирање. Беа опфатени тестирања на физичките способности на пријавените кандидати, потоа психо-образовни тестирања и здравствени проверки. Притоа, со овие кандидати е потпишан договор за основна обука за полицаец во траење од една година, почнувајќи од 7 октомври 2015 година“, се вели во соопштението од МВР.

Од министерството информираат дека „интернатската обука на кандидатите ќе се одвива во три образовни модули“ – јавен ред и мир, сообраќај и гранични работи. Секоја од обуките ќе трае четири месеци, од кои три месеци кандидатите ќе имаат теоретска, а по еден месец теренска обука.

„По завршената основна обука, договор за вработување во МВР потпишуваат 600 кандидати во согласност со ранг-листата подготвена од Центарот за обука“, велат од МВР.