!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Пријавувањето за упис на Универзитетот „Св. Кирил и Методиј“ ќе биде на 17 и 18 август


Скопје, 14 август, 2017 - 10:25 (META) 

Пријавувањето за упис во прва година во академската 2017/2018 година на Универзитетот „Св. Кирил и Методиј“, Скопје ќе биде в четврток и петок на 17 и 18 август.

Според објавениот конкурс за запишување студенти на прв циклус студии за претстојната студиска година, слободни се вкупно 10.818 места.

Од нив, 5.865 се за редовни студенти за кои годишната партиципација е 200 евра, 3.793 места се за редовни со кофинансирање на студиите со 400 евра годишно и 1.160 за вонредни студенти кои, исто така, плаќаат 400 евра.

Кандидатите кои ќе го пропуштат првиот рок за пријавување оваа недела, може да се пријават во вториот рок на 4 септември, а на факултетите на кои ќе има слободни места третиот рок за пријавување за упис е на 15 септември.

Новина во конкурсот е укинувањето на дисперзираните студии.


Конкурс за манифестацијата „Нов културен бран“


Скопје, 31 јули, 2017 - 9:59 (META) 

Министерството за култура денеска на својата веб-страница ќе ги објави условите и формуларите за пријавување на општини, здруженија на граѓани, асоцијации, неформални групи и автори од областа на културата и на уметноста за манифестацијата „Нов културен бран“.

Таа ќе се реализира од крајот на август до крајот на октомври годинава,  односно сè до исцрпување на средствата за реализација на манифестацијата.

„Цел на манифестацијата е да се обезбеди деметрополизација и децентрализација на културата, дисперзија во локалните средини и збогатување, омасовување и раздвижување на културната понуда во сите региони на Македонија. За разлика од претходниот пристап со манифестацијата „Топол културен бран“, на која право за аплицирање со проекти за културни настани имаа само општините, со овој повик, право на аплицирање со проекти и со идеи за манифестацијата ќе имаат здруженија на граѓани, асоцијации, неформални групи и автори од областа на културата и на уметноста, кои ќе треба да понудат квалитетна, естетски профилирана и вредносно издржана понуда, со која ќе внесат посвежи идеи и поиновативни пристапи во креирањето на културата, како и нови и современи форми во создавањето и во презентирањето на културниот и на уметничкиот продукт“, порачува Министерството за култура.


МОН ги објави резултатите од конкурсот за прием во ученичките домови


Скопје, 29 јули, 2017 - 10:40 (META) 

Министерството за образование и наука синоќа ги објави конечните резултати од првиот приемен рок од конкурсот за прием на ученици во јавните ученички домови во Република Македонија за учебната 2017/2018 година.

Од МОН соопштија дека електронското пријавување за вториот уписен рок е активно од вчера и ќе биде отворено сè додека има слободни места, за што Министерството континуирано на својата веб-страница ќе објавува списоци за примени ученици по домови.

Учениците кои ќе поднесенат електронска апликација, ќе треба комплетната документација да ја достават до Министерството за образование и наука во период од 7 до 11 август годинава.

Резултатите за конкурсот за прием во државните студентски домови, како што велат од МОН, ќе бидат достапни по завршувањето на конкурсот.


Само Заев кандидиран за претседател на СДСМ, поддршка од сите општински комитети?


Скопје, 14 мај, 2017 - 12:57 (META) 

Засега не можеме да излеземе со информации, затоа што треба да провериме какви пријави се стигнати на конкурсот. Дури од утре ќе може да дадеме соодветни информации, изјави пред малку портпаролот на СДСМ, Петре Шилегов, на прашањето колку кандидатури за претседател на партијата и за членови на централниот и на надзорниот одбор на СДСМ се пристигнати до вчера, кога истече рокот за самокандидирање.

Сепак, од други извори во СДСМ дознаваме дека најверојатно нема ниеден друг кандидиран за претседател на СДСМ освен актуелниот лидер Зоран Заев, како и дека „зад него застануваат сите општински организации на партијата“.

Според роковникот, кандидатурите ќе се доставуваат до централниот одбор на партијата, по што на 17 мај, односно в среда, централниот одбор ќе ги утврди предлог-листите на кандидатите за претседател на партијата и за членови на нејзиниот централен и надзорен одбор, а потоа следуваат 6 дена за презентирање на кандидатурите. Утврдување на кандидатите ќе се прави на 27 мај, а потоа истиот ден, на редовниот конгрес на СДСМ, ќе се изврши изборот.


СДСМ објави оглас за самокандидирање за претседател на партијата


Скопје, 5 мај, 2017 - 18:11 (META) 

СДСМ вчера на својата веб-страница објави повици, кои во дел од весниците денеска се објавени како огласи за самокандидидирање на заинтересирани за функцијата претседател на партијата, односно за местото на Зоран Заев, како и за членови на централниот и на надзорниот одбор на партијата.

Во повикот за претенденти за претседателската функција се вели дека кандидатот мора да биде истакнат член на СДСМ, кој досега дал значителен придонес за зајакнувањето на партијата, но и да биде личност со висок углед во општеството и да биде способен за раководење и за остварување на програмата. Се нагласува и дека треба да ја ужива довербата на членството и на симпатизерите на СДСМ.

Слични се и барањата за кандидати за членови на централниот и на надзорниот одбор.

Рокот за доставување на кандидатурите е 13 мај. Според тоа што претходно го соопштија од СДСМ за „Мета“, конгресот најверојатно ќе се одржи на 27 мај.


Американска амбасада во Софија: Бугарија сè уште не е подготвена за безвизен режим со САД


Софија, 10 февруари, 2017 - 16:05 (META) 

Бугарија сè уште не ги исполнува условите за безвизен режим со Соединетите Американски Држави. Бројот на одбиени барања за визи минатата година бил 15 отсто од вкупниот број на барања, а условот за добивање безвизен режим е одбиените барања да бидат под три отсто. Ова денеска го објасни генералната конзулка на САД во Бугарија, Кејт Мекгур, но увери дека миграциската политика на новиот американски претседател Доналд Трамп на ниту еден начин нема да влијае на бугарските граѓани.

Републиканското мнозинство во Конгресот на САД пред неколку дена предложи бројот на издадени зелени карти да се намали за половина, а популарната годишна лотарија да запре.

Инаку од 2000 година наваму биле издадени повеќе од 100.000 американски визи на млади граѓани на Бугарија за студентски претстој во САД.

Американската амбасада во Софија, инаку, објави конкурс за најдобра видеоснимка од доживувањата на студентите кои претстојново лето ќе одат во САД, во рамките на програмата за работа и за престој во земјата. Годинешниот конкурс на американската амбасада е на тема „Доживеј го својот сон“.

„Интервјуто е лесно. Неопходно е добро познавање на англискиот јазик, што ќе им овозможи на студентите да се справат со секојдневните задолженија, да се редовни студенти на акредитиран универзитет, да имаат валидна понуда за работа, како и да понудат гаранција дека ќе се вратат во Бугарија по завршувањето на програмата“, рече Мекгур.

Амбасадорот на САД во Бугарија, Ерик Рубин, денеска им ги врачи визите на првите четворица учесници во годинешната програма за работа и за патување во САД.


Објавен конкурсот за наградите „Крсте Чачански“ и „Јован Котески“


Струга, 21 декември, 2016 - 10:02 (META) 

Културниот центар „Бран“ и ревијата за книжевност „Бранувања“ од Струга, седми пат распишаа конкурс за наградите „Крсте Чачански“ – за необјавена збирка на кратки раскази и „Јован Котески“ – за необјавена поетска збирка.

Расказите, односно песните, не треба да се претходно објавувани.

Секој расказ треба да не биде подолг од 100 реда (три страници новинарски проред) и да има наративна форма.

Поетската збирка треба да содржи најмногу 50 песни, а секоја песна да не биде подолга од 30 стихови.

Ракописите во четири примероци треба да се испратат, најдоцна до 20 април 2017 година или по електронски пат на: raskazchachanski@hotmail.com, zbirkakoteski@hotmail.com.

Досегашни добитници на наградите „Крсте Чачански“, односно „Јован Котески“ се: Христо Петрески, Трајче Кацаров, Милован Стефаноски, Санде Стојчески, Петре Димоски, Витомир Долински, Марина Мијаковска, Добре Тодоровски, Славчо Ковилоски, Зоран Пејковски и Васил Тоциновски.


Втор уписен рок во средните училишта


Скопје, 4 јули, 2016 - 9:52 (META) 

Во средните училишта денеска се спроведува второто пријавување од јунскиот уписен рок за запишување ученици во прва година во учебната 2016/2017 година. Резултатите од запишувањето и слободните места ќе бидат објавени на 6 јули.

Првото пријавување за упис во средните училишта за гимназиско, стручно и за уметничко обазование и за спортската академија се одржа на 28 и на 29 јуни, а резултатите од запишувањето и слободните места беа објавени на 30 јуни.

Пријавувањето и запишувањето на учениците во августовскиот рок ќе биде на 24 август, а објавувањето на резултатите и слободните места е следниот ден (25 август).

Училиштата кои во двата уписни рока нема да ги пополнат местата утврдени со конкурсот што го објави Министерството за образование и наука, ќе продолжат со запишување ученици до 31 август.


Објавен конкурсот за наградата „Живко Чинго“


Охрид, 2 јули, 2016 - 10:34 (META) 

Општина Охрид го распиша традиционалниот конкурс за најдобар расказ за наградата „Живко Чинго“.

Наградата ќе биде врачена на 13 август, на културната манифестација „Вечер на Живко Чинго“, која ќе се одржи во неговото родно место, Велгошти.

Краен рок за доставување на трудовите до Општината е 31 јули. Жири-комисијата ќе ги објави резултатите од конкурсот во дневниот печат најдоцна до 8 август.

 


Француски институт го објави конкурсот „Моето минивидео 2016“


Скопје, 11 април, 2016 - 14:36 (META) 

Францускиот институт во Скопје, во соработка со Фондацијата за интернет и општество „Метаморфозис“ и регионот Нормандија, го организира второто издание на конкурсот „Моето минивидео“.

Конкурсот е отворен за млади од 18 до 28 години, кои се интересираат за мултимедијалната сфера и потребно е да имаат паметен телефон со камера.

Кандидатите треба да имаат желба слободно да го изразат своето мислење на конкретна актуелна тема, а оваа година тема ќе биде слободата на изразување.

Најуспешните минивидеозаписи од три минути ќе бидат прикажани на новото издание на Фестивалот на француски филм, кој ќе се одржи од 15 до 18 јуни 2016 година.

Победникот на конкурсот ќе биде гостин на фестивалот „Оф корт“ (Off-Court) во Трувил, Нормандија, а воедно ќе добие и подготвителни часови по француски јазик од Францускиот институт во Скопје.

За слектираните 15 кандидати наменети ќе бидат две подготвителни работилници, кои ќе се одржат на 12 и на 13 мај 2016 година, за да им се дадат упатства за пишување сценарио, за технички совети и за практична реализација на видеозаписот.

Формуларот за учество на конкурсот и на подготвителните работилници треба да се испрати на culture@ifs.mk најдоцна до 6 мај 2016 година.