!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

СЗО зависноста од компјутерски игри ја стави на листата на ментални нарушувања


Женева, 5 јануари, 2018 - 11:02 (META) 

Светската здравствена организација (СЗО) ги додаде зависноста од компјутерски игри и рискантното играње компјутерски игри, на нивната нацрт – листа на ментални нарушувања поврзани со зависности.

Според дефиницијата на СЗО, првото нарушување го карактеризира шема на однесување поврзано со постојано играње дигитални игри или навраќање на такво однесување манифестирано преку „нарушена контрола на играњето, зголемен приоритет кој се дава на играњето наспроти другите интереси во животот и дневните активности, продолжување или ескалација на играњето, наспроти појава на негативни последици.“

СЗО исто така го дефинира рискантното или хазардерско играње компјутерски игри како „шема на играње, било преку онлајн или офлајн, која забележително го зголемува ризикот од штетни последици по физичкото или менталното здравје на индивидуата или лицата од нејзината околина.“

„Здравиот разум и објективните истражувања докажаа дека видео-игрите не создаваат зависност. Исто така, ставање официјална етикета на терминот неодговорно, ги тривијализира менталните нарушувања како депресија и социјална анксиозност, кои заслужуваат лекување и целосно нимание од медицинската заедница“, велат од „Ентертејнмент софтвер асосиејшн“ (ЕСА), претставникот на индустријата за видео-игри од САД, кој во истовреме и побара од СЗО да ја промени оваа одлука.

Британската експертка за социјални медиуми, Силвија Коршак го поздрави додавањето на овие нарушувања на листата од СЗО, како храбар потег кој ќе им помогне и на медицинските професионалци кои се занимаваат со превенција и лекување зависности, а и ќе поттикне поширока јавна дебата за овие прашања.

„Играњето компјутерски игри не е баш табу тема, но мислењата за него се поделени и често не се базираат на факти, што воопшто не им помага на луѓето кои уживаат во него и имаат позитивно влијание, ниту пак на играчите кои се соочуваат со форми на зависност, при што не може да побараат професионална помош. Иако се појавуваат се повеќе програми за одвикнување, кампови или други идеи за помош, просечните родители или брачни партнери имаат реален проблем при соочувањето, бидејќи и онлајн и мејнстрим медиумите не заплашуват, па дури и преплашуваат, без да посочат практични решенија,“ напиша Коршак на нејзиниот блог.

Сепак, и покрај ова предупредување од страна на СЗО, новокласифицираните нарушувања не се фокус на нивната работа. На нивниот веб-сајт тие укажуваат дека најголемите здравствени проблеми на светско ниво во 2017 година биле поврзани со недоволното вакцинирање против заразни болести како менингитисот, намалување на смртноста од колера и глад.

Фото: Piotr Drabik via Wikipedia, CC BY 2.0.


Трамп: Ниту еден компјутер не е сигурен


Вашингтон, 2 јануари, 2017 - 18:10 (META) 

Новоизбраниот американски претседател Доналд Трамп изјави дека ниту еден компјутер не е безбеден кога станува збор за приватност на податоците.

Тој изрази скептицизам во поглед на безбедноста на интернет-комуникацијата која неговата администрација ќе ја користи секојдневно во планирањето на меѓународните односи.

Трамп на новинарите на новогодишната прослава што ја организираше на својот имот во Флорида, им рече дека ретко користи електронска пошта и компјутер, иако често твита.

Тој истакна дека повеќе доверба има во пораки кои ги пишува рачно.

– Ако нешто навистина ви е важно, ќе го напишете и ќе го испратите преку курирска служба, на старомоден начин. Затоа што, да ви кажам нешто, ниту еден компјутер не е безбеден – рече Трамп.

Новоизбраниот претседател на САД повеќепати ги отфрли тврдењата на американските разузнавачки агенции дека Русија се обидела да влијае на претседателските избори преку хакирање.

Тој најави дека следната недела ќе се сретне со официјални лица од разузнавачките агенции за да дознае повеќе за тие тврдења, истакнувајќи дека сака американските власти „да бидат сигурни во обвинувањата кои се прилично сериозни“.

Пред два дена Трамп истакна жалење поради компликациите што ги носи „ерата на компјутерите“ и соопшти дека компјутерите „значително ги комплицираат животите на луѓето“.


Децата со аутизам добија платформа за компјутерски игри


Штип, 7 март, 2016 - 18:28 (META) 

Платформа преку која безжично, со гестови, ќе може да се контролира компјутерска игра изработија студентите од Факултетот за информатика при Универзитетот „Гоце Делчев“ од Штип. Оваа платформа, која денеска беше промовирана во Штип, е наменета за деца со аутизам и со синдром на дефицит на внимание, познат под кратенката АДХД.

Раководителот на проектот, професорот Сашко Коцески, рече дека платформата е изработена по медицински протокли, во соработка со Детската клиника во Словенија.

– Платформата е наменета е за деца со психосоматски нарушувања или болести. Она што е карактеристично и интересно за овој тип игри е дека практично станува збор за платформа што првпат се развива кај нас. Врз основа на медицински протоколи потоа се преточени командите преку компјутерски јазик во соодветни интерактивни видеоигри – објасни Коцески.

Овој тип игри им е познат на родителите на деца со аутизам, кои на интернет гледале како се користат.

– Би биле пресреќни, еве, во Штип, во Центарот за аутизам доколку би можело да се почне да се користи оваа платформа, бидејќи некои од нашите деца во странство го имаат испробано ова и многу помага, особено за когнитивните способности, а за хиперактивните деца помага да бидат буквално смирени – рече претседателот на здружението „Сплотени срца“, Зоран Мијалков.

Како што најави тимот на Универзитетот, оваа платформа ќе биде достапна за Центрите за аутизам. Студентите веќе изработиле компјутерски игри кои не го врзуваат корисникот за компјутер, туку се игра од дистанца со активирање на мускулите преку движење на рацете, нозете и телото. Овие компјутерски игри се прилагодени не само за децата, туку и за возрасни.


Дали само учениците ќе се офајдат од набавката на 300.000 таблети?


Скопје, 9 март, 2015 - 9:45 (META) 

По проектот „Компјутер за секое дете“, основните и средните училиште од следната година ќе се подноват со „таблет-компјутери за секое дете“, информираше заменик-министерот за образование и наука, Спиро Ристовски.

„Компјутер за секое дете“ мина со многу контроверзии и сомнежи за набавките на опремата, а до ден-денес не е познато колку точно пари чинеше проектот. Опозицијата обвини дека од  првичниот проект од 8,5 милиони евра, достигнал 24 милиони евра

Неговиот наследник, проектот „Таблет за секое дете“, е предвиден и во „Проверено“, изборната програма на ВМРО-ДПМНЕ за 2014-2018 година.

„Ќе продолжиме да ја осовременуваме наставата за нашите ученици, преку набавка на нови 300.000 таблет-компјутери (со тастатура) за сите ученици во основно и во средно образование. На тој начин, ќе се обноват компјутерите за учениците и ќе се овозможи внесување нови дигитални содржини, кои ќе овозможат посовремен и поактивен пристап во совладувањето на наставата. Тоа ќе придонесе за подобар квалитет на образовниот процес и за подобри резултати на македонските ученици“, се вели во „Проверено“.

Во програмата се вели дека во 2016 година ќе бидат набавени таблети за учениците во средно образование, во 2017 година за учениците од шесто до девето одделени, а во 2018 година за учениците од прво до петто одделение во основното образование. Средствата ќе бидат обезбедени од буџетот на Република Македонија.

– Планирани се околу 150 милиони денари. Планирано е да има многу поголема индивидуална одговорност, за секое училиште, за секој менаџмент на училиштето и, нормално, да има одговорност и за оној што го користи таблетот – рече Спиро Ристовски.

Овој проект го најави премиерот Никола Груевски на митинг во Тетово, во предизборната кампања во април минатата година.

– Предвидена е постепена четиригодишна замена на постојните компјутери, кои полека застаруваат. Копмјутерот е такво нешто што за шест-седум години почнува да застарува. Ова ќе бидат таблети со тастатура и ќе бидат многу помодерни, во согласност со времето во кое живееме – рече Груевски во Тетово.

Владиниот проект „Компјутер за секое дете“ се темелеше на Националната програма за развој на образованието (2005-2015 година). Во овој проект планирано беше да се обезбедат 17.818 персонални компјутери, 98.710 ЛЦД-монитори, 98.710 тастатури, глувчиња и 80.892 тин-клиенти за основните и за средните училишта.

Сè уште е непознато точно колку пари ја чинеше државата овој проект, ниту што ќе се случи со компјутерите што веќе се користат и се застарени.

Пред неколку години, од опозицијата обвинија дека првичниот проект од 8,5 милиони евра, достигнал 24 милиони евра.

– Првичниот проект за набавка на 100.000 компјутери беше замислен да чини 8,5 милиони евра, за на крај да дојде до 24 милиони евра. Беше распишан оглас за набавки без претходно да се обезбедат електрична и телекомуникациска инфраструктура во училиштата. Плус пари се добија од Телеком со ТК- инфраструктура, од ЕВН за струјата, а како врв на сè, ЈП „Македонска радиодифузија“ распиша оглас за комуникациска инфраструктура иако таа нема никаква врска со тоа – рече Јани Макрадули од СДСМ.

Во врска со изјавата на Макрадули дека за 8,2 милиони евра може да се набават 100.000 компјутери, Ивановски рече дека „со таа математика“ еден компјутер би чинел 82 евра.

– Ако Макрадули може да набави компјутер за 82 евра, секоја чест – рече Ивановски.

Според истражувањето, објавено во книгата на Сашо Ордановски „Заробена демократија- Развој на сопственичката структура на медиумите во Република Македонија“ (2012 година), Владата во 2009 година, преку Министерството за информатичко општество, со тендер набавила лаптоп-компјутери за учениците до трето одделение и за наставничкиот кадар.

Станува збор за 55.000 лаптоп-комјутери набавени од српската фирма „Комтрејд груп“ за сума од 11,7 милиони евра, односно 213 евра од парче.

Сопственик на фирмата, „Комтрејд груп“ е српскиот тајкун Веселин Јевросимовиќ, кој некои го нарекуваат „српскиот Бил Гејтс“. Фирмата ја основал во 1996 година.

Како што пишува Ордановски во „Заробена демократија“, Јевросимовиќ бил во одлични деловни контакти со Жарко Луковски, инаку близок пријател на Орце Камчев и на директорот на Упрвата за безбедност и контраразунвање (УБК), Сашо Мијалков, прв братучед на премиерот Никола Груевски.

Луковски по доаѓањето на ВМРО-ДПМНЕ на власт, во 2006 година, беше поставен за член на Одборот на директори на „Македонски телеком“, а наскоро потоа и за претседател на тој одбор и за извршен директор на најголемиот мобилен оператор во Македонија „Т-мобиле“, фирми на кои Јевросимовиќ во изминатите години им продава телефонски апарати и ИТ-опрема. Индикативно, приватната компанија на Луковски со која работел пред да стане директор во „Македонски телеком“, се вика „Комтрејд њу технолоџис лимитед“, слично на компанијата „Комтрејд“ на Јевросимовиќ.

Според пишувањето на медиумите (истражувачка сторија на новинари од редакциите на „Нова ТВ“ и на „Фокус“, објавено во февруари 2014 година), Веселин Јевросимовиќ, преку фирмата „Интернет груп ДОО“, е сопственик на една третина од „Графички центар“, фирмата која ги печати изданијата на МПМ, а со тоа и на порталот „Телеграф.мк“.

Српскиот тајкун Јевросимовиќ е сопственик и на телевизијата „Алфа“, која ја купи од Штерјо Наков.

Во март 2013 година, на домот на Јевросимовиќ, во Белград, беа фрлени две бомби кои експлодираа, но освен материјалната штета, за среќа, никој не беше повреден.


Нов проект: Таблет за секое дете


Скопје, 5 март, 2015 - 17:30 (META) 

Таблет-компјутери ќе се набавуваат во училиштата, информираше заменик-министерот за образование и наука, Спиро Ристовски, објави телевизија „Сител“.

– Во првата фаза ќе се потрошат 152 милиони денари. Во 2017 година, таблет ќе добијат основците од шесто до деветто одделение, во 2018 година, најмалите, од прво до петто одделение – изјави Спиро Ристовски, заменик-министер за образование и наука.


Изработен компјутер во форма на коцка


Париз, 23 декември, 2014 - 15:08 (META) 

Француската компанија „Кјуб“ направи револуционерен компјутер во облика на коцка, наречен „кјуб“.

Компјутерот, со големина од 12 сантиметри од двете страни, е опремен со модерна технологија и е компатибилен со сите периферни уреди, монитори, тастатури и компјутерски глувци, пишува порталот „Инфос-мобајлс“.

Како што наведува порталот, компјутерот може да биде испорачан во различни модели и има големи можности, бидејќи „телото“ може да му се прилагоди на сите вкусови. Освен тоа, воопшто не загрева и троши малку струја. Секој „кјуб“ е уникатен и изработен во различни бои.

Уредот, исто така, работи на новата генерација на процесори „интел кор“.