Сјајот и бедата на Попова Шапка: Од центар со светска слава во јалова долина (галерија)


Тетово, 11 февруари, 2019 - 13:52 (META) 

Попова Шапка некогаш беше познат скијачки центар во регионот и пошироко. Се инвестирало во инфраструктурата, се одржувале скијачки натпревари на кои учествувале натпреварувачи од целиот свет, и била омилена дестинација за многу планинари и скијачи. Денес, останата е само големата желба на туристите скијачи да го видат овој центар развиен како некогаш, пренесува „Порталб.мк“.

Овој планински терен уште од 1924 година беше дестинација за планинарите на тогашната Југославија. Први кои што го воочиле и почнале да го користат потенцијалот на овој терен биле членовите на Здружението на планинари „Шар Планина“ уште од 1934 година, кога и го формирале првото скијачко здружение.

Бидејќи качувањето во Попова Шапка било тешко и одземало многу време, првиот домаќин во селото Лисец, Нуреман Велиу, ги сместувал скијачите во неговиот конак. Скијачите првиот дел од патувањето го имале до Лисец, застанувале во конакот на Нуреман да преспијат и утредента продолжувале до Попова Шапка.

„Шарпланинскиот куп“ почнал во 1947 година

Во 1934 година била изградена првата планинарска куќа со четири соби и дваесет кревети, која била пуштена во употреба на 11 ноември истата година.Со ова започнал и развојот на Попова Шапка, која подоцна се претворила во балкански туристички центар, посетувана од туристи од цела Југославија.

Истата година била изградена и првата планинарска куќичка, а биле организирани и првите натпревари, трчање на 15 километри и спуст од 1,5 км во патеката Церипашина, која сега се вика Син Врв. Натпреварите биле повторно организирани во 1936 година, кога Нуреман Велиу од Лисец бил трето-пласиран во спуст, а прво пласиран во трчање.

Првиот меѓународен натпревар, кој подоцна станал и традиционален бил „Шарпланинскиот куп“ во 1947 година, кој продолжил да се организира и подоцна и бил еден од поважните натпревари на меѓународно ниво. Во рамки на Македонија бил еден од највисоко оценетите натпревари. На натпреварувањето имало учесници од целиот свет, од Европа, Америка и Австралија. Последниве години овие трки не се организираат повеќе.

Големи инвестиции во овој скијачки центар биле направени уште од 1934, а продолжил со изградба на ски-лифтовите, жичарата и патот Тетово – Попова Шапка.

Земајќи ги предвид тешкотиите за да се стигне до Попова Шапка, била изградена првата жичара Тетово-Попова Шапка. Првиот дел на жичарата, до селото Лисец, со должина од 3.209 метри започнал со работа на 14 септември 1962 година, а вториот дел Лисец-Попова Шапка, со должина од 2.991 метри бил изграден во текот на наредните три години и бил пуштен во функција на 8 март 1965 година.Жичарата имала 100 кабини, со капацитет за 400 лица. Времето на патување било 40 минути.

103.000 патници ја користеле жичарата од 8 март кога започнала со работа, до декември минатата година.Во 1981 година е пуштен во употреба патниот правец Тетово-Попова Шапка, во должина од 18 километри.

Попова Шапка денес, уништена и заборавена

Денес Попова Шапка не само што го изгубила некогашниот сјај туку е целосно запоставена и воопшто не се инвестира таму. Компанијата која во моментов управува со Попова Шапка е компанијата „Елем турс“. Некои од хотелите кои што ги управува истата компанија со години работат со загуби, при што до денес акумулирале вкупен долг од 24 милион евра.

Жичарата не работи уште од 2001 година, поради штетите предизвикани во текот на војната, а поради тоа се предизвикани и други проблеми. Околу објектот кој во минатото беше жичара пасат овци.Недостатокот од канти за отпадоци како и лошото управување со отпадоците довело до палење на истите од хотелите и граѓаните.

Недостаток од паркинг простор во Попова Шапка ги принудива граѓаните да пешачат по три километри. Веќе се изградени повеќе викендички, со или без дозвола, и сега се функционални, со што Попова Шапка е претворено во едно „мало село“.

Актуелно е тоа што премиерот Зоран Заев се обратил писмено до раководството на Граѓанската иницијатива „Да ја спасиме Попова Шапка“, за да седнат да разговараат со цел да го решат проблемот на овој туристички центар.


Филипче: За пропустот со вакцините, може да го раскинеме договорот со „Македонија лек“


Скопје, 8 јануари, 2019 - 16:05 (META) 

Министерот за здравство, Венко Филипче, денеска изјави дека кај само еден отсто од вкупниот број увезени МРП вакцини, имало проблем со декларациите, на кои бил впишан рок кој не соодветствува со реалниот рок, кој не е изминат.

– Инспекции ќе има во здравствените домови кои извршиле прием на вакцините, но и во самата компанија, која ќе треба да си ги испита процедурите за да видат каков пропуст направиле. Нема да дозволиме ништо да го подрива угледот и довербата во нашиот здравствен систем, во период кога правиме напори да го зачуваме угледот. Наша намера е да ги смениме сите оние работи кои родија сомнеж во јавноста околу исправноста на вакцините. Министерството за здравство ќе ги преземе сите мерки кои се во рамки на правната регулатива да се справиме со ова, да укажеме на производителот каков проблем се јавил со локалниот добавувач, за да докажеме дека сме сериозна власт на која граѓаните и се на прво место – рече Филипче.

Тој потенцира дека не се најдени вакцини со изминат рок, односно дека е најден мал процент на вакцини со погрешни декларации.

– Станува збор за декларации на кои има постар датум од она што е вистински рок, кој е наведен и на кутијата и на вијалата на самата вакцина. Одговараме за квалитетот на вакцините, за критериумите на нивната набавка. Многу сериозно го разгледуваме прашањето. Вакцините се проверени од инспектори, дадена е дозвола за дистрибуција, дадена е дозвола од Агенцијата за лекови. Инициравме контрола во неработни денови, што укажува дека крајно сериозно пристапување на прашањето. Не сакавме да се создаде дополнителна паника во јавноста, посебно не во овој период на епидемија. Претставници на министерството и на Агенцијата за лекови ја контролираат серијата која се увезува на земјата. Но тогаш, дистрибутерот нема обврска да стави декларација, туку тоа го прави отпосле. После добивањето на таа дозвола, се лепат лепенки и вакцините се дистрибуираат во здравствените домови – појасни Филипче.

Тој информира дека немало никаков проблем со чувањето на вакцините. Директорите на здравствените домови веднаш биле задолжени да информираат во врска со нивниот прием. Вакцини со погрешна декларација се пронајдени во Здравствениот дом „Железничар“, во Демир Хисар, во Велес и во Свети Николе.

– Лекот не е фалсификат, се работи за техничка грешка. Кога ќе ги собереме сите количини, ќе постапиме понатаму со фирмата „Македонија лек“. Тие направиле техничка грешка, односно наместо нови, залепиле стари налепници. Понатаму ќе видиме како ќе се одвиваат работите – рече министерот.

Според него, оправдано е прогласувањето на епидемија од морбили.

– После многу години, ова е еден случај каков што не сме имале во нашата држава. Вкупно 60 заболени е сериозна бројка и затоа се преземени овие мерки. Апелот е ист, родителите треба да ги вакцинираат децата зашто тоа е единствениот излез, само така може да се запре оваа епидемија. Имавме несреќа да се дететктираат налепници кои се надеваме дека нема да создадат паника. Ќе преземеме се` што е во наши рамки, вклучително и раскинување на договорот, ако се докаже дека ова бил пропуст кој можел да се превенира. Како што сме ние сериозни во овој процес, сакаме да имаме и сериозни партнери. Ќе инсистирам да се реши ова што поскоро, како и да бидам лично информиран за сите инспекциски надзори, како во компанијата, така и од пунктови на терен. Сакам да верувам дека е техничка грешка. Ги уверувам сите граѓани дека станува збор за квалитетна и добра вакцина, дека нема ризик, дека релацијата со болести се темели на парамедицина. Со нашите мерки целта ни беше да интервенираме во почетокот, да не дозволиме да имаме смртни случаи, па тогаш да преземаме активности – додава Филипче.


Од понеделник започнува новата сезона за парно-греење


Скопје, 12 октомври, 2018 - 12:17 (META) 

Граѓаните и правните субјекти во Скопје кои се поврзани на централниот систем на топлинска енергија, од понеделник, 15 октомври 2018 година ќе почнат да добиваат топлинска енергија, сe до 15 април 2019, кога трае регулираниот период за редовна испорака, информираат од „БЕГ снабдување“.

„Во рамките на овој период, испораката на топлинска енергија се врши по строго утврдени правила и дијаграми во зависност од атмосферските услови и надворешните температури. Овие правила и дијаграми се утврдени во регулативата за испорака на топлина до потрошувачите одобрена од Регулаторната комисија за енергетика“, се вели во соопштението на компанијата.

Од таму додаваат дека годинава, споредено со минатата година, бројот на нови потрошувачи е зголемен.

„За сите детали за испораката на топлинска енергија, потрошувачите може да се информираат на веб-страницата www.beg-snabduvanje.com.mk (Мрежни правила за дистрибуција на топлинска енергија Прилог 3), или да се обратат до Центарот за грижа за потрошувачи на телефонскиот број 02 3076 200 и на 075 400 100 или преку е-пошта на: contact@beg-snabduvanje.com.mk “, се додава во соопштението.

 


„Теламон“ од САД ќе инвестира четири милиони евра и ќе отвори 300 работни места


Скопје, 13 јули, 2018 - 14:43 (META) 

Американската компанија „Теламон корпорејшн“ ќе добие државна помош за инвестиции во државата. Министерката задолжена за странски инвестиции Зорица Апостолска, информираше дека компанијата која се занимава со производство на кабли и е присутна на американскиот и пазарите во Мексико и Кина, планира почетна инвестиција во Инџиково од четири милиони евра и 300 нови работни места.

Апостолска посочи дека предвидената поддршка е во делот на поврат по основ на инвестициски вложувања, вработувања со плати над 18.000 денари, извоз, корпоративен и персонален данок.

– Граѓаните ќе го поддржат членството на нашата земја во НАТО и ЕУ, бидејќи знаат дека придобивките се огромни и имаат една голема и посакувана цел – подобрување на квалитетот на живот за сите“, рече во своето обраќање премиерот, Зоран Заев на потпишувањето на договорот.

Развојниот план на компанијата предвидува инвестицијата да достигне вредност од околу 11 милиони евра и отворање на 600 нови работни места.

– Ова е една од бројните странски инвестиции кои дојдоа во последните месеци во Македонија. Компанијата „Теламон“ има над 2.000 вработени, функционира во повеќе држави во светот и има 784 милиони долари промет на годишно ниво – рече вицепремиерот за економски прашања, Кочо Анѓушев.

Тој информираше дека првиот квартал во 2018 година, странските инвестиции бележат вредност од 235 милиони евра, што е повеќе од било кој квартал тргнувајќи од 2007 година па наваму.

Анѓушев оцени дека сите бројки покажуваат дека Владата е на добар пат за раздвижување на економијата и дека со санирање на нискоградбата се очекуваат позитивни резултати на целокупната економска слика во државата.


„Еуромакс ресорсис“ ја објави структурата на 488 работни места во Иловица-Штука


Гевгелија, 23 мај, 2018 - 14:54 (META) 

„Еуромакс ресорсес“ објави список на 488 директни работни места во проектот Иловица-Штука, за кои ќе организира конкурси откако ќе ги добие потребните дозволи за експлоатација, информираат од компанијата.

Од таму додаваат дека опсегот на работните места е усогласен со потребите објавени во Физибилити студијата за проектот, а земени се предвид сугестиите од локалните засегнати страни.

„Еуромакс има стратешка определба за вработување на локалното население во проектот. Компанијата ќе организира серија Саеми за вработување и други настани од отворен тип за да објасни како потенцијалните вработени можат да аплицираат за работните места откако ќе ја добие потребната дозвола за експлоатација. Процесот на одбирање ќе се одвива со индивидуален пристап со цел на кандидатите да им се помогне да го најдат најдоброто работно место за себе. „Еуромакс“ ќе обезбеди и сеопфатна обука за работните места во рамките на Проектот, директно или преку своите изведувачи“, се вели во соопштението.

Во него се додава дека со почетокот на работењето на рудникот во Иловица – Штука, ќе се отворат и три пати повеќе дополнителни индиректни работи места за локалните добавувачи, како резултат на определбата на компанијата да соработува со локални компании.


Андреас Елснер заминува од позицијата главен извршен директор на „Македонски телеком“


Скопје, 22 мај, 2018 - 15:07 (META) 

Главниот извршен директор и член на Одборот на директори на „Македонски телеком“, Андреас Елснер, заминува од компанијата од 1 јули 2018 година.

„На позицијата главен извршен директор на „Македонски телеком“ беше назначен во мај 2017 година и под негово водство компанијата бележи позитивен пресврт во работењето преку најдобрата мрежа, иновативното портфолио на производи и најдоброто корисничко искуство. Тој заминува од компанијата со успешни резултати во првото тромесечје од 2018 година, со раст од 2,6 отсто во однос на минатата година и водечки позициониран бренд“, соопштуваат од компанијата.

Од „Македонски телеком“ не соопштија кој ќе го наследи.


Раководството на САСА и синдикатите постигнаа договор за зголемување на платите


Скопје, 11 мај, 2018 - 15:44 (META) 

Мултиетничкиот синдикат за образование (МЕСО), Сојузот на синдикати на Македонија и рудникот за олово и цинк Саса потпишаа спогодба, согласувајќи се на понудата за зголемување на платата, која што компанијата ја достави до синдикатот на 26 април.

„Рудникот Саса и неговите нови сопственици од Лондон, „Централ Азија металс“, веруваат дека со оваа прифатена понуда се решава суштинскиот од проблемите поврзани со наградувањето и исплатата на вработените, кои што беа наследени од претходните сопственици и се надеваат дека соработката со тимот ќе продолжи и во иднина со цел изградба на успешна иднина на рудникот.

Се надеваме дека ќе можеме да ја извршиме исплатата на зголемувањето за април и ретроактивно за месец март со исплаќањето на априлската плата, кое ќе се реализира во текот на денешниот ден. Дискусиите со МЕСО за други прашања во Саса ќе продолжат“, изјави Неил Стевенсон, генерален директор на Саса.

Со потпишаната спогодба завршуваат преговорите меѓу раководството на рудникот и овластените претставници на синдикатот започнати кон средината на минатиот месец. Истовремено, синдикатите се обрзуваат дека и формално ќе го прекинат штрајкот кој беше ставен во мирување кога започнаа преговорите.


Анѓушев: Продажбата на ЕДС беше максимално транспарентна


Скопје, 25 април, 2018 - 15:49 (META) 

Вицепремиерот за економски прашања, Кочо Анѓушев за продажбата на неговата компанија ЕДС на грчката национална компанија за производство на електрична енергија ППЦ рече дека транзицијата на сопственоста ќе трае дваесетина дена.

– По финасиската трансакцијата, согласно законите во Македонија ќе си платам персонален данок и средствата што сум ги добил од продажбата ќе ги прикажам во мојот анкетен лист. Им посакувам на сите,  политиката да не се меша во реалниот бизнис. Трансакцијата беше максимално транспарентна и евалуацијата на цената беше извршена од две меѓународни куќи што беа ангажирани од грчката компанија да направат проценка – рече Анѓушев одговарајќи на прашање пред почетокот на форумот „Инвестиции за долгорочен економски развој“.

Од продажбата, 90 отсто од средствата, или 4,8 милиони евра, ќе легнат на негова сметка, а 10 отсто на сметката на „Фероинвест“.

– Преговарањето за цената не беше лесен процес, бидејќи станува збор за интернационална компанија која е присутна во неколку држави во ЈИЕ. Компанијата сум ја развивал од нула, како старт-ап во сите држави во време кога беше стопирана либерализацијата. Доколку продолжеше либерализацијата на пазарот на електрична енергија, веројатно ќе имаше поголема вредност, – додаде Анѓушев.

Тој објасни дека грчката компанија ППЦ е гигант во енергетскиот сектор во регионот со годишен промет од пет милијарди евра и 15 милијарди евра капитал во електрани и далекуводи.

– Со таков ветер зад грбот, ЕДС ќе има прекрасна иднина, бидејќи пазарот на електрична енегија во Југоисточна Европа допрва ќе се развива. Тоа е шанса за компанијата, за сите вработени и за земјава – рече Анѓушев.

Вицепремиерот додаде дека директорот на ППЦ им дал гаранции на 40-на вработенти во ЕДС дека ќе се ги задржат работните места


ЕЛЕМ: Струја произведуваме колку што е моќноста на хидроелектраните


Скопје, 19 април, 2018 - 15:35 (META) 

ЕЛЕМ може да произведува електрична енергија преку хидроелектраните толку колку што е нивната моќност, се вели во реакцијата на компанијата, на обвинувањата на ВМРО-ДПМНЕ дека се загубени половина милион евра поради ненавремено производство на струја на ХЕЦ Глобочица и ХЕЦ Шпилје.

Во соопштението се додава дека „во години на големи дотеци, како што е оваа, производствените капацитети на ЕЛЕМ технички не се во можност да ја прифатат целата вода.“

„Два и пол месеци електраните Глобочица и Шпилје работат со максимален капацитет и се произведува електрична енергија според максималната инсталирана моќност на овие  капацитети. Сакаме, исто така, да појасниме дека претпразнење на акумулациите во есенскиот период немаше потреба да се прави, затоа што претходното раководство на компанијата ги остави акумулациите речиси празни и од тие причини дополнително претпразнење не беше потребно да се направи“, се вели во соопштението.

Од ЕЛЕМ појаснуваат дека не се единствениот корисник на водните ресурси каде што има инсталирано хидроенергетски капацитети.

„Согласно со тоа, ЕЛЕМ може да ги користи дотоците во овие водни ресурси согласно со Дозволите за користење на вода, кои пропишуваат услови за користење“, додаваат од ЕЛЕМ.


Кина воведе царина од 25 отстo на 128 американски производи


Пекинг, 2 април, 2018 - 10:17 (META) 

Кина воведе царина од 25 отсто на 128 американски производи вклучувајќи ги и свинското месо и виното, како реципрочна мерка на САД за царината за увоз на челик и алуминиум од Кина.

Зголемувањето на царината стапува на сила денеска и ќе влијае на увозот кој изнесува околу три милијарди долари.

Пекинг информира дека овој потег ќе ги заштити кинеските интереси и ќе ги балансира загубите предизвикани од новите американски царини.

Пртеходно, Кина за овие мерки најави дека не сака трговска војна, но ќе преземе одредени мерки ако економијата почне да ги трпи последиците.

Но, Трамп е на ставот дека „трговските војни се добри“ и дека лесно САД би победиле. Американските власти веќе најавија планови за воведување на нови тарифи.