Тевдовски: Наплатата на даноци повисока за 120 милиони евра повеќе од лани


Скопје, 10 септември, 2018 - 11:24 (META) 

Наплатата на даноци и придонеси заклучно со август е повисока за 120 милиони евра во однос на минатата година, вели министерот за финансии Драган Тевдовски. Тој додаде дека даноците и придонесите пораснале за седум проценти во однос на минатата година.

– Наплатата на даноците покажува интензивирање на економската активност. Ова се должи во голема мерка на растот на данокот на добивка, чија наплата е подобра за 25 проценти во однос на лани или за околу 35 милиони евра. Тоа укажува на зголемена активност на фирмите. Исто така има раст на придонесите на седум проценти што укажува дека трендот на раст на плати и нови работни места продолжува и после второто тримесечје. Имено, високата наплата на придонеси во првото полугодие од годинава е поврзано со растот на платите за 5,6 проценти и растот на бројот на работни места за околу 10.000 нови – рече Тевдовски и дополни дека сервисирањето на обврските од државата се одвива непречено.

– Повратот на ДДВ кон фирмите е навремен и неселективен. Од почетокот на годината до крајот на август, во стопанството се вратени 250 милиони евра поврат на ДДВ. Во август имавме извршено најголем поврат во последните години, во износ од 44 милиони евра. Со обезбедување на ликвидност на фирмите, се поддржуваат нивните тековни, но и инвестициски активности. Во овој период се забележува поголема инвестициска активност на компаниите. Имено, ако се анализира увозот, во периодот од јануари-јули 2018, најголем раст од 19,7 проценти се забележува кај секторот машини и транспортни уреди. Овој податок укажува на раст на инвестициите на фирмите во основни средства. Тоа ќе придонесе за раст на економската активност и во иднина, поголемо производство и нови работни места- вели Тевдовски.


СКМ ќе ги поттикнува компаниите да аплицираат за државна помош


Скопје, 6 август, 2018 - 12:35 (META) 

Од Стопанска комора на Македонија следниот период ќе ги посетат компаниите кои сметаат дека ги исполнуваат условите за да добијат финансиска помош од државата согласно Законот за финансиска поддршка, во првиот и вториот столб на мерки.

Согласно податоците од Владата, лани 600 компании имале зголемен профит, вработувања и инвестиции, од нив 182 аплицирале за државна помош, а 100 потпишаа договори за државна помош.

„Не е лоша бројката од 182 компании, но е далеку од доволна. Има успешни компании кои спроведуваат инвестиции, остваруваат профити, имаат вработувања. Критериумите за аплицирање се јавни и транспарентни и ги опфаќаат сите производствени компании кои создаваат профит“, рече Љупка Трајковска од Стопанска комора на Македонија.

Таа додаде дека забелешки во однос на законското решение за државна помош нема, критериумите се транспарентни и базирани на податоци на Централен регистар, останува само доследно реализирање согласно роковите и почитување на одредбите од законот.

Трајковска потенцираше дека се чувствува постоење на јавно-приватен дијалог и тридецениските барања од приватните компании се инкорпорирани во законот.

Целта е, како што истакна, зголемување на учеството на индустријата во креирањето на домашниот бруто-производ, бидејќи процентот на учество во 1992 година изнесувал 32 проценти, а во 2016 година 15 проценти.

Стопанска комора издаде и брошура „Време за промена на досегашниот модел на економски развој“ во кој има предложени мерки за економски пораст, а дел од тие мерки биле инкорпорирани и во новиот закон.


Заев: 100 компании ќе добијат финансиска помош од 9,2 милиони евра


Скопје, 1 август, 2018 - 16:49 (META) 

Над 100 компании ќе добијат вкупна финансиска помош од 9,2 милиони евра согласно Законот за финансиска поддршка на инвестициите за остварените резултати лани, информираше денеска на прес-конференција премиерот Зоран Заев.

Во овие компании, лани работеле 14.000 вработени и биле отворени нови илјада работни места.

– Прв пат под исти услови домашните и странските компании ќе добиваат државна финансиска поддршка на транспарентен начин за остварените резултати. Сите компании кои аплицира и ги исполнија условите ќе мора да покажат документи и фактури за реализација на инвестицијата за да им биде доделена помошта – рече Заев.

Тој нагласи дека преку помошта што се нуди во трите столба директно во стопанството ќе бидат вратени 70 милиони евра.

На новинарско прашање во врска со ребаланс на буџетот, тој одговори дека „буџетот не покажува индиции за ребаланс“.

Во однос на нискиот процент на реализација на капитални инвестиции додаде дека очекува проектираното ниво да се оствари следните месеци. Премиерот оцени дека направените проектни документации, биле најголема слабост за потфрлањето на капиталните инвестиции.

„Дополнително на тие инвестиции кои што не се бележат со буџетот се патиштата и железничката инфраструктура. Тие се преку јавни претпријатија финансирани надвор од буџетот, а всушност најголем дел од капиталните инвестиции се патишта, железници и гасификација. Понатаму во буџетските рамки каде што ги броиме соопштените 16,5 проценти се во делот на другите видови капитални инвестиции, како изградба на полициски станици, амбуланти, училишта, градинки“, рече Заев.


Деспотовски: Компаниите да достават изјави за сопственичка структура до ФИТР


Скопје, 24 јули, 2018 - 14:46 (META) 

Директорот на Фондот за иновации и технолошки развој (ФИТР), Јован Деспотовски ги повика компаниите кои беа избрани во првиот повик за финансиска помош, во рок од 15 дена да достават изјава во која ќе се изјаснат дали во сопственичката структура имаат лице кое е носител на јавна функција или член на потесно семејство.

Тој додаде дека, Фондот не е истражна агенција, сопственичката структура не е критериум при одлучувањето, но во интерес на транспарентноста и кредибилитетот на целиот процес во кој, како што вели длабоко верува, ќе ги повика компаниите самите да се декларираат.

– За оние компании кои ќе го декларираат тоа во рок од 15 дена, како директор на Фондот согласно насоките кои ги добивме од премиерот, ќе побарам од Комитетот за одобрување на инвестициите, повторно да ги разгледа тие проекти. Не можам да наредам, бидејќи Комитетот е независно тело, но ќе побарам дали тие компании кои ќе декларираат потенцијален конфликт на интерес, навистина ги исполнуваат сите критериуми – изјави Деспотовски.

Тој додаде дека во второто системско решение за следниот јавен повик, чија што постапка е веќе започната, ќе предвидат при аплицирањето секоја компанија да декларира дали во сопственичката структура има лице, носител на јавна функција или член на потесно семејство.

Деспотовски потенцираше дека интересот за првиот јавен повик за финансиска помош на компаниите ги надминал очекувањата.

„235 компании доставија апликации и согласно одлуката на Комитетот, 160 од тие компании добија можност за финансирање и дополнителни 30 кои имаат условено одобрување. Значи 75 проценти од компаниите ќе добијат финансиска помош. Договори нема потпишано, и ниту еден денар буџетски пари не се исплатени. Резултатите се објавени пред да се потпишат договорите и да се исплатат средствата“, објасни Деспотовски и додаде дека, 79 компании кои ќе бидат поддржани во првата фаза предвидуваат инвестиции во приватниот сектор од 20 милиони евра, 10,5 се државни а 9,5 милиони сопствени средства, 460 лица ќе бидат ангажирани на овие проекти, ќе се отворат 85 нови работни места со просечна плата 48.000 денари.

Во Комитетот за одобрување на инвестициите рече дека членуваат 80 домашни и пет надворешни експерти и тие биле вклучени во оценување на проектите.


Секое трето државно претпријатие лани ја завршило со загуба


Скопје, 13 јули, 2018 - 10:44 (META) 

Анализата на финансиските резултати на компаниите во државна сопственост што ја изработи Центарот за граѓански комуникации според податоците за 2017 година, преземени од Централниот регистар, покажува дека профит оствариле 86 државни фирми, додека загуба имало кај 36 државни претпријатија. Тоа значи дека секое трето државно претпријатие лани ја завршило со загуба.

Профитот изнесува 141 милиони евра додека загубите 30 милиони евра. Нето-ефектот е позитивен и изнесува 111 милиони евра.

„Компаниите во државна сопственост во текот на 2017 година инкасирале вкупно 791,4 милиони евра приходи од работењето, што е за 6,2 проценти повеќе во споредба со годината претходно, покажуваат податоците за вкупно 118 фирми од јавниот сектор анализирани во оваа база на податоци. Од нив, 66 работеле подобро од претходната година, односно ги зголемиле приходите, додека пак, 52 државни фирми ги намалиле приходите. Во исто време, овие 118 државни фирми направиле расходи во вредност од 686,6 милиони евра што е намалување за 3,8 отсто на годишно ниво“, се вели во истражувањето.

ЈП за државни патишта своите финансиски приходи за 2017 година ги зголемило за 78 пати поради позитивните курсни разлики од кинескиот кредит за изградба на автопатите. Инаку, приходите од редовното работење му се зголемиле за само 2,3 отсто. Во сите државни фирми на крајот од 2017 година работеле 27.981 луѓе, што е намалување на бројот на вработени за околу два проценти во споредба со 2016 година.

На врвот на ранг-листата на државни претпријатија според големината на приходите што ги оствариле во 2017 година веќе неколку години по ред е АД ЕЛЕМ со приходи од речиси 219 милиони евра, но во споредба со 2016 година тие се намалени за 3,4 проценти.

Второ според висината на приходите е рангирано ЈП за државни патишта со инкасирани 146,3 милиони евра, што е за 41,6 отсто  повеќе отколку во 2016 година.


Европските компании кои инвестирале во руски гасовод ќе се соочат со санкции од САД


Вашингтон, 12 јули, 2018 - 10:32 (META) 

Санкции за европските компании кои инвестирале во рускиот гасовод „Северен поток 2“ кон Германија, најави администрацијата на американскиот претседател Доналд Трамп.

– Бевме јасни дека постои ризик од воведување санкции за компаниите кои работат во секторот на рускиот енергетски извоз –  изјави претставник на американскиот Стејт департмент.

Тој додаде дека Вашингтон смета дека „гасоводот ќе ја поткопа целата енергетска безбедност и стабилност на Европа, давајќи и на Русија уште еден инструмент за вршење политички притисок врз европските земји, особено врз Украина“.

Доколку САД ги спроведе санкциите, засегнати ќе бидат компаниите „Унипер“ (Uniper), „Винтершел“ (Wintershall), „О-ем-ве“ (OMV), „Анжи“ (Engie) и „Шел“ (Shell).


Странските заинтересирани за соработка со домашните компании, но им треба поддршка


Скопје, 9 јули, 2018 - 13:14 (META) 

Стопанската комора на Македонија ги споила домашните и странските компании кои би можеле да соработуваат, а најголем интерес за соработка пројавиле компаниите од автомобилската индустрија, информираше денеска Јадранка Аризанковска од Стопанската комора на Македонија.

Таа додаде дека на домашните компании им треба поддршка и помош за градење капцитети за да може да се реализира соработката.

Од комората очекуваат 10 до 15 компани да поминат конкретна теоретска обука, а во пет да бидат спроведен таканаречени индивидуални „инхаус“ обуки во следниве два месеца.

– Проектот треба да резултира со пет компании кои ќе склучат договори за одредена соработка дали за нов производ или услуга што домашните компании можат да ја испорачаат – рече Аризанковска.

Според анализите на Комората македонските компании имаат потреба од поддршка во делот на креирање нов производ, воведување нови технолошки процеси или преструктуирање на веќе постојните, воведување стандарди што ги бараат странските компании, но и нови менаџмент решенија и техники.

Стопанска комора вложува големи напори за едуцирање на компаниите за да можат сами да аплицираат за ЕУ-фондови.


Промовирана Индустриска стратегија за раст на производствениот сектор


Скопје, 5 јули, 2018 - 12:11 (META) 

Денеска беше промовирана Индустриска стратегија која произлезе од проектот „Ревизија на индустриската политика 2009-2020“, финансиран од Делегацијата на ЕУ и имплементиран од Министерството за економија.

Стратегијата, според министерот за економија Крешник Бектеши е во согласност со принципите на европските добри практики и е клучна економска основа на земјава во преговорите за пристапување со ЕУ.

– Фокусот во Стратегијата е ставен на производствениот сектор, а во документот се интегрирани мерките од Планот за економски раст и предложени се нови мерки. Целта е да се промовира индустријализацијата преку стимулирање на растот и развојот на производствениот сектор – рече Бектеши.

Тој додаде дека Стратегијата има пет цели, и тоа зајакнување на базата на преработувачката индустрија, подигнување на продуктивноста во производството, иновациите и трансферот на технологии, катализирање на зелената индустрија и зеленото производство, стимулирање на извозот на производството, изградба на сектор за учење за производство.

Со новиот план за економски раст на Владата, следните пет години ќе се доделат државни средства за производствениот сектор во износ од 150 милиони евра.

Според раководителот на секторот за соработка во рамки на Делегацијата на ЕУ, Никола Бертолини, она што државата го правела последните десет години не било добро.

– Нема да има конкурентност со субвенции. Субвенциите ја влечат економијата надолу. Конкурентноста почнува да се развива кога бизнисот лежи на здрави основи – порача тој.

Бертолини укажа дека еден од поголемите проблеми со кои се соочува македонската економија е недостигот на соодветно едуциран, млад кадар и додавајќи дека Индустриската стратегија што произлезе од проектот, претставува добра појдовна основа. Покрај стратегијата, подготвен е и Акционен план за периодот 2018-2020.

Преработувачката индустрија учествува со 12,2 отсто во БДП (2016 година), вработува 19 проценти од вработените и учествува со 10 проценти во бројот на активни компании, а најголем дел од извозот или 87 проценти од извозот се креира кај компаниите од индустријата.

– Речиси 40 проценти од вкупните странски инвестиции во државата се во преработувачката индустрија, од кои 75 проценти се концетрирани во транспорт и опрема, основни и преработени материјали и преработка на храна – информираше Бектеши.


ССК: Неформалната економија најголем проблем во сите сектори


Скопје, 4 јули, 2018 - 15:04 (META) 

Сузбивање на неформалната економија во Македонија која изнесува над 30 проценти е главниот предизвик за обезбедување поволен деловен амбиент за малите и средни претпријатија кои се стожер на македонската економија и сочинуваат 99,7 проценти од сите компании со учество од 70 отсто во домашниот бруто-производ (БДП).

Ова беше една од темите на која претседателката на  на Сојузот на стопански комори, Данела Арсовска и членовите на Управниот одбор, дискутираа со министерот задолжен за регулатива за подобрување на инвестициската клима за домашните претпријатија, Зоран Шапуриќ.

Според анализите на Сојузот, неформалната економија најмногу е застапена во транспорт, градежништво, туризам, угостителство, услужни дејности и земјоделство.

„Неформалната економија, претставува директна нелојална конкуренција на регистрираните и го поткопува развојот на стопанството. Потребно е да се овозможи функционален механизам за справување со сивата економија, бидејќи таа не придонесува во буџетот и дополнително ги дестимулира компаниите да инвестираат со тоа што ги руши основите на еднаквост врз кои се темели еден пазарен систем“, изјави Арсовска.

Таа додаде дека неформалната економија бележи пораст секоја година и доколку не се отпочне со сериозна акција за нејзино сузбивање финално ќе предизвика и дерегистрирање на оние претпријатија кои работат на пазарот и нивно преминување во сивата зона.

Анализите на Светска банка покажуваат дека учеството на компаниите кои се борат против нерегистрираните или неформални компании во Македонија е 55, 5 проценти или најмногу во регионот пред Црна Гора со 52,4 проценти, Хрватска со 48,2 проценти, Албанија со 40,2, Србија со 37, 5 проценти и Словенија со 26,5 проценти.


Арсовска: Стопанството е во стагнација, потребни се активни мерки за раст


Скопје, 7 јуни, 2018 - 15:21 (META) 

Претседателката на Сојузот на стопански комори, Данела Арсовска, на денешниот форум насловен „Потенцијал на регулатива за ангел-инвеститори“, рече дека летаргијата кај стопанствениците е резултат на континуираната криза и воздржување од инвестиции.

„Стопанството е во стагнација и потребни се активни мерки за поттикнување на нови инвестиции и раст. Она што ние во стопанството го чувствуваме е една летаргична состојба по основ на инвестициите. Не се работи само за тоа дека компаниите не инвестираат, туку дека и оние малку средства што ги имаат не се подготвени да ги вложат во состојба на ризик, особено кога се работи за добра идеја која бара повеќе средства. И комерцијалните банки во Македонија не нудат финансиски средства за проекти без целосно покритие. Затоа сметаме дека алтернативните начини на финансирање се влез на големи средства по основ на капитал во нашиите национални компании со цел нивно брзо растење и овозможување да го реализираат она што не се во можност да го спроведат со сопствените средства“, додаде Арсовска.

На Форумот, на кој учествуваше и гувернерката Анита Ангеловска-Бежоска, беше потенцирана потребата од законско регулирање на ангел-инвестирите, создавање поволен амбиент за нивен влез, а законската регулатива во најголем дел да биде во функција на проверка на капиталот на ангел инвеститорите.

Еден од заклучоците на Форумот беше и тоа дека постојат потенцијални пречки од Законот за трговски друштва за идните инвестиции.

„Македонија има недостиг од комерцијални форми за поддршка на компаниите особено малите и средни претпријатија, како и старт-ап бизнисите, токму затоа по примерот на земјите со конкурентни економии потребен е влез на ангел-инвеститори кои финансиски ќе ги поддржат македонските компании, ќе ги зајакнат, а со тоа и домашното стопанство“, велат од ССК.