!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Утре почнува расправата за Законот за јазиците во Комисијата за европски прашања


Скопје, 10 декември, 2017 - 18:57 (META) 

Со почеток во 11 часот, утре во Собранието на Република Македонија, Комисијата за европски прашања ќе ја одржи 6-тата седница. На дневниот ред единствена точка е предлог-законот за употреба на јазиците, во второ читање.

Оваа седница за законот за јазиците првично беше закажана за 22 ноември, Денот на албанската азбука, но претседателот на комисијата, Артан Груби, ја одложи. Тој рече дека тоа го сторил за да не се дефокусира јавноста од итните прашања.

Иако Груби негираше поврзаност, таквиот потег уследи откако еврокомесарот Јоханес Хан при посетата на Скопје изјави дека владата треба да се фокусира на приоритетните реформи за кои ќе биде оценувана и дека законот за јазиците не е во Договорот од Пржино, ниту, пак, е нешто кое Брисел го бара.


Како „копи-пејст“, „препишани“ и „излишни“, не поминаа 95 амандмани за буџетот


Скопје, 7 декември, 2017 - 15:03 (META) 

„Не се прифаќа“. „За побараното со овој амандман веќе се предвидени пари во буџетот за 2018 година“. „Општините треба да аплицираат во соодветното министерство и ќе добијат пари од буџетот“. Така денеска гласеше постојано одговорот што го даваше Ширет Елези, заменик-министер за финансии, како претставник на Владата, на сите прашања од претседавачот на седницата на собраниската Комисија за финансирање и буџет, Васко Ковачевски, како се изјаснува Владата за одреден амандман.

До попладневната пауза беа разгледани 95 амандани за буџетот за 2018 година, а од нив, освен трите што Беса ги повлече, сите беа отфрлени со само еден глас „за“ или без гласови за поддршка. Пратениците од ВМРО-ДПМНЕ и денеска не учествуваа во работата на комисијата. За разлика од нив, на седницата беа пратениците од Беса, кои ги образлагаа своите предлози.

Пратениците Жаклина Лазаревска, Диме Велковски, Ивана Туфегџиќ, Горан Милевски прашува како е можно најголемиот дел од амандманите да бидат буквално истите, со истата побарана сума и со истото образложение, „а да се смени само „старски дом“ со „училиште“ или да се смени името на местото.

– Од една ставка ги барат сите пари од Филхармонија. И што ќе се случеше ако министерството ги прифатеше барањата? Кога ги пишувале амандманите брзале, не виделе дека во сите бараат по 20 милиони од Филхармонија. Па, помножете со бројот на амандмани и ќе видите дека така Македонска филхармонија не само што ќе остане без пари, туку ќе ѝ се создаде и долг од 7 милијарди денари. Овие амандмани немаат врска со реалноста. Седнале во еден ден, само градовите ги смениле, сè друго е исто – рече Милевски.

Независната пратеничка Ивана Туфегџиќ, пак, амандманите од ВМРО-ДПМНЕ ги оквалификува како „чист популизам“, само за да се каже дека се поднесени амандмани, а тие се или непотребни или технички неуредни.


Анѓушев: Предложениот буџет за 2018 година е најекономскиот и најреформскиот досега


Скопје, 26 ноември, 2017 - 16:31 (META) 

Вицепремиерот за економски прашања денеска, еден ден пред почетокот на комисиската расправа за буџетот за 2018 година во Собранието, на прес-конференција истакна дека од сите буџети досега, предложениот за 2018 година има најреформски и најекономски карактер.

Буџетот за 2018 година е 211,7 милијарди денари или 3,4 милијарди евра и треба да обезбеди најмалку 3,2 отсто пораст на домашниот бруто-производ (БДП), а буџетскиот дефицит е проектиран на 2,7 отсто со тенденција на опаѓање.

– Наменивме повеќе од една милијарда денари за програмата за поттикнување на вработувањето, што претставува 5 отсто повеќе во однос на 2017 година, со кои ќе стимулираме нови подобро платени работни места. Ќе ги поддржиме компаниите да исплаќаат повисоки плати, со што ќе ја отвориме спиралата за зголемување на просечната плата – посочи Анѓушев.

За програмата за економски развој, според предлог-буџетот за 2018 година се наменети 46 отсто повеќе средства, а се кратат од непродуктивни трошоци, како што е промоцијата на Македонија како бизнис-дестинација.

– За поддршка на домашни гринфилд-инвестиции се наменети повеќе од 900 милиони денари или 592 отсто повеќе во однос на ребалансот во 2017 година, 585 милиони денари или 23 отсто повеќе средства за привлекување странски инвестиции, како и 385 милиони денари за поддршка на инвестициони вложувања. Домашните и странските инвеститори имаат исти услови за инвестирање, независно дали ќе се одлучат да инвестираат во технолошко-индустриските развојни зони (ТИРЗ) или надвор од нив – додаде Анѓушев.

Инаку, расправата за буџетот за 2018 година во Комисијата за финансирање и буџет на Собранието почнува утре и според деловникот може да трае 10 дена.


Жестоката расправа за бегалците ја прекина седницата на собраниската комисија


Скопје, 1 август, 2017 - 17:38 (META) 

Претседателот на собраниската Комисија за труд и социјална политика, Владимир Ѓорчев, денеска на седницата посветена на предлог-стратегијата за интеграција на бегалци и на странци за периодот од 2017 до 2027 година и за националниот акциски нацрт-план за интеграција на бегалци, упати серија прашања до Министерството за труд и социјала.

Ѓорчев побара одговори од заменик-министерот за труд и социјална политика, Елми Азири, за тоа каков ќе биде ефектот на пазарот на трудот доколку Македонија се отвори за масовен прилив на ниско квалификувана работна рака, дали бегалците и мигрантите ќе добиваат приоритет при делењето на социјални станови, отворени места во градинките, здравствената заштита и други програми за помош кои се предвидени во документите подготвени од Министерството.

– Во акцискиот план предлагате да се воведат политики и модели и да се подготват мерки за локална интеграција на бегалците и на странците на ниво на општините. Посочете ни конкретно на кои општини мислите? Праќате циркуларни барања до сите општини во Македонија, па кажете ни дали ова се однесува на центарот во Визбегово и во Демир Капија, дали се планира проширување на центрите во Гевгелија и во Куманово – праша Ѓорчев.

Заменик-министерот Азири, сепак, не прецизираше во кои општини се планира да се спроведуваат мерките за интеграција на бегалците и на странците.

Претставничката на невладината организација „Легис“, Јасмина Голубовска, бурно реагираше на должината на воведното обраќање посветено на стратегијата и на акцискиот план, велејќи дека со тоа се троши времето на учесниците во дискусијата. По ваквата реакција, дебатата се вжешти, поради што Ѓорчев ја прекина седницата.


Пленарната седница за предлог-буџетот за 2017 година закажана за понеделник


Скопје, 12 октомври, 2016 - 11:47 (META) 

Пленарната седница на која пратениците треба да расправаат за предлог-буџетот за 2017 година е закажана за понеделник, 17 октомври.

По завршување на комисиската расправа, предлог-буџетот за 2017 година беше вратен на повторно разгледување во Владата, која, пак, повторно го вратила до Собранието.

Расправата за предлог-буџетот на пленарната седница може да трае најмногу пет дена.

Предлог-буџетот за 2017 година тежи 3,3 милијарди евра.


На Катица Јанева ѝ се слоши, комисиската расправа одложена за утре


Скопје, 22 септември, 2016 - 20:17 (META) 

На специјалната обвинителка Катица Јанева вечерва ѝ се слоши откако цел ден присуствуваше на седницата на собраниската комисија за политички систем, на која втор ден се разгледува извештајот на Специјалното јавно обвинителство, објави телевизија „Телма“.

Претседателот на комисијата, Влатко Ѓорчев, дозволи пауза, меѓутоа пратеникот на ВМРО-ДПМНЕ, Крсто Мукоски, инсистираше да постави прашања до Јанева. Тој не сакаше да ја напушти говорницата, по што Јанева си замина.

Комисиската расправа ќе продолжи утре во 13 часот.


Дали на 12 октомври може да се повтори 24 декември: Роковите го притискаат буџетот


Скопје, 22 септември, 2016 - 11:08 (META) 

До 12 октомври, кога најрано треба да се распушти Собранието заради изборите на 11 декември, остануваат 14 работни дена, во кои треба да се запазат сите законски рокови за донесување на новиот буџет за 2017 година, кој изнесува 3,3 милијарди евра.

Предлог-буџетот за 2017 година, Владата до Собрание го достави на 20 септември, а според Законот за буџет, по доставата на предлог-буџетот во Собрание тој се става на пленарна седница по најмалку 20 работни дена.

Од 20 септември, откако предлог-буџетот влезе во собраниска процедура, до 12 октомври, кога најдоцна треба да се изгласа поради распуштањето на Собранието, има само 16 работни денови, со што не може да се запази законскиот рок од минимум 20 дена предвиден со собранискиот деловник.

Во рок од пет до десет дена од влегувањето во Собранието, предлог-буџетот се доставува на Комисијата за финансирање и буџет, која го разгледува максиумум 10 дена.

По комисиската расправа, предлог-буџетот со извештај се враќа до Владата. Доколку има измени и дополнувања, се остава рок од три дена за амандмани на дополнетиот предлог.

Според деловникот на Собранието, буџетот на пленарна седница се разгледува максимум пет дена.

Оттаму, ако максимално се испочитуваат сите рокови, нема да се стигне на овој собраниски состав да се усвои буџетот, но секогаш постои можност Владата и владејачкото мнозинство да го забрзаат процесот.

Во однос на запазувањето на законските рокови, министерот за финансии Кирил Миноски истакна дека работа на Министерството за финансии е да го достави предлог-буџетот до Влада, а потоа целата процедура се остава на Собранието.

Опозицискиот СДСМ засега не најавува никаква стратегија во врска со донесувањето на буџетот, освен соопштението дека ако тој биде донесен, кога ќе формираат влада, ќе направат ревизија на овој стратешки финансиски документ.