!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев: Во договорот со Бугарија нема дилема дека се работи за две држави, два народи, два јазика


Скопје, 18 јули, 2017 - 16:35 (META) 

Договорот е основа за добрососедство и за пријателство, двете држави во иднина ќе работат за заемен успех и тој е добар за националните интереси на Република Македонија, изјави премиерот Зоран Заев по завршувањето на затворената седница на собраниската Комисија за надворешна политика, на која тој го презентираше нацрт-договорот за добрососедство со Бугарија.

– Со договорот, Владата уште еднаш ја афирмира посебноста на македонскиот народ, македонскиот јазик и на македонскиот идентитет. Во договорот нема дилеми дека се работи за две држави, два народи, два јазика. Со договорот се отвораат нови перспективи на соработка со соседите и на забрзување на процесот на интеграции во Европската Унија и во НАТО. Реткост се вакви договори помеѓу две држави без посредство на големите сили – вели Заев, кој очекува договорот да биде потпишан до 1 август.

Заев додаде дека состанокот претставувал можност тој и неговите советници да добијат сугестии од власта и од опозицијата во Собранието во врска со документот и додаде дека додека не се стави потпис на договорот, сите опции се отворени.

Договорот, како што кажа, ќе помогне за поврзување на патната и на гасната инфраструктура помеѓу Македонија и Бугарија, ќе се унапредат размената на стоки, услуги и капитал, ќе се даде јак импулс на изградба на Коридорот 8 за што на самитот во Трст Македонија доби грант од 70 милиони евра, а ќе има царински и гранични олеснувања. Постојните гранични премини ќе се реновираат, а македонската влада, како што рече, ќе бара и нов граничен премин кај Берово.

– Заедно ќе ја спречуваме недобронамерната пропаганда во двете земји, заедно ќе бидеме против говорот на омраза и заедно ќе го поразиме национализамот. Република Бугарија цврсто го поддржува приемот на Република Македонија во ЕУ и во НАТО, без да нè условува на решавање на спорот за името. Ќе ни ги пренесе сите искуства со ЕУ-интеграциите, особено во делот на прибирање на средствата – додаде Заев.


Почна седницата на Комисијата за надворешна политика, Заев го презентира договорот со Бугарија


Скопје, 18 јули, 2017 - 13:36 (META) 

Премиерот Зоран Заев денеска на затворена седница на собраниската Комисија за надворешна политика го презентира нацрт-договорот за добрососедство на Република Македонија со Република Бугарија.
На седницата присуствуваат претседателот на Собранието, Талат Џафери, координаторите на пратеничките групи и претседатели на соодветни комисии.

Заев кажа дека потребно е да се отвори расправа за нацрт-договорот во функција на градење заеднички национални консензуални политики од интерес за сите граѓани.

– Сакавме овие прашања да ги отвориме така како што им доликува: прво за нив да се зборува во најважната институција, Собранието, потоа на седница на Влада, потоа би ја информирале комплетно јавноста и ако се заокружат сите постапки во позитивна смисла, премиерот би ставил свој потпис, а Собранието би го ратификувало договорот – рече Заев, посочувајќи дека очекува договорот да биде заокружен на 1 август.

Тој додаде дека барањето за затворена седница го заснова на Виенската конвенција, но и затоа што не сака да го наруши моментот на заемно почитување со Бугарија.

Седницата почна по проверката на безбедносните сертификати на пратениците, а пратениците кои немаа такви сертификати, потпиша соодветни изјави.


Договорот со Бугарија денеска на затворена седница на Kомисијата за надворешна политика


Скопје, 18 јули, 2017 - 9:41 (META) 

Членовите на собраниската Комисија за надворешна политика денеска во 10 часот на затворена седница ќе го разгледуваат нацрт-договорот за добрососедство помеѓу Република Македонија и Република Бугарија.

Седницата е закажана откако вчера до Комисијата за надворешна политика беше упатено барање од Владата на Република Македонија.

На седницата се очекува да присуствува и премиерот Зоран Заев, кој треба да го образложи постигнатиот договор.

Минатата недела, кога Заев го презентираше реформскиот план „3-6-9“ пред Комисијата за европски прашања, вети дека договорот со Бугарија, сепак, ќе им го достави на увид на пратениците.

Реакцијата на премиерот дојде откако координаторот на првата од десетте пратенички групи на ВМРО-ДПМНЕ, Илија Димовски, обвини дека Владата ја игнорира опозицијата за договорот со Бугарија, дека молчи за деталите од посетата на шефот на македонската дипломатија, Никола Димитров, на Атина, а не ја консултирал ниту за законот за јазиците.


Договорот со Бугарија утре на затворена седница на Комисијата за надворешна политика


Скопје, 17 јули, 2017 - 20:09 (META) 

Нацрт-договорот за добрососедство помеѓу Република Македонија и Република Бугарија утре ќе биде претставен пред членовите на собраниската Комисија за надворешна политика на затворена седница, со почеток во 10 часот, информираат собраниските служби.

Седницата е закажана откако денеска до Комисијата за надворешна политика било упатено барање од Владата на Република Македонија и на неа се очекува да присуствува и премиерот Зоран Заев.

Минатата недела, кога Заев го презентираше реформскиот план „3-6-9“ пред Комисијата за европски прашања, вети дека договорот со Бугарија, сепак, ќе им го достави на увид на пратениците.

Реакцијата на премиерот дојде откако координаторот на првата од десетте пратенички групи на ВМРО-ДПМНЕ, Илија Димовски, обвини дека Владата ја игнорира опозицијата за договорот со Бугарија, дека молчи за деталите од посетата на шефот на македонската дипломатија, Никола Димитров, на Атина, а не ја консултирал ниту за законот за јазиците.