Во Србија 29 луѓе починале од вирусот Западен Нил


Белград, 12 септември, 2018 - 14:59 (META) 

Од почетокот на сезоната на комарците, од 1 мај, о соседна Србија до вчера биле регистрирани 286 случаи на заболени од вирусот Западен Нил, а 29 починале од последиците, соопшти Институтот за јавно здравје на Србија „Др. Милан Јовановиќ – Батут“.

Најголемиот број заболени се регистрирани околу Белград и на територијата на Војводина.

До 6 септември, на Косово биле регистрирани три случаи на заболени од Западнонилска треска, со еден починат,  во Грција имало 168 случаи, со 18 починати.


Утре во Скопје ќе се прска против комарци


Скопје, 30 август, 2018 - 10:55 (META) 

Градот Скопје соопшти дека третата фаза прскање против ларви од комарци од авион и од земја ќе се изврши утре, 31 август, додека четвртата фаза од прскањето од земја против возрасни форми на комарци ќе почне в понеделник, а ќе заврши најдоцна в петок.

Доколку временските услови не го дозволуваат вршењето на дезинсекцијата, авионското прскање ќе се изврши првиот нареден ден кога ќе бидат поволни временските услови, а согласно на тоа ќе се извршува и прскањето од земја.

Град Скопје ги повика пчеларите навремено да ги преземат потребните мерки за заштита на пчелите.


ИЈЗ: Во Македонија нема Западнонилска треска


Скопје, 16 август, 2018 - 11:05 (META) 

Во Македонија до вчера не е регистриран ниту еден случај на Западнонилска треска, болест што ја пренесуваат комарците, соопшти Институтот за јавно здравје (ИЈЗ).

Здравствените власти потсетуваат дека ниту еден случај на заболен од оваа болест нема од 2016 година до вчера, за разлика од соседството, каде од почетокот на сезоната до 9 август има 13 смртни случаи.

Така, од соседните земји најлоша е состојбата со Србија, каде се забележани 102 случаи на Западнонилска треска, од кои 9 се починати, потоа Грција со 59 случаи , од кои три смртни. Болеста се појави и на Косово, каде беа регистрирани два случаи, од кои еден е починат.

Во поблиските земји, по 23 случаи имаше во Унгарија и Романија, каде пак имаше и еден смртен случај.


Шилегов: Проблемот со комарците е поради лошото време, но интензивно реагиравме


Скопје, 14 август, 2018 - 13:06 (META) 

Неповолното време го создаде проблемот со комарците, но интензивно реагиравме, порача скопскиот градоначалник Петре Шилегов, уверувајќи дека средството кое се користи при прскањето на комарците во главниот град не влијае на здравјето на луѓето.

– Препаратот кој го користевме годинава не влијае врз општото здравје на луѓето и малку или минимално влијае на остатокот од живиот свет. Исклучиво ги третира комарците и останатите инсекти кои се јавуваат како штетни инсекти во овој период – изјави Шилегов.

Тој вели дека годинава климатските услови, односно врнежливото лето, придонеле интензивно да се појават комарците.

– Годинава имавме климатски услови што придонесоа толку да се појават комарците. И на 1 јули температурата беше 18 степени и имаше врнежи. Имавме долг врнежлив период, врнежливо лето и наглото затоплување и сушење всушност претставува основа за интензивно зголемување, расплодување на комарците. Поради таквата масовна појава, иако претходно веќе двапати беа третирани комарците, дадовме интензитет со цел да го заштитиме здравјето на граѓаните. Интензивното прскање во изминатите четири дена придонесе таа експанзија на комарците да прекине – рече Шилегов.

Тој рече дека се прскало кога тоа го дозволувале климатските услови, односно најмалку три дена без врнежи и потоа и следните два дена да бидат без врнежи за да не се измие средството кое се употребува.

– Ние не можеме да ги предвидуваме природните појави, ниту временските услови, но можеме соодветно да реагираме. Соодветната реакција на градот беше со интензивирање на прскањето против комарци – рече скопскиот градоначалник.


Град Скопје четири дена ќе прска против комарци


Скопје, 10 август, 2018 - 13:11 (META) 

Утринава почна третото продолжено и засилено прскање против комарци во Скопје. Заради зголемените врнежи во изминатиот период се создаде поволна клима за брзо размножување на комарците, па Град Скопје одлучи третото прскање наместо два дена да трае 4 дена со што се зголемува интензитетот на заштита.

Третото авионско прскање против возрасни форми на комарци се изврши во раните утрински часови, а ќе се одвива и во наредните три дена, односно до 13 август (понеделник). Потоа, прскањето ќе продолжи од земја и ќе се одвива во деновите од 13 август до 17 август (од понеделник до петок), во период од 23 до 04 часот, наредниот ден.

По ова продолжено и засилено прскање Град Скопје ќе изведе уште две прскања против комарци што се планирани кон крајот на август и на почетокот на септември.

Се известуваат пчеларите навремено да ги преземат потребните мерки за заштита на пчелите.


Прскање против комарци викендов во Скопје


Скопје, 19 јули, 2018 - 14:51 (META) 

Град Скопје соопшти дека претстојниов викенд ќе почне втората дезинсекција, односно прскање, против комарци на подрачјето на главниот град.

Авионското прскање ќе се одвива в сабота и в недела во раните утрински часови.

Прскањето од земја против комарци ќе почне в недела, а ќе заврши најдоцна в четврток. Ќе се врши во периодот од 23 часот до 4 часот следниот ден.

Доколку временските услови во некој ден оневозможат да се прска, тоа ќе се прави следниот погоден ден, во истите термини.

Од Град Скопје ги советуваат пчеларите навремено да ги преземат потребните мерки за заштита на пчелите.


Прскање против комарци во Скопје в сабота и в понеделник


Скопје, 12 јули, 2018 - 17:00 (META) 

Град Скопје соопшти дека в сабота во раните утрински часови на подрачјето на Скопје, ќе се врши авионско прскање против ларви од комарци.

В понеделник пак, во текот на денот ќе се врши прскање од земја.

Доколку условите не дозволуваат прскање в сабота и в понеделник, тоа ќе се изврши во првиот погоден ден, во истите термини.

Од Град Скопје ги предупредуваат пчеларите навреме да ги заштитат своите пчели.


Викендов прво авионско прскање против комарци


Скопје, 5 јули, 2018 - 14:35 (META) 

Првото авионско прскање против комарци на територијата на Град Скопје ќе се одвива во сабота и недела во раните утрински часови, информираат од градската администрација.

Доколку временските услови не го дозволуваат вршењето на дезинсекцијата, истата ќе се изврши првиот нареден ден кога ќе бидат поволни временските услови, во истиот термин.

Се известуваат пчеларите навремено да ги преземат потребните мерки за заштита на пчелите.


Од утре до сабота Град Скопје ќе прска против комарци


Скопје, 2 јули, 2018 - 13:13 (META) 

Град Скопје од утре до сабота ќе прска против комарци, информираа денеска од градската администрација.
Првата фаза од терестричната дезинсекција на подрачјето на Град Скопје против возрасни форми на комарци ќе се реализира во периодот од утре до сабота а ќе се прска во периодот од 23 до 04 часот наредниот ден.

Доколку временските услови не го дозволуваат вршењето на дезинсекцијата, истата ќе се изврши кога ќе бидат поволни временските услови.

Од градот ги известуваат пчеларите навремено да ги преземат потребните мерки за заштита на пчелите.


Град Скопје не прска против комарци зошто испитува дали средството е штетно


Скопје, 12 јуни, 2018 - 11:08 (META) 

Град Скопје доцни со прскање против комарци оти испитувале дали средството кое се користи е штетно, велат од кабинетот на градоначалникот Петре Шилегов.

Прскањето против комарци Град Скопје го почнува кон почетокот на јуни, но годинава тоа ќе се одвива кон крајот на месецов оти уште не е завршен тендерот.

„Јавната набавка за прскањето против комарците е почната на 19 февруари, и во овој момент е во завршна фаза, се очекува да помине рокот за жалби и да се склучи договор со субјектите кои треба да го извршат во согласност со програмата, усвоена од Советот на Град Скопје. Поради сомнение дека препаратите со кои се прска се штетни по здравјето на граѓаните, побаравме мислење од соодветна здравствена институција околу средството кое треба да се употреби при прскањето. Во моментов во тек се административните постапки по што ќе се почне со аеросолното и терестичното прскање“, велат од кабинетот на градоначалникот Шилегов.