Таравари побара од командирот на полицијата во Гостивар да не ги казнува иселениците


Гостивар, 26 декември, 2017 - 13:48 (META) 

Градоначалникот на општина Гостивар, Арбен Таравари, со службен допис се обратил до командирот на полициска станица Гостивар, Гази Абдурахмани, барајќи тој и полицајците да бидат потолерантни и покоректни кон иселениците што се вратени во родниот крај за време на новогодишните празници.

„Од позиција на градоначалник на Гостивар и како граѓанин на овој град, барам вашите полицајци да бидат што покоректни во нивните задачи, особено за кон иселениците кои се дојдени во Гостивар. Тие се враќаат само неколку дена во својата татковина и даваат толку многу пари, што ги држат градот и државата со своите приходи! Не е ниту законско, ниту хумано а ниту морално да ги казнувате со парични казни, само затоа што се претпоставува дека тие имаат пари! Прво, тие се заморуваат многу за да ги заработат тие пари, и второ, треба да бидат еднакви пред законот!“, се вели во писмото од Таравари.


ВМРО-ДПМНЕ реагира за унапредување полицајци во Гевгелија и за автопатот Демир Капија – Смоквица


Скопје, 12 октомври, 2017 - 16:39 (META) 

ВМРО-ДПМНЕ денеска на две прес-конференции го обвини владејачкиот СДСМ дека е во паника и за партиски интереси деградира и унапредува полицајци, како и дека намерно не го пуштил во употреба автопатот Демир Капија – Смоквица, иако бил готов.

– СДС ги губи изборите и во Гевгелија. Затоа Спасовски е во паника и носи решенија спротивни на закон за да ги задоволи партиските послушници. Со издавање „писмени наредби“ со важност од 30 дена во екот на предизборната кампања, на само четири дена дена до изборите, се унапредени и разрешени полициски службеници по неколку скалила од системот на кариера. Ова е беззаконие и за ваквите предизборни партиски комбинаторики ќе следи одговорност – рече Милан Стефаноски на прес-конференцијата во седиштето на ВМРО-ДПМНЕ.

На друга прес-конференција Крсте Јовановски, пак, ја обвини Владата на СДСМ дека беспотребно ќе потрошела 850.000 евра преку нов анекс-договор за надзор, иако, како што рече тој, автопатот веќе бил готов.

– Значи, готов автопат, намерно го одолжуваат пуштањето во употреба поради изборите, а граѓаните тоа ќе го платат со 850.000 евра. Скандалозен анекс кој не се однесува на градежни работи, туку на надзор. Со ова, почитувани граѓани, се врши директна злоупотреба на вашите пари и се отвора сомнеж за тежок криминал кој СДС, Заев и Сугаревски свесно сакаат да го направат – обвини пратеникот Јовановски.


Чавков на чело на „Алфите“ го врати аболираниот Ивица Антески – Пуки


Скопје, 21 мај, 2016 - 14:13 (META) 

Министерот за внатрешни работи Митко Чавков веќе го сменил Примислав Димовски од командир на едницата „Алфа“ и на негово место го поставил Ивица Антески – Пуки, еден од 56. лица кои се најдоа на списокот на помилувани од претседателот, Ѓорге Иванов, пишува  „Либертас“ повикувајќи се на свои извори од МВР.

Од Министерството за внатрешни работи засега нема потврда, но ниту демант на оваа информација.

Ивица Антески – Пуки, кој и претходно беше командир на оваа единица, е еден од осомничените во случајот „Тортура“, што го отвори Специјалното јавно обвинителство (СЈО) за апсењето на поранешниот министер за внатрешни работи Љубе Бошкоски, пред ресторанот „Воденица“ на 6 јуни 2011 година.

Според СЈО, нарачател на апсењето бил екс-директорот на Управата за безбедност и контраразузнавање (УБК) Сашо Мијалков, кој е првоосомничен во случајот, како одмазда кон Бошкоски поради пораките кои му ги упатил за време на предизборната кампања во 2011 година.

Старо-новиот министер за внатрешни работи, Чавков, во текот на вчерашниот ден го сменил досегашниот началник на СВР Охрид Сашо Смилески и на негово место го поставил Гоце Недески.


Кадровски промени во СВР Тетово


Тетово, 13 октомври, 2015 - 12:36 (META) 

Неваир Шабани е новиот началник на Секторот за внатрешни работи Тетово, а досегашниот, Фаредин Зенуни, замина на друга должност во Министерството за внатрешни работи. Кадровски промени се извршени и во други сектори во тетовската полиција.

Началник на одделението за криминалистичка полиција е Берат Мустафи, кој на ова место го замени Муазам Халили. Нов командир на полициската станица за безбедност на патниот сообраќај Тетово е Атанас Беќарски, додека негов заменик е Бесир Ќамили, а за заменик-командир на полициската станица Тетово поставен е Ацо Милошевски.

Старо-нов началник на одделението за полиција е Сашо Трајчевски, a на одделението на криминалистичко-разузнавачка анализа, Соња Николовска.

З.Д.


Кривична пријава за полициски командир оти не запленил покер-апарати


Тетово, 10 февруари, 2015 - 13:32 (META) 

Командир во полициското одделение Камењане при СВР Тетово, А.М. (33), бил осомничен за злоупотреба на службената положба и овластување, информираат од МВР.

Кривичната пријава ја поднел Секторот за внатрешна контрола и професионални стандарди на МВР, поради сомневање дека командирот на 19 ноември минатата година, при контрола на нелегална спортска обложувалница во селото Пирок, не запленил шест покер-апарати.