Во Нигерија од колера починале 14 лица


Абуџа, 3 септември, 2017 - 17:20 (META) 

На североистокот на Нигерија од колера починале 14 лица, а жртвите претежно биле раселени лица во прифатни центри кои побегнале поради насилствата на Боко харам.

Нигериското министерство за здравство соопшти дека до 1 септември умреле 14 лица и додаде дека околу 180 лица се заразени со колера.

Колерата е многу заразна болест од која може да се умре за неколку часа доколку на заразениот не му биде укажана лекарска помош. Симптомите се повраќање, дијареја, грчеви во мускулите и општа дехидрација на организмот. Обично се јавува во средини каде има лоши хигиенски услови.


СЗО: Во Сомалија 25.000 лица се заболени од колера


Могадишу, 13 април, 2017 - 13:09 (META) 

Повеќе од 25.000 лица во Сомалија се погодени од колера, односно од акутна водена дијареја, а се очекува бројот на заболените двојно да се зголеми во претстојните месеци од летото, соопшти Светската здравствена организација.

Стапката на смртност предизвикана од болести поради загадената вода или храна изнесува 2,1 отсто во Сомалија, додека смртноста предизвикана од колера достигнува и до 14,1 отсто во Среден Џуби и до 5,1 отсто во Баколо, соопшти портпаролот на ОН, Јенс Лерк.

Околу 533 смртни случаи се поврзуваат со избивањето на епидемијата од почетокот на годината досега.


Ураганот Метју на Хаити усмрти 1.000 лица


Порт о Пренс, 10 октомври, 2016 - 12:16 (META) 

Ураганот Метју однел најмалку 1.000 животи на Хаити и предизвикал огромни штети во југозападните делови на земјата, по што почнало да се шири колера, соопштија денеска локалните власти.

На руралните заедници им недостига чиста вода, храна и засолниште, предупредија властите.

Властите почнале да ги закопуваат жртвите во заеднички гробници во градот Ѓереми, затоа што телата почнале да се распаѓаат.

Колерата предизвикува тешка дијареја и може да доведе до смрт, доколку не се лекува. Болеста се шири преку контаминирана вода и има краток период на инкубација.

Државните тимови го посетуваат тешко погодениот југозападен дел од земјата во обид да ги обноват медицинските центри и да стигнат до епицентарот на епидемијата.

Болниците не располагаат со возила, а нови пациенти постојано пристигнуваат во подрачјата кои речиси се целосно срамнети со земја.

Плантажите со банани се уништени во подрачјето, а жителите се хранат со кокосови ореви, бидејќи никаква помош не е пристигната.


Епидемија на колера во Ирак


Багдад, 22 октомври, 2015 - 15:45 (META) 

Минатиот месец во Ирак се потврдени 1.600 случаи на заболување од колера, додека хуманитарната ситуација во земјата се влошува и на повеќе од 8,6 милиони лица им е потребна помош, соопштија Обединетите нации.

Канцеларијата на ОН за координација на хуманитарните прашања наведува дека главна причини за епидемијата на колера се расипаните водоводни системи и недоволното количество хлор за прочистување на водата.

Последната епидемија на колера во Ирак била во 2012 година.


Мозамбик: Колера усмрти 41 лице


Малуто, 2 март, 2015 - 13:09 (META) 

Четириесет и едно лице починаа од колера во централните и во западните делови на Мозамбик од крајот на декември, соопштија локалните власти.

– Од 4.518 заразени, 41 лице починаа од 25 декември 2014 година – соопшти Министерството за здравство.

Колерата е честа во дождливата сезона, која во Мозамбик обично трае од октомври до март, но годинава е поизразена поради честите поплави, кои придонесуваат за ширење на инфекциите.

Симптом на колерата е дијареја, која доведува до нагла и драстично голема дехидрација, а доколку не се лекува, може да биде смртоносна.