Советникот од Германија кој ќе помага во реформите, ќе пристигне на крајот на месецот


Берлин, 6 февруари, 2019 - 14:59 (META) 

Вицепремиерот задолжен за економски прашања, Кочо Анѓушев, како копретседавач на Мешовитиот управувачки комитет помеѓу нашата земја и СР Германија, денеска е во еднодневна посета во Берлин.

Според Анѓушев, Германија е земјата во која што најмногу може да се научи за економијата и индустријата и токму поради тоа е формиран Мешовитиот управувачки комитет помеѓу двете влади.

„Денес имавме работна средба на која договоривме многу работи пред се’, договоривме кога ќе дојде советникот од германската влада во Република Македонија. Тоа ќе се случи кон крајот на февруари годинава, а се работи за искусен професионалец од Германија кој се надеваме ќе даде голем придонес кон нашите структурни реформи и едукацијата на нашата администрација во полето на пристап кон фондовите од ЕУ кои Македонија ќе има право да ги користи во следниов период. На тој начин, сметам дека ќе стекнеме квалификации за тоа како подобро да ги искористиме европските фондови во интерес на нашите граѓани за реализација на инфраструктурни проекти, како и за сите останати делови од економијата“, рече Анѓушев.

Со Германија лани остваривме нов рекорд во трговската размена што изнесува околу четири милијарди евра.

„Што се однесува до реалните проекти, со помош на Мешовитиот управувачки комитет и финансиските институции во Германија ќе обезбедиме средства, кои што ќе ги договориме во рамки на овој Комитет, за реализација на инфраструктурни проекти на комерцијална основа, а притоа ќе добиеме и одредени грантови преку редовните фондови на Европската унија“, додаде Анѓушев.


Средба помеѓу делегации на Македонија и Бугарија предводени од Анѓушев и Дончев


Скопје, 17 јануари, 2019 - 11:25 (META) 

Во пресрет на одржувањето на првиот македонско-бугарскиот бизнис форум „Македонија-Бугарија 2019“, во Владата на Република Македонија се одржа билатерална средба помеѓу вицепремиерот задолжен за економски прашања и координација со економските ресори, Кочо Анѓушев и потпретседателот на Советот на Министри на Република Бугарија, Томислав Дончев.

Од владиниот прес-центар информираат дека во главниот фокус на разговорите било продлабочувањето на економската соработка и бизнис релациите помеѓу двете земји во 2019 како важен предуслов за продолжување на трендот на зголемување на обемот на трговска размена, што претставува придобивка од потпишувањето на Договорот за соработка, добрососедство и пријателство помеѓу двете земји.

-Дозволете ми да ви се заблагодарам за големата поддршка што Република Бугарија ни ја дава на нашиот пат за зачленување во НАТО и ЕУ. Потпишаниот Договор за добрососедство, соработка и пријателство покажа дека имаме пријател кој сака да не види во ЕУ И НАТО. Сега, откако ги решивме отворените политички прашања е идеално време да се посветиме на економијата. Очекувам и во иднина да се зголемува економската соработка помеѓу двете земји, организирањето на прв македонско – бугарски бизнис форум на почетокот на годината е убав сигнал за компаниите од двете земји – рече Анѓушев.

Дончев нагласил дека развивањето на добрососедските односи има значајно влијание во зголемувањето на соработката во повеќе сектори и порача дека двете влади треба да му помогнат на бизнисот со тоа што ќе работат на надминување на проблемите со кои се соочуваат компаниите во двете земји.


Сериозна градежна патна и железничка инфраструктура најавува Анѓушев за 2019


Скопје, 27 декември, 2018 - 12:32 (META) 

Во организација на Канцеларијата на премиерот се одржа неформална предновогодишна средба и дружба на економскиот тим министри во Владата со претседателите на стопанските комори и претставници на бизнис-секторот.

Во рамките на оваа средба, вицепремиерот за економски прашања и координација со економските ресори, Кочо Анѓушев стави акцент на плановите за четирите клучни области, индустријата, трговијата, градежништвото и земјоделството кои имаат сериозно учество во севкупниот раст на бруто домашниот производ.

„Покрај автопатот Кичево – Охрид кој ќе продолжи да се гради, се градат експресните патишта, Штип – Радовиш, се гради Штип – Кочани, се гради излезот кај Куманово кон Крива Паланка, се гради излезот од Градско кон Прилеп, ќе се гради Скопје – Блаце. Ова се проекти од една груба бројка, од над една и пол милијарда евра заедно со железницата од втората фаза, којашто сега се тендерираше и сега е во фаза на евалуација, далекуводот од Македонија кон Албанија во вредност од 50 милиони евра кој е проектиран, а ќе се распише во јануари. Преку Законот за енергетика ќе се отвори простор за инсталација на 200 мегавати фотоволтаици кои ќе бидат распишани во две фази, првата ќе биде во првиот квартал во 2019“, соопшти Анѓушев.

Тој посочи дека со овие активности кои што се во тек, во 2019 започнува еден сериозен градежен процес на патна, железничка и енергетска инфраструктура кој на месечно ниво се очекува да има реализација од околу 50 до 60 милиони евра што ќе го подигне градежништвото на ниво на кое заедно со приватните градби ќе генерира раст.


Анѓушев: Сите средства предвидени за поддршка на економијата се искористени


Скопје, 26 декември, 2018 - 16:05 (META) 

Сите предвидени средства во буџетот и ребалансот кои што беа за поддршка на економијата во државата се искористени, одговори денеска на новинарско прашање вицепремиерот за економски прашања Кочо Анѓушев за тоа колку од средствата се искористени.

Тој додаде дека заклучно со утре, ќе бидат исплатени 35 милиони евра и над 250 компании ќе бидат помогнати.

Инаку денеска, премиерот Зоран Заев, директорот на Фондот за иновации и технолошки развој, Јован Деспотовски и вицепремиерот Анѓушев на 65 домашни компании им доделија грантови за кофинансирање на проекти од вториот инвестициски бран, во рамки на првиот повик од столб 3 од Планот за економски раст.

Посочувајќи дека досега повеќе од 130 компании од Македонија добија грантови за кофинансирање на нивните проекти, премиерот Заев истакна дека тоа е доказ дека Планот за економски раст во изминатата година не само што ја постигнал, туку и ја надминал зацртаната цел. Тој додаде и дека вкупниот износ на нови инвестиции во економијата само со втората група компании за финансирање е 824.828.614 денари (13.411.847 евра) и дека со инструментот за поддршка – инструмент за подобрување на иновативноста, вкупно се ангажирани 323 лица, од кои 85 се ново вработени.

„И натаму остануваме на нашата определба за раст на поддршката за домашните и странските инвестиции, со буџет повисок за 37 проценти во однос на ребалансот за 2018 година. Предвидуваме 37 отсто повеќе пари за зголемување на конкурентноста на приватниот сектор – преку мерки за нови инвестициони вложувања, мерки за поддршка на извозот и освојување на нови пазари, за поддршка за создавање на нови вработувања, за поддршка на малите и средните претпријатија, за странските инвестиции во технолошко индустриските развојни зони и секако за субвенции за иновативната дејност, технолошки развој и истражување“, рече Заев.


Италијанските компании заинтересирани за учество во развојни капитални проекти


Скопје, 3 декември, 2018 - 13:48 (META) 

Искуствата, технологиите и знаењата на италијанските компании во фазите на проектирање, изведба и надзор на градежните проекти кои се планира да се реализираат во Македонија се добродојдени, порача вицепремиерот за економски прашања Кочо Анѓушев на отворањето на бизнис-форумот кој го организира канцеларијата на италијанската Агенција за трговија во Скопје.

На бизнис-форумот присуствуваа претставници од 15 италијански компании, со меѓународно искуство во реализација на проекти од патна и железничка инфраструктура, енергетски како и проекти за заштита на животната средина.

Вицепремиерот ги информираше присутните за тековните и планирани инфраструктурни проекти, при што потенцираше дека заинтересираните италијански компании треба да ги следат јавните повици за реализација на проектите, нивното присуство ќе доведе до дополнителен квалитет и конкурентност во самите постапки.

Амбасадорот на Италија во Македонија Карло Ромео нагласи дека ова е втор бизнис-форум кој се организира во Македонија само во 2018 година, со што се докажува големиот интерес на италијанските компании за учество во развојни проекти во транспортот, енергетиката и животната средина. Тој нагласи дека претставниците на компаниите кои се присутни претставуваат здруженија кои работат во 90 земји и годишно реализираат приходи од околу 14 милијарди евра.

Италија е шести трговски партнер на Македонија, трговската размена помеѓу двете земји во првите девет месеци од 2018 година, во однос на истиот период лани, бележи раст од над 14,2 проценти, со вкупен обем од 448 милиони евра, а голем придонес за зголемување на економската соработка има порастот на извоз на производи од 11,7 проценти.

Бизнис форумот е во организација на Италијанската Агенција за трговија (ICE), во соработка со Италијанското здружение на приватни градежни компании (ANCE) и Италијанското здружение за инжинерство и градежништво (OICE).


Анѓушев: Се надевам дека набрзо ќе се формира една регионална берза на електрична енергија


Скопје, 29 ноември, 2018 - 13:45 (META) 

Македонија денеска, како актуелен претседавач, е домаќин на 16. состанок на Советот на министри на Енергетската заедница на која учествуваат премиерот Зоран Заев, вицепремиерот Кочо Анѓушев, министерот за економија Крешник Бектеши, кој претседава со Советот заедно со директорката за енергетска политика во Европската комисија, Меган Ричардс.

Заев истакна дека мисијата на оваа заедница е да воспоставува стабилна регулаторна и пазарна рамка, способна да привлече инвестиции во производство на електрична енергија и мрежи.

„Работата на Енергетската заедница секогаш треба да се гледа од аспект на интересот на граѓаните и токму затоа создавање интегриран енергетски пазар кој овозможува прекугранична трговија со енергија и интеграција со пазарот на ЕУ е од суштинско значење за нив. Тоа значи безбедно снабдување за да се обезбеди стабилен и континуиран пристап на енергијата до граѓаните и до компаниите, што е од суштинско значење за економскиот развој и социјалната стабилност“, рече Заев.

Македонија како членка на Енергетската заедница, се обврза да стане дел од внатрешниот пазар на енергија во Унијата преку членството во Енергетската заедница.

Анѓушев рече дека соработката во регионот е важна за енергетиката бидејќи таа не може да ги следи границите на државите кои што се територијални. Енергетиката, како што рече тој, е област која што само административно познава граници.

„Нашиот регион е премногу мал за сите ние да правиме поединечни берзи и аукции, така што правецот во кој што се движат работите во делот на енергетиката да има регионален пристап е вистинското решение. Лично се надевам дека брзо ќе дојде денот кога ќе се формира една регионална берза на електрична енергија и една куќа за аукции на крос-бордер капацитети во делот на енергетиката, бидејќи тоа е правото решение за проблеми коишто во моментов ги имаме“, рече меѓу другото вицепремиерот Анѓушев.

Очекувањата за следната година, како што посочи вицепремиерот, Анѓушев се дека државата ќе создаде околу 200 мегавати инсталирана сила во фотоволтаични електрани, што ќе има сериозен импакт во развојот не само на енергетиката, туку и на градежништвото.


Започна со работа мешовитиот управувачки комитет со Владата на Германија


Скопје, 23 ноември, 2018 - 14:38 (META) 

Првиот состанок на мешовитиот управувачки комитет помеѓу владите на Македонија и СР Германија се одржа денеска во Владата. Телото е формирано на германска иницијатива, а во насока на интензивирање на економската соработка на двете земји.

Вицепремиерот за економски прашања Кочо Анѓушев, кој е претседавач на телото од македонска страна истакна дека Македонија и Сојузна Република Германија имаат одлична економска соработка, Германија е прв трговски партнер на нашата земја и една од ретките со кои оставруваме суфицит во трговската размена.

„Целта на заедничкиот управувачки комитет е да ја забрза и подобри соработката на економско поле помеѓу Македонија и Германија, комуникацијата да биде подиректна, полесна и поедноставно да се надминуваат административните и бирократските бариери. Се разгледуваат три главни теми, од кои првата е зголемување на соработката во индустриското производство, односно да обезбедиме поголем извоз на македонски производи на германскиот пазар, како и поинтензивен трансфер на знаења и технологии од Германија во нашата земја. Воедно се разговараше и за можности за инвестиции од Германија во Македонија, да се зголеми бројот на инвеститори во нашата земја. Втората област на соработката е во изградба на инфраструктура, за проекти со особена важност за квалитетот на живото на граѓаните, каде очекуваме поддршка од финансиските институции од СР Германија. Третата област на соработка е образованието, каде што ќе се обидеме да ги пренесеме позитивните практики од германската страна за практично образование, образование кое е насочено кон индустријата и создавање на квалификуван кадар за потребите на странските и домашните компании“, рече Анѓушев.

Претседавачот на Комитетот од германска страна, Хелге Толксдорф од Сојузното министерство за екеномија и енергетика на СР Германија, потенцираше дека фокусот на соработката ќе биде ставен на компаниите кои работат во Македонија, но и на други институции, како „КфВ“ банката, една од водечките банки во регионот, која спроведува проекти во земјата. Поддршка на овој процес ќе дадат германскиот Комитет за економска соработка во Источна Европа и Делегацијата на германското стопанство во Македонија.

„Овој управувачки комитет се вклопува во стратегијата на германската сојузна влада, во однос на соработката со земјите од Западен Балкан. Веќе се организирани четири конференции со земјите од регионот, следува конференцијата во Полска наредната година, на кои што се разговара за агендата за поврзување, но и формирање на регионална економска соработка. Македонија е еден од главните столбови на нашата стратегија, со оглед на фактот дека тука веќе функционираат повеќе успешни германски компании и постои се поголем интерес на германски компании за инвестирање во земјата. Германските инвеститори сакаат да дојдат во земјата, да се задржат младите луѓе во земјата, да се спречи одливот на мозоци од Македонија“, додаде Толксдорф.


Анѓушев: Со 1,5 милиони евра кредит, „Југохром“ ќе се рестартира до јуни 2019 година


Тетово, 22 ноември, 2018 - 15:26 (META) 

По одлуката на владата за обезбедување кредит од 1,5 милиони евра за комбинатот „Југохром“ од Јегуновце, вицепремиерот за економски прашања Кочо Анѓушев при посетата на фабриката порача дека комбинатот може профитабилно да работи, а работниците можат да ја гледаат својата егзистенција во „Југохром“.

– Преку одобрувањето на кредитот е постигнат договор за рестартирање на „Југохром“. Повторно ќе работаат најголемите печки, со што ќе се функционира со 50 отсто од капацитетот. Сметаме дека тоа е повеќе од доволно. Како услов за давање на кредитот беше прво сопственикот да ги инвестира своите средства, а потоа да се обезбедат средствата. Комбинатот мора да ги исполни еколошките стандарди, а Владата ќе помогне преку Македонската банка за поддршка на развојот, која ќе склучи договор со фабриката, за изградба на филтерска постројка за заштита од загадување- истакна Анѓушев.

Се работи за кредит со хипотека кој со себе носи комерцијална камата. Управителот на „Југохром“, Васко Скендеровски, изјави дека комбинатот има перспектива и овој пат ќе се исполнат економскиот, еколошкиот, како и социјалниот сегмент во неговото работење.

– До сега се инвестирани 1,8 милиони евра, а во наредните 5,6 месеци ќе се инвестираат и добиените 1,5 милиони евра. Со тоа ќе се заврши изградбата на филтерската постројка. Според оптималните услови, кон крајот на април, почетокот на мај се очекува финализирање на изградбата, а потоа следи еден месец „ладна проба“, по која во месец јуни би требало да се започне со рестартирањето на работата. До Нова година, 150 вработени ќе бидат вратени на работните места, а потоа и останатите – рече Скендеровски.

„Југохром“ престана со работа пред две години, бидејќи не ја изгради филтер станицата во зададениот рок, која е задолжителна за комбинатот да добие А интегрирана еколошка дозвола за работа.


Анѓушев место Заев на работниот појадок кај Курц со премиерите од Западен Балкан


Виена, 19 ноември, 2018 - 13:19 (META) 

Вицепремиерот задолжен за економски прашања, Кочо Анѓушев, денеска присуствуваше на работниот појадок кој го организираше канцеларот на Австрија, Себастијан Курц за премиерите од Западен Балкан.

Анѓушев присуствуваше на појадокот наместо премиерот Зоран Заев откако тој го откажа неговото учество поради внатрешните политички случувања во земјата.

Од Владата информираат дека главна тема била регионалната соработка која има важна улога во процесот на интеграција на земјите од Западен Балкан во Европската Унија, начините за нејзино унапредување преку процеси на дигитализација, поврзување и економската соработка.

По завршувањето на официјалниот дел од работниот појадок се одржа заедничка прес-конференција на којашто се обратија канцеларот на Австрија, Себастијан Курц, еврокомесарот за соседска политика и проширување, Јоханес Хан, еврокомесарката за дигитална економија и општество, Марија Габриел, премиерите од Западен Балкан и вицепремиерот Кочо Анѓушев.

Канцеларот Курц изрази голема поддршка за земјите од Западен Балкан за процесот на ЕУ интеграција посочувајќи ја регионалната соработка како клучен сегмент кој ќе го забрза зачленувањето на земјите од Западен Балкан во ЕУ и еден од приоритетите на австриското претседавање со Европската Унија.

Тој ја посочи важноста од продолжување на иницијативата за формирање на регионална економска област како прв чекор во понатамошното интегрирање во единствениот европски пазар.

Вицепремиерот Анѓушев потенцираше дека подобар животен стандард за граѓаните може да се обезбеди само преку подобрување на економијата, што подразбира обезбедување државна финансиска помош, владеење на правото и законите, како и стабилност во земјата.

-Стабилна држава, особено за мала земја како Македонија, значи интеграција во подобар безбедносен и европски систем. Токму поради оваа причина, нашата земја ќе биде посветена на овој процес, ќе ги вложиме нашите најдобри напори за да ја завршиме нашата домашна задача, но и за да обезбедиме подобар живот за нашите граѓани. Да покажеме повеќе капацитет за регионална соработка, меѓу нашите држави, особено ако сакаме да имаме подобра соработка во Европската Унија во иднина – рече Анѓушев.


Анѓушев: Владата со анексот за автопатот Кичево – Охрид заштеди 95 милиони евра


Скопје, 2 ноември, 2018 - 15:15 (META) 

Со третиот анекс-договор помеѓу Владата и кинеската компанија „Синохидро“, главниот изведувач на работите на автопатската делница Кичево-Охрид, по една година преговори, Владата заштедила 95 милиони евра, изјави вицепремиерот за економски прашања Кочо Анѓушев на денешната прес-конференција.

-Денеска на владината седница го усвоивме третиот анекс на договорот за автопатот Кичево-Охрид со кој се дефинитивно се решаваат сите проблеми во градењето и со кој очекуваме интензивно да продолжи изградбата на автопатот. Бевме соочени со веќе потпишан договор, кој беше со потешкотии во своето функционирање. Имавме две можности, едната да се прекине изградбата, со што ќе бевме приморани да ги вратиме средствата кои веќе беа потрошени за проектот, да останеме без автопат, како и да платиме сериозни пенали поради лошиот проект кој беше усвоен од претходната Влада. Втората можност беше да се продолжи со изградбата на автопатот, но претходно да се доведе во технички и финансиски исправна состојба, за која се одлучивме како Влада – објасни Анѓушев.

Вицепремиерот рече дека согласно цените кои се наведени во основниот договор, вкупниот износ за дополнителни и непредвидени работи ќе изнесувал 282 милиони евра, но во преговорите биле постигнати значително пониски цени, односно 187 милиони евра, што е заштеда од 95 милиони евра.

Анѓушев образложи дека само за поправка на косините во должина од 30 километри, се планирани дополнителни трошоци од околу 70 милиони евра, а за тунелот, кој наместо во карпа е пробиен во земја, се потребни дополнителни зафати на 4 километри и дополнителен бетон и челични потпори.

Како што објасни министерот за транспорт и врски Горан Сугарески, со новиот анекс-договор изведувачот се согласува не само да изгради девет клучки, за да може жителите од населените места долж автопатот да се приклучуваат на него, а кои претходно не беа предвидени, туку и алтернативен пат од Пресека до Арбиново како составен дел на овој проект.

-Исто така изведувачот ќе ги изведе и сите дополнителни работи во тунелот Пресека, сите пропусти за вода на целата траса, како и ископите за стабилизација на косините и санација на свлечиштето на целата траса. Откако овој Анекс ќе влезе во сила, Изведувачот има рок од 28 дена да изготви детална програма за работа според реалните услови на терен согласно договорените позиции – нагласи Сугарески.