!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Анѓушев – Гарет: Македонија може повеќе да извезува во Велика Британија


Скопје, 19 јули, 2017 - 18:11 (META) 

Вицепремиерот за економски прашања, Кочо Анѓушев, денеска се сретна со британскиот амбасадор во земјава, Чарлс Гарет, со кој разговарал за економската соработка помеѓу Македонија и Обединетото Кралство.

Тие заклучиле дека соработката е на солидно ниво, но и дека постои можност економските односи уште повеќе да се развијат, особено во поглед на извозот од Македонија.

„Обединетото Кралство е значаен економски партнер на Македонија, втора земја по обем на трговската размена. Сметам дека досегашната меѓусебна економска соработка е добра основа која може да ја надградиме, особено во намалување на трговскиот дефицит и зголемување на извозот кон Обединетото Кралство. Со економските политики кои Владата ќе ги спроведe во наредниот период, ќе се насочиме кон тоа да ги развиваме македонските компании да произведуваат производи со повисока додадена вредност, да станат поконкурентни на регионалните и на европскиот пазар и да го зголемат извозот, со што ќе придонесеме и за отворање нови работни места и за побрз пораст на економијата“, истакна Анѓушев.

Амбасадорот Гарет се осврнал на активностите од Берлинскиот процес, односно на самитот за Западен Балкан кој се одржа во Трст, но и на активностите кои следуваат наредната година.

„На самитот во Трст, Македонија навистина имаше успешно претставување. Наредниот самит за Западен Балкан ќе се одржи во Обединетото Кралствo и се надевам дека планираните реформски процеси во земјата ќе бидат реализирани, а Република Македонија ќе добие уште поголема поддршка на наредниот самит“, изјавил Гарет.


90 проценти од компаниите имаат потреба од странски експерти


Скопје, 17 јули, 2017 - 18:01 (META) 

90 проценти од домашните претпријатија повторно би аплицирале на проектот „Странски експерти за домашни компании“, поддржан од швајцарската и од други амбасади, информираат од Владата каде што беше промовиран третиот јавен повик за проектот „Странски експерти за домашни компании“.

„Суштината на овој проект е да се пренесат искуствата од странски експерти во македонските компании за да се примени нивото на новите технологии во нашите компании, нивото на соработка со странски компании што имаат поголемо искуство во примената на новите технолошки достигнувања и менаџирање. Овој проект треба да им помогне на домашните компании да ги зголемат својот капацитет и своите знаења за да можат да бидат поконкурентни на светскиот пазар“, изјави вицепремиерот за економски прашања, Кочо Анѓушев.

Досегашните постигнувања од овој проект покажуваат дека дури 78 проценти од компаниите се задоволни од користењето на странска експертиза. Рокот за пријавување на третиот повик е до 29 јули.

На настанот присуствуваа претставници на стопанските комори и амбасадорката на Швајцарија во Македонија, Сибил Сутер Тејада, која рече дека Швајцарија поддржува 14 економски проекти во земјава.


Синдикатот на „Југохром“ бара нова средба со Заев


Тетово, 17 јули, 2017 - 13:23 (META) 

Синдикатот на компанијата „Југохром“ бара нова средба со премиерот Зоран Заев, бидејќи, како што велат оттаму, сè уште ништо не е реализирано од претходниот состанок помеѓу нивните претставници и Владата, што се одржа на 18 јуни оваа година.

Од синдикатот велат дека сакаат да бидат информирани од премиерот за „моменталната состојба и за неговото видување на статусот на комапнијата“, бидејќи, како што се додава во соопштението, синдикатот бил под притисок од вработените во „Југохром“, кои бараат организирање протести.

„На одржаната средба со Вас и со Кочо Анѓушев беше договорено дека Вие ќе преземете активности за одржување средба со сопственикот на компанијата и со невладините организации, за повторно да се разгледаат и да се најдат начини за фабирката да почне со работа. Бидејќи помина подолго време, а сме под силен притисок од вработените во „Југохром“ за организирање протести, бараме да одржиме средба на која би нè информирале за моменталната состојба и за вашето мислење за статусот на компанијата. Ве молиме бараната средба да биде одржана во најкраток можен рок, односно уште во текот на оваа недела“, стои во соопштението од синдикатот на „Југохром“.

Комбинатот престана со работа на 31 октомври минатата година, откако Инспекторатот за животна средина донесе одлука да се запре производствениот процес на фабриката, поради непочитувањето на рокот за изградба на филтер-станицата. Од раководството на „Југохром“ велат дека не успеале навреме да ја изградат станицата поради одолжување на постапката за добивање градежна дозвола.


Анѓушев: Добивме 70 милиони евра грант од ЕУ за пругата кон Бугарија


Скопје, 13 јули, 2017 - 14:15 (META) 

Од вкупно 194 милиони евра грант наменет за развој на инфраструктурата во Западен Балкан, Македонија на самитот во Трст добила 70 милиони евра за доизградба на пругата од Бељаковце до Крива Паланка, информираше денеска вицепремирот задолжен за економски прашања, Кочо Анѓушев, кој додаде дека оваа неповратна помош, доволна за да се покрие 46 отсто од вкупната сума што е потребна за изградба на втората делница од пругата кон Бугарија.

– Препознаен е реформскиот дух на Владата практично да ги имплементира сите процедури и потребни чекори за побрзо и полесно пристапување кон Европската Унија и до нејзините фондови – изјави Анѓушев.

Одговарајќи на новинарско прашање, Анѓушев кажа дека пругата ќе биде градена во континуитет и дека третата делница ќе се гради откако ќе биде завршена втората.

Тој, исто така, нагласи и дека биле направени контакти со Светска банка, која била незадоволна што последните две-три години воопшто не биле склучени нови договори за изградба на инфраструктура во Македонија, а и тие чија реализација почнала не е на потребното ниво.

Средствата што ги нуди Светска банка најчесто се за автопатска мрежа, а било разговарано и за буџетска поддршка која, како што рече Анѓушев, конечно ќе заврши кај македонските компании.


Хан: Интеграцијата на Западен Балкан во ЕУ не може да биде успешна без економска поддршка


Трст, 12 јули, 2017 - 12:53 (META) 

Протекционизмот не е вистински одговор за развој на економијата, изјави шефот на италијанската дипломатија Анџелино Алфано, при отворањето на бизнис-форумот во Трст, кој се одржува во рамките на самитот Западен Балкан – ЕУ.

Алфано истакна дека отвореноста и транспарентноста на државните органи кон бизнис-секторот се клучни за повисока динамика на економијата, а дека вистински предизвик е креирањето нови работни места за младите луѓе, во кои е иднината на секоја земја.

Еврокомесарот за проширување и за добрососедска политика Јоханес Хан нагласи дека самитот испраќа порака за поддршка и стимул за реформи во земјите од Западен Балкан. Тој рече дека одблизу се следат процесите на меѓусебно поврзување, спроведување на реформи во енергетиката и во другите области.

– Интеграцијата на Западен Балкан во ЕУ не може да биде успешна без економска поддршка. Европската Унија ќе ги поттикне реформите, за регионот да продолжи да се развива и земјите да го постигнат посакуваното ниво на економски развој. Економскиот развој е еден од клучните елементи за интегративниот процес на регионот на Западен Балкан во Европската Унија – изјави Хан.

Вицепремиерот за економски прашања, Кочо Анѓушев, рече дека Владата ќе се посвети на спроведување на потребните реформи што го трасираат патот на земјата кон членството во Европската Унија.

– Не е возможно да зборуваме за економски пораст на земјата ако не работиме на поддршка и на стимулирање на извозот на компаниите што работат во Република Македонија. Пазарот од два милиони луѓе е мал и пред сè треба да ги поддржиме нашите компании да растат и да бидат конкурентни во регионот, а потоа и во ЕУ – рече Анѓушев.

Во однос на привлекувањето странски инвестиции во земјата, Анѓушев рече дека сите странски инвеститори дека се добродојдени во Македонија и дека владата ќе ја гарантира безбедноста на странскиот капитал.

Самитот за Западен Балкан во Трст е четврти по ред и е дел од активностите кои се одвиваат во рамките на „Берлинскиот процес“, иницијатива на Европската Унија, за забрзување на евроинтеграцијата на земјите од Западен Балкан.


Анѓушев – Жбогар: Новиот закон за енергетика ќе биде донесен до крајот на годинава


Скопје, 7 јули, 2017 - 12:52 (META) 

Вицепремиерот задолжен за економски прашања, Кочо Анѓушев, денеска имал средба со евроамбасадорот Самуел Жбогар, на која на шефот на Делегацијата на Европската Унија во земјава му ја презентирал економската програма на Владата.

Анѓушев, како што соопшти неговиот кабинет, на средбата нагласил дека Владата ќе работи на создавање добра бизнис-клима и на овозможување исти услови за инвеститорите.

„Владата ќе работи на реализација на капитални проекти, важни за подигнување на конкурентноста на компаниите во земјата. Ќе ја стимулираме соработката помеѓу домашните и странските компании и ќе воведеме нов концепт за привлекување инвестиции, што ќе биде транспарентен и со исти услови и за странските и за домашните инвеститори“, рекол Анѓушев, стои во соопштението.

Тој додал дека реформите во енергетскиот сектор ќе бидат во фокусот на Владата и дека до крајот на 2017 година ќе биде донесен новиот закон за енергетика, во согласност со договорот со Енергетска заедница и со препораките на Европската комисија.

„Во новиот закон за енергетика ќе ги имплементираме третиот енергетски пакет на Европската Унија и мерките препорачани од Енергетската заедница. Ќе работиме на искористување на сите постојни капацитети за производство на енергија во земјата, но ќе поддржуваме и изградба на нови капацитети, особено од обновливи извори на енергија“, нагласил вицепремиерот за економски прашања.

Жбогар на средбата порачал дека ако се исполнат поставените цели, македонската економија ќе забележи пораст со посилно темпо, што е во интерес и на земјата, но и на регионот и на Европската Унија.


Анѓушев – Коблер: Странските инвеститори ќе имаат отворен партнер во Владата


Скопје, 6 јули, 2017 - 13:14 (META) 

Вицепремиерот задолжен за економски прашања, Кочо Анѓушев, денеска се сретна со амбасадорката на Република Австрија, Ренате Коблер, со која разговарал за инвестициите на компаниите од Австрија, која е втора земја во поглед на обемот на инвестиции.

– Инвеститорите од странство, вклучително и оние од Република Австрија, ќе имаат искрен и отворен партнер во Владата. Странските компании кои веќе имаат инвестирано во земјата треба да се чувствуваат слободни да продолжат со своите развојни активности. Владата ќе продолжи да привлекува и нови инвеститори, а преку поддршка на домашните компании, ќе гледаме соработката помеѓу домашните и странските компании да ја подигнеме на повисоко ниво, со што добробит ќе имаат и компаниите, но и економијата на земјата – изјавил Анѓушев.

Како што информираат од кабинетот на вицепремиерот, Анѓушев и Коблер заклучиле дека економската соработка ќе продолжи да се развива и во иднина и дека се очекуваат уште подобри економски резултати.


Заев и економскиот тим на Владата на средба со бизнис-заедницата


Скопје, 5 јули, 2017 - 19:54 (META) 

Премиерот Заев и економскиот тим на Владата денеска имаа работна средба со повеќе од 200 претприемачи, бизнисмени и стопанственици, во организација на Сојузор на стопански комори на Република Македонија.

Од кабинетот на премиерот соопштуваат дека Заев ги слушнал барањата и предлозите на стопанствениците и изразил цврста определеност на Владата да ја интензивира соработката со бизнис-заедницата, како и одлучноста низ заемна консултација да се носат одлуките во креирањето и во спроведувањето на економските политики.

– Владата ќе биде успешна ако соработува со бизнис-заедницата. Постои огромна мотивација и добра соработка помеѓу економските ресори во Владата. Желбата да бидеме сервис за бизнисот и за граѓаните е голема и очекуваме резултати од ваквата успешна соработка – изјави Заев.

Заев, пред претставниците на бизнис-секторот, ги презентирал економските политики на Владата за поддршка на домашните фирми и за нивно поврзување со странските инвеститори, а исто така го најавил и новиот ребаланс на буџетот.

Освен Заев на средбата присуствуваа и заменик-претседателот на Владата задолжен за економски прашања и координација на економските ресори, Кочо Анѓушев, министерот за финансии, Драган Тевдовски, министерот за економија, Крешник Бектеши, министерот за транспорт и врски, Горан Сугарески, министерот за земјоделство, шумарство и водостопанство, Љупчо Николовски, и министерот за животна средина и просторно планирање, Садула Дураку.


Анѓушев со владина делегација на комеморацијата за Хелмут Кол во Стразбур


Стразбур, 1 јули, 2017 - 11:47 (META) 

Вицепремиерот за економски прашања и за координација со економските ресори, Кочо Анѓушев, заедно со делегација на Владата денеска присуствува на комеморацијата за поранешниот германски канцелар Хелмур Кол, што се одржува во Стразбур, соопштија од Владата.

“Еврoпa зaгуби еден гoлем чoвек, визиoнер кoј ги зaдoлжи идните генерaции дa прoдoлжaт дa јa следaт идејaтa зa oбединетa Еврoпa”, изјaвил вицепремиерoт Анѓушев, изразувајќи сoчувствo нa гермaнскaтa кaнцелaркa Ангела Меркел, на претседателот на Европската комисија, Жан Клод Јункер, и на претседателот на Европскиот парламент, Антонио Тајани.

Нa кoмемoрaцијaтa присуствувaат и фрaнцускиoт претседaтел Емaнуел Мaкрoн и пoрaнешниoт претседaтел нa САД, Бил Клинтoн.

Хелмут Кол почина на 16 јуни оваа година, на 87-годишна возраст. Тој беше канцелар на Германија од 1982 до 1998 година од редовите на Христијанско-демократската унија, чиј лидер беше од 1973 до 1998 година. За време на неговото вршење на функцијата канцелар се случи паѓањето на Берлинскиот ѕид во 1989 година и повторно обединување на Западна и на Источна Германија во една држава.


Анѓушев уште еднаш ги повика ЕЛЕМ да го сопрат објавувањето јавни повици


Скопје, 19 јуни, 2017 - 16:31 (META) 

Вицепремиерот за економски прашања, Кочо Анѓушев, уште еднаш го повика раководството на АД ЕЛЕМ, веднаш да го запре објавувањето на јавните повици со проценета вредност од 80 милиони евра, за да се избегне штета на државниот и на буџетот на компанијата.

„Наспроти укажувањето од Владата, раководството на ЕЛЕМ, најпрвин во петокот, на 15 јуни, објави јавен повик за набавка на рударска опрема за РЕК Битола во вредност од 34 милиони евра, за денеска да го објави и јавниот повик за изградба на топлификација на Битола, Новаци, Логоварди и на Могила во вредност од 46 милиони евра“, се вели во соопштението од кабинетот на Анѓушев.

Оттаму потсетуваат дека раководството на ЕЛЕМ имало 11 години да ги реализира овие проекти, а особено проектот за топлификација на Битола.

Вицепремиерот нагласи дека одредена штета е веќе направена со објавувањето на јавните повици, но според него, „крајно време е управниот одбор на компанијата да донесе одлука за мораториум на проектите за да не се направи поголема штета и да не се загрози имиџот на Македонија и во меѓународни рамки“.