СДСМ: Мицкоски ја потврдува поврзаноста на ВМРО-ДПМНЕ со насилството од 27 април


Скопје, 10 декември, 2018 - 10:36 (META) 

За владејачката СДСМ е неприфатливо барање на Христијан Мицкоски да се формира независно тело кое ќе ги преслуша снимките на судиите и обвинителите во изминатите две години.

„Мицкоски ги потврдува сведоштвата за сериозна поврзаност на насилниците со ВМРО-ДПМНЕ во организацијата и координацијата на насилството од 27 април. Преку нелогични, несериозни и неосновани барања, интерпелации, измислици, Мицкоски се обидува да ги закочи реформите, да ги блокира процесите за интеграција на Македонија во НАТО и ЕУ. Не му беа доволни 11 години прислушување на Мицкоски па бара нови снимки да преслушувале „експертите“ од ВМРО-ДПМНЕ, одговори вчера СДСМ.

Мицкоски своите вкупно шест барања ги упати вчера од Кочани, каде ВМРО-ДПМНЕ одржа протест.

„Веднаш да се формира независно тело предводено човек предложен од опозицијата, коешто ќе ги преслуша, анализира, систематизира сите материјали коишто се собрани  изминативе две години како резултат на црниот Вотергејт на Заев, односно прислушувањето на сите судии и обвинители. Да ги видиме нарачаните пресуди  за поткуп, да ја видиме нарачаната пресуда за „Глобал“ , да видиме како нарачувате обвиненија за луѓето од 27 Април, да видиме како нарачувате обвиненија за ВМРО-ДПМНЕ, побара претседателот на ВМРО-ДПМНЕ од Кочани.

Тој рече дека после секој протест ќе има нови барања и побара оставки од министрите Спасовски и Димитров.

– Итна и неотповиклива оставка на министерот којшто својата нација ја нарече искомплексирана нација. Министерот кој благодарение на ова нација која го полни буџетот зема плата, ужива во привилегиите да се школува неговото семејство надвор од Република Македонија со стипендиите кој овој народ ги обезбедил. Итна и неотповиклива оставка на министерот за терор и прогон т.е. полиција, Оливер Спасовски затоа што откако е министер само порази шпиунски акции, претреси и омаловажувања на нашите браќа и сестри, граѓани на Република Македонија – рече Мицкоски.

Тој побара веднаш да сопре иницијативата од Владата за покачување на даноците „и да престане осиромашувањето на бизнисот и на граѓаните.“ Побара и соодветни мерки за решавање на проблемот со загадувањето на воздухот.

– Ги лажевте граѓаните испентарени на падините на преубавото Водно и велевте само да падне режимот и ќе започне да дува алпски воздух. Овде во Кочани им велевте на луѓето најзагаден град сте, многу скара вртите па затоа ви е загаден градот – рече Мицкоски, кој исто така побара „почитувања на јасно изразената волја на народот на референдум“.


Кочанчани бараат катна гаража, паркинзи и паркови


Кочани, 29 ноември, 2018 - 9:42 (META) 

Наоѓање на локација за изградба на катна гаража, решавање на проблемите со јавниот паркинг, дислокација на Градскиот пазар од строгиот центар и нови паркови, беа главните барања и предлози на граѓаните на Кочани на јавната презентација на Буџетот на Општината за 2019 година која се одржа вчера. Новата проекција на буџетот, проектите и плановите како да се трошат граѓанските пари ги претстави градоначалникот Николчо Илијев.

-Буџетот за 2019 година е проектиран на 185 милиони денари. Има зголемување на средствата за инфраструктурата од 61 милион на 75,5 милиони, а сето ова зборува за нашите намери за економично, планско и рационално работење – рече градоначалникот.

Намалена е проекцијата на општинскиот буџет за 2019 година. За тековната година 2018-та, Буџетот беше проектиран на 205 милиони денари, но очекувањата се дека до крајот на годината ќе биде реализирани 175 милиони денари.

Централната власт забележува на досегашното нереално планирање на општинските буџети, при што се забележување и до 40- 50 отсто отстапување на реализацијата од планираното. Поради тоа, за следната година општинските буџети не смеат да бидат поголеми за 10 отсто од реализираното од претходната година.


Кочанските советници ја преименуваа улицата „ВМРО“ во „Маршал Тито“


Кочани, 31 октомври, 2018 - 9:39 (META) 

Мнозинството во Советот на Општина Кочани го врати името на една од централните улици, што неколку децении го носеше името на претседателот на некогашната СФРЈ, Јосип Броз – Тито. Советниците од коалицијата на СДСМ го сменија името на улицата во „Маршал Тито“ со поддршка на еден независен советник. Советничката група на ВМРО-ДПМНЕ во време кога се гласаше за предлогот, ја напушти седницата на Советот.

Советникот од СДСМ, Благој Ситновски рече дека нема ништо против некоја друга улица во Кочани во перспектива да го добие името ВМРО, но не треба да се заборави човекот од нашата педесетгодишна историја, со чија помош беа поставени темелите на Република Македонија.

Името на улицата „Маршал Тито“ беше сменето во „ВМРО“ во пакет со 18 кочански улици во 2014 година, кога мнозинството во Советот го имаше ВМРО-ДПМНЕ.


Штипската Клиничка болница плати над 346.000 евра долг кон вработените


Штип, 18 октомври, 2018 - 14:04 (META) 

Со аванс од Фондот за здравствено осигурување, Клиничката болница од Штип им го плати долгот на болничарите, медицинските сестри и докторите, кои во периодот 2015-2017 година не добивале надоместок за дежурство. Над 80% од персоналот ангажиран во дежурствата имаше извршни решенија за наплата, со што на болницата и се закануваше блокада на сметката. Покрај основниот долг од 364.000 евра, болницата платила уште дополнителни околу 80.000 евра за извршување.

Директорот Ален Ѓеоргијев вели дека парите што ги позајмиле, сега Фондот за здравствено осигурување ги сопира на неколку рати. Веќе се минусирани 8 милиони денари од парите што ФЗОМ ги префрла на болницата за редовно работење.

-Ќе го стегнеме ременот, ќе се трудиме и натаму да останаме ликвидни како што сме до сега, бидејќи сè уште не сме навлегле во должничка криза. Можеби овие месец- два ќе имаме некои доцнења во исплатата, меѓутоа, јас сум оптимист дека ќе успееме да го пребродиме овој економски удар – изјави Ѓеоргијев.

Проблемот со неплатените дежурства се провлекуваше со години, за да кулминира кога вработените тужеа на суд, по што се наталожија над 450 извршни решенија.

Директорот Ѓеоргијев вели дека ако имало волја, претходното раководство на болницата лесно можело да го реши проблемот.

-Јасно е кој не ги исплаќал парите. Во законот јасно си пишува како треба да одат исплатите. Гледате колку сето ова нè чини. Некој друг, не знам од кои причини, не плаќал. На крај, по сумирањето на бројките, може ќе побараме одговорност – рече Ѓеоргијев.

Тој се заблагодари на поголемиот дел од вработените, кои по серија преговори, сепак одлучиле да почекаат и не ги активираат извршните решенија, кои, според директорот Ѓеоргијев, сигурно ќе им ја блокирале сметката.

Дежурствата ја чинат Клиничката болница во Штип значаен дел од месечните издатоци, особено со зголемувањата кои ги добија лекарите и средниот персонал. Сепак, повисоките плати не го решаваат проблемот со недостиг на лекари с- пецијалисти, кои акутно, штипската Клиничка болница го решава со позајмици.

Во моментов во Штип секоја недела дежураат специјалисти од Клиничкиот центар од Скопје и од Општата болница од Кочани. Во Штип доаѓаат 5 неврохирурзи од Клиниката за неврохирургија од Скоје, кои освен дежурство преземаат и редовни операции, а има договор за еден детски хирург. Од Општата болница од Кочани дежураат по еден  невролог и еден анестезиолог.


АХВ: Пирошките што затруја свадбари се правени нелегално над објектот на фирмата


Скопје, 3 мај, 2018 - 15:28 (META) 

Инспекциските служби на Агенцијата за храна и ветеринарство (АХВ), вчера доцна попладне заплениле 300 килограми смеса за подготовка на пирошки, како и пирошки и јајца, во простории над операторот за храна ДПТУ „Гицов“ ДООЕЛ од Кочани, кој на 25 април беше затворен од страна на АХВ и Државниот санитарен и здравствен инспекторат, по труење на 20-тина лица во Штип од пирошки.

И новите труења на свадбари викендот во Кочани и Кочанско, според АХВ се предизвикани од пирошките што овојпат се произведувале нелегално, во домашни услови.

„Со одземањето, спречувањето на нелегалното подготвување и дистрибуирање на небезбедните пирошки и нивно нештетно уништување под надзор на инспектор за храна, затворена е истрагата за овој случај на труење со храна, за што сторителот на делото ќе биде прекршочно и кривично гонет од страна на надлежните државни органи. Агенцијата за храна јавно се заблагодарува на граѓаните за дадената соработка при решавањето на овој случај“, порачаа од АХВ.


Кривична пријава за Тодоров поради несовесно работење при реконструкција на болници


Скопје, 3 април, 2018 - 11:01 (META) 

Управата за финансиска полиција (УФП) поднела кривична пријава за несовесно работење во службата против поранешниот министер за здравство, Никола Тодоров, и против П.В., раководител на Единицата за спроведување на Проектот за реконструкција и доградба на објекти на јавните здравствени установи при Министерството за здравство.

Во пријавата до Основно јавно обвинителство – Скопје (ОЈО), УФП вели дека во врска со договор склучен во 2010 година со изведувачот Конструктор Инженеринг АД – Сплит, за градежни и градежно-занаетчиски работи за Општа болница Куманово, Општа болница Кочани и Општа болница Крива Паланка, дозволиле ненавремено и неквалитетно изведување на работите.

Според УФП, тие во 2011 година не се обиделе да ја наплатат банкарската гаранција од 3,81 милиони денари (речиси 62.000 евра), ниту пак побарале да се продолжи нејзината важност.

Потоа во 2012 година е раскинат договорот со хрватскиот изведувач и биле ангажирани нови изведувачи, кои ги довршиле почнатите работи и вршеле поправки.


Мотоциклист загинал во судир со автомобил и друг мотоцикл


Кочани, 12 март, 2018 - 11:39 (META) 

Во тешка сообраќајна нессреќа вчера на патот Штип – Кочани животот го загубил 39-годишен жител на Свети Николе, откако мотоциклот со кој управувал се судрил со друг мотоцикл и со автомобил.

Според полицијата, во сообраќајната незгода која се случила пред 17 часот учествувале автомобил „фолксваген голф“ управувано од 19-годишна жителка на Кочани,  мотоцикл „сузуки“ со светиниколски регистарски ознаки управуван од В.Ц. (39) од Свети Николе и мотоцикл „хонда“ со бугарски национални ознаки управуван од В.Ј. (33), на кој сопатник бил К.Г. (22), двајцата од Свети Николе.

Од здобиените повреди починал В.Ц., додека В.Ј. и сопатникот К.Г. се здобиле со телесни повреди и се пренесени во Медицински центар Штип.


Пијан полицаец од Кочани ја тепал сопругата и дивеел дома


Кочани, 13 јануари, 2018 - 12:30 (META) 

Психичко и физичко малтретирање од нејзиниот сопруг пријавила вчера 38-годишната К.А.К. од Кочани. Таа во Полициската станица во градот кажала дека нејзиниот сопруг М.К. (39) вработен во МВР, под дејство на алкохол почнал да и се заканува дека ќе ја убие и барал да замине од дома и да го остави нивното седумесечно бебе.

Жената пријавила и дека нејзиниот сопруг секој ден бил пијан и во повеќе наврати на сличен начин ја малтретирал психички и физички. На 3 декември лани, според пријавата, тој под дејство на алкохол го извадил службениот пиштол и испукал неколку куршуми во дневната соба.

По наредба на Основното јавно обвинителство Кочани на М.К. му е одземен пиштолот. Во расчистување на случајот е вклучен и Одделот за внатрешна контрола, криминалистички истраги и професионални стандарди.


Заев: Не паѓа само дожд во Македонија, паѓа и Никола Груевски


Кочани, 7 октомври, 2017 - 21:56 (META) 

„Цел ден паѓа дожд, но запре за нашиот митинг. Но, не паѓа само дожд во Македонија, паѓа и Никола Груевски. Паѓа ВМРО-ДПМНЕ на ниво на цела Македонија, а со неа и Никола Груевски. Ќе падне и во Кочани на 15 октомври, заедно со неговиот Ратко“. Ова вечерва на митингот во Кочани го изјави лидерот на СДСМ, Зоран Заев.

Лидерот на СДСМ се осврна на испразнетиот буџет кој зад себе го оставила претходната влада, но и за ветените и исполнети ветувања на актуелната централна власт, како што е укинувањето на радиодифузната такса, на екстерното тестирање, поевтината струја и зголемувањето на минималната плата. Се осврна и на реформите во образованието, како и на новите можности за вработување младите преку проектот „Младинска гаранција“, кој треба да придонесе за задржување на младите во Македонија. Заев рече дека актуелниот градоначалник на Кочани, Ратко Димитровски, изјавил дека не сакал трет мандат, но бил принуден од партијата. Од тие причини, Заев ги повика граѓаните да му помогнат на градоначалникот да си замине и притоа додаде дека наслушнал оти и така ќе има полни раце работа со судството.

Тој во својот говор рече дека нивните анкети покажале дека Николчо Илиев е најпосакуван кандидат од сите кандидати за градоначалници во цела Македонија и дека тој и предложените советници од СДСМ ги знаат проблемите на општината.

Кандидатот за градоначалник на општина Кочани од редовите на СДСМ, Николчо Илиев, вети подобар живот со намалување на трошоците на граѓаните и на фирмите преку гасификација, повисоки плати, задржување на младите во Македонија, субвенции за земјоделците, инфраструктура во градот и во околните села, како и сообраќајни решенија за Кочани. Тој рече дека Општината ќе одвојува повеќе пари за спортот, поголема соработка со младите, отворање на градинки и грижа за пензионерите.

– Животот може да биде подобар. Доста со користољубие и со себељубие. Доста со нееднаквиот пристап. Доста со притисоци и со мобинг. Да ставиме крај на своеволното трошење пари собрани од сите нас. Да се ослободиме од партиските стеги – порача Илиев, додавајќи дека сега е вистинскиот момент за промени.


Скопјанец загинал во пожар, кочанец се удавил во канал за наводнување


Скопје, 8 септември, 2017 - 12:22 (META) 

Две жртви на несреќи регистрирала полицијата во изминатото деноноќие, од кои едната се случила во Скопје, а втората во Кочани.

Вчера, во 16.50 часот, во атарот на селото Грдовци, С.Ј.(42) од Кочани го пронашол својот татко  Д.Ј. (70) удавен во канал за наводнување. Смртта била констатирана од лекар од итна медицинска помош, а притоа не биле забележани видливи траги на насилство. Увид извршиле јавен обвинител и увидна екипа од Полициска станица Кочани,  по што по одобрение на обвинителот, телото на починатиот било предадено на семејството за погреб.

Денеска, околу 3 часот, во стан на булеварот Јане Сандански во Скопје, од засега непознати причини избувнал пожар. При интервенцијата на пожарникарите, во станот бил пронајден починат Н.Н. (23). Смртта била констатирана од лекар од итна медицинска помош, а по наредба на јавен обвинител, телото на починатиот било предадено на обдукција.