Стево Пендаровски е консензуалниот кандидат на СДСМ и коалицијата за шеф на државата


Скопје, 1 март, 2019 - 23:36 (META) 

Стево Пендаровски е консензуалниот кандидат за шеф на државата зад кој застанаа СДСМ и коалиција, владината коалиција и неколку други партии. На двочасовната средба, премиерот и лидер на СДСМ, Зоран Заев, заедно со другите партиски лидери, рече дека сите застануваат зад Пендаровски.

– За прв пат во македонската историја различните застануваат зад еден кандидат. Застануваме сите зад Стево Пендаровски, натпартиски, европски, граѓански – пријател и претседател на сите и за сите граѓани на Република Северна Македонија. Изразувам голема благодарност за големината на другите наши кандидати фаворити. Радмила Шекеринска, Оливер Спасовски, Никола Димитров и другите кандидати. Големи луѓе, локомотиви на Владата кои одлучија да одработат во Владата, за реформите, за граѓаните. Одлучија да дадат предност на над партискиот кандидат Стево Пендаровски, претседател којшто ќе биде претседател на сите граѓани подеднакво во нашата земја Република Северна Македонија – рече Заев по средбата со коалицијата.

Пендаровски стана кандидат по консултациите на Заев со претседателот на ДУИ, Али Ахмети, и со другите партиски лидери,.

Одлуката за неговата кандидатура ќе стане конечна в недела кога СДСМ ќе ја верификува на партискиот конгрес.

Пендаровски беше кандидат за претседател пред пет години кога изгуби од актуелниот шеф на државата Ѓорге Иванов.

Професорката Гордана Силјановска – Давкова е кандидатот на ВМРО-ДПМНЕ.

На Пендаровски и на Силјановска – Давкова во трката ќе се обидат да им  се придружат поранешниот директор на државниот архив Филип Петровски и поранешниот амбасадор Блерим Река поддржан и од Алијансата за Албанците и Беса.


Прегрупирања или само дефокусирања на македонската политичка сцена?


Скопје, 28 февруари, 2019 - 15:00 (META) 

Таман кога македонската јавност се олабави и мислеше дека коалицијата помеѓу владејачките Социјалдемократски сојуз на Зоран Заев и Демократската унија на Албанците на Али Ахмети е гранитно цврста – таа се разниша. Двете партии, двете жртви на насилствата во македонскиот парламент кога беа повредени премиерот Зоран Заев, пратеници и новинари ја растурија љубовта – или барем така изгледаше – ни помалку ни повеќе, токму кога требаше да му биде одземен имунитетот на поранешниот претседател на Парламентот Трајко Вељаноски.

Со остри зборови, Социјалдемократите ја обвинија партијата на Ахмети од која е актуелниот спикер Талат Џафери и чиј избор беше повод за насилствата, дека шурува со партијата на бегалецот и политичкиот азилант Никола Груевски (ВМРО-ДПМНЕ) само за да го заштити Вељаноски од притвор/затвор. СДСМ, во ескалацијата на препукувањето, дури потсети дека теоретски влада е можна е без Ахмети.

Ова не е баш јасно за обичниот човек во Македонија, кој уште живо се сеќава дека „падна крв“ Џафери да биде избран, а сега токму тој прави се човекот (Вељаноски) кој е осомничен дека бил еден од организаторите на тој крвав инцидент, да остане на слобода!

Но, ништо не е така едноставно и повторно се покажува дека во политиката ништо не е онака како што изгледа на прв поглед.

Се ближат претседателски избори кои, повторно наликуваат на македонска салата, но со силен албански зачин: Социјалдемократите тешко можат да изберат претседател ако тој не биде поддржан од Ахмети и неговата партија, на која пак како дамоклов меч и висат неколку обвиненија за местење изборни резултати и корупција кога беше во коалиција со партијата на Груевски.

Да, Ахмети сега со намигнувањето кон ВМРО-ДПМНЕ, како да бара да биде поштеден од истрагите и обвинувањата на Специјалното јавно обвинителство кои ги гони криминалите кои произлегуваат од серијата прислушувани разговори и со тоа ја условува поддршката на секој чекор на Зоран Заев.

Нивната заедничка средба пред некој ден не донесе ништо посебно ново, освен дека се договориле дека ќе имаат т.н. консензуален кандидат за претседател, кој треба да се објави на 5 март.


Заев и Ахмети договориле заеднички претседателски кандидат


Скопје, 28 февруари, 2019 - 10:32 (META) 

Претседателот на ДУИ Али Ахмети и лидерот на СДСМ Зоран Заев се договориле за заеднички претседателски кандидат на вчерашните разговори.

Веста ја објави лидерот на ДУИ, на неговиот Фејсбук профил.

Ахмети се надева дека концептот ќе наиде на поддршка од мнозинството на граѓаните. Инаку, одговарајќи на новинарско прашање, Ахмети нагласи дека кандидатот ќе се знае до крајот на седмицава.


СДСМ и Коалицијата постигнаа согласност за заеднички кандидат за претседател


Скопје, 18 февруари, 2019 - 9:45 (META) 

Постигната е начелна согласност на лидерско ниво, партиите од Коалицијата предводена од СДСМ да застанат зад заеднички кандидат за претседател на државата, како и заеднички да настапат на престојните претседателски избори, уште во првиот круг, информираа од партијата.

„Договорено е да продолжат пошироки консултации во рамки на самите партии, кои се дел од коалицијата, за избор на најсоодветен заеднички кандидат за претседател на државата, во интерес на граѓаните. Претседателот на СДСМ, Зоран Заев, во име на Коалицијата, ќе ги продолжи консултациите со партиите од албанскиот блок во владината коалиција, како и со други парламентарни и вонпарламентарни партии, од власта и опозицијата, околу можностите да се дојде до заеднички кандидат за претседател на државата, кандидат за кој што ќе застанат граѓаните“, се вели во соопштението.


Заев ги финишира разговорите со Демократската партија на Турците


Скопје, 28 март, 2018 - 15:26 (META) 

За проширувањето на владината коалиција, премиерот Зоран Заев рече дека ги допрецизира договорите со Демократската партија на Турците и се надева дека до идниот вторник, тој процес ќе биде завршен.

На новинарско прашање врзано за овој процес, тој исто така одговори дека пратеникот од Турската демократска партија веќе учествува во поддршката на законските решенија и процедурите во Парламентот.

– Прво треба да ја заокружиме оваа соработка, а после ќе разговараме и со другите партии. Пред сè размислувам за Беса и тоа двете групи. Се надевам дека имаат нешто кое ќе ги спои како една група, а потоа ќе разговараме и со другите опозициони партии и пратеници – рече Заев.

На новинарско прашање за ставот на ДУИ во однос на проширување на коалицијата, Заев рече дека ставот на владејачката коалиција е да ги остави отворени вратите.

– Уште кога го објавивме договорот за коалиција, рековме дека остануваме со отворени врати. И од тој аспект, оставена е можноста на премиерот секогаш да разговара со политичари, пратеници, партии кои се подготвени да ја поддржат програмата на владата, посебно позициите во поглед на актуелните прашања во Македонија. Зборувам за прашањето за проблемот со името, реформите, и за концептот “едно општество за сите“ – додаде Заев.

Тој објасни дека има пратеници и политички партии кои се во опозиција, а не се согласуваат со најголемата опозициска партија.

– Тие негуваат концепт или филозофија кој е близок на владејачкото мнозинство. Тоа го препознавме и од тука се иницијативите и причините да разговараме со сите. Штом ќе ја поминам оваа фаза, од Ахмети и другите коалициони партнери ќе барам согасност за евентуално зголемување на коалицијата и бројот на парламентарното мнозинство – дополни Заев.


Граѓаните на Германија ќе добијат законско право на брз интернет


Берлин, 1 март, 2018 - 9:53 (META) 

Граѓаните на Германија ќе добијат законско право на брз интернет, според коалицискиот договор на конзервативците на Ангела Меркел и Социјалдемократската партија на Германија (СПД), вели Хелге Браун, кој е именуван за шеф на кабинетот на германската канцеларка.

Во интервју за весникот „Билд“, Браун објаснува дека новата голема владина коалиција ќе создаде правна рамка со која граѓаните ќе добијат право на брз интернет.

– Брзиот интернет е важен колку и снабдувањето со гас, вода и струја, па затоа тоа прашање е меѓу врвните приоритет на канцеларката – вели тој.

Според именуваниот шеф на кабинет на Меркел, федералната влада и индустријата ќе издвојат најмалку 100 милијарди евра за до 2025 година сите  региони во Германија да имаат брз интернет.

Германија е на 28. место на списокот на 32 земји по пристапот до брз интернет, подготвен од Организацијата за економска соработка и развој (ОЕЦД).

Браун вели и дека се планира забрзување на процесот на разгледување на барањата за азил, а депортирањето во иднина да се врши побргу.

Сепак, дали сето тоа ќе се случи ќе се знаев в недела, кога околу 464.000 членови на СПД ќе гласаат за „големата коалиција“.


Средба на коалициските партнери од „За подобра Македонија“


Скопје, 4 февруари, 2018 - 21:09 (META) 

Претседателот на ВМРО-ДПМНЕ, Христијан Мицкоски денеска се сретна со коалициските партнери од „За подобра Македонија“.

На средбата, како што информираат од ВМРО-ДПМНЕ, се разговарало за актуелната политичка состојба, „случаите на политичките притисоци и реваншизам, како и размена на мислења околу актуелните теми врзани со предизвиците на надворешната политика, спорот за името и евроатланските интеграции.“

На состанокот било заклучено дека државата се движи во погрешен правец и кон континуирано економско и политичко слабеење.

„Евидентни се политичките притисоци кои ги прави актуелната власт, пресметката и реваншизмот кој се спроведува врз политичките неистомисленици“, се вели во соопштението на ВМРО-ДПМНЕ.

На средбата било посочено дека „владата треба да се откаже од намерата да донесе неуставен и неприменлив Закон за јазици.“

„Воедно тоа е и закон кој ги става и припадниците на другите заедници во подредена состојба, менувајќи го карактерот на државата. Во однос на спорот за името, суштествено важно е владата која ги води разговорите, да ги запази државните и националните интереси и да води грижа за заштита на македонскиот идентитет кој треба да остане непроменет“, се додава во соопштението.


Шулц ги убеди Социјалдемократите да останат во владата на Меркел


Бон, 21 јануари, 2018 - 17:05 (META) 

Со тесно мнозинство Социјалдемократите денеска изгласаа партијата да влезе во коалиција со ЦДУ на Ангела Меркел. Лидерот на Социјалдемократската партијата Мартин Шулц успеа да ги убеди своите сопартијци кои со тесно мнозинство изгласаа партијата да влезе во коалиција со ЦДУ на канцеларката Ангела Меркел.

Шулц ги убеди 600-те делегати на партиската конвенција во Бон дека за Германија и за Европа е најдобро да нема политичка криза.

Шулц, кој и беше директен опонент на Меркел на изборите во септември, рече дека многу е направено во коалициските преговори и останува уште да се прецизира мигрантската политика. Социјалдемократите бараат од десничарите на Меркел да се ограничи слободниот влез во земјата на членови на семејствата на мигрантите кои добиле азил.

Доколку Шулц не беше успешен во убедувањето на неопределените сопартијци, Германија за прв пат по Втората светска војна ќе се соочеше со формирање малцинска влада. Второто сценарио беше предвремени избори, за што Марттин Шулц рече дека Социјалдемократите се неподготвени, по катастрофалните резултати на последните избори.

Десничарите на Меркел и Социјалдемократите се во коалициска влада од 2013 година .


Меркел се надева дека ќе има нова влада до април


Берлин, 13 јануари, 2018 - 14:08 (META) 

Германската канцеларка Ангела Меркел изрази надеж дека новата влада ќе биде формирана до Велигден, јави ДПА.

Во својот изборен округ во Тринвилерсхаген, во североисточната провинција Мекленбург-Западна Померанија, синоќа маратонските разговори меѓу нејзиниот блок ЦДУ/ЦСУ и социјалдемократите за тоа дали да влезат во официјални преговори за коалицирање, Меркел ги нарече „првиот чекор во еден долг процес”.


Нова рунда на преговори за формирање на владејачка коалиција во Германија


Берлин, 7 јануари, 2018 - 18:11 (META) 

Германската канцеларка Ангела Меркел, почна нова рунда на преговори за формирање на коалиција, за да се стави крај на политичката криза во таа држава, објавија светските медиуми.

Во преговорите учествуваат Христијанско-демократската унија, Христијанско-социјалната унија и Социјалдемократската партија на Германија.

„Мислам дека може да успееме. Имаме цел да работиме посветено и интензивно, имајќи предвид што граѓаните на Германија очекуваат од политичарите кои ги претставуваат. Во преговорите влегувам оптимистички, иако знам дека наредните денови не очекува многу работа, но решени сме да оствариме резултат“, изјави Меркел.

Во Германија, нова влада не е избрана повеќе од три месеци по одржувањето на изборите на 24 септември.